1. Wanem samting i mekim na yumi amamas?

YUMI amamas tru long lukim olsem planti manmeri moa i kam insait long lain bilong Jehova! Long 2017, yumi bin mekim winim 10 milion Baibel stadi. Dispela i kamapim klia olsem ol wokman bilong God i larim lait bilong ol i stap ples klia! Tingim planti milion manmeri husat i gat gutpela bel em yumi welkamim ol long Memorial. Ol i kisim save long pasin laikim bilong God long rot bilong pe bilong baim bek man.—1 Jon 4:9.

2, 3. (a) Wanem samting i no inap pasim yumi long stap olsem ‘lait namel long ol manmeri long dispela graun’? (b) Tok bilong Jisas long Matyu 5:14-16 i kirapim yumi long stori long wanem ol samting?

² Long olgeta hap bilong graun, lain bilong Jehova i mekim kain kain tokples. Maski i olsem, dispela i no pasim yumi long bung wantaim na litimapim nem bilong Jehova, em Papa bilong yumi. (Rev. 7:9) Maski yumi mekim wanem wanem tokples, o yumi stap long wanem hap, yumi inap stap olsem ‘lait namel long ol manmeri long dispela graun’.—Fili. 2:15.

³ Taim yumi stap wanbel wantaim, wok strong long was i stap, na yumi lukim planti manmeri moa i kam insait long lain bilong  God, dispela i givim glori long Jehova na kirapim planti man long kisim tok i tru. Long dispela stadi, yumi bai stori long olsem wanem ol dispela samting i givim glori long God.—Ritim Matyu 5:14-16.

4, 5. (a) Olsem wanem yumi inap larim lait bilong yumi i stap ples klia taim yumi autim tok? (b) Wanem samting inap kamap taim yumi mekim gutpela pasin long ol manmeri? (Lukim piksa long kirap bilong stadi.)

⁴ Long Wastaua bilong Jun 1, 1925, i gat dispela atikol, “Light in the Darkness.” Em i tok: “I no gat wanpela man inap stap gut long Bikpela long dispela taim bilong las de . . . sapos em i no mekim ol samting bilong larim lait bilong em i stap ples klia.” Atikol i tok moa: “Man i mas mekim olsem long rot bilong autim gutnius long ol manmeri bilong graun, na em yet i mas bihainim ol stretpela lo bilong God.” Tru tumas, wanpela rot bilong yumi long larim lait bilong yumi i stap ples klia, em long autim gutnius na kamapim ol disaipel. (Mat. 28:19, 20) Na tu, yumi inap givim glori long Jehova taim yumi bihainim ol gutpela pasin Kristen. Ol manmeri yumi autim tok long ol, na ol man i wokabaut i go i kam, ol i save skelim ol pasin bilong yumi. Taim yumi smail na tok gude long ol, ol bai kliagut long yumi husat na God yumi lotuim.

⁵ Jisas i tokim ol disaipel olsem: “Taim yupela i go insait long haus, givim gude long lain i stap long haus.” (Mat. 10:12) Long ol hap em Jisas na ol aposel i save autim tok long en, ol manmeri i save invaitim ol man i kam long haus bilong ol maski ol i no save long ol. Long nau, ol manmeri long planti hap bilong graun i no gat dispela pasin. Maski i olsem, taim yumi bihainim gutpela pasin na tokim ol long risen na yumi kam lukim ol, dispela inap mekim na ol i no belhat o tingting planti. Pasin bilong smail em gutpela rot bilong kirapim tok. Ol bratasista i yusim troli bilong tilim ol litresa long pablik ples i save mekim olsem. Taim yu insait long dispela rot bilong autim tok, yu bai luksave olsem ol manmeri i amamas long putim gut yau taim yu smail na gritim ol. Dispela inap kirapim ol long kisim ol pablikesen bilong yumi. Gutpela pasin bilong yu inap opim rot long yu inap toktok wantaim ol manmeri.

6. Olsem wanem tupela marit i painim rot bilong autim tok?

⁶ Tupela lapun marit long Inglan i gat hevi long helt bilong tupela, olsem na ol i no save lusim bikpela haptaim long autim tok long ol haus. Ol i larim lait bilong ol i stap ples klia taim ol i putim sampela pablikesen bilong Baibel long tebol ausait long haus bilong ol. Ol i mekim olsem bambai ol papamama i kam kisim ol pikinini long skul i stap klostu long haus bilong ol, ol inap kisim ol pablikesen. Planti papamama i laikim ol dispela pablikesen, olsem na ol i kisim kopi bilong buk Questions Young People Ask —Answers That Work, Volium 1 na 2, na ol buklet. Wanpela painia sista long kongrigesen bilong ol i joinim tupela. Gutpela pasin pren bilong dispela sista na gutpela wok bilong tupela lapun marit i kirapim wanpela papa long stadi long Baibel.

7. Olsem wanem yu inap helpim ol lain i kam sindaun long hap bilong yu?

⁷ Long ol yia i go pinis, planti moa refiuji i go sindaun long ol arapela kantri. Olsem wanem yu inap helpim ol kain lain olsem long kisim save long Jehova na ol samting em i tingting pinis long kamapim? Pastaim, yu ken lainim pasin bilong gritim man long tokples bilong ol lain husat i kam sindaun long hap yu stap long en. Yu inap kisim helpim long JW Language aplikesen, em wanpela gutpela tul. Na tu, yu ken lainim sampela hap tok yu inap mekim bilong kirapim laik bilong ol long putim yau. Yu ken stiaim ol i go long jw.org na soim ol long ol vidio na pablikesen i stap long tokples bilong ol.—Lo 10:19.

8, 9. (a) Miting namel long wik i save helpim yumi long mekim wanem? (b) Olsem wanem papamama inap helpim ol pikinini long bekim tok long ol miting?

 ⁸ Long rot bilong Miting Bilong Kristen Laip na Wok Autim Tok, Jehova i skulim yumi long olsem wanem yumi inap mekim gut wok autim tok. Dispela miting i helpim yumi long mekim gut ol gobek na ol Baibel stadi.

⁹ Planti nupela husat i kam long miting, ol i save lukim ol pikinini bilong yumi i insait long bekim tok. Ol papamama, helpim ol pikinini bilong yupela long bekim tok long toktok bilong ol yet na bai lait bilong ol i stap ples klia. Sotpela tok ol pikinini i pilim tru long bel na bekim, dispela inap kirapim ol nupela man long luksave long tok i tru.—1 Kor. 14:25.

10. Olsem wanem famili lotu i save strongim pasin wanbel?

¹⁰ Narapela rot bilong larim lait bilong yu i stap ples klia em long strongim pasin wanbel insait long famili na long kongrigesen. Ol papamama inap mekim olsem long rot bilong mekim Famili Lotu long olgeta taim. Planti famili i save makim wanpela taim long olgeta mun long watsim JW Brodkas. Bihain long famili i watsim program, ol i ken lusim sampela haptaim long stori long olsem wanem ol i ken bihainim ol tok bilong program. Long taim bilong famili lotu, papamama i mas tingim olsem skultok ol i givim long liklik pikinini i no wankain long skultok ol i givim long tineja. Olsem na papamama i ken skelim gut pasin ol i bihainim long skulim ol pikinini bambai olgeta insait long famili i ken kisim helpim.—Sng. 148:12, 13.

11-13. Olsem wanem yumi olgeta i ken strongim pasin wanbel long kongrigesen na helpim ol narapela long larim lait bilong ol i stap ples klia?

¹¹ Olsem wanem ol yangpela inap strongim pasin wanbel insait long kongrigesen na kirapim ol narapela long larim lait bilong ol i stap ples klia? Sapos yu wanpela yangpela Kristen, yu ken putim mak long toktok wantaim ol bratasista i gat bikpela krismas. Ating yu ken askim ol long stori long ol ekspiriens bilong ol taim ol i bin stap long fultaim sevis. Dispela bai strongim bilip bilong yu, na kirapim yupela olgeta long wok strong moa long larim lait bilong tok i tru i stap ples klia. Yumi olgeta i ken putim mak long welkamim olgeta lain i kam long Haus Kingdom. Taim yu mekim olsem, yu bai strongim pasin wanbel na kirapim ol nupela long larim lait bilong ol i stap ples klia. Ating yu ken smail na  gritim ol nupela i kam long miting, o helpim ol long painim ples sindaun. Na tu, yu ken helpim ol long save long ol bratasista na bai ol i pilim olsem yumi tingim ol.

¹² Sapos yu gat wok long lukautim bung bilong autim tok, yu inap mekim ol samting bilong helpim ol lapun bratasista long insait long dispela wok. Ating yu inap makim teritori i stret long ol i ken autim tok. Yu ken makim wanpela yangpela long wok wantaim lapun brata o sista bambai yangpela i ken helpim em. Na tu, soim olsem yu tingim ol bratasista em ol i sik o sindaun bilong ol i pasim ol long lusim bikpela haptaim long autim tok. Taim yu skelim gut ol samting na tingim ol yangpela na ol lapun, ol lain i gat ekspiriens na ol nupela, dispela inap helpim ol long givim bel tru long autim gutnius.—Wkp. 19:32.

¹³ Man bilong raitim song i tok: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas, na ol i ken i stap belgut.” (Ritim Song 133:1, 2.) Lain Israel i stap wanbel na ol i helpim narapela narapela long lotu long Jehova. Pasin wanbel i olsem gutpela oil i mekim man i amamas na kisim nupela strong. Olsem wanem? Yu laik stap olsem gutpela eksampel na strongim pasin wanbel namel long ol bratasista? Sapos yu wok long mekim olsem, mipela i laik tok amamas long yu. Olsem wanem? Yu inap strongim pasin wanbel long olgeta taim na mekim “i go bikpela moa”?—2 Kor. 6:11-13.

14. Yu inap mekim wanem bilong larim lait bilong yu i stap ples klia long hap yu stap long en?

¹⁴ Yu ting yu inap wok strong moa long larim lait bilong tok i tru i stap ples klia long hap yu stap long en? Gutpela tok na pasin bilong yu inap kirapim neiba bilong yu long kisim tok i tru. Askim yu yet: ‘Ol neiba bilong mi i gat wanem tingting long mi? Haus na banis bilong mi i stap klin long ai bilong ol neiba? Mi save go pas long helpim ol narapela?’ Taim yu toktok wantaim wanpela wanbilip, askim em long olsem wanem gutpela pasin bilong em i bin helpim ol wanblut, ol neiba, ol wanwok, na ol wanskul bilong em. Ating yu bai harim em i stori long ol gutpela ekspiriens bilong em.—Efe. 5:9.

15. Bilong wanem em i bikpela samting long yumi mas was i stap?

¹⁵ Taim yumi was i stap, dispela inap helpim yumi long wok yet long larim lait bilong yumi i stap ples klia. Planti taim Jisas i tokim ol disaipel: “Yupela i mas was i stap.” (Mat. 24:42; 25:13; 26:41) Sapos yumi holim kain tingting olsem “traipela hevi tru” i no inap kam kwiktaim, dispela inap mekim na yumi no tingim wok autim tok olsem bikpela samting. (Mat. 24:21) Lait bilong yumi i no inap stap ples klia, isi isi dispela lait bai i pinis olgeta.

16, 17. Yu inap mekim wanem bilong kisim pasin bilong was i stap?

¹⁶ Haptaim yumi stap long en i go nogut moa, olsem na yumi olgeta i mas was i stap. Yumi ken bilip tru olsem de bilong Jehova long kotim ol man bai kam long taim stret. (Mat. 24:42-44) Olsem na yumi mas kisim pasin bilong i no les kwik na was i stap long olgeta taim. Na tu, yumi mas ritim Baibel na beten long olgeta de. (1 Pita 4:7) Yumi ken ritim eksampel bilong ol bratasista em ol i amamas long was i stap na larim lait bilong ol i stap ples klia. Wanpela gutpela eksampel em ekspiriens i stap long atikol “Inap 70 Yia Mi Holim Wanpela Juda,” long Wastaua bilong Epril 15, 2012, pes 18-21.

¹⁷ Yu mas bisi long mekim ol wok lotu na bung wantaim ol wanbilip. Dispela bai mekim yu stap amamas na i olsem taim i wok long ron hariap. (Efe. 5:16) Inap 1 handret yia i go pinis, ol bratasista bilong yumi i bisi tru na ol i mekim planti gutpela wok. Tasol  long nau, Jehova i stiaim yumi long mekim planti wok moa winim long bipo. Yumi larim lait bilong yumi i stap ples klia na planti manmeri moa long olgeta hap inap lukim, em samting yumi no bin ting bai kamap.

18, 19. Olsem wanem ol elda inap helpim yumi long was i stap na mekim wok? Stori long dispela.

¹⁸ Bilip bilong yumi i kamap strong taim yumi kisim save olsem, yumi inap lotuim Jehova long pasin em i orait long en maski yumi gat sin. Yumi tenkyu long Jehova i givim “ol man olsem ol presen,” em ol elda. (Ritim Efesus 4:8, 11, 12.) Taim ol elda i visitim yu, dispela em i gutpela rot long yu inap kisim skul long savetingting bilong ol na edvais ol i givim.

¹⁹ Tupela elda long Inglan i go visitim tupela marit em ol i gat hevi. Meri i pilim olsem tupela i no mekim wok lotu wantaim. Man i tok em i no gat pasin bilong mekim gut wok tisa, olsem na em i no stretim rot long mekim famili lotu long olgeta taim. Ol elda i stiaim tupela long tingim eksampel bilong Jisas. Em i lukautim ol disaipel na tingim ol long ol samting ol i nidim. Tupela elda i kirapim man marit long bihainim pasin bilong Jisas, na tu, ol i kirapim meri long no ken les kwik. Na tu, ol elda i stori long olsem wanem tupela inap mekim famili lotu wantaim 2-pela pikinini bilong ol. (Efe. 5:21-29) Bihain ol elda i tok amamas long man marit long pasin bilong em long wok strong. Ol i kirapim em long wok strong na larim holi spirit i helpim em long mekim gut wok bilong em olsem het bilong famili long ol wok lotu. Ol elda i tingim na helpim dispela famili, olsem na famili olgeta i larim lait bilong ol i stap ples klia.

20. Wanem gutpela samting inap kamap taim yumi larim lait bilong yumi i stap ples klia?

²⁰ Man bilong raitim song i tok: “Yu wanem man o meri i save pret long Bikpela na i save bihainim tok bilong en, yu ken amamas.” (Sng. 128:1) Yumi larim lait bilong yumi i stap ples klia taim yumi singautim ol narapela long mekim wok bilong God, strongim pasin wanbel, na kisim pasin bilong was i stap. Taim yumi mekim ol dispela samting, amamas bilong yumi bai go bikpela. Ol narapela bai lukim ol gutpela wok yumi mekim, na ol bai givim glori long Papa bilong yumi.—Mat. 5:16.