1. Wanem samting i mekim na ol man i narapela kain long ol animal?

WANPELA samting i mekim na yumi ol man i narapela kain long ol animal em olsem, yumi gat maus bilong bel. Taim God i wokim Adam na Iv, em i wokim ol wantaim maus bilong bel. Bihain long tupela i brukim lo bilong Jehova, ol i go na hait. Dispela i soim olsem maus bilong bel i kotim ol.

2. Olsem wanem maus bilong bel i olsem kompas? (Lukim piksa long kirap bilong stadi.)

² Ol lain i no skulim gut maus bilong bel, ol i olsem wanpela sip i gat kompas i bagarap. Sapos sip i go long wanpela longwe hap na kompas i no wok gut, hevi inap kamap. Strongpela win na solwara inap stiaim sip i go long narapela hap. Gutpela kompas bai helpim kepten long stiaim sip i go long ples em i laik go long en. Maus bilong bel bilong yumi i olsem kompas. Em inap stiaim yumi long bihainim stretpela pasin o pasin i no stret. Sapos yumi laik bai maus bilong bel i wok gut, yumi mas skulim gut maus bilong bel na stretim stretim.

3. Wanem samting inap kamap sapos man i no skulim gut maus bilong bel?

³ Sapos man i no skulim gut maus bilong bel, orait maus bilong bel i no inap pasim em long mekim pasin nogut. (1 Tim. 4:1, 2)  Maus bilong bel inap kirapim yumi long ting olsem “pasin nogut em i gutpela.” (Ais. 5:20) Jisas i givim tok lukaut long ol disaipel olsem: “Bihain bai taim i kamap na ol man i kilim yupela i dai, ol bai ting ol i mekim wok bilong God.” (Jon 16:2) Long taim bilong ol aposel, sampela man i kilim i dai Stiven, em wanpela disaipel, na ol i ting olsem God i orait long pasin ol i mekim. Long nau tu, sampela man i gat kain tingting olsem. (Apo. 6:8, 12; 7:54-60) Ol man i strong tumas long lotu bilong ol i kilim nating ol man. Ol i tok ol i lotuim God, tasol ol i brukim ol lo em God yet i bin kamapim! (Kis. 20:13) Dispela i kamapim klia olsem maus bilong bel bilong ol i no wok gut!

4. Olsem wanem yumi inap skulim gut maus bilong bel?

⁴ Olsem wanem yumi inap skulim gut maus bilong bel? Ol lo na stiatok long Baibel i “gutpela long skulim man, stretim man, mekim ol samting i kamap stret, na skulim ol man long stretpela pasin.” (2 Tim. 3:16) Yumi mas stadi gut long Baibel, tingim tingim ol tok bilong en, na bihainim long laip bilong yumi. Taim yumi mekim olsem, yumi skulim gut maus bilong bel long bihainim tingting bilong God. Yumi ken skelim olsem wanem ol lo na stiatok bilong Jehova inap helpim yumi long skulim gut maus bilong bel.

5, 6. Olsem wanem pasin bilong bihainim ol lo bilong God i lukautim yumi?

⁵ Sapos yumi laik bai ol lo bilong God i stiaim yumi, yumi mas ritim ol dispela lo, kliagut long en, na laikim na rispektim ol dispela lo. Baibel i tok: “Lusim pasin nogut, na bihainim gutpela pasin tasol.” (Amo. 5:15) Olsem wanem yumi inap mekim olsem? Yumi mas holim wankain tingting olsem bilong Jehova long ol samting. Yumi ken tok piksa olsem: Yu hatwok long slip long nait. Dokta i tokim yu long eksasais, skelim kaikai yu kisim, na senisim pasin bilong yu long mekim ol samting. Taim yu bihainim tok bilong dokta, yu luksave olsem dispela i helpim yu! Ating yu amamas tru olsem dokta i helpim yu long mekim ol senis bambai helt bilong yu i kamap gutpela.

⁶ Olsem tasol, Krieta bilong yumi i givim yumi ol lo bilong lukautim yumi na bai yumi abrusim ol hevi, na laip bilong yumi bai kamap gutpela. Yumi stap gut taim yumi bihainim ol lo bilong Baibel na sakim pasin giaman, pasin pamuk, kros pait, wok bilong ol spirit nogut, na rausim tingting bilong mekim pasin nogut. (Ritim Sindaun 6:16-19; Rev. 21:8) Taim yumi luksave long ol blesing yumi kisim long pasin bilong bihainim ol lo bilong Jehova, pasin bilong yumi long laikim Jehova na ol lo bilong em bai kamap strong moa.

7. Taim yumi ritim na tingim tingim stori bilong ol man long Baibel, olsem wanem dispela inap helpim yumi?

⁷ I no olsem yumi mas brukim ol lo bilong God na karim hevi bambai yumi inap kisim skul long wanem ol pasin yumi mas bihainim. Taim yumi ritim Baibel, yumi inap kisim skul long popaia bilong ol man long bipo. Sindaun 1:5 i tok, ‘Man i gat save bai kisim save moa yet.’ Tru tumas, yumi kisim ol gutpela skultok i kam long God taim yumi ritim laip stori bilong ol man long Baibel na tingim tingim ol dispela stori. Olsem, tingim bel hevi King Devit i pilim taim em i brukim lo bilong Jehova na mekim pasin adaltri wantaim Batseba. (2 Sml. 12:7-14) Taim yumi ritim na tingim tingim dispela stori, yumi ken askim yumi yet: ‘Olsem wanem King Devit inap abrusim bel hevi em i pilim taim em i mekim pasin adaltri wantaim Batseba? Sapos kain traim i painim mi, mi inap sanap strong na sakim? Mi bai bihainim pasin bilong Josep na ranawe o bai mi bihainim pasin bilong Devit na mekim rong?’ (Stt. 39:11-15) Taim  yumi tingim hevi we inap kamap long pasin bilong mekim sin, yumi bai tingting strong long “lusim pasin nogut.”

8, 9. (a) Maus bilong bel i helpim yumi long mekim wanem? (b) Olsem wanem ol stiatok bilong Jehova i stiaim maus bilong bel bilong yumi?

⁸ Yumi mas stap longwe long ol pasin God i heitim. Tasol i gat sampela samting em Baibel i no tokaut stret long en em yumi mas stap longwe long en. Olsem wanem yumi inap save sapos God i orait long ol dispela samting? Long kain taim olsem, maus bilong bel em yumi skulim pinis long rot bilong ol tok bilong Baibel inap helpim yumi.

⁹ Jehova i laikim yumi na em i givim yumi ol stiatok bilong stiaim maus bilong bel bilong yumi em Baibel i skulim pinis. God i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.” (Ais. 48:17, 18) Taim yumi tingim tingim long bel ol stiatok bilong Baibel, i olsem yumi wok long stretim stretim na stiaim maus bilong bel bilong yumi. Long dispela rot, yumi inap mekim ol gutpela disisen.

10. (a) Stiatok i makim wanem samting? (b) Olsem wanem Jisas i mekim gutpela wok long ol stiatok?

¹⁰ Stiatok i makim wanpela bikpela tok i tru o wanpela bilip i stap olsem as bilong ol samting yumi mekim. Sapos yumi laik kliagut long wanpela stiatok, yumi mas kliagut long tingting bilong Man i givim lo, na ol risen na em i givim dispela lo. Taim Jisas i stap long graun na autim tok, em i skulim ol disaipel long ol bikpela tok i tru we inap helpim ol long luksave long samting inap kamap long pasin ol i bihainim. Kain olsem, pasin bilong belhat inap kirapim man long pait na kilim narapela, na pasin bilong aigris inap kirapim man long mekim pasin adaltri. (Mat. 5:21, 22, 27, 28) Sapos yumi laik skulim gut maus bilong bel, orait yumi mas larim ol stiatok bilong God i stiaim yumi na yumi inap givim glori long God.—1 Kor. 10:31.

11. Olsem wanem maus bilong bel bilong tupela Kristen i no wankain?

¹¹ Tupela Kristen husat i skulim pinis maus bilong bel long rot bilong Baibel, sampela taim ol bai gat narapela narapela tingting long wanpela samting. Tingim pasin bilong dring bia. Baibel i no tambuim pasin bilong dring bia long skel. Tasol Baibel i tok lukaut long pasin bilong dring planti na spak. (Snd. 20:1; 1 Tim. 3:8) Maski sapos Kristen i save long skel bilong em long dring bia, yu ting dispela i makim olsem i no gat wok long em i skelim ol narapela samting? Nogat tru. Maus bilong bel bilong dispela Kristen i no gat tok long dring liklik, tasol em i mas tingim maus bilong bel bilong ol narapela.

12. Olsem wanem tok bilong Rom 14:21 inap helpim yumi long tingim maus bilong bel bilong ol narapela?

¹² Pol i stori long pasin bilong tingim maus bilong bel bilong ol narapela, na em i tok: “I no gutpela long kaikai mit o dring wain o mekim wanpela samting i pundaunim brata bilong yu.” (Rom 14:21) Olsem wanem? Yu redi long lusim sampela samting em yu laik mekim sapos maus bilong bel bilong wanbilip i gat tok long dispela samting? Yumi olgeta i ken tingim maus bilong bel bilong ol narapela. Paslain long sampela bratasista i kisim save long tok i tru, ol i save dring spak, tasol nau ol i tingting strong long sakim dispela pasin. Yumi no laik mekim wanpela samting bilong pundaunim brata o sista bilong yumi na dispela inap bagarapim em long sait bilong bilip! (1 Kor. 6:9, 10) Olsem na yumi laik bihainim pasin laikim na yumi no fosim brata o sista long dring bia sapos em i tok nogat.

13. Olsem wanem Timoti i stap gutpela eksampel long tingim wok bilong Kingdom olsem bikpela samting?

 ¹³ Taim Timoti i tineja o taim em i gat 22 krismas samting, em i orait long katim skin bambai em i no ken pundaunim lain Juda, em ol lain em bai autim tok long ol. Em i gat wankain pasin olsem bilong aposel Pol. (Apo. 16:3; 1 Kor. 9:19-23) Olsem wanem? Yu laik bihainim pasin bilong Timoti na daunim sampela laik bilong yu yet bambai yu inap helpim ol narapela?

14, 15. (a) Yumi mas mekim wanem bambai yumi kamap strong long bilip? (b) Taim yumi soim pasin laikim, olsem wanem dispela i kamapim klia olsem yumi kamap strong long bilip?

¹⁴ Ol Kristen i “no ken kisim save tasol long ol as bilip bilong Krais, nogat. [Ol i] mas taitim bun na wok yet long kamap strong.” (Hib. 6:1) Dispela samting i no inap kamap nating. Sapos yumi laik kamap strong long bilip, yumi mas “taitim bun” na wok yet long kisim save long tok bilong Baibel na kliagut long ol tok yumi lainim. Olsem na oltaim yumi kisim tok bilong kirapim yumi long ritim Baibel long olgeta de. (Sng. 1:1-3) Olsem wanem? Yu putim mak long ritim Baibel long olgeta de? Sapos yu mekim olsem, yu bai save gut long ol lo na stiatok bilong Jehova, na save bilong yu long Tok Bilong God bai i go bikpela.

¹⁵ Nambawan lo ol Kristen i mas bihainim em long laikim narapela narapela. Jisas i tokim ol disaipel: “Sapos pasin laikim i stap namel long yupela, orait olgeta bai save olsem yupela i disaipel bilong mi.” (Jon 13:35) Jems em hap brata bilong Jisas, na em i kolim pasin laikim olsem “lo i gutpela tru.” (Jems 2:8) Pol i tok: “Pasin laikim em i inapim lo.” (Rom 13:10) I stret yumi kamapim pasin laikim bikos Baibel i tok: “God em i pasin laikim.” (1 Jon 4:8) God i kamapim klia pasin laikim bilong em long yumi. Jon i tok: “Pasin laikim bilong God i kamap ples klia long yumi olsem: God i salim Pikinini bilong en, em pikinini tru bilong en, i kam long dispela graun bai yumi inap kisim laip long rot bilong em.” (1 Jon 4:9) Tru tumas, pasin laikim i kirapim God long mekim samting bilong helpim ol man. Taim yumi mekim ol samting bilong soim olsem yumi laikim Jehova, Pikinini bilong em, ol wanbilip Kristen, na ol narapela, dispela i soim olsem yumi wok long kamap strong moa long bilip.—Mat. 22:37-39.

16. Taim yumi wok long kamap strong long bilip, bilong wanem yumi tingim ol stiatok olsem bikpela samting?

 ¹⁶ Taim yu mekim ol samting bilong kamap strong long bilip, yu bai luksave long olsem wanem ol stiatok i bikpela samting. Ol lo i stret long wanpela samting, tasol ol stiatok inap stiaim yumi long planti samting. Kain olsem, pikinini i no save olsem pasin bilong bung wantaim ol poroman nogut inap kamapim hevi, olsem na papamama i gat gutpela tingting bai putim ol lo em i mas bihainim bambai em i stap gut. (1 Kor. 15:33) Tasol taim pikinini i kamap bikpela, em inap long skelim gut ol samting na yusim ol stiatok bilong Baibel long wokim tingting. Long dispela rot, em inap long mekim gutpela disisen long makim ol poroman. (Ritim 1 Korin 13:11; 14:20.) Taim yumi yusim ol stiatok bilong Baibel long wokim tingting, yumi wok long skulim gut maus bilong bel bambai ol samting yumi mekim i stret wantaim tingting bilong God.

17. Bilong wanem yumi tok yumi gat olgeta samting yumi nidim bilong helpim yumi long mekim gutpela disisen?

¹⁷ Yu ting yumi gat olgeta samting yumi nidim bilong helpim yumi long mekim ol gutpela disisen em Jehova inap orait long en? Yes. Taim yumi larim ol lo na stiatok bilong Baibel i stiaim yumi, yumi bai “inap tru na redi long mekim olgeta kain gutpela wok.” (2 Tim. 3:16, 17) Olsem na painim ol stiatok bilong Baibel bambai yu inap “save gut long laik bilong Jehova.” (Efe. 5:17) Yusim gut ol tul yumi kisim long rot bilong kongrigesen. Kain olsem, Watch Tower Publications Index, Stadi Indeks Bilong Ol Witnes Bilong Jehova, Watchtower Library, Wastaua INTENET LAIBRERI, na JW Library. Ol i wokim ol dispela tul bilong helpim yumi long mekim pesenel stadi na famili lotu.

18. Yumi inap kisim wanem ol blesing taim yumi bihainim ol lo na stiatok bilong Jehova?

¹⁸ Taim yumi bihainim ol lo na stiatok bilong Jehova, yumi bai kisim planti blesing. Song 119:97-100 i tok: “Mi laikim tru lo bilong yu. Mi save tingting long en long san na long nait. Lo bilong yu i stap wantaim mi oltaim na i givim planti save long mi. Na dispela i mekim mi i saveman tru na mi winim save bilong ol birua bilong mi. Oltaim mi save tingting long tok tru bilong yu, olsem na mi kisim gutpela tingting tru, na mi winim ol tisa bilong mi. Na save bilong mi i winim save bilong ol lapun, long wanem, mi save bihainim stretpela lo bilong yu.” Taim yumi “tingting” long ol lo na stiatok bilong God, yumi bai kliagut long tok bilong Baibel na bihainim savetingting taim yumi mekim ol samting. Sapos yumi wok strong long larim ol lo na stiatok bilong God i skulim maus bilong bel bilong yumi, yumi bai inapim mak “wankain olsem mak Krais i bin winim, em dispela mak i inap olgeta.”—Efe. 4:13.