OL I kolim ol dispela buk ol renbo buk. Taim mi skelim ol piksa insait long ol dispela buk, dispela i kirapim tru tingting bilong mi. Olsem na taim mi liklik yet, mi kisim pasin bilong laikim ol tok bilong Baibel, kain olsem i stap long ol renbo buk.

Taim Wol Woa 2 i kamap long India, laip bilong mi i go nogut moa. Papamama i seperet na bihain ol i divos. Mi laikim tru papamama, na mi no klia wai na tupela i lusim narapela narapela. Mi bel hevi tru na mi pilim olsem ol i lusim tingting long mi. Mi wanpela pikinini tasol, na mi pilim olsem i no gat man bilong mekim isi bel bilong mi na sapotim mi long ol samting mi nidim.

Mi na Mama i stap long Karachi, em biktaun bilong provins. Fred Hardaker em wanpela dokta na Witnes Bilong Jehova. Wanpela taim em i kam long haus bilong mipela. Em i gat wankain bilip olsem dispela misineri husat i bin givim ol renbo buk long mipela. Em i askim Mama sapos em i laik stadi long Baibel. Mama i no laik, tasol em i tok ating mi bai amamas long stadi. Long wik bihain, mi kirap stadi wantaim Brata Hardaker.

 Sampela wik bihain, mi kirap long i go long ol miting Kristen i save kamap long klinik bilong Brata Hardaker. Inap olsem 12-pela Witnes em ol i gat bikpela krismas i save bung na mekim lotu long dispela hap. Ol i lukautim mi olsem pikinini bilong ol na mekim gut bel bilong mi. Mi tingim pasin bilong ol long sindaun wantaim mi na toktok gut wantaim mi olsem ol gutpela pren, em samting mi nidim stret long dispela taim.

Bihain Brata Hardaker i invaitim mi long i go autim tok wantaim em. Em i lainim mi long pilaim masin pikap bambai mipela i ken pilaim ol tok bilong Baibel. Sampela tok i sutim stret bel bilong ol man, olsem na sampela man i no amamas long harim ol tok mipela i pilaim. Tasol mi amamas tru long autim tok long ol narapela. Mi laikim ol tok i tru bilong Baibel, na mi laik serim wantaim ol narapela.

Taim ol soldia bilong Japan i kam klostu long India, ol bikman bilong Briten i putim hevi long ol Witnes Bilong Jehova. Long Julai 1943, ol i putim hevi long mi. Hetmasta bilong skul em wanpela pris pasto bilong lotu Angliken. Em i rausim mi long skul bikos “mi no stap gutpela eksampel long ol narapela.” Em i tokim Mama olsem mi save bung wantaim ol Witnes Bilong Jehova, olsem na mi no stap gutpela piksa. Mama i no amamas na em i stopim mi long bung wantaim ol Witnes. Bihain Mama i putim mi long sip na salim mi i go stap wantaim Papa long Peshawar, em wanpela taun i stap 1,370 kilomita long hap not. Mi no kisim kaikai long sait bilong bilip na bung wantaim ol bratasista, olsem na pasin pren bilong mi wantaim Jehova i no strong.

Long 1947, mi go bek long Karachi bilong painim wok mani. Taim mi stap long Karachi, mi go visitim Dokta Hardaker long klinik bilong em. Em i welkamim mi na mekim ol gutpela tok i strongim mi.

Em i ting mi kam bilong kisim helpim long sait bilong sik, olsem na em i askim mi, “Yu gat wanem sik?”

Mi tokim em: “Dokta mi no gat sik long bodi, tasol mi gat sik long sait bilong bilip. Mi laik stadi long Baibel.”

Em i askim mi: “Yu laik bai yumi stadi long wanem taim?”

Mi tok: “Nau yet sapos em i orait.”

Long dispela apinun, mitupela i stadi. Mi stap bel isi bikos nau mi kirap bung gen wantaim lain bilong Jehova. Mama i wok strong long stopim mi long no ken bung wantaim ol Witnes, tasol mi tingting strong long bihainim tok i tru em mi lainim. Long Ogas 31, 1947, mi kisim baptais bilong makim olsem mi dediketim laip bilong mi long Jehova. Taim mi gat 17 krismas, mi kirap mekim wok painia oltaim.

Mi kisim fes asainmen bilong mi long Quetta, em hap bilong ol ami bilong Briten. Long 1947, kantri India i bruk na i kamap 2-pela kantri, India na Pakistan. * Dispela senis i mekim na pasin bilong birua long ol lotu i go bikpela, na planti manmeri i go sindaun long ol narapela hap. Kain samting olsem i no bin kamap long bipo. Inap olsem 14 milion refiuji i no gat ples bilong i stap. Ol Muslim long India i go stap long Pakistan, na ol Hindu na ol Sik long Pakistan i go stap long India. Taim dispela samting i kamap, mi kalap long wanpela tren long Karachi we i pulap tru long ol manmeri. Mi holim strong ol hap ain bilong tren inap long tren i kamap long Quetta.

Long Quetta, mi bungim George Singh, em wanpela painia salim na em i gat 25 krismas samting. George i givim mi wanpela olpela baisikol we mi ken kikim (o pulim) taim mi raun long ol teritori i gat ol maunten. Planti taim mi wan i save autim tok. Insait long 6-pela mun mi gat 17 Baibel stadi, na sampela bilong ol i kam insait long tok i tru. Wanpela bilong ol em Sadiq Masih, em wanpela ofisa bilong ami na em i helpim mi na George long trensletim ol litresa bilong Baibel i go long tokples Urdu, em bikpela tokples bilong Pakistan. I no longtaim, Sadiq i kamap wanpela Witnes.

Bihain, mi go bek long Karachi na wok wantaim Henry Finch na Harry Forrest, em ol nupela misineri i kam long Skul Gileat. Ol i givim gutpela skul long mi! Wanpela taim mi go wantaim Brata Finch long autim tok long hap not bilong Pakistan. Taim mipela i autim tok long arere bilong ol maunten, mipela i bungim planti manmeri em ol i mekim tokples Urdu, na ol i laik tru long kisim save long tok i tru bilong Baibel. Tupela yia bihain, mi go long Skul Gileat; bihain mi kam  bek long Pakistan na sampela taim mi mekim wok wasman sekit. Mi stap long haus misineri long Lahore wantaim 3-pela brata i mekim wok misineri.

Long 1954, ol misineri long Lahore i no stap wanbel wantaim narapela narapela, na dispela i mekim na ol brata long brens ofis i mas senisim ol asainmen bilong ol. Mi no bihainim savetingting na mi bin insait long pasin bilong kros, olsem na ol i givim strongpela tok kaunsel long mi. Mi bel hevi stret, na mi pilim olsem mi no stap strong long bilip. Mi go bek long Karachi, na bihain mi go long London, Inglan, na mi tingting long kamap strong gen long bilip na mekim gut asainmen bilong mi.

Long London, planti pablisa long kongrigesen bilong mi em ol lain i wok long Betel. Pryce Hughes i wok long Betel na em i trenim mi. Wanpela taim, em i tokim mi olsem em i bin kisim strongpela tok kaunsel long Joseph F. Rutherford. Long dispela taim Brata Rutherford i save lukautim wok autim tok long olgeta hap bilong graun. Brata Hughes i laik mekim ol tok bilong helpim em yet, tasol Brata Rutherford i stretim tingting bilong em. Mi kirap nogut long lukim olsem Brata Hughes i smail taim em i stori long dispela samting. Em i tok pastaim em i bel hevi. Tasol bihain em i luksave olsem i stret long em i kisim tok kaunsel, na dispela i kamapim klia pasin laikim bilong Jehova. (Hib. 12:6) Mi pilim tru tok bilong em, na dispela i helpim mi long amamas gen long mekim wok lotu.

Long dispela taim, mama bilong mi i kam long London, na em i kirap stadi long Baibel wantaim John E. Barr. Bihain Brata Barr i kamap memba bilong Gavening Bodi. Mama i kamap strong long sait bilong bilip, na long 1957 em i kisim baptais. Bihain, mi harim olsem Papa i bin stadi wantaim ol Witnes Bilong Jehova paslain long em i dai.

Long 1958, mi maritim Lene, em wanpela sista bilong Denmak na em i kam stap long London. Wanpela yia bihain, mitupela i kisim wanpela blesing, mipela i gat wanpela pikinini meri, Jane. Em i fesbon bilong 5-pela pikinini bilong mipela. Na tu, mi amamas olsem ol i makim mi long kamap elda long kongrigesen long Fulham. Sampela yia bihain, helt bilong Lene i no gutpela, olsem na mipela i mas i go long ples we weda i hot liklik. Long 1967, mipela i go long Adelaide, Australia.

Long Adelaide, kongrigesen bilong mipela i gat 12-pela lapun bratasista em ol i bilong lain God i makim bilong kisim laip long heven. Ol i givim bel tru long go pas long wok autim tok. Wantu dispela i strongim mipela long kirap gen long mekim ol gutpela wok bilong Jehova.

Long 1979, mitupela Lene i amamas long lukim namba 5 pikinini bilong mipela i bon, em Daniel. Em  i gat sik Down’s syndrome, * na dokta i tok em i no inap stap laip longpela taim. I hatwok long stori long bel hevi bilong mipela. Mipela i mekim olgeta samting mipela inap mekim bilong lukautim em, na tu, mipela i tingim 4-pela narapela pikinini bilong mipela. I gat 2-pela hul long lewa bilong Daniel. Olsem na sampela taim i hatwok long em i pulim win na dispela i mekim na skin bilong em i save go blu. Olsem na kwiktaim mipela i mas kisim em i go long haus sik. Maski helt bilong em i no gutpela, em i wanpela kleva mangi na em i save laikim ol narapela. Na tu, em i laikim tru Jehova. Taim mipela i laik beten bilong kaikai, Daniel bai holim 2-pela han bilong em na meknaisim het na tok “Amen!” Bihain long dispela em i save kaikai.

Taim Daniel i gat 4-pela krismas, em i kisim sik lukimia. Mitupela Lene i bel hevi tru. Mi pilim olsem mi no gat strong long mekim wanpela samting. Wanpela taim, mipela i pilim olsem mipela i no gat strong olgeta, na wasman sekit em Neville Bromwich i kam long haus bilong mipela. Long dispela nait em i holimpas mitupela na krai. Mipela olgeta i krai. Pasin laikim na ol gutpela tok bilong em i mekim isi bel bilong mipela. Bihain long Brata Bromwich i lusim haus long 1 klok long moning, Daniel i dai. Dispela i givim bikpela bel hevi tru long mipela. Maski i olsem, mipela i sanap strong na karim hevi. Mipela i bilip olsem i no gat wanpela samting, na dai tu, inap tekewe Daniel long pasin laikim bilong Jehova. (Rom 8:38, 39) Mipela i laik tru long bungim Daniel taim em i kirap bek long nupela taim God i tok promis long kamapim!—Jon 5:28, 29.

Mi kisim bikpela sik strok inap 2-pela taim, tasol mi mekim yet wok elda long nau. Ol samting i kamap long laip bilong mi i kirapim mi long sori tru long ol narapela, na moa yet long ol lain i gat hevi. Mi save wok strong long no ken skelim pasin bilong ol. Mi askim mi yet olsem: ‘Ol samting i kamap long laip bilong ol i mekim wanem long pasin na tingting bilong ol? Olsem wanem mi inap soim olsem mi tingim ol? Olsem wanem mi inap strongim ol long mekim wok bilong Jehova?’ Mi laikim tru sepeding wok insait long kongrigesen! Tru tumas, taim mi strongim na mekim isi bel bilong ol narapela long sait bilong bilip, dispela i strongim mi yet na givim bel isi long mi.

Mi pilim wankain olsem man bilong raitim song, em i tok: “Taim mi bel hevi na mi gat planti tingting long ol samting, [Bikpela i] save mekim bel bilong mi i stap isi na [em] mekim mi i amamas.” (Sng. 94:19) Hevi i kamap long famili, Mama i birua long bilip bilong mi, mi bel hevi long mi yet, na mi bin tingting planti, tasol God i bin strongim mi. Tru tumas, Jehova i olsem Papa tru bilong mi!