Yu bin ritim gut ol nupela Wastaua? Yu ken traim bekim ol dispela askim:

Wanem 4-pela samting yumi ken mekim bambai yumi singsing gut?

Yumi ken sanap stret na holim singsing buk i go antap. Pulim win gut. Taim yumi opim maus na singsing, yumi bai singsing strong.—w17.11, p. 5.

Bilong wanem yumi amamas long save long ol hap em ol taun bilong hait i stap long en na ol rot i go long ol dispela taun?

I gat 6-pela taun bilong hait i stap long Israel, na ol rot i go long ol dispela taun i gutpela. Olsem na man inap ranawe kwik na i go hait long ol dispela taun.—w17.11, p. 14.

Bilong wanem pe bilong baim bek man em nambawan presen tru yumi kisim long God?

Dispela presen i inapim laik bilong yumi long i stap laip oltaim, na inapim samting yumi nidim, em long lusim kalabus bilong sin na dai. Taim yumi stap sinman yet, God i givim pe bilong baim bek man, na dispela i kamapim klia pasin laikim bilong God.—wp17.6, p. 6-7.

Olsem wanem Song 118:22 i stori long kirap bek bilong Jisas?

Ol manmeri i sakim Jisas olsem Mesaia na ol i kilim em i dai. Jisas i mas kirap bek bambai em i kamap “nambawan ston bilong strongim banis bilong haus.”—w17.12, p. 9-10.

Yu ting Mesaia i kamap long lain tumbuna bilong ol lain i gat rait olsem fesbon?

Sampela lain tumbuna bilong Mesaia em ol man husat i gat rait olsem fesbon, tasol sampela bilong ol nogat. Devit i no fesbon pikinini bilong Jesi, tasol Mesaia i kamap long lain tumbuna bilong Devit.—w17.12, p. 14-15.

Baibel i stori long wanem sampela stiatok long sait bilong helt?

Lo i tok ol man i gat ol kain sik olsem lepra i mas stap longwe long ol narapela. Ol man i mas waswas bihain long ol i holim bodi bilong daiman. Ol man i mas i go longwe na digim hul long graun na karamapim gut pekpek. Long namba 8 de bihain long mama i karim bebi boi, ol i mas katim skin long sem bilong bebi bikos bodi bilong em inap stopim blut long ron.—wp18.1, p. 7.

Bilong wanem i no gat rong long Kristen i laikim em yet?

Yumi mas laikim ol narapela olsem yumi laikim yumi yet. (Mak 12:31) Ol man marit i mas “laikim meri bilong ol olsem ol i laikim bodi bilong ol yet.” (Efe. 5:28) Tasol yumi mas was gut bambai yumi no kisim pasin bilong tingim yumi yet tumas.—w18.01, p. 23.

Yumi inap mekim wanem ol samting bilong kamap strong long bilip?

Yumi mas stadi long Tok Bilong God, tingim tingim ol tok yumi ritim, na bihainim ol tok yumi lainim. Na tu, yumi mas larim holi spirit i stiaim bel na tingting bilong yumi, na amamas long kisim helpim long ol narapela.—w18.02, p. 26.

Bilong wanem astroloji na glasman i no save long ol samting bai kamap bihain?

I gat planti risen, tasol nambawan risen em Baibel i tambuim dispela 2-pela bilip.—wp18.2, p. 4-5.

Olsem wanem yumi inap soim olsem yumi tingim ol lain i invaitim yumi?

Sapos yumi tok orait long go long wanpela bung, yumi mas truim tok promis bilong yumi. (Sng. 15:4) I no stret long senisim tingting na tok nogat sapos yumi no gat gutpela risen. Ating man i invaitim yumi i tromoi bikpela taim na strong long redim kaikai.—w18.03, p. 18.

Ol man God i makim inap kisim wanem skul long Timoti?

Timoti i tingim tru ol narapela na em i tingim wok autim tok olsem namba 1 samting. Em i wok strong long mekim ol wok holi na em i bihainim skul em i kisim. Em i wok yet long trenim em yet na larim holi spirit i stiaim em. Ol elda na ol narapela inap bihainim gutpela eksampel bilong em.—w18.04, p. 13-14.