1. Bilong wanem yumi mas bihainim tok lukaut bilong Jisas?

JISAS i tok profet long ol samting bai kamap long haptaim bilong las de, na em i tok: “Was gut long yupela yet, nogut . . . ol wari bilong laip i daunim yupela, na dispela de i kamap long yupela wantu tasol.” (Luk 21:34) Yumi mas bihainim dispela tok lukaut. Bilong wanem? Long nau, yumi tu bai karim wankain hevi olsem olgeta arapela manmeri.

2. Wanem ol hevi i putim presa long ol bratasista bilong yumi?

² Sampela taim yumi bungim planti hevi long wankain taim. Skelim ol dispela eksampel. John * em wanpela Witnes, na em i gat bikpela sik we i save pinisim strong bilong em. Em i bel hevi tru taim meri bilong em i lusim em—tupela i bin marit inap 19 yia. Bihain 2-pela pikinini meri bilong em i stop long mekim wok bilong Jehova. Bob na Linda em tupela marit, na ol tu i karim hevi. Bos i pinisim tupela wantaim long wok mani, olsem na ol i no gat mani bilong rentim ples slip. Na tu, Linda i kisim sik bilong lewa we inap kilim em, na long wankain taim narapela sik tu i bagarapim helt bilong em.

3. Olsem Filipai 4:6, 7 i kamapim, Jehova i redi long mekim wanem?

³ Yumi ken bilip tru olsem Jehova, em Krieta na Papa bilong yumi, em i pilim tru tingting bilong yumi taim hevi i daunim yumi. Em i laik helpim yumi long karim ol hevi i painim yumi. (Ritim Filipai 4:6, 7.) Baibel i stori long ol wokman bilong God husat i sanap strong na karim ol hevi i painim ol. Em i stori tu long hau Jehova i helpim ol long  karim ol dispela hevi. Yumi ken skelim sampela eksampel.

4. (a) Elaija i bungim wanem ol hevi? (b) Em i luksave long wanem samting?

⁴ Elaija i mekim wok bilong Jehova long taim bilong hevi, na planti hevi i bin painim em. King Ahap em wanpela king nogut bilong Israel, na em i bin maritim Jesebel, em meri i save lotuim god Bal. Tupela i strongim pasin bilong lotuim Bal na ol i kilim planti profet bilong Jehova. Tasol Elaija i ranawe na em i stap laip. Long taim bilong bikpela hangre, Elaija i abrusim bagarap bikos em i bilip long Jehova. (1 Kin. 17:2-4, 14-16) Na tu, Elaija i bilip long Jehova, olsem na em i salensim ol profet na ol manmeri i lotuim Bal. Em i kirapim lain Israel long lotuim Jehova. (1 Kin. 18:21-24, 36-38) Planti samting i kamap na Elaija i luksave olsem Jehova i sapotim em long ol dispela taim bilong hevi.

5-6. (a) Olsem 1 King 19:1-4 i kamapim, Elaija i pilim olsem wanem? (b) Jehova i mekim wanem ol samting bilong soim olsem em i laikim Elaija?

⁵ Ritim 1 King 19:1-4. Elaija i pret taim Kwin Jesebel i laik kilim em. Olsem na em i ranawe i go long Berseba. Em i bel hevi tru na em “i askim long em i laik i dai.” Bilong wanem em i pilim olsem? Elaija em sinman “wankain olsem yumi.” (Jems 5:17) Ating bel hevi i daunim em tru na em i pilim olsem em i no gat strong. Ating Elaija i ting olsem hatwok bilong em long strongim lotu i tru bai lus nating, na lain Israel i no senisim pasin bilong ol, na em  wanpela tasol i lotuim Jehova. (1 Kin. 18:3, 4, 13; 19:10, 14) Ating yumi kirap nogut long dispela profet i pilim olsem. Tasol Jehova i kliagut long filings bilong Elaija.

⁶ Jehova i no krosim Elaija taim Elaija i kamapim bel hevi bilong em. Em i strongim Elaija. (1 Kin. 19:5-7) Jehova i bihainim gutpela pasin na em i soim klia bikpela strong bilong Em, na long dispela rot em i stretim tingting bilong Elaija. Bihain Jehova i tokim em olsem i gat 7 tausen manmeri long Israel em ol i no lotuim Bal. (1 Kin. 19:11-18) Jehova i mekim ol dispela samting bilong soim olsem em i laikim Elaija.

7. Olsem wanem pasin Jehova i mekim long Elaija inap mekim gut bel bilong yumi?

⁷ Olsem wanem? Wanpela hevi i putim presa long yu? Yumi ken belgut bikos Jehova i bin kliagut long filings bilong Elaija! Dispela i strongim bilip bilong yumi olsem God i kliagut long bel hevi bilong yumi tu. Em i save long ol samting yumi no gat strong long mekim, na em i save tu long tingting na filings bilong yumi. (Sng. 103:14; 139:3, 4) Sapos yumi bihainim eksampel bilong Elaija na bilip long Jehova, em bai strongim yumi long karim ol hevi we i daunim yumi.—Sng. 55:22.

8. Olsem wanem Jehova bai helpim yu long daunim bel hevi?

⁸ Taim bel hevi i daunim yu, yu inap kisim tingting kranki na pilim olsem hevi bilong yu i no inap pinis. Sapos kain samting olsem i kamap, tingim olsem Jehova bai helpim yu long daunim bel hevi. Em bai helpim yu olsem wanem? Em i laik bai yu autim ol wari bilong yu long em. Em bai harim krai bilong yu. (Sng. 5:3; 1 Pita 5:7) Olsem na oltaim yu mas beten na kamapim hevi bilong yu long Jehova. Em i no inap toktok stret long yu olsem em i bin mekim long Elaija. Em bai toktok long yu long rot bilong Baibel na oganaisesen bilong em. Ol stori yu ritim long Baibel inap mekim gut bel bilong yu na givim yu hop. Ol bratasista tu inap strongim yu.—Rom 15:4; Hib. 10:24, 25.

9. Olsem wanem wanpela pren yumi trastim inap helpim yumi?

⁹ Jehova i tokim Elaija long givim sampela wok long Elisa. Long dispela rot, Jehova i givim gutpela pren bilong helpim Elaija long daunim bel hevi. Olsem tasol, taim yumi autim bel hevi bilong yumi long wanpela pren yumi trastim, em inap helpim yumi long daunim bel hevi. (2 Kin. 2:2; Prov. 17:17) Sapos yu pilim olsem yu no gat wanpela pren long autim bel hevi bilong yu, beten askim Jehova long helpim yu long painim wanpela strongpela Kristen husat inap strongim yu taim yu bel hevi.

10. (a) Olsem wanem ekspiriens bilong Elaija i strongim yumi? (b) Olsem wanem tok promis i stap long Aisaia 40:28, 29 i helpim yumi?

¹⁰ Jehova i strongim Elaija taim bel hevi i daunim Elaija, na em i mekim gut wok bilong God inap planti yia. Stori bilong Elaija i helpim yumi long save olsem yumi tu inap daunim bel hevi na stap gut yet long God. Ating sampela samting inap mekim yumi bel hevi tru na dispela inap pinisim strong bilong yumi. Maski i olsem, sapos yumi bilip long Jehova, em bai strongim yumi long mekim yet wok bilong em.—Ritim Aisaia 40:28, 29.

11-13. Bel hevi i mekim wanem long ol wokman na wokmeri bilong God?

¹¹ Baibel i stori tu long ol narapela em  bel hevi i bin daunim ol. Hana i no inap karim pikinini, olsem na narapela meri bilong man bilong em i save tok bilas na dispela i mekim Hana i bel hevi tru. (1 Sml. 1:2, 6) Hana i pilim nogut tru na em i save krai na em i no save kaikai.—1 Sml. 1:7, 10.

¹² Sampela taim bel hevi i daunim tru King Devit. Tingim ol hevi i painim em. Devit i bel hevi tru long planti rong em i mekim. (Sng. 40:12) Pikinini bilong em Apsalom i bikhet na birua long Devit na bihain Apsalom i dai. (2 Sml. 15:13, 14; 18:33) Na tu, wanpela gutpela pren bilong Devit i givim baksait long em. (2 Sml. 16:23–17:2; Sng. 55:12-14) Planti singsing Devit i raitim i stori long bel hevi bilong em na pasin bilong em long trastim tru Jehova.—Sng. 38:5-10; 94:17-19.

¹³ Bihain, wanpela man bilong raitim song i aigris long sindaun bilong ol manmeri husat i bihainim pasin nogut. Em i mekim wok “insait long haus holi bilong God.” Ating em i kamap long lain tumbuna pikinini bilong Asap, em wanpela Livai. Dispela man bilong raitim song i tingting planti, olsem na em i no amamas long ol samting em i gat pinis. Em i kisim ol blesing long God, tasol em i pilim olsem ol dispela blesing i no inap long em.—Sng. 73:2-5, 7, 12-14, 16, 17, 21.

14-15. Yumi kisim wanem skul long ol bilipman na bilipmeri em ol i askim Jehova long helpim ol?

¹⁴ Ol dispela wokman na wokmeri bilong God i bilip na askim Jehova long helpim ol. Ol i beten na autim bel hevi bilong ol. Ol i tokim God long olgeta samting i mekim ol i bel hevi tru. Na tu, ol i go oltaim long ples bilong lotuim Jehova.—1 Sml. 1:9, 10; Sng. 55:22; 73:17; 122:1.

 ¹⁵ Jehova i sori long ol na em i helpim olgeta wan wan bilong ol. Hana i kisim bel isi. (1 Sml. 1:18) Devit i tok: “Planti hevi i save painim stretpela man, tasol Jehova i save helpim em na ol dispela hevi i no save daunim em.” (Sng. 34:19) Man bilong raitim song i pilim olsem Jehova i “holim rait han” bilong em na givim gutpela edvais bilong stiaim em. Em i singsing olsem: “Mi bai go klostu long God, long wanem, dispela i gutpela long mi. Nambawan Bikpela Jehova, yu ples hait bilong mi.” (Sng. 73:23, 24, 28) Yumi kisim wanem skul long ol dispela stori? Sampela taim ol bikpela hevi bai kamap na putim presa long yumi. Tasol yumi inap sanap strong na karim hevi sapos yumi tingim tingim hau Jehova i bin helpim ol narapela, na yumi ken beten askim em long helpim yumi, na yumi mas mekim ol samting em i tokim yumi long mekim.—Sng. 143:1, 4-8.

16-17. (a) Bilong wanem yumi no ken stap yumi yet? (b) Olsem wanem yumi inap kisim nupela strong?

¹⁶ Stori bilong Hana, Devit, na man bilong raitim song i skulim yumi long narapela bikpela samting—yumi no ken lusim  Jehova na lain bilong em na stap yumi yet. (Prov. 18:1) Nancy i bel hevi tru taim man bilong em i lusim em. Em i tok: “Planti taim mi no laik lukim o toktok long wanpela man. Tasol taim mi stap mi yet, dispela i mekim mi bel hevi moa yet.” Nancy i daunim bel hevi taim em i painim rot long helpim ol narapela husat i gat hevi. Em i tok: “Mi putim yau taim ol narapela i stori long hevi bilong ol. Mi luksave olsem taim mi pilim hevi bilong ol, mi no tingting tumas long mi yet na hevi bilong mi.”

¹⁷ Yumi inap kisim nupela strong taim yumi go long ol miting bilong kongrigesen. Taim yumi go long ol miting, dispela i opim rot bilong Jehova long ‘helpim yumi na mekim isi bel bilong yumi.’ (Sng. 86:17) Em i strongim yumi long rot bilong holi spirit, tok bilong em long Baibel, na ol manmeri bilong em. Miting i opim rot long ol narapela inap ‘strongim yumi na yumi strongim ol.’ (Rom 1:11, 12) Sophia em wanpela sista, na em i tok: “Jehova na ol bratasista i helpim mi long sanap strong na karim hevi. Ol miting bilong kongrigesen i stap olsem bikpela samting long mi. Mi luksave olsem taim mi autim tok oltaim na bekim tok long miting, mi inap daunim bel hevi na wari.”

18. Taim yumi bel hevi, yumi mas tingim wanem tok promis bilong Jehova?

¹⁸ Taim yumi bel hevi, yumi mas tingim olsem Jehova i tok promis long pinisim tru olgeta hevi. Na tu, long nau em i redi long helpim yumi long sanap strong na karim hevi. Em i givim yumi “laik na strong” bilong daunim pasin bilong bel hevi.—Fili. 2:13.

19. Tok bilong Rom 8:37-39 i kamapim wanem tok promis?

¹⁹ Ritim Rom 8:37-39. Aposel Pol i tok i no gat wanpela samting inap tekewe yumi long pasin laikim bilong God. Olsem wanem yumi inap helpim ol bratasista husat i stap bel hevi? Neks atikol bai stori long hau yumi inap bihainim eksampel bilong Jehova na soim pasin sori na strongim ol bratasista husat i stap bel hevi.