1. Olsem wanem pasin bilong Jehova i olsem pasin bilong mama?

“OLSEM WANEM? Wanpela mama inap lusim tingting long bebi em i givim susu long em?” Jehova i kamapim dispela askim long taim bilong profet Aisaia. God i tokim ol manmeri bilong em olsem: “Maski sapos ol dispela meri i lusim tingting long pikinini bilong ol, mi no inap tru long lusim tingting long yu.” (Ais. 49:15) God i no save skelim em yet wantaim ol mama. Tasol long dispela taim, em i mekim olsem. Jehova i yusim pasin laikim namel long mama na pikinini long kamapim klia pasin laikim bilong em long ol wokman bilong em. Planti mama inap wanbel long tok bilong wanpela sista, nem bilong em Jasmin. Em i tok, “Taim yu susuim pikinini, wanpela kain pasin pren i kamap namel long yutupela, na yutupela bai pas gut wantaim inap long laip olgeta bilong yutupela.”

2. Jehova i save pilim olsem wanem taim wanpela pikinini bilong em i lusim em?

² Jehova i luksave taim wanpela pikinini bilong em i no bung moa wantaim kongrigesen na em i no insait moa long wok autim tok. Tingim bel hevi em i pilim taim em i lukim olsem long olgeta wan wan yia, planti tausen wokman bilong em i save kamap slek pablisa. *

3. Jehova i laik bai ol bratasista i kamap slek long bilip i mekim wanem?

³ Planti bilong ol dispela bratasista husat i kamap slek long bilip, ol i save kam bek long kongrigesen, na yumi save amamas tru taim ol i kam bek! Jehova i laik bai ol i kam bek, na  yumi tu i laik bai ol i kam bek. (1 Pita 2:25) Olsem wanem yumi inap helpim ol? Paslain long yumi bekim dispela askim, em bai gutpela long save long wai na sampela i stop long kam long ol miting na ol i lusim wok autim tok.

4. Wok mani i mekim wanem long sampela bratasista?

⁴ Sampela i putim wok mani i stap olsem bikpela samting long ol. Hung * em wanpela brata long Saut-is Esia na em i tok: “Mi save lusim bikpela haptaim na strong long wok mani bilong mi. Mi holim tingting kranki, na mi pilim olsem sapos mi gat planti mani, mi bai mekim gut wok bilong Jehova. Olsem na mi lusim planti aua long wok. Mi stat long lusim planti moa miting na bihain mi no bung moa wantaim kongrigesen. Ol wok bilong dispela graun i gat strong long pulim ol manmeri na isi isi ol inap lusim God.”

5. Ol hevi i mekim wanem long wanpela sista?

⁵ Sampela bratasista i karim ol hevi na dispela i daunim ol. Anne em wanpela mama long Briten, na em i gat 5-pela pikinini. Anne i tok: “Pikinini man bilong mi i paralais taim em i bon. Bihain pikinini meri i raus long kongrigesen na narapela pikinini man i kamap longlong. Mi bel hevi tru na mi no go moa long ol miting na autim tok. Bihain mi kamap slek long bilip.” Yumi sori tru long Anne na famili bilong em na ol narapela husat i karim kain hevi olsem!

6. Sapos man i no bihainim tok bilong Kolosi 3:13, hau bai dispela i mekim na isi isi em i lusim lain bilong Jehova?

⁶ Ritim Kolosi 3:13. Sampela wokman bilong Jehova i bel hevi long pasin bilong wanpela brata o sista long kongrigesen. Aposel Pol i luksave olsem sampela taim “i gat as na wanpela i gat tok long narapela” brata o sista. Ating sampela taim ol narapela i no mekim stretpela pasin long yumi. Sapos yumi no was gut, yumi inap belhat long ol. Isi isi belhat inap kirapim man long lusim lain bilong Jehova. Skelim ekspiriens bilong Pablo, em wanpela brata long Saut Amerika. Wanpela i sutim tok giaman long Pablo olsem em i mekim rong, olsem na em i lusim wok bilong em insait long kongrigesen. Em i mekim wanem? Pablo i tok: “Mi belhat, na isi isi mi lusim kongrigesen.”

7. Wanem samting inap kamap long man sapos bel i kotim em?

⁷ Sapos wanpela i mekim bikpela sin long bipo, bel bilong em inap kotim em na em inap pilim olsem em i no fit moa long God inap laikim em. Maski em i tanim bel na kongrigesen i soim pasin marimari na stretim em, em inap pilim olsem em i no gutpela man moa long bung wantaim lain bilong God. Francisco em wanpela brata, na em i bin pilim olsem. Em i tok: “Mi kisim tok bilong stretim mi bikos mi mekim pasin pamuk. Mi go yet long ol miting, tasol bihain mi bel hevi na pilim olsem mi no gutpela moa long stap wantaim lain bilong Jehova. Bel i kotim mi, na mi pilim olsem Jehova i no fogivim mi. Bihain mi no bung moa wantaim kongrigesen.” Yu pilim olsem wanem long ol bratasista i bungim kain hevi olsem? Yu pilim tingting bilong ol? Bikpela samting moa, Jehova i pilim olsem wanem long ol?

8. Yu ting Jehova i save lusim tingting long ol man i bin mekim wok bilong em? Eksplenim.

⁸ Jehova i no save lusim tingting long ol man husat i mekim wok bilong em, na inap liklik haptaim ol i no bung moa wantaim lain bilong em. Na tu, em i no lusim tingting long ol samting ol i mekim long wok bilong em. (Hib.  6:10) Profet Aisaia i mekim gutpela tok piksa bilong soim hau Jehova i save lukautim ol manmeri bilong em. Aisaia i tok: “Olsem wanpela wasman bilong sipsip, em bai lukautim gut ol sipsip bilong em. Em bai bungim ol pikinini sipsip long han bilong em, na em bai karim ol long bros bilong em.” (Ais. 40:11) Bikpela Wasman bilong sipsip i save pilim olsem wanem taim wanpela sipsip bilong em i lusim banis? Jisas i kamapim klia tingting bilong Jehova taim em i askim ol disaipel olsem: “Yupela ting wanem? Sapos wanpela man i gat 100 sipsip na wanpela bilong ol i lus, orait ating bai em i lusim ol 99 sipsip i stap long maunten na i go painim dispela wanpela sipsip i lus, a? Mi tok tru long yupela, sapos em i painim dispela sipsip, amamas bilong em long dispela sipsip bai i winim amamas bilong em long dispela 99 sipsip i no bin lus.”—Mat. 18:12, 13.

9. Long bipo, ol gutpela wasman i save mekim wanem long ol sipsip? (Lukim fran pes piksa.)

⁹ Wai na i stret long tingim Jehova olsem wasman bilong sipsip? Long bipo, gutpela wasman i save lukautim gut ol sipsip bilong em. Olsem, Devit i bin pait long wanpela laion na bea na bai em inap lukautim ol sipsip. (1 Sml. 17:34, 35) Gutpela wasman bai luksave sapos sipsip bilong em i lus, maski em wanpela sipsip tasol. (Jon 10:3, 14) Dispela kain wasman i save lusim 99 sipsip long banis o lusim ol wantaim ol narapela wasman na em i go painim sipsip i lus. Jisas i yusim dispela tok piksa long skulim yumi long wanpela bikpela tok: “Papa bilong mi long heven i no laik bai wanpela bilong ol dispela man i no gat nem i lus.”—Mat. 18:14.

10. Olsem Esekiel 34:11-16 i kamapim, Jehova i promis long mekim wanem long ol sipsip i lus?

¹⁰ Jehova i save laikim yumi olgeta wan wan, na em i laikim tu ol “man i no gat nem” em ol i lusim lain sipsip bilong em. Long rot bilong profet Esekiel, God i promis olsem em bai painim ol sipsip i lus na helpim ol long kamap strong gen long bilip. Na em i kolim stret ol samting em bai mekim long kisim bek ol, em  ol samting wasman bilong lain Israel bai mekim sapos wanpela sipsip i lus. (Ritim Esekiel 34:11-16.) Wasman bilong sipsip inap lusim bikpela haptaim na strong bilong em long i go painim sipsip. Taim em i painim dispela sipsip i lus, wasman bai bringim em i go bek long banis. Na tu, sapos sipsip i kisim bagarap o em i hangre, wasman bai helpim gut dispela sipsip, pasim ol sua bilong em, karim em, na givim kaikai long em. Ol elda i stap olsem ol wasman bilong “ol sipsip bilong God,” na ol i mas mekim ol wankain samting olsem bilong helpim ol lain husat i bin lusim kongrigesen. (1 Pita 5:2, 3) Ol elda i mas painim ol, helpim ol long kam bek long kongrigesen, na soim pasin laikim na helpim ol long kamap strong gen long bilip. *

11. Gutpela wasman i gat wanem save long ol sipsip?

¹¹ Gutpela wasman i save olsem ol sipsip inap lus. Na sapos sipsip i lusim banis, wasman i no inap mekim hatpela pasin long em. Tingim samting God i mekim taim em i helpim sampela wokman husat i bin lusim em inap sampela haptaim.

12. Jehova i mekim wanem pasin long Jona?

¹² Profet Jona i ranawe long asainmen bilong em. Maski i olsem, Jehova i no les kwik long Jona. Olsem gutpela wasman, Jehova i kisim bek em na strongim em long inapim asainmen bilong em. (Jna. 2:7; 3:1, 2) Bihain, God i yusim botol-got rop long helpim Jona long luksave olsem laip bilong ol man i dia tumas. (Jna. 4:10, 11) Yumi kisim wanem skul? Ol elda i no ken les kwik long ol lain i kamap slek long bilip. Ol i mas traim long kliagut long wanem samting i mekim na ol i lusim kongrigesen. Na taim ol dispela lain i kam bek long Jehova, ol elda i mas wok yet long bihainim pasin laikim na soim olsem ol i tingim ol.

13. Yumi inap kisim wanem skul long pasin Jehova i mekim long Asap?

¹³ Asap, em man i raitim ol tok bilong Buk Song sapta 73, em i bel hevi taim em i lukim olsem ol man nogut i gat gutpela sindaun. Em i kisim 2-pela tingting long mekim  laik bilong God. (Sng. 73:12, 13, 16) Jehova i mekim wanem? Em i no daunim Asap. God i putim ol tok bilong Asap long Baibel. Bihain, Asap i luksave olsem em i bikpela samting long em i mas pas gut wantaim Jehova, na dispela i winim olgeta narapela samting. (Sng. 73:23, 24, 26, 28) Yumi kisim wanem skul? Ol elda i no ken hariap long skelim ol lain i holim 2-pela tingting long mekim wok bilong Jehova. Ol elda i no ken daunim ol; mobeta ol i traim long kliagut long risen bilong toktok na pasin ol i mekim. Long dispela rot tasol, ol elda bai inap long yusim tok bilong Baibel long strongim ol.

14. (a) Wai na Elaija i nidim helpim? (b) Hau na Jehova i helpim em?

¹⁴ Profet Elaija i ranawe long Kwin Jesebel. (1 Kin. 19:1-3) Em i ting i no gat man moa i mekim wok olsem wanpela profet bilong Jehova, na em i pilim olsem wok em i mekim i samting nating. Elaija i bel hevi tru na em i laik dai. (1 Kin. 19:4, 10) Jehova i no daunim Elaija; em i tokim Elaija olsem em i no stap wanpis, na em inap bilip long strong bilong God, na i gat planti wok i stap yet long em i mas mekim. Jehova i putim gut yau taim Elaija i kamapim ol wari bilong em, na em i givim ol nupela asainmen long Elaija. (1 Kin. 19:11-16, 18) Yumi kisim wanem skul? Yumi olgeta, na moa yet ol elda, i mas soim gutpela pasin long ol wokman bilong Jehova. Maski man i kros o pilim olsem em i no gutpela man inap long Jehova i ken marimari long em, ol elda i mas putim yau taim em i stori long ol wari bilong em. Ol i mas helpim em long bilip olsem Jehova i laikim em.

15. Olsem Jon 6:39 i kamapim, Jisas i pilim olsem wanem long ol sipsip bilong Papa bilong em?

¹⁵ Jehova i laik bai yumi pilim olsem wanem long ol sipsip bilong em i lus? Jisas i stap gutpela eksampel long yumi. Em i save olsem olgeta sipsip bilong Jehova i dia tumas long ai bilong God, olsem na Jisas i mekim olgeta samting em inap mekim bilong helpim “ol sipsip bilong lain Israel i lus pinis” long kam bek long Jehova. (Mat. 15:24; Luk 19:9, 10) Jisas i stap olsem gutpela wasman, olsem na em i mekim olgeta samting em inap mekim na bai i no gat wanpela sipsip bilong Jehova i lus.—Ritim Jon 6:39.

16-17. Ol elda i mas pilim olsem wanem long ol bratasista husat i bin lusim kongrigesen? (Lukim blok “Lus Sipsip Inap Pilim Olsem Wanem?”)

¹⁶ Aposel Pol i tokim ol elda bilong kongrigesen long Efesus long bihainim eksampel bilong Jisas. Yupela i mas “helpim ol man i no gat strong, na yupela i mas tingim tok bilong Bikpela Jisas. Em yet i tok: ‘Amamas bilong givim samting i winim amamas bilong kisim samting.’” (Apo. 20:17, 35) I klia tru olsem long nau ol elda i gat bikpela wok long lukautim ol manmeri bilong Jehova. Salvador em wanpela elda long Spen, na em i tok: “Taim mi tingim olsem Jehova i wari tru long ol sipsip bilong em i lus, dispela i save kirapim mi long mekim olgeta samting mi inap mekim bilong helpim ol. Mi stap olsem wasman bilong ol long sait bilong bilip, na mi bilip tru olsem Jehova i laik bai mi mekim gut wok bilong lukautim ol.”

¹⁷ Ol bratasista husat i bin lusim kongrigesen na stori bilong ol i stap long dispela atikol, ol i kisim helpim na ol i kam bek long Jehova. Planti moa i bin lusim kongrigesen, na long nau ol i laik kam bek long Jehova. Neks atikol bai stori moa long ol samting yumi ken mekim bilong helpim ol long kam bek.