Mi bon long Me 19, 1940 long taun Amioûn, long Lebanon. Sampela yia bihain, famili bilong mi i go sindaun long Tripoli, we mi kamap bikpela long wanpela naispela famili i save long God Jehova na laikim Em. Mipela 5-pela pikinini; mi liklik na mi gat 3-pela sista na wanpela brata. Papamama bilong mi i tingim wok mani olsem namba 2 samting tasol. Long famili bilong mipela, bikpela samting tru em long stadi long Baibel, go long ol miting Kristen, na helpim ol narapela long kisim save long God.

Long kongrigesen bilong mipela, i gat sampela Kristen em God i makim. Wanpela em Michel Aboud, em i save lukautim buk stadi bilong mipela. Em i kisim save long tok i tru long New York na em i kirap autim tok long Lebanon long 1921. Mi tingim em i rispektim na helpim gut tupela yangpela i bin grediuet long Skul Gileat em, Anne na Gwen Beavor. Ol i kamap gutpela pren bilong mipela. Planti yia bihain, mi bin amamas tru long bungim Anne long Amerika. Sampela yia bihain, mi bungim Gwen, em i maritim Wilfred Gooch na tupela i mekim wok long Betel long London, Inglan.

I gat sampela Witnes tasol long Lebanon taim mi yangpela. Tasol mipela i givim bel tru  long tokim ol narapela long ol tok bilong Baibel. Mipela i mekim olsem, maski ol bikman bilong lotu i birua long mipela. Mi tingim yet sampela bilong ol samting i bin kamap long mipela.

Wanpela taim mi na sista bilong mi Sana, mitupela i autim tok long wanpela apatmen bilding. Pris i kam long hap we mipela i sanap na autim tok i stap. Ating wanpela i ringim em long kam. Pris i kirap long krosim sista bilong mi. Em i belhat nogut tru na em i pusim Sana i go daun long lata, na Sana i kisim bagarap. Wanpela i ringim polis, na polis i kam na tokim ol narapela long helpim sista bilong mi. Ol i kisim pris i go long polis stesin na painimaut olsem em i karim gan wantaim em. Bikman bilong polis i askim em: “Yu wanem samting? Yu lida bilong lotu o lida bilong ol paitman?”

Narapela ekspiriens mi tingim em taim kongrigesen bilong mipela i haiarim wanpela bas bilong kisim mipela i go autim gutnius long wanpela taun i stap longwe. Mipela i bin amamas tru, tasol bihain pris long dispela hap i harim olsem mipela i go long hap na em i bungim bikpela lain manmeri na ol i kam pait long mipela. Ol i kros long mipela na ol i tromoi ol ston long mipela na papa bilong mi i kisim bagarap. Mi tingim blut i karamapim olgeta hap long pes bilong em. Em na Mama i go bek long bas, na mipela i wari na bihainim em i go. Tasol wanpela samting mi no inap lusim tingting em taim Mama i wok long klinim papa bilong mi, em i tok: “Jehova, plis fogivim ol. Ol i no save long samting ol i mekim.”

Narapela taim, mipela i go lukim ol wanfamili bilong mipela long asples taun bilong mipela. Long hap mipela i bungim wanpela bikman bilong lotu—wanpela bisop—long haus bilong bubuman bilong mi. Dispela bisop i save olsem papamama bilong mi ol i Witnes Bilong Jehova. Olsem na em i sutim askim long mi, maski mi gat 6-pela krismas tasol long dispela taim. Em i tok: “Yu, wai na yu no baptais?” Mi bekim tok olsem mi pikinini yet na bilong kisim baptais mi mas save gut long ol tok bilong Baibel na mi mas i gat strongpela bilip. Em i no laikim bekim mi givim na em i tokim bubuman bilong mi olsem mi no rispektim em.

Ol kain ekspirien olsem i no planti. Lain Lebanon i save mekim gutpela pasin pren na redi long helpim ol narapela. Olsem na mipela i save stori gut wantaim ol man long Baibel na mipela i gat planti Baibel stadi.

Taim mi skul yet, wanpela yangpela brata long Veneswela i kam long Lebanon. Em i save kam miting long kongrigesen bilong mipela na em i wok long prenim susa bilong mi Wafa. Bihain ol i marit na ol i go sindaun long Veneswela. Taim Wafa i raitim pas long mipela, em i kirapim papa bilong mi long kisim mipela famili na go sindaun long Veneswela. Em i mekim olsem bikos em i misim mipela. Bihain mipela i harim tok bilong em na mipela i muv!

 Mipela i go kamap long Veneswela long 1953 na mipela sindaun long Caracas, klostu long pales bilong presiden. Mi liklik mangi na mi amamas tru long lukim presiden i go i kam long fensi kar bilong em. Tasol em i no isi long papamama bilong mi long lain long nupela kantri, tokples, kalsa, kaikai, na klaimet. Taim ol i pilim olsem ol i wok long lain gut long nupela sindaun, wanpela narapela samting i kamap.

Papa bilong mi stat long pilim sik. Mipela kirap nogut long dispela bikos Papa em strongpela man na em i gat gutpela helt. Mipela i no inap tingim olsem em i bin sik. Papa i gat kensa na em i kisim operesen. Sori tru, wanpela wik bihain em i dai.

Dispela i mekim na mipela i bin pilim bikpela bel hevi tru. Mi gat 13 krismas tasol. Mipela kirap nogut tru long dispela samting na mipela pilim olsem mipela i no inap stap amamas gen. Inap sampela haptaim, Mama i pilim hatwok long bilipim olsem man bilong em i dai pinis. Tasol mipela i luksave olsem mipela mas mekim samting bilong stap amamas gen na Jehova i helpim mipela long mekim olsem. Taim mi gat 16 krismas, mi grediuet long haiskul long Caracas, na mi gat bikpela laik tru long helpim na sapotim famili bilong mi.

Long dispela taim, susa bilong mi Sana i maritim Rubén Araujo husat i bin grediuet long Skul Gileat na kam bek long Veneswela. Tupela i muv i go sindaun long New York. Famili bilong mi i wokim disisen olsem mi mas go skul long yunivesiti, olsem na mi go stap wantaim susa na man bilong em na mi skul. Susa bilong mi na man bilong em i bin helpim mi gut long sait bilong bilip taim mi stap wantaim ol. Na tu, i gat planti strongpela brata long kongrigesen bilong mipela—em Brooklyn Spanish kongrigesen. Tupela brata em mi kisim save long ol na laikim ol em Milton Henschel na Frederick Franz; tupela i wok long Brooklyn Betel.

Taim fes yia bilong mi long yunivesiti i pinis, mi wok long gat tupela tingting long samting mi mekim long laip bilong mi. Mi ritim na tingim gut ol atikol long ol nius Wastaua i stori long ol Kristen i winim ol mak long wok bilong Jehova. Mi lukim olsem ol painia na ol lain i wok long Betel insait long kongrigesen bilong mipela, ol i luk amamas tru na mi laik tru long kamap olsem ol. Tasol mi no kisim baptais yet olsem wanpela Kristen. I no longtaim, mi luksave olsem em i bikpela samting long dediketim laip bilong mi long Jehova. Mi mekim olsem na mi kisim baptais long Mas 30, 1957.

Bihain long mi kisim baptais, nau mi tingting long mekim narapela samting, em long insait long fultaim sevis. Mi laikim tru dispela mak mi laik winim, tasol mi lukim olsem em bai hatwok long mi mekim olsem. Mi pilim hatwok long mekim wok painia na skul long yunivesiti long wankain taim. Mi na famili bilong mi i raitim planti pas i go i kam, na mi tokim Mama na ol brata na susa bilong mi olsem mi laik lusim skul na kam bek long Veneswela, na mekim wok painia.

 Mi go bek long Caracas long Jun 1957. Tasol mi lukim olsem sindaun bilong famili bilong mi i no gutpela. Ol i nidim wanpela narapela insait long famili long wok mani. Olsem wanem mi ken helpim ol? Mi kisim wok long benk, tasol mi gat laik tru long wok painia. Em as na mi bin kam bek. Olsem na mi strongim tingting long mekim tupela wok wantaim. Inap sampela yia, mi wok fultaim long benk na mi mekim wok painia tu. Maski mi bin bisi tru, mi stap amamas tru!

Narapela samting i mekim mi amamas em taim mi bungim na maritim Sylvia, em wanpela sista bilong Jemani husat i laikim tru Jehova. Em wantaim papamama bilong em, ol i muv i kam sindaun long Veneswela. Bihain mipela i gat tupela pikinini—pikinini man bilong mipela em Michel (Mike) na pikinini meri bilong mipela em Samira. Na tu, mi mekim wok bilong lukautim mama bilong mi. Em i kam stap wantaim mipela. Maski mi lusim wok painia bilong inapim ol narapela wok bilong mi insait long famili, mi holimpas yet tingting olsem wanpela painia. Mitupela Sylvia i mekim wok painia haptaim long taim mipela i kisim malolo long wok mani bilong mipela.

Samting mi stori long en long kirap bilong atikol i bin kamap taim ol pikinini bilong mi i skul yet. Mi ken tok stret olsem laip bilong mi i gutpela tru, na ol narapela wokman bilong benk i save rispektim mi. Maski i olsem, mi laik bai ol man i tingim mi olsem wanpela wokman bilong Jehova. Mi holim strong tingting mi gat long dispela de. So mitupela meri bilong mi i sindaun na toktok long sait bilong mani. Sapos mi lusim wok long benk, mi bai kisim bikpela pinis pe. Na mipela i no gat dinau, so mipela luksave olsem sapos mipela i lusim sampela samting mipela i holim, orait mani mi kisim inap lukautim mipela inap longpela taim.

Em i no isi long mekim olsem, tasol gutpela meri bilong mi na mama bilong mi, tupela i sapotim dispela disisen. So nau mi inap joinim gen ol lain bilong fultaim sevis. Em gutpela blesing tru! Mi save long samting mi laik mekim. Tasol i no longtaim, mipela i kisim wanpela toksave em mipela kirap nogut long en.

Wanpela taim dokta bilong mipela i tokim mipela olsem Sylvia i gat bel. Em wanpela saprais long mitupela! Em samting bilong amamas tru long en, tasol mi tingim gen disisen bilong mi long kamap painia oltaim. Mi inap mekim yet wok painia? Kwiktaim mipela i  stretim bel na tingting bilong mipela na redi long kisim narapela memba bilong famili. Tasol mi wok long tingting yet olsem bai mi wok painia o nogat?

Bihain long mipela i stori long ol mak bilong mipela, mipela i pasim tok olsem mi ken wok painia. Pikinini man bilong mipela Gabriel i bon long Epril 1985. Maski i olsem, mi risain long benk na kirap gen long wok painia long Jun 1985. Bihain, mi kamap wanpela memba bilong Brens Komiti. Tasol brens i no stap long Caracas, olsem na mi mas travel inap 80 kilomita 2-pela o 3-pela de long wik i go wok long brens.

Brens ofis i stap long taun La Victoria, olsem na mipela famili i laik muv i go long La Victoria na stap klostu long Betel. Em bikpela senis tru long mipela. Mi laikim tru famili bilong mi na mi amamas tru long ol. Pasin bilong ol i helpim mi tru. Susa bilong mi, Baha, i lukautim mama bilong mi. Mike i marit, tasol Samira na Gabriel i stap yet wantaim mipela long haus. So bilong go sindaun long La Victoria, ol i mas lusim ol pren bilong ol long Caracas. Na tu, Sylvia i mas lain long sindaun long liklik taun na i no biktaun we i bisi tru. Na mipela olgeta i mas lain long sindaun long wanpela liklik taun. Yes, mipela i mekim planti senis bilong lusim Caracas na go sindaun long La Victoria.

Tasol ol samting i senis gen. Gabriel i marit na Samira i go sindaun long em yet. So ol i singautim mitupela Sylvia long go joinim Betel famili long 2007, na mipela i amamas tru long mekim olsem inap nau. Bikpela pikinini man bilong mipela Mike i mekim wok elda na em wantaim meri bilong em Monica i mekim wok painia oltaim. Gabriel i mekim wok elda na em wantaim meri bilong em Ambra i mekim wok long Itali. Samira i mekim wok painia, na em i save kam helpim wok long Betel olsem rimot volantia.

Tru tumas, mi bin mekim ol bikpela disisen long laip bilong mi. Na mi no rigret liklik. Mi bai mekim ol wankain disisen gen. Mi amamas tru long ol gutpela wok bilong Jehova mi bin mekim. Long ol yia i go pinis, mi luksave olsem em i bikpela samting long holimpas strongpela pasin pren bilong yumi wantaim Jehova. Maski yumi mekim ol liklik disisen o ol bikpela disisen, yumi ken save tru olsem Em bai givim yumi bel isi “i winim tru tingting bilong man.” (Fili. 4:6, 7) Mitupela Sylvia i amamas long wok long Betel na mipela pilim olsem Jehova i blesim ol disisen bilong mipela bikos oltaim mipela i putim Jehova i stap nambawan long laip bilong mipela.