Baibel i no stori long dispela. Tasol Baibel i stori long sampela intresting infomesen we inap eksplenim risen na ol i no go bek long Nasaret long dispela taim.

Wanpela ensel i tokim Maria olsem em bai kisim bel na karim wanpela pikinini. Taim ensel i go bilong givim dispela tok, Maria na Josep i stap long Nasaret, em asples bilong Josep long Galili. (Luk 1:26-31; 2:4) Bihain, taim ol i lusim Isip, ol i go bek long Nasaret. Jisas i go bikpela long dispela hap na em i kamap wanpela man Nasarin. (Mat. 2:19-23) Olsem na taim yumi tingim Jisas, Josep, na Maria, yumi save tingim taun Nasaret.

Maria i gat wanpela wanblut nem bilong em Elisabet, na em i save stap long Juda. Elisabet em i meri bilong pris Sekaraia na em i mama bilong Jon Bilong Baptais. (Luk 1:5, 9, 13, 36) Maria i bin visitim Elisabet na em i stap wantaim em inap 3-pela mun long Juda. Bihain Maria i go bek long Nasaret. (Luk 1:39, 40, 56) Olsem na Maria i save gut long dispela hap bilong Juda.

Bihain Josep i bihainim singaut bilong i go “rejistaim nem bilong ol.” Olsem na ol i lusim Nasaret na i go long Betlehem, em “taun bilong Devit” na em ples we tok profet i kamapim olsem Mesaia bai bon long en. (Luk 2:3, 4; 1 Sml. 17:15; 20:6; Mai. 5:2) Bihain long Maria i karim Jisas long dispela hap, Josep i no laik bai Maria i wokabaut inap longpela rot i go bek long Nasaret wantaim nupela bebi. Olsem na ol i stap long Betlehem, em inap olsem 9-pela kilomita longwe long Jerusalem. Long dispela rot, em bai isi moa long ol i kisim bebi bilong ol i go long tempel na mekim ofa olsem Lo i makim.​—Wkp. 12:2, 6-8; Luk 2:22-24.   

Ensel bilong God i bin tokim Maria olsem pikinini bilong em bai sindaun long “sia king bilong . . . Devit” na em bai “stap King.” Ating Josep na Maria i luksave olsem em i bikpela samting long Jisas i bin bon long taun bilong Devit, a? (Luk 1:32, 33; 2:11, 17) Ating tupela i ting em gutpela long ol i stap yet long Betlehem na wetim God i givim sampela tok moa long laik bilong em long ol.

Yumi no save long hamas yia ol i bin stap long Betlehem taim ol glasman bilong sta i kam kamap long ol. Tasol long dispela taim, ol i stap pinis long wanpela haus, na Jisas em i liklik “pikinini,” na em i no wanpela bebi. (Mat. 2:11) Na i luk olsem ol i no go bek long Nasaret, ol i stap longpela taim long Betlehem na em i kamap ples bilong ol.   

Herot i givim oda na salim ol man i go long “Betlehem . . . na ol i kilim i dai olgeta pikinini man i gat 2-pela krismas na i go daun.” (Mat. 2:16) Wanpela ensel i givim tok lukaut long Josep long dispela samting, olsem na Josep na Maria i kisim Jisas na ol i ranawe i go long Isip na ol i stap long hap inap long Herot i dai. Bihain Josep i kisim famili bilong em i go long Nasaret. Wai na ol i no go bek long Betlehem? Bikos long dispela taim, pikinini man bilong Herot em Arkelaus, em i bosim Judia na em i wanpela man nogut, na tu, wanpela ensel i givim tok lukaut gen long Josep long no ken go bek long dispela ples. Long Nasaret, em i seif moa long Josep i mekim bikpela long Jisas na skulim em long kamap man bilong lotuim God.​—Mat. 2:19-22; 13:55; Luk 2:39, 52.

I luk olsem Josep i dai paslain long Jisas i opim rot long ol manmeri bai kisim laip long heven. Olsem na Josep bai kirap bek na kisim laip long graun. Planti manmeri bai bungim em na kisim sampela save moa long risen na em na Maria i stap yet long Betlehem bihain long Jisas i bon.