Long taim bilong Wol Woa 2, papamama bilong mi i lusim Estonia na ol i go long Jemani, em ples we mi bin bon long en. Bihain long mi bon, ol i redi long muv i go long Kanada. Fes haus bilong mipela long Ottawa, Kanada, em wanpela liklik haus we ol kakaruk i save stap long en. Mipela i stap rabis tru, tasol mipela i save kaikai ol kiau long olgeta moning.

Wanpela taim ol Witnes Bilong Jehova i ritim tok bilong Revelesen 21:3, 4 long mama bilong mi. Em i pilim tru tok em i lainim, olsem na em i krai. Sid bilong tok i tru i stap long bel bilong Mama na Papa i gro na i no longtaim na tupela i winim mak bilong kisim baptais.

Papamama i no kliagut long tok Inglis, tasol ol i save givim bel tru long mekim wok bilong God. Maski Papa i save wok hat long nait olgeta long wanpela faktori we ol i save meltim nikol long Sudbury, Ontario, klostu olgeta Sarere em i save kisim mi na liklik susa bilong mi, Sylvia, na i go autim tok. Na long olgeta wik, mipela famili olgeta i save stadi wantaim long Wastaua. Mama na Papa i helpim mi long kisim pasin bilong laikim God. Na dispela i kirapim mi long dediketim laip bilong mi long Jehova long 1956 taim mi gat 10-pela krismas. Tupela i laikim tru Jehova na dispela i strongim mi long laip olgeta bilong mi.

Bihain long mi grediuet long haiskul, mi no moa putim tingting olgeta long mekim wok bilong Jehova. Mi ting olsem sapos mi kamap painia, mi no inap kisim planti mani inap bilong baim tiket bilong balus na raun i go long ol narapela kantri. Mi wok long wanpela lokol redio stesin olsem man bilong pilaim ol musik ol i rekodim pinis, na mi laikim tru dispela wok. Tasol mi save wok long ol apinun, olsem na mi misim planti miting na mi poroman wantaim ol man em ol i no laikim God. Tasol bihain, maus bilong bel bilong mi em ol tok bilong Baibel i trenim i kirapim mi long mekim ol senis.   

Mi muv i go long Oshawa, Ontario. Long dispela hap, mi bungim Ray Norman na sista bilong em Lesli, na ol narapela painia. Ol i bin mekim gut long mi. Mi lukim olsem ol i amamas tru na dispela i kirapim mi long tingim gen ol samting mi laik mekim long laip bilong mi. Ol i kirapim mi long mekim wok painia, na mi stat long mekim wok painia long Septemba 1966. Mi amamas na mi enjoim laip bilong mi. Tasol sampela samting i kamap em mi no bin ekspektim na i senisim laip bilong mi.

Taim mi stap yet long haiskul, mi aplai long go wok long Betel long Toronto, Kanada. Bihain taim mi  mekim wok painia, mi kisim singaut bilong mekim wok long Betel inap 4-pela yia. Tasol mi laikim tru Lesli, na mi pret olsem sapos mi tok orait long go long Betel, mi no inap lukim em gen. Tasol mi wok long beten strong long Jehova, na mi mekim disisen long go long Betel na mi tok gutbai long Lesli.

Mi wok long Betel londri na bihain mi mekim wok olsem seketeri. Na Lesli i kamap spesel painia long Gatineau, Quebec. Planti taim mi save tingting olsem, em i wok long mekim wanem na mi bin mekim rait disisen o nogat. Wanpela taim mi kisim naispela saprais tru. Ray, em brata bilong Lesli, i kisim singaut bilong kam long Betel. Na em i kamap rumeit bilong mi! So nau rot i op long mitupela Lesli i ken toktok wantaim gen. Mitupela i marit long laspela de bilong namba 4 yia bilong mi long mekim wok long Betel, em long Februeri 27, 1971.

Mitupela Lesli i kisim asainmen long mekim wok long wanpela kongrigesen i save mekim tokples Frans long Quebec. Bihain long sampela yia, mi kirap nogut olsem mi kisim asainmen bilong mekim wok olsem wasman sekit taim mi gat 28 krismas. Mi pilim olsem mi yangpela tumas na mi no gat ekspiriens, tasol tok bilong Jeremaia 1:7, 8 i strongim mi. Lesli i bin insait long sampela kar eksiden na em i save pilim hatwok long slip. So mi tingting, hau bai mitupela i mekim gut wok sekit? Maski i olsem, em i tok: “Sapos Jehova i singautim yumi long mekim samting, yumi mas traim long mekim!” Mipela i kisim dispela asainmen na mipela i amamas long mekim wok sekit inap 17 yia.

Mi bisi tru long mekim wok sekit na mi no spendim planti taim wantaim Lesli. Mi lainim narapela lesen. Long bikmoning tru long wanpela Mande, wanpela i ringim dua-bel. I no gat man i sanap long dua, tasol i gat wanpela piknik basket wantaim tebol-klot, ol prut, sis, bret, wanpela botol wain, ol glas, na i gat wanpela nout i tok, “Kisim meri bilong yu i go long wanpela piknik.” Em naispela de na san i sain. Tasol mi tokim Lesli olsem mi no inap long go bikos mi mas redim ol tok. Em kliagut long risen na mi no inap go, tasol em i bel hevi. Mi sindaun long tebol, tasol bel bilong mi i wok long kotim mi. Mi tingim tok bilong Efesus 5:25, 28. Mi luksave olsem ol dispela tok i kam long Jehova bilong kirapim mi long tingim filings bilong meri bilong mi. Bihain long mi beten, mi tokim Lesli, “Yumi go,” na em i amamas tru. Mipela draiv i go long wanpela naispela ples klostu long riva, spredim tebol-klot, na mitupela wantaim i enjoim tru dispela de. Bihain mipela i go bek long haus na mi redim ol tok bilong mi.

Mipela i amamas tru long visitim planti kongrigesen long sekit bilong mipela kirap long British Columbia i go inap long Newfoundland. Mi bin gat laik tru long raun lukim ol narapela ples na dispela laik bilong mi i kamap tru. Mi save tingting long go long Skul Gileat, tasol mi no gat laik long mekim wok misineri long narapela kantri. Mi tingim ol misineri olsem ol spesel lain, na mi pilim olsem mi no winim dispela mak. Na tu, mi pret olsem nogut ol i salim mipela i go long wanpela kantri long Afrika we i gat ol bikpela sik na woa. Mi amamas long stap long Kanada.

Long 1992, ol Witnes Bilong Jehova i kisim tok orait long kirap gen long mekim wok autim tok long sampela kantri i bin stap aninit long Soviet Yunion. Olsem na ol brata i askim mipela sapos mipela i redi long muv i go long Estonia na mekim wok misineri long hap. Mipela i kirap nogut, tasol mipela i beten long dispela samting. Na mitupela i tingting olsem, ‘Sapos Jehova i singautim yumi long mekim samting, yumi mas traim long mekim!’ Mipela i kisim dispela asainmen, na mi tingting olsem, ‘Em orait bikos mipela i no inap go long Afrika.’

Hariap tru mipela i kirap long lainim tokples Estonia. Bihain long mipela i stap sampela mun long Estonia, ol brata i askim mipela long mekim wok sekit. Mipela i mas visitim inap 46 kongrigesen na sampela grup long 3-pela kantri bilong Boltik na long Kaliningrad long Rasia tu. So mipela i mas lainim sampela tokples bilong Latvia, Lituenia, na Rasia. Em hatwok tru. Tasol ol pren i pilim tru pasin bilong mipela long givim bel long lainim tokples na ol i helpim mipela. Long 1999, ol i kamapim brens ofis bilong Estonia, na ol i makim mi long insait long Brens Komiti wantaim Toomas Edur, Lembit Reile, na Tommi Kauko.

Mipela i save long planti Witnes em ol i bin dipotim ol i go long Saibiria long ol yia i go pinis. Maski ol birua i mekim nogut tru long ol taim ol i stap long kalabus na maski ol i stap longwe long ol famili bilong ol, ol i no larim pasin bilong bel nogut i daunim ol. Ol i amamas na givim bel yet long autim tok. Dispela i helpim mipela long luksave olsem mipela i ken sanap strong na amamas yet maski mipela i bungim ol hevi.

Insait long planti yia, mipela i bisi tru long mekim ol wok bilong mipela na mipela i no gat planti taim bilong malolo, so Lesli i wok long pilim taiet tru. Bihain long sampela haptaim mipela i luksave olsem em i gat wanpela sik i save mekim em taiet, em sik fibromyalgia. Mipela i tingting strong long muv i go bek long Kanada. Taim mipela i kisim singaut bilong go long brens skul long Patterson, New York, long Amerika, mi ting olsem mitupela i no inap long go. Tasol mitupela i beten strong planti taim, na bihain mipela i mekim disisen long i go long dispela skul. Na Jehova i blesim disisen bilong mipela. Em long dispela taim bilong skul, Leslie i kisim helpim long sait bilong helt. Long dispela rot, mipela inap kirap gen long mekim asainmen bilong mipela.

Long wanpela apinun bilong 2008 long Estonia, mi kisim wanpela fon kol long wol hetkota na ol i askim mipela long mekim wanpela asainmen long Kongo. Mi kirap nogut na moa yet bikos mi save olsem mi mas givim bekim bilong mipela long neks de. Pastaim mi no tokim Lesli bikos mi save em i no inap slip long nait. Tasol long dispela nait mi yet i no slip, mi wok long beten bikos mi tingting planti long laip bilong mipela long Afrika bai olsem wanem.

Long neks de taim mi tokim Lesli, mitupela i tok: “Jehova i singautim yumi long go long Afrika. Hau yumi save olsem yumi no inap mekim dispela asainmen na enjoim sapos yumi yet i no bin traim?” So mipela i kalap long balus na i go long Kinshasa, Kongo, bihain long mipela i bin stap long Estonia inap 16 yia. Brens ofis i gat naispela plaua gaden na yu bai stap bel isi long dispela hap. Wanpela fes samting  Lesli i putim long rum bilong mipela em wanpela kad em i bin lukautim kirap long taim mipela i bin lusim Kanada. Long dispela kad i gat ol dispela tok, “Amamas long ples yu stap long en.” Taim mipela i bungim ol bratasista, mekim ol Baibel stadi, na kisim amamas long misineri asainmen bilong mipela, mipela i amamas moa yet long mekim wok bilong Jehova. Bihain, mipela i kisim blesing long visitim ol brens ofis long 13 narapela narapela kantri long Afrika. Dispela i opim rot long mipela i bungim kain kain manmeri bilong narapela narapela bekgraun. Ol pret bilong mi long bipo i pinis, nau mi tok tenkyu long Jehova i salim mipela i go mekim wok bilong em long Afrika.

Long Kongo, ol i givim mipela ol kaikai olsem ol binatang, na mi ting mipela i no inap kaikai. Tasol taim mipela i lukim ol bratasista i amamas long kaikai, mitupela i traim na mipela i laikim tru.

Mipela i raun i go long hap is bilong Kongo bilong strongim ol bratasista, na tu, long givim ol samting ol i nidim. Long ol ples ol i stap long en, ol lain paitman i atekim ol manmeri long ol viles na mekim nogut long ol meri na ol pikinini. Planti bratasista i no gat planti samting long sait bilong skin. Maski i olsem, mipela i pilim tru pasin bilong ol long holimpas bilip long kirap bek, laikim Jehova, na stap gut long oganaisesen bilong Jehova. Dispela i kirapim mipela long skelim gen na strongim bilip bilong mipela. Haus bilong sampela bratasista na kaikai ol i planim long gaden i bagarap. Dispela i kirapim mi long tingim olsem wantu tasol mani kago bilong yumi inap lus na ol samting yumi gat long sait bilong bilip ol i dia tumas. Maski ol brata i karim ol bikpela hevi tru, ol i no save komplein. Pasin bilong ol i kirapim mipela long sanap strong na karim ol hevi na hevi bilong sik tu.

Mipela i kisim narapela saprais. Ol brata i askim mipela long i go wok long Hong Kong brens. Mipela i no bin ting olsem mipela bai go stap long Esia! Tasol mipela i lukim hau Jehova i soim pasin laikim long mipela na helpim mipela long olgeta asainmen mipela i mekim, olsem na mipela i orait long i go. Long 2013, mipela i aiwara wantaim na tok gutbai long Afrika na ol gutpela pren bilong mipela, na mipela i no save long wanem samting bai painim mipela long nupela asainmen bilong mipela.

Em bikpela senis long stap long Hong Kong bikos i gat planti manmeri tru long dispela siti na ol i  bilong olgeta hap bilong graun. Na em hatwok long lainim tokples Cantonese bilong Saina. Ol bratasista i welkamim mipela na mipela i laikim tru ol kaikai bilong ol. Planti wok moa i kamap long brens ofis, tasol long wankain taim pe bilong baim ol bilding i go antap tru. Olsem na Gavening Bodi i bihainim savetingting na ol i salim planti bilding i stap aninit long lukaut bilong brens. Bihain liklik, long 2015, mipela i muv i go long Saut Korea we mipela i mekim yet wok bilong God. Nau mipela i mas lainim narapela tokples i hatwok long lainim na maski mipela i no save gut long mekim tokples Korea, mipela i pilim tru gutpela pasin bilong ol pren long luksave olsem isi isi mipela i wok long lain long mekim dispela tokples.

Em i no isi long kisim ol nupela pren, tasol mipela i luksave olsem taim mipela i go pas long mekim pasin helpim long ol narapela, em isi moa long save gut long ol. Mipela i luksave olsem i gat planti samting long ol bratasista bilong yumi we inap mekim yumi pas gut wantaim winim ol samting i no wankain long yumi. Na tu, Jehova i wokim yumi gut tru bambai yumi inap mekim pasin laikim long bel bilong yumi i go bikpela moa na laikim tru planti pren bilong yumi.​—2 Kor. 6:11.

Mipela i luksave tu olsem em bikpela samting long holim wankain tingting em Jehova i gat long ol narapela na lukim ol evidens i soim olsem Jehova i laikim na stiaim yumi. Long ol taim we mipela i bel hevi o pilim olsem ol narapela i no amamas long mipela, mipela i save ritim gen ol kad i gat ol tok bilong strongim mipela na ol pas i kam long ol pren bilong mipela. Mipela i lukim hau Jehova i bekim ol beten bilong mipela, na em i mekim isi bel bilong mipela na strongim mipela.

Long ol yia i go pinis, mitupela Lesli i kisim skul olsem em i bikpela samting long spendim taim wantaim, maski mipela i gat planti wok long mekim. Na tu, mipela i luksave olsem em gutpela long lap long mipela yet, na moa yet taim mipela i laik lainim nupela tokples. Na long olgeta nait, mipela i traim long tingim wanpela samting mipela i amamas long en na mipela i save tok tenkyu long Jehova long dispela samting.

Mi mas tokaut stret olsem pastaim mi pilim olsem mi no inap tru long kamap misineri o go stap long ol narapela kantri. Maski i olsem, mi amamas long kisim skul olsem yumi ken mekim olgeta samting wantaim helpim bilong Jehova. Mi tingim tok bilong profet Jeremaia olsem: “Jehova, yu bin trikim mi.” (Jer. 20:7) Yes, Em i givim mipela planti naispela saprais na ol blesing em mipela i no bin tingim, na em i inapim laik bilong mi long raun long balus tu. Mipela i mekim ol brens visit long 5-pela kontinen, na long dispela rot mipela i raun long balus i go long planti kantri moa winim samting mi bin tingim taim mi liklik boi. Long olgeta asainmen bilong mipela, mi pilim tru pasin bilong Lesli long sapotim mi na redi long mekim olgeta kain asainmen mipela i kisim.

Oltaim mipela i save rimaindim mipela yet olsem wok mipela i mekim em bilong Jehova na mipela i mekim bikos mipela i laikim Em. Ol blesing mipela i kisim long nau em liklik teis tasol bilong laip oltaim long bihain. Long dispela taim, Jehova bai “opim han bilong [em] na inapim laik bilong olgeta samting i gat laip.”​—Sng. 145:16.