1. Olsem 1 Pita 5:2 i kamapim, ol elda i kisim wanem gutpela wok?

 OL ELDA Kristen i kisim wok bilong lukautim ol sipsip bilong Jehova em ol i dia tumas long Em. Ol dispela gutpela brata i amamas long gutpela wok ol i kisim bilong lukautim ol brata na sista bilong ol, na ol i save wok hat tru olsem “ol wasman bilong was long ol na ol bai lukautim ol gut.” (Jer. 23:4; ritim 1 Pita 5:2.) Yumi tenkyu tru olsem yumi gat ol kain brata olsem insait long kongrigesen bilong yumi!

2. Sampela elda inap bungim wanem ol hatwok?

² Ol elda inap bungim plant hatwok taim ol i mekim ol wok bilong ol. Olsem, ol elda i mas wok hat tru bilong lukautim kongrigesen. Tony em wanpela elda long Amerika, em i luksave olsem em i mas mekim pasin daun taim em i laik kisim sampela moa wok. Em i tok: “Taim COVID-19 pendemik i stat, mi kisim planti moa wok long oganaisim ol miting na wok autim tok. Tasol maski mi mekim planti wok, i gat sampela moa wok long mekim. Dispela i mekim na mi no gat inap taim long mekim Baibel ritim, pesenel stadi, na beten.” Ilir, em wanpela elda long Kosovo, em i bungim narapela hatwok. Taim em i stap long hap bilong woa, em i pilim hatwok long bihainim daireksen i kam long oganaisesen. Em i tok: “Taim brens ofis i givim mi asainmen long helpim ol bratasista long wanpela hap i no seif, dispela i traim pasin bilong mi long strongim bel. Mi pret na mi pilim olsem daireksen ol i givim i no inap helpim mipela.” Tim em wanpela misineri long Esia, em i pilim hatwok long mekim olgeta samting em i mas mekim insait long wanpela de. Em i tok: “Sampela taim mi taiet tru na mi pilim olsem mi no gat strong long lukautim ol bratasista.” Wanem samting i ken helpim ol elda em ol i bungim ol wankain hatwok olsem?

3. Olsem wanem yumi olgeta i ken kisim helpim taim yumi skelim eksampel bilong Hetman Gideon?

³ Ol elda i ken kisim skul long eksampel bilong Hetman Gideon. (Hib. 6:12; 11:32) Em i bin kisim bek lain bilong God long han bilong ol birua, na tu, em i lukautim ol. (Het. 2:16; 1 Sto. 17:6) Wankain  olsem Gideon, God i makim ol elda long lukautim lain bilong Em long dispela haptaim nogut we i gat planti hatwok. (Apo. 20:28; 2 Tim. 3:1) Yumi ken kisim skul long pasin bilong Gideon long daunim em yet na bihainim tok. Taim em i mekim ol asainmen bilong em, ol samting i kamap bilong traim pasin bilong em long sanap strong. Maski yumi mekim wok elda o nogat, yumi ken strongim pasin bilong yumi long tok tenkyu long ol elda long ol gutpela wok ol i mekim. Yumi ken sapotim ol dispela brata em ol i wok hat long lukautim kongrigesen.​—Hib. 13:17.

4. Olsem wanem Gideon i mekim pasin daun?

⁴ Gideon em man i gat pasin daun. b Taim ensel bilong Jehova i tokim Gideon olsem God i bin makim em long kisim bek lain Israel long han bilong strongpela lain Midia, long pasin daun Gideon i tok: “Klen bilong mi ol i liklik lain tru namel long traib bilong Manase, na mi no gat nem liklik long famili bilong papa bilong mi.” (Het. 6:15) Em i pilim olsem em i no inap mekim dispela asainmen, tasol Jehova i save em i ken mekim. Jehova i helpim Gideon na em i inapim dispela asainmen bilong em.

5. Wanem samting inap traim pasin bilong elda long mekim pasin daun?

⁵ Ol elda i wok strong long mekim pasin daun long olgeta samting ol i mekim. (Mai. 6:8; Apo. 20:18, 19) Ol i no hambak na tokim ol narapela long save ol i gat na ol wok ol i mekim. Na tu, maski ol i mekim ol popaia, ol i no larim dispela i daunim ol. Maski i olsem, sampela samting inap traim pasin bilong wanpela elda long mekim pasin daun. Olsem, ating em i tok orait long mekim planti asainmen, tasol bihain em i pilim hatwok long inapim ol dispela asainmen. O ating ol narapela i sutim tok long em i no mekim gut wanpela asainmen o ol i preisim em long em i mekim gut narapela asainmen. Ol elda i ken kisim wanem skul long Gideon taim ol kain samting olsem i kamap long ol?

6. Ol elda inap kisim wanem skul long pasin bilong Gideon long daunim em yet? (Lukim tu piksa.)

⁶ Askim ol narapela long helpim yu. Man i gat pasin daun i luksave olsem i gat sampela samting em i no inap mekim. Gideon i mekim pasin daun taim em i redi long askim ol narapela long helpim em. (Het. 6:27, 35; 7:24) Ol elda i gat savetingting i mekim olsem tu. Tony em yumi stori pinis long em, em i tok: “Mi save orait long mekim  planti wok moa maski mi no inap mekim olgeta bilong ol, long wanem, em pasin mi bin lain long en taim mi liklik yet. So long taim bilong famili lotu, mipela i stori long topik bilong pasin daun, na mi kisim tingting bilong meri bilong mi long dispela samting. Na tu, mi lukim gen dispela vidio Skulim, Trastim, na Strongim Ol Narapela, Olsem Jisas i Save Mekim long jw.org.” Dispela i kirapim Tony long askim ol narapela long helpim em long mekim ol wok bilong em. Wanem samting i kamap? Tony i tok: “Mi inap mekim wok bilong mi long kongrigesen, na mi gat bikpela haptaim moa bilong strongim pasin pren bilong mi wantaim Jehova.”

7. Hau ol elda i ken bihainim eksampel bilong Gideon sapos ol narapela i sutim tok long ol? (Jems 3:13)

⁷ Bekim tok long pasin isi sapos ol narapela i sutim tok long yu. Taim ol narapela i sutim tok long ol elda, dispela tu inap traim pasin daun bilong ol. Eksampel bilong Gideon i ken helpim ol tu long taim dispela samting i kamap. Gideon i save olsem em i no gutpela olgeta, olsem na taim lain Efraim i sutim tok long em, em i bekim tok long pasin isi. (Het. 8:1-3) Gideon i no belhat na kros long ol. Em i mekim pasin daun na putim gut yau taim ol i kamapim tingting bilong ol, na em i bekim tok long pasin isi na dispela i kilim i dai kros bilong ol. Ol elda i gat savetingting i bihainim eksampel bilong Gideon taim ol i putim gut yau na bekim tok long pasin isi taim ol narapela i sutim tok long ol. (Ritim Jems 3:13.) Long dispela rot, ol i strongim bel isi insait long kongrigesen.

8. Ol elda i mas mekim wanem sapos ol narapela i preisim ol? Stori long wanpela eksampel.

⁸ Givim biknem long Jehova. Taim ol narapela i givim biknem long Gideon bikos em i bin pait na daunim ol Midia, em i kirapim ol long tingim Jehova. (Het. 8:22, 23) Olsem wanem ol elda inap bihainim eksampel bilong Gideon? Ol i mas givim biknem long Jehova taim ol i mekim gut wok bilong ol. (1 Kor. 4:6, 7) Olsem, sapos ol narapela i tok amamas long wanpela elda bikos em i save mekim gut ol tok, em i ken tokim ol olsem Baibel em i as bilong ol tok em i mekim na oganaisesen bilong Jehova i skulim yumi olgeta. Sampela taim ol elda i ken skelim ol yet, olsem pasin ol i bihanim long mekim wok tisa i onarim Jehova o em i kirapim ol narapela long givim biknem long ol. Tingim ekspiriens bilong wanpela elda, nem bilong em Timothy. Taim ol i makim Timothy long kamap elda, em i save laik tru long mekim ol pablik tok. Em i tok: “Kirap bilong ol tok bilong mi i longpela na mi save yusim planti tok piksa. Dispela i mekim na planti i save preisim mi. Tasol ol i fokas long mi na ol i no fokas long tok bilong Baibel na Jehova.” Isi isi Timothy i luksave olsem em i mas senisim wei bilong em long mekim ol tok bambai ol narapela i no ken fokas long em. (Prov. 27:21) Taim em i mekim olsem, wanem gutpela samting i kamap? Em i tok: “Ol narapela i tokim mi long olsem wanem tok bilong mi i bin helpim ol long karim wanpela hevi, sanap strong, na pas gut moa wantaim Jehova. Mi kisim bikpela amamas tru long ol dispela komen winim amamas mi kisim taim ol i save preisim mi long ol yia i go pinis.”

9. Wanem samting i kamap na i traim pasin bilong Gideon long bihainim tok na strongim bel? (Lukim fran pes piksa.)

⁹ Bihain long God i makim Gideon long kamap hetman, sampela samting i kamap na i traim pasin bilong em long bihainim tok na strongim bel. God i givim asainmen long em long bagarapim ol alta bilong lotuim Bal em papa bilong em i bin wokim. (Het. 6:25, 26) Bihain, taim Gideon i kisim planti man long insait long lain ami bilong em, tupela taim God i tokim em long daunim namba bilong ol man insait long ami. (Het. 7:2-7) Na long narapela taim, God i tokim em long i go pait long kem bilong ol birua long biknait.​—Het. 7:9-11.

10. Wanem samting inap traim pasin bilong wanpela elda long bihainim tok?

 ¹⁰ Ol elda i mas “redi long bihainim tok.” (Jems 3:17) Elda husat i gat pasin bilong bihainim tok i save redi long bihainim ol tok bilong Baibel na ol daireksen i kam long oganaisesen bilong God. Taim em i mekim olsem, em i stap gutpela piksa em ol narapela i ken bihainim. Tasol sampela samting inap traim pasin bilong em long bihainim tok. Olsem, em inap pilim hatwok long bihainim olgeta daireksen em i kisim. Sampela taim, em inap tingting olsem i stret long bihainim daireksen em i kisim o nogat. O ating em i kisim wanpela asainmen we ol inap arestim em. Taim ol kain samting olsem i kamap, hau ol elda inap bihainim pasin bilong Gideon long bihainim tok?

11. Wanem samting i ken helpim ol elda long bihainim tok?

¹¹ Putim gut yau long daireksen na bihainim. God i tokim Gideon long hau em i ken bagarapim alta bilong papa bilong em, na ples em bai wokim nupela alta bilong lotuim Jehova, na animal em bai givim olsem ofa. Gideon i no mekim planti askim long daireksen em i kisim, em i redi long bihainim olgeta tok em i kisim. Long nau, ol elda i kisim ol instraksen long oganaisesen bilong Jehova long rot bilong ol pas, ol toksave, na ol gaidlain we i helpim yumi long pas gut wantaim Jehova na stap seif. Yumi laikim tru ol elda long pasin bilong ol long bihainim gut olgeta daireksen ol i kisim long oganaisesen. Taim ol i mekim olsem, dispela i helpim tru kongrigesen olgeta.​—Sng. 119:112.

12. Sapos oganaisesen i kamapim nupela senis, hau ol elda i ken bihainim tok bilong Hibru 13:17?

¹² Redi long mekim senis. Tingim olsem taim Jehova i tokim Gideon long salim klostu olgeta man long lain ami bilong em i go bek long famili bilong ol, em i redi long bihainim tok. (Het. 7:8) Em inap ting olsem, ‘I gat nid long mekim dispela senis? Dispela senis bai wok?’ Tasol Gideon i no mekim olsem, em i bihainim tok bilong God. Long nau, ol elda i bihainim eksampel bilong Gideon taim ol i bihainim tok bilong oganaisesen long senisim wei bilong mekim ol samting. (Ritim Hibru 13:17.) Wanpela eksampel em, long 2014, lain Gavening Bodi i senisim wei bilong kisim mani bilong wokim ol Haus Kingdom na ol Haus Kibung. (2 Kor. 8:12-14) Nau i no gat wok moa long ol kongrigesen i bekim dinau long oganaisesen. Ol kongrigesen long olgeta hap bilong graun i givim kontribiusen bilong sanapim ol Haus Kingdom na ol Haus Kibung long ol ples i gat nid, maski kongrigesen long dispela hap yet i givim liklik kontribiusen tasol bilong helpim wok. Taim José i harim olsem dispela nupela senis i kamap, em i gat tupela tingting long dispela. Em i tingting olsem: ‘Ol bai no inap tru long wokim wanpela Haus Kingdom. Mipela i no save mekim olsem long ples bilong mipela.’ Wanem samting i helpim José long bihainim dispela daireksen? Em i tok: “Tok bilong Provep 3:5, 6 i kirapim mi long trastim Jehova. Na gutpela samting tru i kamap long dispela senis! Mipela i wokim planti moa Haus Kingdom,  na tu, mipela i lain long hau mipela i ken givim mani na ol samting mipela i gat olsem kontribiusen bilong helpim olgeta kongrigesen long graun olgeta long kisim wankain helpim.”

13. (a) Gideon i bilip tru long wanem samting? (b) Hau ol elda i ken bihainim eksampel bilong Gideon? (Lukim tu piksa.)

¹³ Strongim bel na mekim laik bilong Jehova. Gideon i bihainim tok bilong Jehova maski em i pret na em inap lusim laip bilong em. (Het. 9:17) Jehova i mekim ol tok bilong strongim Gideon, olsem na Gideon i bilip tru olsem Em bai sambai long em taim em i lukautim lain bilong Em. Ol elda i stap long ol ples we gavman i tambuim wok lotu bilong yumi, ol i ken bihainim eksampel bilong Gideon. Ol i strongim bel na go pas long lukautim ol miting na wok autim tok maski ol birua inap arestim ol, kwestenim ol, rausim ol long wok mani bilong ol, o paitim ol. c Long taim bilong traipela hevi tru, ol elda i mas strongim bel na bai ol i bihainim ol instraksen ol i kisim, maski ol inap bungim taim nogut. Ating em ol instraksen bilong autim strongpela tok i olsem ren ais na hau long abrusim bagarap long pait bilong Gok Bilong Magok.​—Ese. 38:18; Rev. 16:21.

14. Wanem samting i kamap na i traim pasin bilong Gideon long sanap strong?

¹⁴ Gideon i mas wok hat tru bilong inapim asainmen bilong em olsem hetman. Taim ol Midia i ranawe long biknait taim ol i wok long pait, Gideon i ronim ol kirap long Veli Bilong Jesril i go olgeta long Wara Jordan, ating i gat planti bus na diwai long dispela ples. (Het. 7:22) Yu ting Gideon i givap na stop long ronim ol taim em i kamap long Jordan? Nogat! Maski em i taiet tru, em wantaim 300 man long lain ami bilong em i brukim Wara Jordan na ol i ronim yet ol Midia. Na ol i go kamap long kem bilong ol Midia na pait long ol na daunim ol.​—Het. 8:4-12.

15. Wanem samting inap kamap na i traim pasin bilong ol elda long sanap strong?

¹⁵ Sampela taim ol elda i save pilim taiet tru na ol i pilim olsem ol i no gat strong long lukautim kongrigesen na famili bilong ol. Long dispela kain taim, olsem wanem ol i ken bihainim eksampel bilong Gideon?

16-17. (a) Wanem samting i helpim Gideon long sanap strong? (b) Ol elda i ken bilip tru long wanem samting? (Aisaia 40:28-31) (Lukim tu piksa.)

 ¹⁶ Bilip tru olsem Jehova bai strongim yu. Gideon i bilip tru olsem Jehova bai strongim em, na Jehova i bin mekim olsem. (Het. 6:14, 34) Wanpela taim, Gideon na ol man long lain ami bilong em i ronim tupela king bilong ol Midia taim ol dispela king i sindaun long ol kamel na spit i go. (Het. 8:12, 21) Tasol God i helpim ol Israel na ol i ketsim tupela na kilim ol i dai. Olsem tasol, ol elda i ken bilip tru olsem Jehova bai helpim ol, long wanem, “em i no save taiet o strong bilong em i no save pinis.” Em bai strongim ol long taim ol i nidim helpim.​—Ritim Aisaia 40:28-31.

¹⁷ Tingim ekspiriens bilong Matthew, em i insait long wanpela Hospital Lieson Komiti. Wanem samting i helpim em long sanap strong? Matthew i tok: “Mi lukim truim bilong tok i stap long Filipai 4:13. Long ol taim we mi pilim taiet tru na mi no inap mekim wanpela samting, mi save beten strong long God na askim em long givim mi strong mi nidim na bai mi ken sapotim ol brata bilong mi. Long ol dispela taim, mi pilim holi spirit bilong Jehova i strongim mi na helpim mi long sanap strong.” Olsem Gideon, ol elda bilong yumi inap bungim ol hatwok long taim ol i givim bel tru long lukautim lain sipsip bilong God. Em tru olsem ol i mas daunim ol yet na luksave olsem ol i no inap mekim olgeta samting ol i laik mekim. Tasol ol i ken bilip tru olsem Jehova bai harim beten bilong ol na em bai helpim ol long sanap strong long mekim wok bilong ol.​—Sng. 116:1; Fili. 2:13.

18. Olsem yumi stori pinis, hau ol elda i ken bihainim eksampel bilong Gideon?

¹⁸ Ol elda i ken kisim planti gutpela skul long stori bilong Gideon. Ol elda i mekim pasin daun taim ol i luksave olsem ol i no inap mekim olgeta wok ol i laik mekim insait long kongrigesen na long taim ol i bekim tok long pasin isi taim ol narapela i sutim tok long ol o preisim ol. Ol i mas mekim pasin daun na strongim bel, moa yet long nau taim pinis bilong las de i kam klostu tru. Na ol i mas bilip tru olsem God bai strongim ol long karim olgeta kain hevi ol i feisim. Tru tumas, yumi amamas long ol dispela wasman em ol i wok hat tru long lukautim yumi, na yumi no ken “lusim pasin bilong tingim tru ol kain man olsem.”​—Fili. 2:29.