1-2. Olsem Buk Song 25:14 i kamapim, yumi mas mekim wanem sapos yumi laik pas gut wantaim Jehova?

 YU TING em i bikpela samting long yu mas i gat wanem ol pasin bilong pas gut wantaim wanpela gutpela pren? Ating bai yu tok olsem ol gutpela pren i mas laikim na sapotim narapela narapela. Ating yu no inap tingim pret olsem wanpela pasin i mas stap namel long tupela gutpela pren. Tasol olsem tim skripsa bilong dispela stadi atikol i kamapim, ol man husat i laik pas gut wantaim Jehova, ol i mas “pret long em.”​—Ritim Buk Song 25:14.

² Maski yumi mekim wok bilong Jehova inap longpela taim o nau tasol, yumi olgeta i mas i gat pasin bilong pret na rispek tru long em. Tasol pret long God i makim wanem samting? Olsem wanem yumi ken lain long pret long Jehova? Na yumi ken kisim wanem skul long bosboi Obadia, Hetpris Jehoiada, na King Joas long pasin bilong pret long God?

3. Wanem samting i save mekim yumi pret na dispela i mekim wanem long yumi?

³ Yumi inap pret taim yumi save olsem samting nogut i laik painim yumi. Kain pret olsem i gutpela na em inap helpim yumi long bihainim savetingting. Yumi inap pret long pundaun na dispela inap pasim yumi long go klostu tru long arere bilong wanpela klif. Yumi inap pret long bagarap i laik painim yumi na nau yumi ranawe long wanpela bikpela hevi. Yumi inap pret long bagarapim pasin pren bilong yumi wantaim wanpela yumi laikim tru na dispela inap pasim yumi long mekim ol tok o pasin i no stret.

4. Satan i laik bai yumi mas i gat wanem kain pret long Jehova?

⁴ Satan i laik bai ol manmeri i pret nogut tru long Jehova. Satan i kirapim ol man long bilipim dispela tingting em Elifas i kamapim olsem, Jehova em i man bilong bekim rong, na em i God bilong  belhat na i no gat man inap amamasim em. (Jop 4:18, 19) Satan i laik bai yumi pret nogut tru long Jehova na bai yumi stop long mekim wok bilong Em. Bilong abrusim dispela trap, yumi mas i gat pasin bilong pret o rispek tru long God.

5. Pret long God i makim wanem samting?

⁵ Man husat i save pret o rispek tru long God em i save laikim Em na em i no laik mekim wanpela samting bilong bagarapim pasin pren bilong em wantaim God. Jisas i gat dispela kain pasin bilong “pret long God.” (Hib. 5:7) Em i no pret nogut tru long Jehova, nogat. (Ais. 11:2, 3) Em i laikim tru God na em i laik bihainim tok bilong em. (Jon 14:21, 31) Olsem Jisas, yumi rispek tru long Jehova na pilim tru ol gutpela pasin bilong em, long wanem, em i gat pasin laikim, savetingting, stretpela pasin, na bikpela strong. Na tu, yumi save olsem Jehova i laikim yumi tru na pasin yumi mekim bilong bihainim ol stiatok bilong em o nogat, dispela i mekim sampela samting long em. Pasin bilong yumi i ken mekim Jehova i bel hevi o mekim em i amamas.​—Sng. 78:41; Prov. 27:11.

6. Wanem wanpela rot yumi ken lain long pret long God? (Buk Song 34:11)

⁶ Yumi no bon wantaim pasin bilong pret long Jehova, yumi mas kisim dispela pasin. (Ritim Buk Song 34:11.) Wanpela rot yumi ken mekim olsem, em long lukim ol samting God i bin mekim. Taim yumi lukim “ol samting God i bin wokim,” yumi bai lukim savetingting bilong God, strong bilong em, na pasin bilong em long laikim tru yumi na dispela bai strongim pasin bilong yumi long laikim na rispek tru long em. (Rom 1:20) Wanpela sista nem bilong em Adrienne, em i tok: “Mi pilim tru savetingting bilong Jehova we i stap ples klia long ol samting em i wokim na dispela i helpim mi long luksave olsem em i save long nambawan gutpela rot bilong helpim mi.” Em i tingim tingim ol dispela samting long bel na em i tok: “Wai bai mi mekim ol samting we bai pasim mi long pas gut wantaim Jehova, em As bilong laip bilong mi?” Yu inap lusim sampela haptaim long dispela wik long tingim tingim wanpela samting God i bin wokim? Taim yu mekim olsem, dispela bai strongim tru pasin bilong yu long rispek long Jehova na laikim em.​—Sng. 111:2, 3.

7. Olsem wanem beten i ken helpim yumi long kisim pasin bilong pret o rispek long Jehova?

⁷ Narapela samting i ken helpim yumi long kisim pasin bilong pret long God em long beten oltaim. Taim yumi beten planti taim, dispela bai helpim yumi long tingim Jehova olsem Man i stap tru tru. Long olgeta wan wan taim yumi askim em long helpim yumi long sanap strong na karim wanpela hevi, dispela i kirapim yumi long tingim bikpela strong bilong em. Taim yumi tok tenkyu long Jehova long em i givim Pikinini bilong em olsem presen long yumi, dispela i kirapim yumi long tingim pasin laikim bilong em. Na taim yumi beten na askim Jehova long helpim yumi long stretim wanpela hevi, dispela i kirapim yumi long tingim olsem em i gat bikpela savetingting. Ol kain beten olsem i strongim tru pasin bilong yumi long rispek long Jehova. Na ol i helpim yumi long tingting strong long no ken mekim wanpela samting we inap bagarapim pasin pren bilong yumi wantaim em.

8. Yumi ken mekim wanem bilong holimpas pasin bilong yumi long pret long God?

⁸ Yumi ken holimpas pasin bilong yumi long pret long God long rot bilong stadi long Baibel, na putim mak olsem yumi laik kisim skul long ol gutpela eksampel na ol eksampel nogut em Baibel i stori long ol. Yumi ken stori long tupela gutpela wokman bilong Jehova—Obadia em bosboi bilong haus king bilong King Ahap na Hetpris Jehoiada. Na bihain, yumi bai stori long skul yumi ken kisim long King Joas bilong Juda, em pastaim em i lotuim Jehova, tasol bihain em i lusim Em.

9. Pasin bilong pret long Jehova i mekim wanem long Obadia? (1 King 18:3, 12)

⁹ Long festaim Baibel i stori long Obadia b em i mekim dispela tok olsem: “Obadia i save pret tru long Jehova.” (Ritim 1 King 18:3, 12.) Dispela pasin bilong pret long God i mekim wanem long Obadia? Wanpela samting em olsem, dispela i mekim na em i gat onest pasin na ol narapela inap trastim em, olsem na king i makim em long stap bosboi bilong lukautim haus king bilong em. (Skelim Nehemia 7:2.) Pasin bilong Obadia long pret long God i mekim na em i gat strongpela bel tru—em pasin em i mas i gat. Em i stap long haptaim bilong King Ahap, em wanpela king nogut tru husat i bin “mekim ol pasin nogut long ai bilong Jehova na ol pasin em i mekim i nogut moa winim ol king i stap paslain long em.” (1 Kin. 16:30) Na tu, meri bilong Ahap em Jesebel, em i save lotuim god Bal na em i heitim tru Jehova na em i traim long kilim i dai olgeta manmeri i lotuim Jehova long kingdom long hap not. Em i bin kilim i dai planti profet bilong God. (1 Kin. 18:4) Tru tumas, Obadia i lotuim Jehova long wanpela haptaim nogut tru.

10. Olsem wanem Obadia i soim olsem em i gat strongpela bel tru?

¹⁰ Olsem wanem Obadia i soim olsem em i gat strongpela bel tru? Taim Jesebel i wok long painim ol profet bilong God long kilim ol i dai, Obadia i kisim 100 profet na em i haitim “50 long wanpela keiv na 50 long narapela keiv na [em i] wok long lukautim ol long bret na wara.” (1 Kin. 18:13, 14) Sapos Jesebel i bin painimaut long samting Obadia i bin strongim bel na mekim, em bai kilim em i dai. Yumi save olsem Obadia em i man wankain olsem yumi, na em i no gat tingting long i dai. Tasol Obadia i laikim tru Jehova na ol wokman bilong Em winim laip bilong em yet.

11. Olsem wanem ol wokman bilong Jehova long nau i mekim wankain pasin olsem Obadia? (Lukim tu piksa.)

¹¹ Long nau, planti wokman bilong Jehova i stap long ol kantri we gavman i tambuim wok bilong yumi. Ol i rispektim ol gavman, tasol olsem Obadia i bin mekim, ol dispela gutpela bratasista bilong yumi i no lusim pasin bilong ol long lotuim Jehova—em samting i stret long Jehova tasol i mas kisim. (Mat. 22:21) Ol i soim olsem ol i pret long God long rot bilong bihainim tok bilong  em na ol i no bihainim tok bilong ol man. (Apo. 5:29) Ol i mekim olsem taim ol i wok yet long autim gutnius na long pasin hait ol i bung wantaim long ol miting. (Mat. 10:16, 28) Ol i laik tru long helpim ol bratasista bilong ol long kisim ol samting bilong bilip ol i nidim bilong pas gut yet wantaim Jehova. Tingim stori bilong Henri, em i stap long wanpela kantri long Afrika we gavman i bin tambuim wok bilong yumi inap sampela haptaim. Long taim bilong tambu, Henri i bin volantia long i go givim ol buk na nius bilong Baibel long ol wanbilip Witnes. Em i tok: “Mi man bilong sem. So mi save olsem pasin bilong mi long rispek tru long Jehova i bin helpim mi long strongim bel long mekim dispela wok.” Yu inap strongim bel na mekim wankain samting olsem Henri i bin mekim? Yu ken mekim olsem sapos yu gat pasin bilong pret o rispek tru long God.

12. Olsem wanem Hetpris Jehoiada na meri bilong em i soim olsem ol i gat pasin bilong stap gut long Jehova?

¹² Hetpris Jehoiada i gat pasin bilong pret long Jehova, na dispela pret i kirapim em long stap gut long God na strongim lotu i tru. Em i kamapim klia dispela pasin bilong em taim Atalia, em pikinini meri bilong Jesebel i laik stilim wok king long Juda. I gat as long ol manmeri i pret long Atalia. Em i meri nogut tru na em i mangal long stap olsem kwin, olsem na em i traim long kilim i dai olgeta lain husat bai kamap king, em ol tumbuna pikinini man bilong em yet! (2 Sto. 22:10, 11) Wanpela bilong ol dispela pikinini em Joas, em i bin abrusim bagarap, long wanem, Jehosabiat em meri bilong Jehoiada i bin haitim em. Jehosabiat na man bilong em i haitim dispela pikinini na lukautim em. Taim Jehoiada na Jehosabiat i mekim olsem, ol i helpim long lukautim lain king bilong Devit. Jehoiada i stap gut long Jehova na em i no pret long Atalia.​—Prov. 29:25.

13. Taim Joas i gat 7-pela krismas, olsem wanem Jehoiada i soim gen olsem em i stap gut long God?

¹³ Taim Joas i gat 7-pela krismas, Jehoiada i mekim gen samting bilong soim olsem em i stap gut long Jehova. Em i mekim wanpela plen. Sapos plen bilong em i wok gut, Joas bai kamap king, em tumbuna pikinini bilong Devit husat i gat rait long kisim wok king. Tasol sapos plen bilong em i no wok gut, Jehoiada inap lusim laip bilong em. Jehova i blesim em na plen bilong em i wok gut. Ol hetman na ol Livai i sapotim Jehoiada na ol i mekim Joas i kamap king na ol i tokim ol man long kilim i dai Atalia. (2 Sto. 23:1-5, 11, 12, 15; 24:1) Bihain Jehoiada i “mekim kontrak namel long Jehova na king na ol manmeri, olsem ol bai stap yet olsem ol manmeri bilong Jehova.” (2 Kin. 11:17) Jehoiada i “putim tu ol wasman bilong geit long was long ol geit bilong haus bilong Jehova, na bai ol man i no klin i no ken kam insait.”​—2 Sto. 23:19.

14. Long wanem rot Jehova i onarim Jehoiada long em i bin onarim Jehova?

¹⁴ Bipo Jehova i bin tok: “Ol man i givim ona long mi, bai mi givim ona long ol.” Na tru tumas, em i bin givim gutpela pe long Jehoiada. (1 Sml. 2:30) Olsem, em i bin larim ol man i raitim stori bilong ol gutpela pasin em dispela hetpris i bin mekim bambai yumi ken kisim skul long en. (Rom 15:4) Na taim Jehoiada i dai, em i kisim spesel ona na ol i planim em “long Taun Bilong Devit long hap we ol i bin planim ol king, long wanem, em i mekim planti gutpela wok long Israel, na helpim wok bilong God tru na bilong haus bilong God.”​—2 Sto. 24:15, 16.

15. Yumi ken kisim wanem skul long stori bilong Jehoiada? (Lukim tu piksa.)

¹⁵ Stori bilong Jehoiada i ken helpim yumi olgeta long kisim pasin bilong pret long God. Ol elda Kristen i ken bihainim pasin bilong Jehoiada long oltaim redi long lukautim kongrigesen. (Apo. 20:28) Ol lapun bratasista i ken kisim skul long Jehoiada olsem taim ol i pret long Jehova  na stap gut yet long em, Em inap yusim ol long inapim samting Em i tingting pinis long mekim. Em i no save les long ol. Ol yangpela i ken kisim skul long pasin Jehova i mekim long Jehoiada na bihainim pasin bilong Em long soim ona long ol lapun na rispektim ol, moa yet em ol lapun husat i bin mekim wok bilong God inap longpela taim. (Prov. 16:31) Na yumi olgeta i ken kisim skul tu long pasin ol hetman na ol Livai i bin mekim bilong sapotim Jehoiada. Yumi olgeta i ken sapotim “ol man i go pas” long yumi long rot bilong bihainim tok bilong ol.​—Hib. 13:17.

16. Wanem samting i soim olsem King Joas i no gat strong?

¹⁶ King Joas i kisim gutpela helpim long Jehoiada. (2 Kin. 12:2) Dispela i mekim na dispela yangpela king i laik tru long amamasim Jehova. Tasol bihain long Jehoiada i dai, Joas i putim yau long ol apostet hetman. Wanem samting i kamap? Joas wantaim ol manmeri i stap aninit long em “i kirap lotuim ol pos bilong lotu na ol imis.” (2 Sto. 24:4, 17, 18) Jehova i bel hevi tru na em i “wok long salim ol profet i go long ol long bringim ol i kam bek . . . , tasol ol i no laik harim.” Ol i no laik putim yau tu long Sekaraia em pikinini man bilong Jehoiada, em i profet bilong Jehova na wanpela pris, na tu, em i kasen bilong Joas. King Joas i no gat pasin bilong tenkyu long famili husat i bin mekim planti samting bilong helpim em, na em i tok na ol i kilim i dai Sekaraia.​—2 Sto. 22:11; 24:19-22.

17. Wanem samting i kamap long Joas?

¹⁷ Joas i no holimpas pasin bilong pret na rispek tru long Jehova, olsem na hevi i painim em.  Jehova i bin tok: “Ol man i no laikim mi, bai mi no laikim ol.” (1 Sml. 2:30) Bihain, liklik lain ami bilong Siria i kam pait long “bikpela lain ami” bilong Joas na em i kisim “bikpela bagarap tru.” Bihain long ol Siria i go bek, ol wokman bilong Joas yet i kilim em i dai bikos long em i bin kilim i dai Sekaraia. Dispela king nogut i no gat gutnem inap long ol i ken planim em “long hap we ol i save planim ol king.”​—2 Sto. 24:23-25; lukim “son of Barachiah” long stadi nout long Matyu 23:35 long Inglis Baibel.

18. Olsem Jeremaia 17:7, 8 i kamapim, yumi ken mekim wanem na bai yumi no bihainim pasin bilong Joas?

¹⁸ Yumi ken kisim wanem skul long stori bilong Joas? Em i olsem wanpela diwai em ol rop bilong en i no go daun tumas long graun na narapela hap diwai i sapotim em. Taim dispela hap diwai—em Jehoiada—i dai, win bilong apostet i blo na i pundaunim dispela diwai, em Joas. Em wanpela bikpela skul yumi kisim olsem pasin bilong yumi long pret long God i no ken hangamap tasol long ol gutpela pasin bilong ol wanbilip bilong yumi, na dispela i makim tu ol wanfamili bilong yumi. Bilong stap strong long bilip, yumi yet i mas strongim pasin bilong yumi long lotuim God na pret long em long rot bilong oltaim mekim ol stadi bilong yumi, tingim tingim long bel ol tok, na beten.​—Ritim Jeremaia 17:7, 8; Kol. 2:6, 7.

19. Jehova i laik yumi mas mekim wanem?

¹⁹ Jehova i no tokim yumi long mekim planti samting. Samting em i laik yumi mas mekim i stap long Eklisiastis 12:13, em i tok: “Yu mas pret long God tru na bihainim ol lo bilong em, dispela em nambawan wok man i mas mekim.” Taim yumi pret long God, yumi bai sanap strong na karim wanem ol hevi i painim yumi long bihain wankain olsem Obadia na Jehoiada i bin mekim. I no gat wanpela samting inap bagarapim pasin pren bilong yumi wantaim Jehova.