1-2. Wankain olsem Lot, ol Kristen long nau i bungim wanem hevi?

 TAIM yumi lukim ol pasin nogut em ol man long nau i bihainim, yumi pilim wankain olsem stretpela man Lot i bin pilim. Em “i bin bel hevi tru long ol man bilong sakim lo em ol i bihainim pasin bikhet na i no sem” bikos em i save olsem Papa bilong yumi long heven i heitim pasin nogut. (2 Pita 2:7, 8) Lot i pret long God na laikim Em na dispela i kirapim em long sakim ol pasin nogut bilong ol man long taim bilong em. Yumi tu i stap namel long ol manmeri em ol i no rispektim ol stretpela lo bilong Jehova. Maski i olsem, yumi ken bihainim yet ol stretpela pasin sapos yumi holimpas pasin bilong yumi long laikim God na kisim pasin bilong pret o rispek long em.​—Prov. 14:2.

² Bilong mekim olsem, Jehova i givim yumi ol gutpela tok i stap long Buk Provep bilong strongim yumi. Olgeta Kristen em ol man na ol meri na ol yangpela na ol lapun, ol i ken kisim gutpela helpim tru taim ol i skelim ol gutpela tok kaunsel i stap long dispela buk.

3. Olsem Provep 17:3 i kamapim, wanem wanpela risen na yumi mas lukautim bel bilong yumi? (Lukim tu piksa.)

³ Nambawan bikpela risen na yumi mas lukautim bel bilong yumi em olsem, Jehova i save skelim bel bilong yumi. Dispela i makim olsem em i lukim bel bilong yumi na em i save yumi wanem kain man o meri tru, em samting ol narapela i no inap long lukim. (Ritim Provep 17:3.) Em bai laikim yumi sapos yumi pulimapim tingting bilong yumi wantaim savetingting bilong em we bai helpim yumi long stap laip oltaim. (Jon 4:14) Taim yumi mekim olsem, ol pasin nogut na ol tingting nogut bilong Satan na ol man bilong dispela graun i no inap bagarapim tingting na pasin bilong yumi. (1 Jon 5:18, 19) Na taim yumi pas gut moa wantaim Jehova, dispela bai strongim pasin bilong yumi long laikim na rispektim em. Yumi no  laik mekim Papa bilong yumi i bel hevi, olsem na yumi bai heitim tru tingting bilong mekim sin. Taim traim i kamap bilong mekim wanpela rong, yumi bai askim yumi yet olsem, ‘Hau na mi laik mekim samting bilong bagarapim bel bilong dispela Man husat i bin laikim mi tru?’​—1 Jon 4:9, 10.

4. Olsem wanem pasin bilong pret long Jehova i lukautim wanpela sista na em i no pundaun long traim?

⁴ Marta em wanpela sista long Kroesia na traim i painim em long mekim pasin pamuk. Em i tok: “Mi pilim hatwok long tingting klia na long daunim dispela laik bilong mekim sin bilong kisim amamas bilong sotpela taim. Tasol pasin bilong pret long Jehova i lukautim mi.” b Olsem wanem pasin bilong pret long God i bin lukautim em? Marta i tok em i tingim tingim long bel ol hevi we inap kamap sapos em i mekim disisen i no stret. Yumi tu i ken mekim olsem. Hevi we i nogut tru i olsem, yumi bai mekim Jehova i bel hevi na yumi bai i no gat rot long lotuim em inap oltaim oltaim.​—Stt. 6:5, 6.

5. Yu inap kisim wanem skul long stori bilong Leo?

⁵ Taim yumi pret long Jehova, yumi no inap givim eskius long mekim pasin nogut. Leo i stap long Kongo i lainim dispela samting. Fopela yia bihain long em i kisim baptais, em i bung wantaim ol poroman nogut. Em i ting olsem em i no mekim sin long Jehova sapos em yet i no mekim ol pasin nogut. Tasol bihain ol poroman nogut i pulim em na em i dring spak na mekim pasin pamuk. Dispela i mekim na em i tingim gen ol samting em papamama Kristen bilong em i bin skulim em long en, na em i tingim tu amamas em i bin lusim. Wanem samting i kamap? Em i kirap gen long bihainim stretpela pasin. Ol elda i helpim em na em i kam bek long Jehova. Long nau em i amamas long mekim wok olsem wanpela elda na spesel painia.

6. Yumi bai stori long tok piksa bilong wanem tupela meri?

⁶ Yumi ken skelim Provep sapta 9 we i mekim  tok piksa long tupela meri, wanpela i makim savetingting na narapela i makim longlong pasin. (Skelim Rom 5:14; Galesia 4:24.) Taim yumi mekim olsem, tingim olsem ol man long graun bilong Satan i tingting oltaim long mekim pasin pamuk na lukim ponografi. (Efe. 4:19) So em i bikpela samting long yumi mas wok yet long kisim pasin bilong pret long God na lusim pasin nogut. (Prov. 16:6) Yumi olgeta, ol man na meri wantaim, i ken kisim helpim long ol tok i stap long Provep sapta 9. Baibel i tok dispela tupela meri i wok long singautim ol man i sot long save—em ol man i “sot long gutpela tingting”—long go long haus bilong ol. I olsem tupela i tok, ‘Kam long haus bilong mi na yumi kaikai wantaim.’ (Prov. 9:1, 5, 6, 13, 16, 17) Tasol samting i painim ol man i go long haus bilong tupela em i narapela narapela.

7. Olsem Provep 9:13-18 i kamapim, wanem samting i painim ol man i bihainim singaut bilong longlong meri? (Lukim tu piksa.)

⁷ Skelim singaut bilong “longlong meri.” (Ritim Provep 9:13-18.) Em i no pret long singautim ol man i sot long gutpela tingting olsem, “Kam insait long hia” na yumi kaikai wantaim. Wanem samting i kamap long ol man i bihainim singaut bilong em? Baibel i tok: “Ol daiman i no gat strong i stap long hap.” Ating yu tingim ol wankain tok piksa i stap long ol narapela sapta bilong Buk Provep. Yumi kisim tok lukaut long sakim “bikhetmeri” na “meri nogut.” Baibel i tok: “Taim man i go long haus bilong em, i olsem em i go bilong dai.” (Prov. 2:11-19) Provep 5:3-10 i givim tok lukaut long yumi long narapela “bikhetmeri” em “lek bilong em i bihainim rot i go daun long dai.”

8. Yumi mas mekim wanem disisen?

⁸ Ol man i harim singaut bilong “longlong meri” i mas mekim disisen: Ol bai bihainim singaut bilong em o sakim? Ating yumi tu i mas mekim kain disisen olsem. Yumi bai mekim wanem sapos wanpela i traim long pulim yumi long mekim pasin pamuk, o yumi lukim ol piksa o vidio bilong ponografi i kamap long fon bilong yumi o long Intenet?

9-10. Wanem sampela risen na yumi mas sakim pasin pamuk?

⁹ I gat ol gutpela risen na yumi mas sakim pasin pamuk. Baibel i tok dispela “longlong meri” i wok long singaut olsem: “Wara ol i bin stilim i swit.” “Wara ol i bin stilim” i makim wanem samting? Baibel i tok taim man na meri marit i mekim maritpasin, dispela i olsem hulwara i givim nupela strong. (Prov. 5:15-18) Man na meri husat i marit stret long ai bilong God, i stret long tupela i ken mekim maritpasin insait long marit bilong ol. Tasol dispela i no wankain long “wara ol i bin stilim.” Dispela i makim pasin pamuk em man na meri i no marit i bin mekim na i no stret long ol i mekim olsem. Ol i hait na mekim dispela kain pasin, wankain olsem stilman i hait na em i stilim samting.  Ol manmeri i mekim dispela pasin, ol inap pilim olsem “wara ol i bin stilim” em i swit taim ol i save olsem ol man i no bin painimaut long dispela samting ol i bin mekim. Tasol sori tru, ol i giamanim ol yet! Jehova i lukim olgeta samting. Taim Jehova i no orait moa long yumi, dispela em samting i nogut tru na em i no samting we “i swit” o yumi amamas long en. (1 Kor. 6:9, 10) Tasol i gat sampela moa hevi we i painim ol man i mekim dispela pasin.

¹⁰ Taim wanpela i mekim pasin pamuk, em inap pilim sem na pilim olsem em i samting nating, kisim bel nating, na famili i bruk. I klia tru olsem em i savetingting long abrusim “haus” bilong longlong meri na no ken go kaikai wantaim em. Ol man i mekim pasin pamuk i no pas gut moa wantaim Jehova, na tu, planti bilong ol i kisim ol sik bilong pamuk we i mekim na ol i lusim laip bilong ol. (Prov. 7:23, 26) Ves 18 bilong sapta 9 i tok: “Ol manmeri em i singautim, ol i stap insait tru long Matmat.” So wai na planti manmeri i bihainim singaut bilong dispela meri we i bringim ol i go long hevi?​—Prov. 9:13-18.

11. Wai na pasin bilong lukim ponografi inap nogutim tru man?

¹¹ Wanpela trap em planti man i pundaun long en em pasin bilong lukim ponografi. Sampela man i ting pasin bilong lukim ponografi em i no inap long nogutim ol. Tasol ponografi em samting i nogut tru; man i lukim ponografi i no rispektim em yet na em inap kalabus long dispela pasin. Ol piksa na vidio bilong ponografi inap pas strong long tingting bilong man, na i hatwok tru long em i rausim ol dispela piksa long tingting bilong em. Na tu, ponografi i no save kilim i dai ol laik nogut; em i save kirapim na strongim ol dispela laik nogut. (Kol. 3:5; Jems 1:14, 15) Tru tumas, planti man em ol i lukim ponografi i bin mekim pasin pamuk.

12. Hau yumi ken sakim ol piksa we inap kirapim laik bilong yumi long mekim pasin pamuk?

¹² Yumi ol Kristen i mas mekim wanem sapos piksa bilong ponografi i kamap long fon o teblet bilong yumi? Wantu tasol yumi mas sakim dispela piksa na no ken lukluk long en. Samting we i ken helpim yumi long mekim olsem em long tingim olsem nambawan samting i dia tumas long yumi em pasin pren bilong yumi wantaim Jehova. Sampela piksa em ol i no piksa bilong ponografi, tasol ol inap kirapim laik bilong yumi long mekim pasin pamuk. Wai na yumi no ken lukluk long ol dispela kain piksa? Bikos yumi no laik tru long mekim wanpela liklik samting we inap kirapim yumi long mekim pasin pamuk long bel bilong yumi. (Mat. 5:28, 29) David em wanpela elda long Tailan, na em i tok: “Mi save askim mi yet: ‘Maski ol dispela piksa em i no piksa bilong ponografi, Jehova bai amamas sapos mi wok long lukluk yet long ol?’ Taim mi wokim tingting olsem, dispela i helpim mi long bihainim savetingting.”

13. Wanem samting i helpim yumi long bihainim savetingting?

¹³ Taim yumi kisim pasin bilong pret o rispek long Jehova, dispela bai helpim yumi long bihainim savetingting. Pasin bilong pret long God “em i stat,” o faundesen “bilong savetingting.” (Prov. 9:10) Yumi luksave long dispela long kirap bilong Provep sapta 9 we Baibel i mekim tok piksa long “trupela savetingting” i olsem wanpela meri.

14. Provep 9:1-6 i stori long wanem narapela singaut?

¹⁴ Ritim Provep 9:1-6. Long hia yumi kisim save long singaut i kam long Jehova, em i Krieta bilong olgeta samting na em i As na Faundesen bilong trupela savetingting. (Prov. 2:6; Rom 16:27) Baibel i mekim tok piksa long dispela olsem wanpela bikpela haus i gat 7-pela strongpela pos bilong en. Dispela i kamapim klia olsem Jehova i save givim samting long olgeta man na em i welkamim olgeta man husat i laik bihainim savetingting bilong em long laip bilong ol.

15. God i singautim yumi long mekim wanem?

¹⁵ Jehova em i Man Bilong Givim samting long olgeta man. Long tok piksa bilong meri i makim  “trupela savetingting” long Provep sapta 9, yumi kisim save olsem Jehova i save givim yumi planti gutpela samting. Baibel i tok piksa long dispela meri i redim gut ol abus bilong em, miksim wain bilong em, na em i putim ol dis kaikai long tebol long haus bilong em. (Prov. 9:2) Na tu, ves 4 na 5 i tok: “Em [trupela savetingting] i tok long man i sot long gutpela tingting: ‘Kam, kaikai bret bilong mi,’” Wai na yumi mas kam long haus bilong trupela savetingting na kisim kaikai em i laik givim long yumi? Jehova i laik bai ol pikinini bilong em i bihainim savetingting na stap gut. Em i no laik bai yumi lainim samting long rot bilong ol rong yumi mekim, dispela inap mekim yumi bel hevi na yumi rigret. Olsem na “em i bungim bungim i stap ol savetingting bilong helpim ol stretpela man.” (Prov. 2:7) Taim yumi pret o rispek long Jehova, yumi bai laik tru long amamasim em. Yumi bai putim yau long gutpela savetingting bilong em na amamas long bihainim.​—Jems 1:25.

16. Olsem wanem pasin bilong pret long God i helpim Alain long mekim gutpela disisen, na wanem gutpela samting i kamap?

¹⁶ Skelim olsem wanem pasin bilong pret long God i helpim Alain long mekim gutpela disisen. Dispela elda Kristen na skul tisa i tok: “Planti wanwok bilong mi i tingim ol muvi bilong ponografi olsem rot bilong givim skul long ol yet long maritpasin.” Tasol Alain i save dispela em i no tru. Em i tok: “Pasin bilong pret long God i helpim mi na mi sakim ol dispela muvi. Na tu, mi tokim ol wanwok long risen na mi mekim olsem.” Em i bihainim edvais bilong “trupela savetingting” long “wokabaut i go het long pasin bilong kliagut long ol samting.” (Prov. 9:6) Sampela tisa em ol wanwok bilong Alain i luksave long pasin bilong Alain long sanap strong, na dispela i kirapim ol long stadi long Baibel na go long ol miting Kristen.

17-18. Ol man i bihainim singaut bilong “trupela savetingting” i kisim wanem ol blesing, na ol i ken luk fowed long wanem samting? (Lukim tu piksa.)

¹⁷ Jehova i mekim tok piksa long dispela tupela meri na em i soim yumi long hau yumi ken stap amamas long bihain. Ol man i bihainim singaut bilong dispela “longlong meri,” ol i tingting tasol long “swit” bilong amamas ol bai kisim taim ol i mekim pasin pamuk, tasol em amamas bilong sotpela taim tasol. Ol i tingting tasol long amamas ol bai kisim long nau, na ol i no tingting long samting bai kamap bihain. Ol pasin ol i mekim bai bringim ol i go “stap insait tru long Matmat.”​—Prov. 9:13, 17, 18.

¹⁸ Gutpela samting bai kamap long ol man em ol i bihainim singaut bilong “trupela savetingting”! Ol manmeri em i singautim ol long i kam kaikai long haus bilong em, ol i amamas tru bikos ol i gat olgeta kain gutpela kaikai long sait bilong bilip bilong helpim ol long pas gut wantaim Jehova. (Ais. 65:13) Long rot bilong profet Aisaia, Jehova i tok: “Putim gut yau long mi, na kaikai ol gutpela kaikai,  na bai yupela i kisim bikpela amamas long samting i gutpela moa.” (Ais. 55:1, 2) Yumi wok long lain long laikim ol samting Jehova i laikim na heitim ol samting em i heitim. (Sng. 97:10) Na yumi amamas tru long invaitim ol narapela long kisim skul long “trupela savetingting.” I olsem yumi stap “long ol ples antap bilong taun bilong singautim ol manmeri, olsem: ‘Husat man i sot long save, em i ken kam insait long hia.’” Ol helpim em yumi yet i kisim na ol helpim em ol man i kisim taim ol i bihainim dispela singaut, ol i no bilong nau o bilong sotpela taim tasol, nogat. Ol i bilong oltaim oltaim, na ol i opim rot long yumi inap “stap laip” oltaim na “wokabaut i go het long pasin bilong kliagut long ol samting.”​—Prov. 9:3, 4, 6.

19. Olsem Eklisiastis 12:13, 14 i kamapim, yumi mas tingting strong long mekim wanem? (Lukim tu blok “ Pasin Bilong Pret Long God i Lukautim Yumi.”)

¹⁹ Ritim Eklisiastis 12:13, 14. Pasin bilong pret long God i ken wok yet long lukautim bel bilong yumi na helpim yumi long bihainim ol stretpela pasin na pas gut wantaim Jehova long dispela taim bilong las de we i nogut tru. Pasin bilong pret o rispek long God bai kirapim yumi long wok yet long invaitim planti man moa long kisim “trupela savetingting” na bai em i ken lukautim ol.