Mi bon long Disemba 22, 1929, long Noville em wanpela liklik viles i gat 9-pela fam long en, na em i stap klostu long Bastogne, long Belgian Ardennes. Mi gat ol gutpela memori long taim mi liklik na mi stap long fam wantaim papamama bilong mi. Long olgeta de, mi na liklik brata bilong mi Raymond i save kisim milk long ol bulmakau, na tu, mipela i save helpim wok bilong kisim ol kaikai long gaden taim ol i redi. Long viles bilong mipela, olgeta i save wok bung wantaim bilong helpim narapela narapela.

Papamama bilong mi, Emile na Alice, ol i strongpela Katolik. Ol i save go long Misa long olgeta Sande. Tasol long 1939 samting, ol painia em ol i bilong Inglan i kam long viles bilong mipela na ol i tokim Papa olsem em i ken kisim sabskripsen bilong nius Consolation, em nau yumi kolim olsem nius Kirap! I no longtaim na Papa i luksave olsem ol tok i stap long dispela nius ol i tok i tru, olsem na em i kirap long ritim Baibel. Taim em i stop long go long Misa, ol neiba bilong mipela em pastaim ol i save mekim gut long mipela, ol i birua nogut tru long em. Ol i putim presa long Papa i mas stap yet olsem wanpela Katolik, na dispela i mekim na planti taim ol i save tok pait wantaim em.

Mi bel hevi tru long lukim Papa i karim dispela hevi. Olsem na mi beten askim God long helpim Papa, olsem mi bin stori long kirap bilong dispela atikol. Mi amamas tru taim mi luksave olsem isi isi ol neiba bilong mipela i no moa birua long Papa. Nau mi bilip tru olsem Jehova em “Man Bilong Harim ol prea.”

Natsi Jemani i pait na daunim Beljam long Me 10, 1940, dispela i mekim na bikpela lain manmeri i ranawe lusim Beljam. Famili bilong mipela i ranawe i go stap long hap saut bilong Frans. Long dispela wokabaut bilong mipela, sampela taim mipela i kamap long ol ples we ami bilong Jemani na Frans  i pait long narapela narapela na mipela inap long kisim bagarap.

Bihain, taim mipela i kam bek long fam bilong mipela, mipela i luksave olsem ol man i bin stilim klostu olgeta samting bilong mipela. Dok bilong mipela tasol nem bilong em Bobbie i stap bilong welkamim mipela. Ol kain hevi olsem i mekim na mi tingting olsem, ‘Wai na i gat ol woa na pen na hevi i stap?’

Long dispela taim, mipela i kisim gutpela helpim taim Brata Emile Schrantz, a em wanpela elda painia i save kam visitim mipela. Em i yusim Baibel long stori gut long risen na pen na hevi i stap na em i bekim ol narapela askim em mi gat long laip. Mi kisim pasin bilong pas gut tru wantaim Jehova na mi bilip tru olsem em i God bilong pasin laikim.

Paslain long woa i pinis, famili bilong mipela i save amamas tru long bung na toktok wantaim ol narapela Witnes. Long Ogas 1943, Brata José-Nicolas Minet i kam visitim fam bilong mipela long mekim wanpela tok. Em i askim mipela, “Husat i laik kisim baptais?” Papa i putim han i go antap, na mi tu i mekim olsem. Mipela i kisim baptais long wanpela liklik wara i stap klostu long fam bilong mipela.

Long Disemba 1944, ami bilong Jemani i kirap long mekim wanpela bikpela pait bilong Wol Woa 2 long hap wes bilong Yurop, ol i kolim dispela pait Battle of the Bulge. Mipela i stap klostu long hap we pait i wok long kamap, olsem na inap wanpela mun samting, mipela i stap long beismen bilong haus bilong mipela. Wanpela taim mi kam ausait bilong givim kaikai long ol animal, na ol man i sut long gan na ol bulet i flai i kam na rausim rup bilong haus bilong ol animal. Wanpela soldia bilong Amerika i stap klostu long mi long hap we ol animal i save stap long en, em i singaut olsem, “Go daun!” Mi ran i go klostu long em na slip i go daun, na em i kisim helmet bilong em na putim long het bilong mi bilong protektim mi.

Bihain long woa, planti taim mipela i save kontektim ol bratasista long kongrigesen long Liège, em ol i stap longwe long mipela inap 90 kilomita samting long hap not. I no longtaim na mipela i kirapim wanpela liklik stadi grup long Bastogne. Mi kirap wok long edministresen bilong kisim takis na rot i op long mi inap go long skul bilong stadim lo. Bihain, mi wok long lokal gavman ofis. Long 1951, mipela i oganaisim wanpela kibung sekit long Bastogne. Klostu long 100 manmeri i kam long dispela kibung, na wanpela strongpela painia sista nem bilong em  Elly Reuter, em tu i bin kam. Em i ron long baisikol inap 50 kilomita bilong kam long dispela kibung. I no longtaim na mipela i laikim narapela narapela na mipela i pasim tok long marit. Elly i bin kisim invatesen bilong go long Skul Gileat long Amerika. Em i raitim pas i go long wol hetkota bilong tokim ol long risen na em i no inap go long dispela skul. Long dispela taim Brata Knorr i go pas long lidim lain bilong Jehova, na long gutpela pasin em i bekim pas bilong Elly na em i tok bihain sapos rot i op em inap go long Skul Gileat wantaim man bilong em. Mi na Elly i marit long Februeri 1953.

Long dispela seim yia, mitupela Elly i go long New World Society Assembly i kamap long Yankee Stadium long New York. Long dispela hap, mi bungim wanpela brata na em i tokim mi long wanpela gutpela wok mani em mi inap mekim na em i invaitim mi long muv i go long Amerika. Bihain long mitupela Elly i beten long Jehova long dispela samting, mipela i mekim disisen long tok nogat long dispela wok mani na mipela i go bek long Beljam long sapotim wanpela liklik grup long Bastogne we i gat inap olsem 10-pela pablisa long en. Long yia bihain, mipela i amamas tru taim Elly i karim wanpela bebi boi, nem bilong em Serge. Tasol sori tru, 7-pela mun bihain Serge i sik na em i dai. Mipela i beten na tokim Jehova long bikpela bel pen mipela i pilim, na mipela i kisim strong taim mipela i tingim bilip bilong kirap bek.

Long Oktoba 1961, mi painim wanpela pat-taim wok we i opim rot long mi inap mekim wok painia. Long dispela seim de, mi kisim fon kol i kam long brens sevan long Beljam. Em i askim mi sapos mi redi long kirap mekim wok olsem wanpela sekit sevan, nau yumi kolim olsem wasman sekit. Mi askim em olsem: “Em orait long mipela i mekim wok painia pastaim na bihain mipela i ken mekim dispela asainmen?” Ol brata i tok orait long dispela. Bihain long mipela i mekim wok painia inap 8-pela mun, mipela i kirap mekim wok sekit long Septemba 1962.

Bihain long mipela i mekim wok sekit inap 2-pela yia, ol i invaitim mipela long wok long Betel long Brussels. Mipela i kirap wok long Betel long Oktoba 1964. Dispela nupela asainmen i opim rot long mipela inap kisim planti blesing. Bihain liklik long Brata Knorr i visitim Betel bilong mipela long 1965, mi kirap nogut olsem ol i makim mi long mekim wok olsem brens sevan. Bihain, ol i invaitim mitupela Elly long go long namba 41 klas bilong Skul Gileat. Tok em Brata Knorr i bin mekim 13 yia i go pinis i kamap tru! Bihain long mipela i grediuet, mipela i go bek long Betel long Beljam.

Long ol yia i go pinis, mi gat privilis long yusim save bilong mi long lo long difendim raits bilong yumi long stap fri long mekim lotu long Yurop na ol narapela ples tu. (Fili. 1:7) Dispela i opim rot long mi inap toktok wantaim ol bikman bilong winim 55 kantri we ol i tambuim sampela wok bilong yumi o olgeta wok bilong yumi. Taim mi go bungim ol dispela bikman, mi no save stori long save mi gat long sait bilong lo, mi save tokim ol olsem mi “wanpela wokman bilong God.” Oltaim mi save beten long Jehova na askim em long stiaim mi, na mi luksave  olsem “bel bilong king [o jas] i olsem liklik hanwara long han bilong Jehova. Em i save stiaim dispela hanwara i go long wanem hap em i laikim.”—Prov. 21:1.

Wanpela ekspiriens mi no inap lusim tingting long en em toktok i kamap namel long mi na wanpela memba bilong Palamen Bilong Yurop. Planti taim mi bin askim sapos mi inap toktok wantaim em, na wanpela taim em i tok orait long mitupela i ken bung na toktok. Em i tokim mi, “Bai mi givim yu 5-pela minit tasol.” Mi daunim het na mi beten. Dispela memba bilong palamen i tingting planti na em i askim mi long mi mekim wanem. Mi apim het na mi tok, “Mi tok tenkyu long God bikos yu wanpela wokman bilong em.” Em i askim mi, “Yu minim wanem?” Mi soim em tok bilong Rom 13:4. Em i wanpela Protestan, so em i pilim tru tok bilong dispela Baibel ves. Wanem samting i kamap? Mitupela i stori inap 30 minit, na dispela miting i kamapim gutpela samting. Na em i tok tu olsem em i rispektim wok bilong yumi.

Insait long ol yia i go pinis, lain bilong Jehova i bin insait long planti kot keis long Yurop long sait bilong stap niutrol olsem wanpela Kristen, sait bilong lukautim ol pikinini, pasin bilong baim takis, na planti samting moa. Em privilis bilong mi long insait long planti bilong ol dispela keis na mi lukim hau Jehova i save helpim yumi long winim ol kot keis. Ol Witnes Bilong Jehova i bin winim moa long 140 keis long Yuropian Kot ov Human Raits.

Long 1990 samting, mi wok wantaim Brata Philip Brumley, em i wok long wol hetkota, na wantaim Brata Valter Farneti em i bilong Itali. Mipela i helpim ol bratasista bilong yumi long Kuba long kisim moa fridom long sait bilong mekim lotu, bikos ol i putim sampela tambu long wok lotu bilong yumi long dispela kantri. Mi raitim pas i go long embasi bilong Kuba long Beljam na bihain mi bungim wanpela ofisial em ol i makim em long wok wantaim mipela long dispela keis. Long ol fes miting bilong mipela, i hatwok long mipela i stretim ol tingting kranki em gavman i gat long yumi we i bin kirapim ol long putim sampela tambu long wok bilong yumi.

Bihain long mipela i beten na askim Jehova long stiaim mipela, mipela i bin askim na kisim tok orait long sipim 5,000 Baibel i go long Kuba. Ol Baibel i go kamap seif long dispela hap na ol i tilim long ol bratasista, so mipela i save olsem Jehova i wok long blesim hatwok bilong mipela. Bihain mipela i askim sapos em orait long mipela i ken salim 27,500 Baibel moa i go long Kuba. Na ol i tok orait tu long dispela. Mi amamas tru olsem mipela inap helpim ol bratasista bilong mipela long Kuba long kisim wan wan kopi bilong Baibel bilong ol yet.

Mi bin visitim Kuba planti taim bilong helpim wok bilong yumi long ligol sait. Dispela i opim rot long mi inap save gut na kamap pren bilong planti bikman na bikmeri bilong gavman.

Long 1994, ol i kilim i dai winim 1,000,000 manmeri bilong lain Tutsi long Ruanda. Sori tru olsem ol i bin kilim i dai sampela bratasista bilong yumi. Olsem na ol i makim mipela ol brata long oganaisim rilif wok bilong helpim ol bratasista long Ruanda.

Taim grup bilong mipela i go kamap long Kigali em biktaun bilong Ruanda, mipela i lukim olsem planti taim tru ol i bin sut long gan long ol wol bilong trenslesen ofis na long hap bilong putim litresa. Mipela i sori tru long harim planti stori long ol man i yusim ol bikpela busnaip long kilim i dai ol bratasista. Tasol mipela i harim tu ol stori long ol bratasista i helpim narapela narapela. Olsem, mipela i bungim wanpela brata bilong lain Tutsi, em i bin hait long wanpela hul aninit long graun inap 28 de, na wanpela famili Witnes em ol i bilong lain Hutu i bin lukautim em. Long wanpela miting long Kigali, mipela i mekim ol samting bilong strongim na mekim isi bel bilong winim 900 bratasista.

Bihain mipela i abrusim boda na go long Saier (em nau ol i kolim Demokratik Ripablik Bilong Kongo) bilong painim bikpela lain Witnes em ol i bilong Ruanda na ol i bin ranawe i go long ol refiuji kem klostu long biktaun Goma. Mipela i no inap painim ol, so mipela i beten na askim Jehova long stiaim mipela i go long ol. Bihain mipela i lukim wanpela man i wokabaut i kam long mipela, na mipela i askim em sapos em i save long sampela Witnes Bilong Jehova. Na em i tok: “Yes, mi wanpela Witnes. Mi bai amamas long bringim yupela i go long rilif komiti.” Bihain long mipela i bung wantaim rilif komiti, mipela i bung wantaim klostu 1,600 refiuji bilong strongim bilip bilong ol na mekim isi bel bilong ol. Na tu, mipela i ritim long ol wanpela pas i kam long Gavening Bodi. Ol bratasista i pilim tru long bel ol tok ol i harim long dispela pas olsem: “Oltaim mipela i tingim yupela long ol beten bilong mipela. Mipela i save olsem Jehova i no inap lusim tingting long yupela.” Na tru tumas, dispela tok bilong Gavening Bodi i kamap tru. Long nau, moa long 30,000 Witnes i amamas long mekim wok bilong Jehova long Ruanda.

Mitupela Elly i bin marit klostu 58 yia, na sori tru olsem em i dai long 2011. Mi beten long Jehova na autim bel sori bilong mi long em, na em i mekim isi bel bilong mi. Na tu, mi kisim bel isi taim mi autim gutnius bilong Kingdom long ol neiba bilong mi.

Maski mi gat 93 krismas long nau, mi insait yet long wok autim tok long olgeta wik. Na mi amamas tu long helpim Ligol Dipatmen hia long Betel long Beljam na long stori long ol narapela long ekspiriens bilong mi, na tu, long mekim sepeding visit long ol yangpela insait long Betel famili.

Inap olsem 84 yia i go pinis, mi bin mekim fes beten bilong mi long Jehova. Dispela em kirap bilong wokabaut bilong mi wantaim Em na insait long dispela haptaim mi go klostu tru long em. Mi tenkyu tru olsem long laip olgeta bilong mi Jehova i bin putim yau long ol beten bilong mi.—Sng. 66:19. b