1. Olsem Buk Song 18:46 i kamapim, Devit i tok Jehova em i olsem wanem samting?

 YUMI stap long wanpela haptaim we ol samting yumi no ting long en inap kamap, na dispela inap senisim tru laip bilong yumi. Yumi tenkyu tru olsem yumi ken trastim God Jehova long helpim yumi! Long atikol i go pinis, yumi lainim olsem Jehova em i God i stap laip na oltaim em i redi long helpim yumi. Taim yumi kisim helpim i kam long Jehova, dispela i save strongim bilip bilong yumi olsem “Jehova i stap laip!” (Ritim Buk Song 18:46.) Bihain tasol long Devit i mekim dispela tok, em i tok long God olsem: “Bikpela Ston bilong mi.” Jehova em God i stap laip, olsem na wai na Devit i tok Jehova em i olsem wanpela Bikpela Ston, em samting i no gat laip?

2. Yumi bai stori long wanem samting long dispela atikol?

² Long dispela atikol, yumi bai stori long risen na Baibel i kolim Jehova olsem wanpela Bikpela Ston na skul yumi bai kisim long dispela tok piksa. Na tu, yumi bai kisim save long hau yumi ken tingim em olsem Bikpela Ston bilong yumi. Na bihain, yumi bai stori long ol rot we yumi ken bihainim ol pasin bilong Jehova we i mekim na em i stap olsem wanpela Bikpela Ston.

RISEN NA JEHOVA I STAP OLSEM WANPELA BIKPELA STON

3. Baibel i save yusim dispela tok “bikpela ston” bilong helpim yumi long kliagut long wanem samting? (Lukim piksa.)

³ Baibel i save yusim dispela tok “bikpela ston” bilong helpim yumi long kliagut moa long ol pasin bilong Jehova. Long Baibel, planti taim ol wokman bilong God i save preisim em long ol gutpela pasin bilong Em na ol i save tok em i olsem wanpela Bikpela Ston. Long Lo 32:​4, em fes taim Baibel i kolim Jehova olsem “Bikpela Ston.” Hana i beten na em i tok: “I no gat wanpela ston i strong olsem God bilong mipela.” (1 Sml. 2:2) Habakuk i tok long Jehova olsem: “Bikpela Ston bilong mi.” (Hab. 1:12) Man bilong raitim Buk Song 73 i tok long God olsem, Em “i save strongim bel bilong mi. Em i olsem bikpela ston bilong mi.” (Sng. 73:26) Na tu, Jehova i tok  long em yet olsem em i olsem wanpela Bikpela Ston. (Ais. 44:8) Yumi ken stori long 3-pela pasin bilong Jehova we i mekim na em i stap olsem Bikpela Ston, na yumi ken kisim save long hau yumi ken larim em i stap olsem “Bikpela Ston” bilong yumi.—Lo 32:31.

4. Olsem wanem Jehova i stap olsem wanpela ples hait? (Buk Song 94:22)

⁴ Jehova em i Ples Hait bilong yumi. Wankain olsem wanpela bikpela ston inap stap olsem ples hait bilong wanpela man long taim bilong bikpela win na ren, Jehova i save lukautim yumi taim yumi bungim ol bikpela hevi tru. (Ritim Buk Song 94:22.) Em i save lukautim yumi na em i helpim yumi long save tru olsem maski yumi karim ol pen na hevi long nau, ol i bilong sotpela taim tasol. Na em i tok promis olsem: Long bihain, em bai pinisim olgeta samting i save bagarapim bel isi bilong yumi na mekim yumi tingting planti.—Ese. 34:​25, 26.

5. Olsem wanem Jehova inap stap olsem Ples Hait bilong yumi?

⁵ Wanpela rot yumi larim Jehova i stap olsem Ples Hait bilong yumi em long rot bilong beten long em. Taim yumi beten long Jehova, em i save givim yumi “dispela bel isi bilong God” we i save lukautim bel na tingting bilong yumi. (Fili. 4:​6, 7) Tingim stori bilong Artem, em wanpela brata ol i kalabusim em bikos long bilip bilong em. Planti taim wanpela hatpela ofisa i kwestenim em na putim presa long em na semim em. Artem i tok: “Mi save pilim bikpela presa tru taim dispela ofisa i kwestenim mi. . . . Oltaim mi save beten long Jehova. Mi save askim em long givim mi bel isi na savetingting. Maski mi karim dispela hevi, mi stap bel isi. . . . Jehova i helpim mi na i olsem mi sanap baksait long wanpela ston wol.”

6. Wai na oltaim yumi ken trastim Jehova? (Aisaia 26:​3, 4)

⁶ Jehova em Man yumi ken trastim. Olsem wanpela Bikpela Ston i save stap oltaim long ples bilong en, oltaim Jehova i stap redi long helpim yumi. Yumi ken trastim em bikos em i “dispela Bikpela Ston i save stap oltaim.” (Ritim Aisaia 26:​3, 4.) Oltaim em bai stap laip bilong inapim ol tok promis bilong em, harim ol beten bilong yumi, na givim helpim yumi nidim. Na tu, yumi ken save olsem Jehova bai helpim yumi bikos em i save stap gut long ol man i mekim wok bilong em. (2 Sml. 22:26) Em i no inap lusim tingting long ol wok yumi mekim, na oltaim em bai blesim yumi.—Hib. 6:10; 11:6.

7. Yumi bai luksave long wanem samting taim yumi trastim Jehova? (Lukim tu piksa.)

⁷ Yumi larim Jehova i stap olsem Bikpela Ston bilong yumi taim yumi trastim em tru. Yumi save olsem taim yumi bihainim tok bilong em long ol taim nogut tu, dispela bai helpim yumi. (Ais. 48:​17, 18) Taim yumi luksave olsem em i helpim yumi, pasin bilong yumi long bilip long em bai kamap strong moa. Yumi bai bilip tru olsem Jehova tasol inap helpim yumi long karim ol hevi we yumi yet i pilim hatwok long karim. Planti taim ol hevi i painim yumi na i no gat wanpela i stap bilong helpim yumi, long ol dispela taim yumi luksave olsem oltaim yumi ken trastim Jehova long helpim yumi. Vladimir i tok: “Haptaim mi stap long ples kalabus i opim rot long mi inap pas gut moa wantaim God. Mi lain long trastim tru Jehova bikos mi stap wanpis na mi no inap mekim wanpela samting long hevi i painim mi.”

8. (a) Wai na yumi ken tok Jehova i save stap wankain? (b) Yumi kisim wanem helpim taim yumi larim God i stap olsem Bikpela Ston bilong yumi? (Buk Song 62:​6, 7)

 ⁸ Jehova i save stap wankain. Olsem wanpela bikpela ston, Jehova i save stap wankain na em i no save senis. Ol pasin bilong em na ol samting em i tingting pinis long mekim i no save senis. (Mal. 3:6) Taim pasin bikhet i kamap long Iden, Jehova i no senisim tingting long samting em i laik mekim long ol manmeri. Olsem aposel Pol i tok: “Oltaim [Jehova] i save bihainim pasin tru bilong em.” (2 Tim. 2:13) Dispela i makim olsem maski wanem samting i kamap o ol narapela i mekim wanem, Jehova i no inap tru long senisim ol pasin bilong em, samting em i tingting pinis long mekim, na ol lo bilong em. Yumi bilip tru long God bilong yumi em Man i save stap wankain tasol, olsem na yumi trastim em olsem em bai kisim bek yumi na em bai helpim yumi long karim ol hevi.—Ritim Buk Song 62:​6, 7.

9. Yu kisim wanem skul long stori bilong Tatyana?

⁹ Yumi larim Jehova i stap olsem Bikpela Ston bilong yumi long rot bilong tingim ol pasin bilong em na oltaim holim long tingting ol samting em i tingting pinis long mekim. Taim yumi mekim olsem, dispela bai helpim yumi long stap isi na stap gut long em taim yumi karim ol hevi. (Sng. 16:8) Dispela samting i bin painim wanpela sista nem bilong em Tatyana, ol i putim em i stap kalabus long haus bilong em yet bikos long bilip bilong em. Em i tok: “Mi stap wanpis tru. Pastaim em hatwok. Planti taim mi bel hevi tru.” Bihain em i kirap long tingim tingim long bel Jehova na samting Em i tingting pinis long mekim long ol manmeri, na Tatyana i luksave long risen na em i bikpela samting long em i sanap strong na karim dispela hevi. Dispela i helpim em long stap bel isi na i strongim em long stap gut long Jehova. Em i tok: “Taim mi kliagut long risen na mi karim dispela hevi, dispela i helpim mi long tingim olsem mi karim hevi bikos mi laik stap gut long Jehova. Na dispela i helpim mi long lusim pasin bilong tingim mi yet tasol.”

10. Olsem wanem Jehova inap stap olsem Bikpela Ston bilong yumi long nau?

¹⁰ Klostu nau, yumi bai bungim ol bikpela hevi, olsem na yumi mas trastim tru Jehova winim long bipo. Nau em taim bilong strongim pasin bilong yumi long trastim tru Jehova olsem em bai givim yumi ol samting yumi nidim bilong sanap strong na stap gut long em. Hau yumi ken mekim olsem? Yumi ken mekim olsem long rot bilong ritim ol stori bilong Baibel na ol ekspiriens bilong ol Witnes long nau. Skelim olsem wanem God i stap olsem wanpela Bikpela Ston na em i helpim ol wokman bilong em. Tingim tingim long bel ol dispela stori. Taim yu mekim olsem, dispela bai helpim yu long larim Jehova i stap olsem Bikpela Ston bilong yu.

BIHAINIM OL PASIN BILONG JEHOVA OLSEM BIKPELA STON

11. Wai na yumi laik bihainim ol pasin bilong Jehova we i mekim na em i stap olsem wanpela Bikpela Ston? (Lukim tu blok “ Mak Em Ol Yangpela Brata i Ken Winim.”)

¹¹ Yumi bin stori long ol pasin bilong Jehova we i mekim na em i stap olsem wanpela Bikpela Ston. Orait skelim olsem wanem yumi ken bihainim ol dispela pasin bilong em. Taim yumi givim bel tru long bihainim ol dispela pasin bilong em, dispela  bai helpim yumi long strongim kongrigesen. Olsem, Jisas i givim dispela nem Sifas (long tok Grik em “Pita”) long Saimon, we i makim “Wanpela Hap Ston.” (Jon 1:42) Dispela i makim olsem Pita bai stap olsem man bilong mekim isi bel bilong ol narapela long kongrigesen na strongim bilip bilong ol. Baibel i tok ol elda bilong kongrigesen ol i olsem “sedo bilong traipela ston.” Dispela i makim olsem ol i save lukautim ol bratasista insait long kongrigesen. (Ais. 32:2) Tasol yumi olgeta i ken strongim narapela narapela sapos yumi bihainim ol pasin bilong Jehova we i mekim na em i stap olsem wanpela Bikpela Ston.—Efe. 5:1.

12. Stori long sampela rot yumi ken stap olsem ples hait bilong ol narapela.

¹² Stap olsem ples hait bilong ol narapela. Sampela taim, yumi inap larim ol bratasista i stap long haus bilong yumi long taim bilong ol netrol disasta na ol woa. Taim ol hevi long dispela “taim bilong las de” i go nogut moa, bai i gat planti rot moa long yumi inap helpim narapela narapela. (2 Tim. 3:1) Na tu, yumi ken mekim isi bel bilong ol bratasista bilong yumi na strongim ol. Wanpela rot yumi ken mekim olsem em long mekim pasin pren long ol narapela long Haus Kingdom, na long dispela rot yumi mekim kongrigesen i stap olsem ples we narapela i laikim na strongim narapela narapela. Yumi stap namel long ol man i gat hatpela pasin na dispela inap daunim ol bratasista bilong yumi na mekim ol i pilim olsem ol narapela i no laikim ol. So taim ol bratasista bilong yumi i kam long ol miting, yumi laik bai ol i pilim olsem yumi laikim ol, ol i kisim nupela strong, na pilim seif.

13. Olsem wanem ol elda inap stap olsem ples hait bilong ol narapela? (Lukim tu piksa.)

¹³ Ol elda i ken stap olsem ples hait bilong ol bratasista insait long kongrigesen em ol i karim ol bikpela hevi. Long taim bilong ol disasta na ol medikal imejensi, ol elda i save go pas long stretim rot bilong helpim ol bratasista. Na tu, ol i save helpim ol long sait bilong bilip. Ol bratasista bai redi long i go toktok wantaim wanpela elda sapos em i gat pasin isi, pasin bilong pilim hevi bilong ol  narapela, na redi long putim gut yau. Ol dispela kain pasin i helpim ol narapela long pilim olsem ol elda i tingim ol na nau em isi moa long ol i bihainim ol gutpela tok bilong Baibel em wanpela elda inap givim long ol.—1 Tes. 2:​7, 8, 11.

14. Hau yumi ken soim olsem ol narapela i ken trastim yumi?

¹⁴ Stap olsem man ol narapela i ken trastim. Yumi laik bai ol narapela i trastim yumi, moa yet long taim bilong ol bikpela hevi. (Prov. 17:17) Hau yumi ken stap olsem man o meri em ol narapela i ken trastim? Yumi ken wok strong long bihainim ol pasin bilong God, olsem inapim ol tok promis bilong yumi na wok strong long bihainim stret taim. (Mat. 5:37) Na tu, yumi ken redi long helpim wanpela taim em i nidim helpim. Na yumi laik wok strong tu long bihainim gut ol instraksen yumi kisim long mekim ol asainmen bilong yumi long kongrigesen.

15. Taim ol elda i stap olsem man em ol narapela i ken trastim, olsem wanem dispela i helpim kongrigesen?

¹⁵ Ol elda em ol narapela i ken trastim, ol i stap olsem gutpela helpim bilong kongrigesen. Wai na yumi tok olsem? Taim ol bratasista i save olsem ol i ken kontektim ol elda long wanem ol taim ol i nidim helpim, dispela i helpim ol na ol i no tingting planti. Na tu, ol pablisa i save pilim olsem ol narapela i laikim ol taim ol elda i redi long helpim ol. Na taim ol elda i yusim Baibel na ol pablikesen em gutpela wokboi i kamapim bilong givim tok kaunsel  long ol na ol i no kamapim tingting bilong ol yet, dispela bai kirapim ol wanbilip long trastim tru ol. Na tu, ol bratasista i save trastim elda husat i no save tokim ol narapela long ol pesenel samting ol i tokim em long en, na em i save mekim ol samting em i tok em bai mekim.

16. Taim yumi stap wankain, olsem wanem yumi helpim yumi yet na ol narapela tu?

¹⁶ Stap wankain. Yumi inap stap olsem gutpela eksampel long ol narapela sapos yumi tingting strong long bihainim stretpela pasin na yumi mekim ol disisen i stret wantaim ol stiatok bilong Baibel. Taim bilip bilong yumi i wok long kamap strong moa na yumi wok long kisim stretpela save, yumi bai sanap strong na holimpas tok i tru. Yumi no inap paul long wanem disisen yumi bai mekim o senisim senisim tingting bilong yumi, o larim ol bilip giaman na tingting bilong dispela graun i pulim yumi. (Efe. 4:14; Jems 1:​6-8) Pasin bilong yumi long bilip long Jehova na ol tok promis bilong em i helpim yumi long holim stretpela tingting taim yumi harim ol nius nogut. (Sng. 112:​7, 8) Na tu, yumi bai redi long helpim ol narapela em ol tu i bungim ol hevi.—1 Tes. 3:​2, 3.

17. Hau ol elda inap helpim ol bratasista long stap isi na bilip strong?

¹⁷ Ol elda i mas stap olsem man i save mekim ol samting inap long skel, bihainim gutpela tingting, wokabaut stret, na redi long bihainim tingting bilong ol narapela. Ol elda i save helpim ol bratasista long stap isi na bilip strong long Jehova na ol i strongim kongrigesen long rot bilong “holim strong dispela trupela tok.” (Tai. 1:9; 1 Tim. 3:​1-3) Taim ol elda i stap gutpela piksa na ol i mekim ol sepeding visit, ol i helpim ol pablisa long go oltaim long ol miting, autim tok, na mekim pesenel stadi. Taim ol bratasista i bungim taim nogut, ol elda i ken strongim ol na helpim ol long putim tingting long Jehova na long ol samting em i tingting pinis long mekim.

18. Wai na yumi laik litimapim nem bilong Jehova na i go klostu moa long em? (Lukim tu blok “ Rot Bilong i Go Klostu Moa Long Jehova.”)

¹⁸ Yumi bin skelim pinis ol naispela pasin bilong Jehova, olsem na yumi ken mekim tok em King Devit i bin mekim, olsem: “Litimapim nem bilong Jehova, em i olsem Bikpela Ston bilong mi.” (Sng. 144:1) Oltaim Jehova bai stap olsem God em yumi ken trastim. Long laip olgeta bilong yumi i go inap long taim yumi kamap lapun, yumi gat gutpela risen long tokaut olsem: “Em i olsem Bikpela Ston” bilong mi, na yumi ken save tru olsem oltaim em bai helpim yumi long pas gut yet wantaim em.—Sng. 92:​14, 15.