1. Olsem wanem ol tok bilong Buk Song 15:​1-5 inap helpim yumi?

 LONG atikol i go pinis, yumi bin lain olsem ol wokman bilong Jehova em ol i dediket pinis long em, ol inap stap olsem gest long haus sel bilong em taim ol i kisim pasin bilong pas gut wantaim em. Tasol yumi ken mekim wanem bilong stap olsem gest bilong em? Buk Song 15 i stori long ol samting yumi mas mekim. (Ritim Buk Song 15:​1-5.) Dispela hap bilong Buk Song i stori long ol lesen we inap helpim yumi long i go klostu moa long God.

2. Ating wanem samting i kirapim Devit long stori long haus sel bilong Jehova?

² Buk Song 15 i kirap wantaim dispela tok olsem: “Jehova, husat inap i stap long haus sel bilong yu? Na husat inap i stap long maunten holi bilong yu?” (Sng. 15:1) Taim Devit, em man bilong raitim song, i stori long “haus sel” bilong Jehova, ating em i tingim haus lotu sel i bin stap long Gibeon inap sampela haptaim. Devit i kolim tu “maunten holi” bilong God, ating em i tok long Saion i stap long Jerusalem. Long dispela hap, inap 10-pela kilomita samting long hap saut bilong Gibeon, Devit i sanapim haus sel bilong putim Bokis Kontrak i stap long en inap long ol i wokim tempel bilong Bokis Kontrak i ken stap long en.—2 Sml. 6:17.

3. Wai na yumi laik kliagut long ol tok bilong Buk Song 15? (Lukim tu piksa.)

³ Tru, i no olgeta Israel inap mekim wok long haus lotu sel, o i go insait long haus sel we Bokis Kontrak i stap long en. Tasol olgeta wokman bilong Jehova inap stap olsem ol gest long haus sel bilong em taim ol i kamap pren bilong em na stap yet olsem ol pren bilong em. Yumi olgeta i gat laik long mekim olsem. Buk Song 15 i stori long sampela pasin em yumi mas kisim na wok yet long bihainim bilong stap yet olsem ol pren bilong Jehova.

MAN I NO GAT ASUA NA I SAVE MEKIM STRETPELA PASIN

4. Jehova i laik yumi mas kisim baptais tasol o yumi mas mekim sampela samting moa? (Aisaia 48:1)

⁴ Buk Song 15:2 i tok olsem man i stap olsem pren bilong God “em man i no gat asua long wanpela samting, na em i save mekim  stretpela pasin.” Dispela em samting yumi mas mekim long olgeta taim na i no long wanpela taim tasol. Tasol yu ting yumi ol man inap wokabaut stret na “i no gat asua long wanpela samting”? Yes, yumi inap mekim olsem. Maski yumi ol man i no gutpela olgeta, Jehova bai tingim yumi olgeta wan wan olsem “man i no gat asua long wanpela samting” sapos yumi traim bes bilong yumi long bihainim tok bilong em. Taim yumi dediketim yumi yet long God na kisim baptais, dispela em kirap tasol bilong wokabaut bilong yumi wantaim God. Tingim olsem, long taim bilong ol man i bin raitim Baibel, i no olgeta manmeri bilong lain Israel i winim mak bilong stap olsem gest bilong Jehova. Sampela i lotuim em, tasol ol i no mekim long “pasin i tru na stretpela pasin.” (Ritim Aisaia 48:1.) Ol manmeri bilong lain Israel em ol i gat gutpela bel, ol i mas kisim save long ol lo bilong Jehova na bihainim ol dispela lo. Olsem tasol, bilong God i ken orait long yumi long nau, yumi mas kisim baptais na bung wantaim kongrigesen Kristen na mekim sampela samting moa. Yumi mas wok yet long “mekim stretpela pasin.” Hau yumi ken mekim olsem?

5. Olsem wanem yumi ken bihainim tok bilong Jehova long olgeta samting?

⁵ Bilong stap olsem “man i no gat asua long wanpela samting” na man bilong “mekim stretpela pasin” long ai bilong Jehova, yumi mas go oltaim long ol miting Kristen, na yumi mas mekim sampela samting moa. (1 Sml. 15:22) Yumi mas wok strong long bihainim olgeta tok bilong God long olgeta samting long laip bilong yumi, na tu, long ol taim we yumi stap wanpis. (Prov. 3:6; Ekl. 12:​13, 14) Em i bikpela samting long yumi wok strong long bihainim tok bilong Jehova na yumi mas mekim olsem tu long ol liklik samting. Taim yumi mekim olsem, yumi soim olsem yumi laikim em tru na dispela inap kirapim em long laikim yumi moa yet.—Jon 14:23; 1 Jon 5:3.

6. Olsem Hibru 6:​10-12 i kamapim, wanem samting i bikpela samting moa winim ol gutpela wok yumi bin mekim long bipo?

⁶ Jehova i tingim tru ol gutpela wok bilong em yumi bin mekim long bipo. Tasol ol gutpela wok  bilong em yumi bin mekim long bipo, dispela tasol i no makim olsem yumi bai stap yet olsem ol gest long haus sel bilong em, nogat. Yumi luksave long dispela long tok i stap long Hibru 6:​10-12. (Ritim.) Jehova i no lusim tingting long ol gutpela wok bilong em yumi bin mekim long bipo. Tasol em i laik yumi mas wok yet long givim bel olgeta long lotuim em “i go inap long pinis.” Em bai stap olsem pren bilong yumi inap oltaim oltaim “sapos yumi no les kwik.”—Gal. 6:9.

LONG BEL YU MAS MEKIM TOK TRU OLTAIM

7. Dispela tok olsem ‘long bel yumi mas mekim tok tru oltaim’ i makim wanem?

⁷ Sapos yumi laik stap olsem gest long haus sel bilong Jehova, orait ‘long bel yumi mas mekim tok tru oltaim.’ (Sng. 15:2) Dispela i makim olsem yumi no ken sakim tasol pasin bilong mekim tok giaman, yumi mas mekim sampela samting moa. Jehova i laik yumi mekim tok tru oltaim long olgeta tok na pasin bilong yumi. (Hib. 13:18) Dispela em i bikpela samting tru, “long wanem, Jehova i save heitim man bilong mekim pasin giaman, tasol em i save pas gut wantaim man bilong mekim stretpela pasin.”—Prov. 3:32.

8. Yumi mas abrusim wanem kain pasin?

⁸ Ol manmeri em ‘long bel ol i save mekim tok tru oltaim,’ ol i no save giaman long bihainim ol lo bilong God long ai bilong ol man na long pasin hait ol i wok long brukim ol lo bilong God. (Ais. 29:13) Ol i save sakim pasin bilong hait na mekim rong. Man i save hait na mekim rong, em inap holim tupela tingting long savetingting i stap long sampela lo bilong Jehova. (Jems 1:​5-8) Em inap sakim tok bilong Jehova long ol samting we em i no tingim olsem bikpela samting tumas. Na bihain, taim i no gat hevi i kamap long pasin bilong em long sakim tok, dispela inap kirapim em long brukim sampela moa lo bilong God, na dispela inap nogutim pasin bilong em long lotuim Jehova. (Ekl. 8:11) Tasol yumi laik mekim onest pasin long olgeta samting.

9. Yumi inap kisim wanem skul long samting i bin kamap long fes taim Jisas i bin bungim Nataniel? (Lukim tu piksa.)

⁹ Yumi inap kisim skul long wanpela bikpela samting long pasin bilong mekim tok tru oltaim taim yumi skelim samting i bin kamap long fes taim Jisas i bungim Nataniel. Taim Filip i bringim pren bilong em Nataniel long kam bungim Jisas, wanpela narakain samting i kamap. Maski  em fes taim bilong Jisas long bungim Nataniel, Jisas i tok: “Lukim, wanpela gutpela man Israel husat i no gat pasin giaman i stap long em.” (Jon 1:47) Tru Jisas i tingim ol narapela disaipel bilong em olsem ol i save mekim onest pasin, tasol em i tingim Nataniel olsem man em long bel em i save mekim tok tru oltaim. Wankain olsem yumi, Nataniel em i no gutpela olgeta. Tasol em i no gat pasin bilong tupela maus na em i no save mekim tok giaman. Jisas i laikim dispela pasin bilong Nataniel na em i tok amamas long em. Em bai gutpela samting tru sapos Jisas i mekim wankain tok olsem long yumi tu!

10. Wai na yumi no ken mekim wok nogut long pasin bilong yumi long toktok? (Jems 1:26)

¹⁰ Buk Song 15 i stori planti long ol pasin yumi mas mekim long ol narapela. Buk Song 15:3 i tok man i stap olsem gest long haus sel bilong Jehova, “em i no save mekim tok bilong krungutim gutnem bilong ol arapela, na em i no save mekim nogut long ol arapela, na em i no save mekim ol kain kain tok win bilong daunim ol pren bilong em.” Taim yumi mekim wok nogut long pasin bilong yumi long toktok long ol kain rot olsem, dispela inap nogutim ol narapela na yumi bai no inap stap moa olsem ol gest long haus sel bilong Jehova.—Ritim Jems 1:26.

11. (a) Pasin bilong krungutim gutnem i makim wanem? (b) Taim wanpela Kristen i krungutim gutnem bilong narapela na em i no tanim bel, wanem samting bai kamap long em?

¹¹ Man bilong raitim song i stori long pasin bilong krungutim gutnem bilong narapela. Pasin bilong krungutim gutnem i makim wanem? Em i makim pasin bilong mekim tok giaman bilong bagarapim gutnem bilong narapela. Taim wanpela Kristen i krungutim gutnem bilong narapela na em i no tanim bel, em bai raus long kongrigesen.—Jer. 17:10.

12-13. Wanem ol samting inap kamap na nau yumi no luksave olsem yumi mekim ol tok win bilong daunim ol pren bilong yumi? (Lukim tu piksa.)

¹² Buk Song 15:3 i kirapim yumi long tingim tu olsem ol gest bilong Jehova i no save mekim nogut long ol narapela na ol i no save mekim ol kain kain tok win bilong daunim ol pren bilong ol.  Hau yumi inap mekim ol tok win bilong daunim ol pren bilong yumi?

¹³ Ating yumi stori long ol narapela long sampela samting i kamap na nau yumi no luksave olsem yumi mekim ol tok win bilong daunim wanpela. Tingim ol dispela samting inap kamap olsem: (1) wanpela sista i lusim wok fultaim sevis bilong em, (2) tupela marit i no wok moa long Betel, o (3) wanpela brata i no mekim wok moa olsem elda o kongrigesen sevan. Yu ting i stret long kamapim ol tok win na stori long ol risen na ol dispela senis i kamap na nau yumi go stori long ol narapela long ol dispela tok win yumi kamapim? Ating i gat risen na ol dispela senis i kamap na yumi no save long ol dispela risen. Na bikpela samting moa, wanpela gest long haus sel bilong Jehova “em i no save mekim nogut long ol arapela, na em i no save mekim ol kain kain tok win bilong daunim ol pren bilong em.”

GIVIM BIKNEM LONG OL MAN I SAVE DAUN LONG JEHOVA

14. Hau yumi ken givim baksait long “man i save mekim pasin nogut”?

¹⁴ Buk Song 15:4 i tok pren bilong Jehova “i save givim baksait long man i save mekim pasin nogut.” Hau yumi ken mekim olsem? Yumi no gutpela olgeta, olsem na yumi no inap long skelim wanpela man na tok olsem em man bilong mekim pasin nogut. Wai na yumi tok olsem? Bikos em isi long pasin bilong sampela manmeri i mekim na yumi laikim ol o i mekim na yumi bel kaskas long ol. Yumi mas sakim tasol ol manmeri em Jehova i tok ol i man bilong “mekim pasin nogut.” (1 Kor. 5:11) Dispela i makim ol manmeri em ol i mekim ol pasin nogut na ol i no tanim bel, ol manmeri husat i no rispek long ol bilip bilong yumi, o ol i traim long bagarapim bilip bilong yumi.—Prov. 13:20.

15. Wanem wanpela rot yumi ken givim biknem long ol “man i save daun long Jehova”?

¹⁵ Buk Song 15:4 i kirapim yumi long givim biknem long ol “man i save daun long Jehova.” Olsem na yumi save painim rot bilong mekim gutpela pasin na pasin rispek long ol pren bilong Jehova. (Rom 12:10) Hau yumi ken mekim olsem? Buk Song 15:4 i stori long wanpela rot bilong mekim olsem, em i tok gest long haus sel bilong Jehova “i save inapim tok promis bilong em, maski dispela i givim bikpela hevi long em.” Taim yumi brukim ol tok promis bilong yumi, dispela inap mekim ol narapela i bel hevi. (Mat. 5:37) Olsem, Jehova i laik bai ol gest bilong em i mas inapim tok promis ol i bin mekim taim ol i marit. Na tu, em i save amamas taim ol papamama i mekim ol samting bilong truim ol tok promis ol i bin mekim long ol pikinini bilong ol. Pasin bilong yumi long laikim God na laikim ol narapela bai kirapim yumi long wok strong long truim ol tok promis bilong yumi.

16. Wanem narapela rot yumi ken givim biknem long ol pren bilong Jehova?

¹⁶ Narapela rot bilong givim biknem long ol pren bilong God em long mekim gut long ol na redi long givim ol samting long ol. (Rom 12:13) Taim yumi lusim haptaim long kisim amamas wantaim ol bratasista bilong yumi, dispela i helpim yumi long strongim pasin pren bilong yumi wantaim ol na wantaim Jehova. Na moa yet, taim yumi mekim gut long ol, yumi bihainim pasin bilong Jehova.

SAKIM PASIN BILONG LAIKIM TUMAS MANI

17. Wai na Buk Song 15 i stori long mani?

¹⁷ Taim yumi ritim Buk Song 15, yumi luksave tu olsem gest bilong Jehova “i save larim ol man i kisim dinau long em, na taim ol i bekim, em i no save kisim intres, na em i no save larim ol man i givim mani olsem braib bai em i paulim kot bilong man i no gat asua.” (Sng. 15:5) Wai na dispela sotpela hap bilong Buk Song i stori long mani? Sapos yumi no gat stretpela tingting long mani, yumi inap nogutim ol narapela na bagarapim tu pasin pren bilong yumi wantaim God.  (1 Tim. 6:10) Long taim bilong ol man i bin raitim Baibel, sampela i givim dinau mani long ol man i stap rabis na bihain ol i sasim bikpela intres antap long dispela mani ol i givim. Na tu, sampela hetman em ol i mekim wok jas, ol i kisim braib mani na ol i paulim kot bilong ol man i no gat asua. Dispela em ol stingpela pasin tru long ai bilong Jehova.—Ese. 22:12.

18. Wanem ol askim i ken helpim yumi long skelim tingting yumi wan wan i gat long mani? (Hibru 13:5)

¹⁸ Em i gutpela long skelim tingting yumi wan wan i gat long mani. Askim yu yet olsem: ‘Oltaim mi save tingting long mani na ol samting mani inap baim? Taim mi kisim dinau mani, mi save isi isi long bekim na ting olsem man i givim dinau long mi em i no nidim dispela mani? Taim mi gat mani, dispela i save mekim mi pilim olsem mi winim ol narapela na i hatwok long mi serim samting wantaim ol? Mi save skelim ol bratasista bilong mi na ting olsem ol i gat pasin bilong laikim tumas mani bikos ol i gat planti mani? Mi save stap pren bilong ol maniman na mi no gat laik long stap pren bilong ol man i stap rabis?’ I gutpela long yumi skelim ol dispela askim, long wanem, Jehova i invaitim yumi long stap olsem ol gest bilong em. Yumi ken lukautim gut dispela pasin pren bilong yumi wantaim Jehova long rot bilong sakim pasin bilong laikim tumas mani. Taim yumi mekim olsem, Jehova i no inap tru long lusim yumi!—Ritim Hibru 13:5.

JEHOVA I LAIKIM OL PREN BILONG EM

19. Wai na Jehova i tokim yumi long bihainim olgeta tok i stap long Buk Song 15?

¹⁹ Buk Song 15 i pinis wantaim dispela naispela tok promis olsem: “Man i mekim ol dispela pasin, bai i no inap pundaun.” (Sng. 15:5) Long dispela ves, Devit i stori long as na Jehova i laik yumi mas bihainim olgeta tok i stap long Buk Song 15. Jehova i laik bai yumi stap amamas. Olsem na taim yumi mekim ol samting em i tokim yumi long mekim, em bai lukautim yumi na yumi bai stap gut.—Ais. 48:17.

20. Ol gest bilong Jehova i ken luk fowed long wanem samting?

²⁰ Ol gest em Jehova i orait long ol, ol i ken amamas long wetim gutpela samting i kamap bihain. Ol Kristen God i bin makim na ol i stap gut long em, ol bai go long heven we i gat “planti hap bilong stap long en” em Jisas i bin redim bilong ol. (Jon 14:2) Ol manmeri em ol bai kisim laip oltaim long graun, ol i luk fowed long gutpela samting em Revelesen 21:3 i tok promis long en. Tru tumas, yumi olgeta i amamas long kisim invatesen i kam long Jehova long stap olsem ol pren bilong em, na long stap olsem ol gest long haus sel bilong em inap oltaim oltaim!