1. Wanem samting i helpim lain bilong Jehova long wok yet long lotuim em, maski ol i karim ol hevi?

 “TAIM nogut bai kamap na dispela bai givim hatwok long ol man”—dispela em tok Baibel i mekim long haptaim nau yumi stap long en. (2 Tim. 3:1) Yumi lain bilong Jehova i karim ol wankain hevi em olgeta narapela man i feisim long nau, na tu, yumi karim hevi bilong ol man i birua na mekim nogut long yumi. Wanem samting i ken helpim yumi long wok yet long lotuim Jehova, maski yumi karim ol dispela hevi? Wanpela samting i helpim yumi em yumi save olsem Jehova “em i God i stap laip.”—Jer. 10:10; 2 Tim. 1:12.

2. Yumi save long wanem samting na dispela i ken strongim yumi?

² Jehova em Man i stap tru na em i save lukautim yumi long taim bilong hevi na em i save painim ol rot bilong helpim yumi. (2 Sto. 16:9; Sng. 23:4) Yumi save olsem em i God i stap laip, na dispela i ken helpim yumi long sanap strong na karim olgeta kain hevi i painim yumi. Skelim hau dispela tok i stret long stori bilong King Devit.

3. Wanem insait bilong tok Devit i mekim olsem “Jehova i stap laip”?

³ Devit i save long Jehova na em i trastim em. Taim ol birua bilong em i bin ranim em, wanpela bilong ol em King Sol, Devit i beten askim Jehova long helpim em. (Sng. 18:6) Bihain long God i bekim beten bilong em na kisim bek em long han bilong ol birua, Devit i tokaut olsem: “Jehova i stap laip!” (Sng. 18:46) Wanem insait bilong tok Devit i mekim? Wanpela referens i stori olsem tok bilong Devit i makim olsem em i bilip tru long Jehova “olsem em i god i stap laip na oltaim em i save helpim ol wokman bilong em.” Tru tumas, ol samting i kamap long laip bilong Devit i helpim em long bilip tru olsem God bilong em i stap laip, na dispela bilip i strongim tru tingting bilong em long lotuim na preisim Jehova.—Sng. 18:​28, 29, 49.

4. Yumi bilip tru olsem Jehova em i God i stap laip na hau dispela i ken helpim yumi?

 ⁴ Yumi bilip tru olsem Jehova em i God i stap laip na dispela i ken helpim yumi long givim bel olgeta long mekim wok bilong em. Dispela bai strongim yumi long sanap strong na karim ol hevi na kirapim yumi long givim bel yet long mekim wok bilong God. Na tu, yumi bai tingting strong long pas gut yet wantaim Jehova.

GOD I STAP LAIP BAI STRONGIM YU

5. Wanem samting i ken helpim yumi long sanap strong na karim ol hevi? (Filipai 4:13)

⁵ Yumi bai sanap strong na karim olgeta kain hevi, maski em ol bikpela hevi o ol liklik hevi, sapos yumi tingim olsem Jehova i stap laip na oltaim em bai helpim yumi. Yumi bilip tru olsem Em bai helpim yumi, long wanem, God bilong yumi i gat bikpela strong moa winim ol hevi bilong yumi. Em i God i Gat Olgeta Strong, na em inap givim yumi strong yumi nidim bilong sanap strong na karim hevi. (Ritim Filipai 4:13.) Olsem na taim ol hevi i kamap, yumi no inap surik, nogat. Yumi lukim pinis hau Jehova i helpim yumi long karim ol liklik hevi na dispela i strongim bilip bilong yumi olsem em bai helpim yumi long karim ol bikpela hevi tu.

6. Wanem ol samting i kamap long Devit taim em i yangpela man na dispela i strongim pasin bilong em long trastim Jehova?

⁶ Tingim tupela samting i bin kamap long Devit na dispela i strongim pasin bilong em long trastim Jehova. Taim Devit em i yangpela man na em i stap olsem wasman bilong ol sipsip, wanpela bea i kam na kisim sipsip i go, na narapela taim wanpela laion i kam na kisim sipsip i go. Long dispela tupela taim, Devit i strongim bel na em i ranim bea na laion na paitim ol na kisim bek sipsip. Tasol em i no givim biknem long em yet, nogat. Em i save olsem Jehova i bin givim em strong long mekim olsem. (1 Sml. 17:​34-37) Devit i no bin lusim tingting long ol dispela samting i kamap. Em i tingim tingim long bel na dispela i helpim em long bilip olsem God i stap laip bai strongim em long bihain.

7. Devit i holim stretpela tingting na hau dispela i helpim em long pait long Goliat?

⁷ Bihain ating long taim Devit i tineja, em i visitim kem bilong lain ami bilong Israel. Na em i lukim olsem ol soldia i pret nogut tru bikos wanpela traipela man Filistia, nem bilong em Goliat, em i wok long “salensim . . . ol soldia bilong Israel.” (1 Sml. 17:​10, 11) Ol soldia i pret bikos ol i tingim Goliat olsem traipela man na ol i tingim tu ol tok bilas em i sutim long ol. (1 Sml. 17:​24, 25) Tasol Devit i no tingim dispela. Em i tingim olsem Goliat i wok long salensim “lain ami bilong God i gat laip” na em i no salensim tasol lain ami bilong Israel. (1 Sml. 17:26) Devit i putim tingting olgeta i go long Jehova. Em i bilip tru olsem dispela God husat i bin helpim em taim em i stap olsem wasman bilong ol sipsip, em bai helpim em gen long dispela taim. Devit i bilip tru olsem God bai helpim em, olsem na em i go het na pait wantaim Goliat na tru tumas, em i winim dispela pait!—1 Sml. 17:​45-51.

8. Taim yumi karim ol hevi, yumi ken tingim wanem samting? (Lukim tu piksa.)

⁸ Yumi tu i ken sanap strong na karim ol hevi sapos yumi tingim olsem, God i stap laip i redi long helpim yumi. (Sng. 118:6) Yumi ken strongim pasin bilong yumi long trastim Jehova olsem em bai helpim yumi taim yumi skelim ol samting em i bin mekim long bipo. Ritim ol stori bilong Baibel em ol inap helpim yu long tingim gen ol samting Jehova i mekim bilong kisim bek ol wokman bilong em. (Ais. 37:​17, 33-37) Na skelim tu ol ripot i stap long websait bilong yumi long jw.org, ol i soim klia hau Jehova i sambai long ol bratasista bilong yumi long nau. Na tu, tingim bek ol taim Jehova i bin helpim yu. Sapos yu no inap tingim wanpela bikpela hevi i bin painim yu i olsem yu pait long  laion o bea, orait no ken wari. Bilong wanem yumi tok olsem? Samting tru em olsem, Jehova i bin mekim planti samting bilong helpim yu! Em i kirapim yu long kamap pren bilong em. (Jon 6:44) Na long nau tu, yu stap yet long tok i tru bikos em i helpim yu. Yu ken traim mekim olsem: Askim em long helpim yu long tingim ol taim we em i bin bekim ol beten bilong yu, givim helpim yu nidim long taim stret, o sambai long yu taim yu karim wanpela bikpela hevi. Taim yu tingim tingim ol samting em i bin mekim bilong helpim yu, dispela bai strongim pasin bilong yu long trastim Jehova olsem em bai wok yet long helpim yu.

9. Yumi mas holim wanem tingting taim yumi karim ol hevi? (Provep 27:11)

⁹ Taim yumi tingim Jehova olsem Man i stap tru, dispela bai helpim yumi long holim stretpela tingting long ol hevi i painim yumi. Hau yumi ken mekim olsem? Yumi ken tingim olsem ol hevi i painim yumi, ol i insait long bikpela tok i kamap namel long Jehova na Satan. Satan i sutim tok long yumi ol man olsem taim yumi karim pen na hevi, yumi bai givim baksait long Jehova. (Jop 1:​10, 11; ritim Provep 27:11.) Tasol taim yumi sanap strong na karim ol hevi i painim yumi, yumi soim olsem yumi laikim Jehova na yumi pruvim olsem Satan em i man bilong giaman. Olsem wanem? Yu wok long karim hevi long gavman i birua long yu, yu bungim hevi bilong mani, ol man i les long putim yau taim yu autim tok, o yu bungim ol narapela hevi? Sapos olsem, orait tingim olsem ol hevi i painim yu i givim rot long yu inap mekim bel bilong Jehova i amamas. Na tingim tu olsem Em bai no inap larim wanpela traim i kamap long yu winim strong bilong yu, nogat. (1 Kor. 10:13) Em bai givim yu strong yu nidim bilong karim ol hevi.

GOD I STAP LAIP BAI GIVIM GUTPELA PE LONG YU

10. God i stap laip bai mekim wanem long ol man i lotuim em?

¹⁰ Jehova em God i save givim gutpela pe long ol man i lotuim em. (Hib. 11:6) Em i helpim yumi long stap bel isi na belgut long nau na em bai givim yumi laip oltaim long bihain. Yumi ken  bilip na wet long Jehova, na yumi save tru olsem em i gat laik na strong long givim gutpela pe long yumi. Na dispela bilip yumi gat bai kirapim yumi long givim bel long mekim ol wok bilong em, wankain olsem ol gutpela wokman bilong em long bipo i bin mekim. Dispela em samting Timoti i bin mekim long taim bilong ol aposel.—Hib. 6:​10-12.

11. Wanem samting i kirapim Timoti long givim bel olgeta long mekim wok insait long kongrigesen? (1 Timoti 4:10)

¹¹ Ritim 1 Timoti 4:10. Timoti i bilip na wet olsem God bai givim gutpela pe long em. Olsem na em i givim bel olgeta long mekim wok bilong Jehova na ol wok bilong helpim ol narapela. Em i mekim wanem ol wok? Aposel Pol i kirapim Timoti long kamap gutpela tisa moa insait long kongrigesen na taim em i autim tok. Na tu, Pol i tokim em long stap gutpela eksampel long ol wanbilip bilong em, em ol yangpela na ol lapun tu. Na em i kisim tu sampela wok i gat hatwok bilong en, olsem em i mas givim strongpela tok kaunsel long ol Kristen em ol i nidim ol dispela tok, tasol em i mas mekim long pasin laikim. (1 Tim. 4:​11-16; 2 Tim. 4:​1-5) Timoti i save olsem maski sampela taim ol narapela i no lukim ol wok em i mekim o ol i no tok tenkyu long em, Jehova bai givim gutpela pe long em.—Rom 2:​6, 7.

12. Wanem samting i kirapim ol elda long givim bel yet long mekim ol wok insait long kongrigesen? (Lukim tu piksa.)

¹² Long nau tu, ol elda i ken bilip tru olsem Jehova i lukim ol gutpela wok ol i mekim na em i amamas tru long ol. Ol elda i save mekim sepeding visit, skulim ol narapela, na autim tok, na tu, planti elda i sapotim ol konstraksen projek na helpim tu wok bilong disasta rilif. Ol narapela i insait long Ol Grup Bilong Visitim Sikman o Hospital Lieson Komiti. Ol elda em ol i redi long mekim ol dispela wok, ol i tingim kongrigesen olsem arensmen em Jehova i putim na ol i no tingim kongrigesen olsem wanpela oganaisesen bilong ol man, nogat. Dispela i kirapim ol  long givim bel olgeta long mekim ol wok insait long kongrigesen na ol i bilip tru olsem God bai givim gutpela pe long wok ol i mekim.—Kol. 3:​23, 24.

13. Jehova i pilim olsem wanem long ol wok bilong em yumi mekim?

¹³ Yumi olgeta i no inap mekim wok elda. Tasol yumi olgeta i ken givim sampela samting long Jehova. God bilong yumi i save amamas tru taim yumi givim bel olgeta long lotuim em. Em i luksave long ol kontribiusen yumi givim bilong sapotim wok i kamap long olgeta hap bilong graun, maski yumi givim liklik kontribiusen tasol. Em i save amamas taim yumi wok strong long daunim pasin bilong yumi long sem na yumi apim han na bekim tok long ol miting, na em i save amamas tru taim em i lukim olsem yumi lusim rong bilong ol narapela na fogivim ol. Maski sapos yu pilim olsem yu no inap mekim planti samting long wok bilong Jehova olsem yu laik mekim, yu ken bilip tru olsem Jehova i amamas long ol wok yu inap mekim. Em i laikim yu tru na em bai givim gutpela pe long yu.—Luk 21:​1-4.

PAS GUT YET WANTAIM GOD I STAP LAIP

14. Taim yumi pas gut yet wantaim Jehova, hau bai dispela i helpim yumi long stap gut long em? (Lukim tu piksa.)

¹⁴ Sapos yumi tingim Jehova olsem Man i stap tru, dispela bai helpim yumi long stap gut long em. Dispela samting i bin kamap long Josep. Em i sanap strong na sakim pasin pamuk. Em i tingim God olsem Man i stap tru na em i no laik tru long mekim wanpela samting bilong mekim Em i bel hevi. (Stt. 39:9) Sapos yumi laik tingim Jehova olsem Man i stap tru, yumi mas lusim haptaim long beten long em na stadi long Baibel. Dispela bai strongim pasin pren bilong yumi wantaim em. Olsem Josep, taim yumi pas gut wantaim Jehova, yumi bai no laik tru long mekim wanpela samting i mekim Em i bel hevi.—Jems 4:8.

15. Yumi kisim wanem skul long samting i bin kamap long lain Israel taim ol i stap long ples drai nating? (Hibru 3:12)

¹⁵ Taim ol man i lusim tingting olsem Jehova em i God i stap laip, isi isi ol inap i go longwe long Em. Tingim samting i bin kamap long lain Israel taim ol i stap long ples drai nating. Ol i  save olsem Jehova i stap tru, tasol ol i stat long kisim tupela tingting olsem em bai lukautim ol long ol samting ol i nidim, o nogat. Ol i askim tu olsem: “Jehova i stap wantaim yumi o nogat?” (Kis. 17:​2, 7) Dispela i mekim na ol i bikhet long God. Stori bilong ol i stap olsem tok lukaut long yumi, na yumi no laik tru long bihainim pasin bikhet bilong ol.—Ritim Hibru 3:12.

16. Wanem samting inap traim bilip bilong yumi?

¹⁶ Pasin bilong ol man bilong dispela graun i mekim na yumi inap pilim hatwok long pas gut yet wantaim Jehova. Planti man i sakim dispela bilip olsem God i stap tru. Planti taim i luk olsem ol man i sakim ol lo bilong Jehova ol i gat gutpela laip. Taim yumi lukim olsem, dispela inap traim bilip bilong yumi. Em tru yumi bilip olsem God i stap tru, tasol yumi inap stat long kisim tupela tingting olsem em bai helpim yumi, o nogat. Man bilong raitim Buk Song 73 i bin gat kain tingting olsem. Em i lukim olsem ol man i enjoim laip bilong ol, maski ol i brukim ol lo bilong God. Dispela i mekim na em i stat long holim tupela tingting long ol blesing em inap kisim taim em i mekim wok bilong God.—Sng. 73:​11-13.

17. Wanem samting bai helpim yumi long pas gut yet wantaim Jehova?

¹⁷ Bihain wanem samting i helpim man bilong raitim song long holim stretpela tingting gen? Em i tingim samting inap kamap long ol man em ol i lusim tingting long Jehova. (Sng. 73:​18, 19, 27) Na tu, em i tingim ol blesing em inap kisim taim em i mekim wok bilong God. (Sng. 73:24) Yumi tu i ken tingim ol blesing em Jehova i givim long yumi. Na skelim ol blesing nau yumi kisim wantaim ol hevi inap painim yumi sapos yumi no mekim wok bilong Jehova. Dispela bai helpim yumi long wokabaut yet long stretpela rot na yumi bai holim wankain tingting olsem man bilong raitim song, em i tok: “Mi bai go klostu long God, long wanem, dispela i gutpela long mi.”—Sng. 73:28.

18. Wai na yumi no ken pret long ol samting bai kamap bihain?

¹⁸ Yumi ken sanap strong na karim olgeta kain hevi i painim yumi long dispela taim bilong las de bikos yumi stap olsem “wokboi bilong dispela God i gat laip, em God tru.” (1 Tes. 1:9) God bilong yumi em Man i stap tru na em i save helpim ol man i lotuim em. Em i bin helpim ol wokman bilong em long bipo, na em i helpim yumi long nau tu. Klostu nau yumi bai bungim taim bilong traipela hevi tru, kain hevi olsem i no bin kamap bipo long olgeta hap bilong graun. Tasol yumi no inap stap wanpis, Jehova bai stap wantaim yumi. (Ais. 41:10) Yes, yumi olgeta i “ken strongim bel na tok olsem: ‘Jehova em i helpim bilong mi; mi no inap pret.’”—Hib. 13:​5, 6.