OLSEM WANEM? Yu mekim wankain wok olsem ol profet bilong bipo? Long nupela edisen bilong New World Translation bilong 2013, seksen bilong “Glossary of Bible Terms” i tok, profet em “man em God i tokim em long ol samting Em i tingting pinis long mekim. Ol profet i stap olsem ol mausman bilong God na tokaut long ol samting bai kamap bihain, na skulim ol man long ol tok na ol lo bilong Jehova, na tokaut long strafe bai painim ol manmeri.” Yumi no mekim ol tok profet, tasol yumi stap olsem mausman bilong God na tokaut long ol tok i stap long Baibel.—Mat. 24:14.

Yumi kisim gutpela blesing tru long tokim ol manmeri long God bilong yumi, Jehova, na skulim ol long ol samting em i laik bai ol i mekim! Yumi wok bung wantaim “ensel i flai namel long skai.” (Rev. 14:6) Tasol ol hevi inap mekim na yumi no tingim gutpela wok yumi mekim. Wanem ol hevi inap painim yumi? Ating yumi inap pilim les, bel hevi, o pilim olsem yumi no gutpela inap long mekim dispela wok. Ol profet long bipo i bungim wankain hevi, tasol ol i no givap. Jehova i helpim ol long mekim gut asainmen bilong ol. Yumi ken skelim stori bilong sampela profet, na kisim save long olsem wanem yumi inap bihainim pasin bilong ol.

Sampela taim yumi pilim taiet bikos yumi mekim ol wok bilong wan wan de, na yumi les long autim tok. Sampela taim yumi mas malolo olsem Jisas na ol aposel i bin mekim. (Mak 6:31) Tasol tingim Esekiel taim em i mekim wok profet namel long lain Israel em ol i stap kalabus long Babilon. Wanpela taim, God i tokim Esekiel long kisim wanpela brik na katim piksa bilong taun Jerusalem antap long en. Em i mas slip long left sait bilong em inap 390 de na bihain em i mas tanim na slip long rait sait bilong em inap 40 de—dispela i olsem piksa bilong samting em ol soldia i save mekim taim ol i laik daunim wanpela taun. Jehova i tokim Esekiel: “Bai mi pasim yu long baklain na bai yu no inap  tanim bodi bilong yu. Na bai yu stap olsem inap yu pinisim olgeta dispela de mi makim bilong yu.” (Ese. 4:1-8) Ating dispela samting i pulim tingting bilong ol Israel husat i stap kalabus, na ol i laik save long risen bilong ol samting em Esekiel i mekim. Winim 1-pela yia olgeta, Esekiel i mekim dispela asainmen. Olsem wanem bai dispela profet i mekim gut asainmen bilong em?

Esekiel i kliagut long risen na God i salim em olsem profet. God i salim Esekiel i go na God i tok: “Maski ol [Israel] i harim tok bilong yu o nogat, bai dispela lain . . . manmeri i ken save olsem, wanpela profet bilong mi i bin i stap wantaim ol.” (Ese. 2:5) Em i no lusim tingting long risen bilong wok em i mekim. Olsem na em i redi long mekim samting bai stap olsem piksa bilong hevi bai painim Jerusalem. Em i mekim gut wok profet. Bihain, em na ol wanlain Israel i stap kalabus i kisim toksave olsem: “Jerusalem i bagarap pinis”! Long dispela taim, ol Israel i luksave olsem wanpela profet i bin i stap wantaim ol.—Ese. 33:21, 33.

Long nau, yumi toksave long ol manmeri long bagarap bai painim graun bilong Satan. Maski yumi pilim taiet, yumi yusim strong bilong yumi long autim tok bilong Baibel, mekim ol gobek, na ol Baibel stadi. Taim yumi lukim truim bilong ol tok profet i makim pinis bilong haptaim nogut bilong nau, yumi bai belgut tru bikos yumi stap olsem “man em God i tokim em long ol samting Em i tingting pinis long mekim.”

Yumi givim bel olgeta long mekim wok bikos Jehova i strongim yumi. Tasol sampela taim, yumi inap bel hevi taim ol man i no putim yau long tok yumi autim. Yumi ken tingim eksampel bilong profet Jeremaia. Ol man i tok bilas na toknogutim em bikos em i autim tok bilong God long ol Israel. Wanpela taim Jeremaia i tokim God: “Mi no ken tingting moa long yu, na mi no ken autim tok moa long nem bilong yu.” Jeremaia i gat ol filings wankain olsem bilong yumi. Tasol em i autim yet tok bilong God. Bilong wanem em i mekim olsem? Em i tokim God: “Mi pilim tok bilong yu i olsem wanpela bikpela paia i stap long bel bilong mi na i olsem paia i lait insait long ol bun bilong mi. Mi trai hat long pasim tok bilong yu, tasol mi no inap.”—Jer. 20:7-9.

Olsem tasol, sapos ol man i mekim hatpela pasin long yumi na yumi bel hevi, yumi inap stap bel isi sapos yumi tingim tingim ol tok yumi autim. Sapos yumi mekim olsem, tok yumi autim bai i stap ‘olsem paia i lait insait long ol bun bilong yumi.’ Taim yumi kisim pasin bilong ritim Baibel long olgeta de, dispela bai mekim paia i lait yet insait long yumi.

Sampela Kristen i pilim hatwok taim ol i kisim asainmen em ol i no gat save long mekim na ol i no save long risen bilong en. Ating profet Hosea i bin pilim olsem. Jehova i tokim em: “Yu go maritim wanpela meri na meri bai i go mekim pasin pamuk. Na ol pikinini bilong en bai i mekim wankain pasin olsem mama yet.” (Hos. 1:2) Yu bai pilim olsem wanem sapos yu bai marit na God i tokim yu olsem meri bilong yu bai kamap pamukmeri? Hosea i orait long kisim dispela asainmen. Em i maritim Gomer na Gomer i karim wanpela pikinini man. Bihain Gomer i karim pikinini meri na narapela pikinini man. Dispela 2-pela pikinini i kamap long rot bilong pasin adaltri—Gomer i mekim dispela pasin nogut. Jehova i tokim Hosea olsem meri em i laik maritim bai “ ran i go bihainim ol man em i laikim.” Tingim dispela tok, “ol man em i laikim”—dispela i makim olsem em i laikim planti man. Bihain, em bai kam bek gen long Hosea. Sapos yu profet Hosea, bai yu larim meri bilong yu i kam bek long yu o olsem wanem? Jehova i tokim Hosea long em i mas larim meri bilong em i kam bek long em! Hosea i baim bek meri bilong em long bikpela mani.—Hos. 2:7; 3:1-5.

Ating Hosea i laik save long wanem gutpela samting bai kamap sapos em i mekim gut asainmen bilong em. Hosea i yusim laip bilong em yet long helpim yumi long luksave olsem God i bel hevi tru taim lain Israel i givim baksait long em. Gutpela samting i kamap—sampela manmeri bilong lain Israel i tanim bel na kam bek long God.

Long nau, God i no tokim wanpela man long maritim meri i save “mekim pasin pamuk.” Yumi kisim wanem skul long pasin bilong Hosea, olsem em i redi long mekim dispela asainmen? Wanpela skul  em olsem: Maski yumi yet i pilim hatwok, yumi mas amamas long autim gutnius bilong Kingdom long “ol pablik ples na long ol haus.” (Apo. 20:20) Ating yu pilim hatwok long mekim sampela samting long sait bilong wok autim tok bilong Kingdom. Planti manmeri husat i stadi long Baibel wantaim ol Witnes Bilong Jehova, ol i tok ol i amamas long stadi long Baibel, tasol ol i no inap tru long i go long haus bilong ol man na autim tok. Tasol bihain, planti bilong ol i mekim wok em pastaim ol i pilim olsem ol i no inap long mekim. Yu kisim wanem skul long dispela stori?

Yumi inap kisim narapela skul long pasin bilong Hosea long mekim asainmen i gat hatwok long en. Em inap tokim Jehova olsem em i no inap yusim marit bilong em long mekim samting we i stap olsem tok piksa. Sapos Hosea yet i no bin raitim dispela stori, i no gat man inap save long samting em God i tokim Hosea long mekim. Tingim olsem yumi stap namel long planti lain na rot i op long yumi inap tokim ol long Jehova. Dispela samting i kamap long Anna, em wanpela sumatin long haiskul long Amerika. Tisa i tokim olgeta sumatin long klas bilong Anna long raitim wanpela stori long samting ol i bilip tru long en, na ol i ken kirapim ol arapela wanklas long bilipim dispela stori. Anna inap kisim tingting olsem em i no inap yusim dispela rot long autim tok. Tasol em i pilim olsem God i opim rot long em inap autim tok. Anna i tingim gutpela samting bai kamap, olsem na em i beten long Jehova, na em i kisim strongpela laik long autim tok. Em i raitim stori, na putim het tok olsem, “Evolusen: Skelim Ol Evidens.”

Taim Anna i kamapim stori bilong em long klas, wanpela gel i tromoi planti askim long Anna—dispela gel i bilip tru long evolusen. Anna i stori gut na bekim olgeta askim. Tisa bilong Anna i amamas tru na em i givim presen long Anna long gutpela stori em i bin raitim. Kirap long dispela taim, Anna i save stori wantaim dispela wanklas husat i bin givim planti askim long em, na Anna i save stori long ol samting God i wokim. Anna i redi long mekim “asainmen” Jehova i givim long em, na em i tok: “Nau mi no pret moa long autim gutnius.”

Em tru olsem yumi no mekim wok profet, tasol sapos yumi bihainim pasin bilong ol profet olsem Esekiel, Jeremaia, na Hosea, yumi tu inap mekim gut wok em Jehova i laik bai yumi mas mekim long nau! Long taim bilong famili lotu, o long taim yu mekim stadi bilong yu yet, yu ken ritim stori bilong ol profet bilong bipo na tingim tingim olsem wanem yu inap bihainim pasin bilong ol.