1, 2. (a) Sampela papamama Kristen i tingting planti long wanem ol askim taim pikinini i laik kisim baptais? (b) Olsem wanem yumi save olsem ol lain i laik kisim baptais i dediket pinis long Jehova? (Lukim piksa long kirap bilong stadi.)

WANPELA gel em yumi bai kolim em Maria, em i gat 9-pela krismas, na papamama bilong em i lukluk long em taim em i sanap wantaim ol lain bilong kisim baptais. Long strongpela nek, em i bekim 2-pela askim em brata i mekim tok i kamapim. Bihain, Maria i kisim baptais.

² Papamama bilong Maria i amamas tru taim Maria i mekim disisen long dediket long Jehova na kisim baptais. Maski i olsem, inap sampela haptaim mama bilong em i tingting planti long ol dispela askim: ‘Maria i yangpela tumas long kisim baptais? Em i kliagut olsem baptais i bikpela samting? I gutpela em i wet inap long em i kamap bikpela na bai em i ken kisim baptais?’ Planti papamama i givim ol dispela askim long ol yet taim pikinini i kamapim laik bilong em long kisim baptais. (Sav. 5:5) Dediket na baptais em samting olgeta Kristen i mas mekim.—Lukim blok “ Yu Dediket Pinis Long Jehova?”

3, 4. (a) Aposel Pita i mekim wanem tok bilong kamapim klia olsem baptais em i bikpela samting? (b) Olsem wanem baptais i wankain long pasin bilong Noa long wokim sip?

 ³ Taim aposel Pita i stori long baptais, em i stori long wok Noa i mekim bilong wokim sip, na em i tok: “Dispela samting i bin kamap i olsem piksa bilong samting i kisim bek yupela long nau, em baptais yupela i kisim.” (Ritim 1 Pita 3:20, 21.) Taim Noa i wokim sip, em i kamapim long ples klia olsem em i dediketim laip bilong em long mekim laik bilong God. Noa i stap gut long God na em i inapim wok em Jehova i givim long em. Em i bilip na em i wokim sip, olsem na em wantaim famili bilong em i abrusim bagarap long Bikpela Tait. Bilong wanem Pita i stori long Noa i wokim sip taim em i stori long baptais?

⁴ Taim Noa i wokim sip, dispela i kamapim klia bilip bilong em. Olsem tasol, taim wanpela i kisim baptais, dispela i kamapim klia olsem em i bilip long ofa bilong Krais na em i dediket long Jehova. Olsem Noa, ol disaipel i dediket pinis i mekim wok em God i givim long ol. Noa i abrusim bagarap long Bikpela Tait, olsem tasol ol manmeri i kisim baptais na bihainim tok bilong God, ol bai abrusim bagarap taim dispela graun na ol pasin nogut bilong en i pinis. (Mak 13:10; Rev. 7:9, 10) Dispela em risen na dediket na baptais i bikpela samting. Man i mekim ol eskius o surikim taim bilong em long kisim baptais, em inap lus long kisim laip oltaim.

5. Yumi bai skelim wanem ol askim long dispela stadi?

⁵ Yumi luksave olsem baptais i bikpela samting, olsem na yumi ken skelim 3-pela askim. Baibel i tok wanem long baptais? Man i mas mekim wanem paslain long em i kisim baptais? Bilong wanem Kristen i mas kliagut long risen na baptais i bikpela samting taim em i skulim pikinini o narapela Baibel sumatin?

6, 7. (a) Taim Jon i baptaisim ol manmeri, dispela i makim wanem samting? (b) Taim Jon i baptaisim Jisas, olsem wanem dispela baptais i narapela kain?

⁶ Namba 1 taim Baibel i stori long baptais em long stori bilong Jon Bilong Baptais. (Mat. 3:1-6) Ol manmeri em Jon i baptaisim ol, ol i kamapim klia olsem ol i tanim bel long ol sin ol i mekim taim ol i brukim Lo Bilong Moses. Jon i kisim gutpela blesing tru taim em i baptaisim Jisas, em Pikinini Bilong God. Baptais bilong Jisas i no wankain long taim Jon i baptaisim ol manmeri. (Mat. 3:13-17) Jisas i no gat sin, olsem na i no gat wok long em i tanim bel. (1 Pita 2:22) Taim Jisas i baptais, em i soim olsem em i laik givim em yet long mekim laik bilong God.—Hib. 10:7.

⁷ Taim Jisas i stap long graun na mekim wok autim tok, ol disaipel bilong em tu i baptaisim ol man. (Jon 3:22; 4:1, 2) Ol disaipel i baptaisim ol manmeri, na dispela i makim olsem ol manmeri i tanim bel long rong ol i mekim taim ol i brukim Lo Bilong Moses. Tasol bihain long Jisas i dai na kirap bek, baptais bilong ol manmeri i makim narapela samting.

8. (a) Bihain long Jisas i kirap bek, em i givim wanem wok long ol disaipel bilong em? (b) Stori long risen na baptais bilong Kristen em i bikpela samting.

⁸ Long yia 33 C.E., Jisas i kirap bek na em i kamap long winim 5 handret manmeri, na ating ol pikinini tu. Ating long dispela taim em i tokim ol: “Yupela i mas i go na kamapim ol disaipel long olgeta lain man, na baptaisim ol long nem bilong Papa na bilong Pikinini na bilong holi spirit. Skulim ol long bihainim olgeta samting mi tokim yupela long mekim.” (Mat. 28:19, 20; 1 Kor. 15:6) Tru tumas, i luk olsem planti handret disaipel bilong Jisas i stap taim em i givim wok long ol long kamapim disaipel. Tok bilong Jisas i kamapim klia olsem ol manmeri i mas kisim baptais na bai ol inap stap olsem ol disaipel bilong em. (Mat. 11:29, 30) Sapos man i laik mekim wok bilong God, orait em i mas kliagut olsem ol wok Jisas i mekim em bilong inapim ol samting Jehova i tingting pinis long kamapim. Sapos em i kliagut long dispela, orait em i ken kisim baptais. Long dispela rot, God inap orait long em. Baibel i kamapim klia olsem long taim bilong ol aposel, ol nupela disaipel bilong Krais i kliagut long risen na baptais em i bikpela samting. Olsem na kwiktaim ol i kisim baptais.—Apo. 2:41; 9:18; 16:14, 15, 32, 33.

9, 10. Yumi kisim wanem skul long stori bilong man Itiopia na aposel Pol?

⁹ Ritim Aposel 8:35, 36. Tingim stori bilong man Itiopia husat i bihainim lotu Juda. Em i kam lotu long Jerusalem na em i laik i go bek long ples bilong em. Ensel bilong Jehova i kirapim Filip na kwiktaim em i go bungim man Itiopia na “autim tok long gutnius bilong Jisas” long em. Dispela man Itiopia i mekim wanem? Samting em i mekim i kamapim klia olsem em i amamas long tok i tru em i kisim save long en. Em i laik mekim ol samting i stret wantaim laik bilong Jehova, olsem na kwiktaim em i kisim baptais.

¹⁰ Narapela eksampel em wanpela man Juda husat i wok long mekim nogut long ol Kristen. Em i bilong lain Juda em ol i dediket pinis long God, tasol ol Juda i no stap moa olsem lain bilong Jehova. Dispela man i save strong long bihainim kastam bilong ol Juda, tasol bihain em i kisim stretpela save taim Jisas Krais i kamap na toktok long em. Dispela man i mekim wanem? Em i amamas  long kisim helpim long wanpela Kristen, em Ananaias. Baibel i stori long dispela man olsem: “Em i kirap na i kisim baptais.” (Apo. 9:17, 18; Gal. 1:14) Yumi luksave olsem dispela man Juda em aposel Pol tasol. Tingim, bihain long Pol i kisim save long ol wok Jisas i mekim bilong inapim ol samting God i tingting pinis long kamapim, kwiktaim em i kisim baptais.—Ritim Aposel 22:12-16.

11. (a) Wanem samting i kirapim ol Baibel sumatin long kisim baptais? (b) Yumi pilim olsem wanem taim yumi lukim ol nupela i dediket na kisim baptais?

¹¹ Wankain samting i kamap long ol Baibel sumatin long nau, maski ol i yangpela o lapun. Ol manmeri husat i bilip na ol i laikim tok i tru bilong Baibel, ol i redi long dediket na kisim baptais. Long taim bilong kibung, yumi olgeta i save amamas long harim brata i mekim tok bilong baptais. Ol Witnes Bilong Jehova i save amamas taim wanpela Baibel sumatin i kisim save long tok i tru na i winim mak bilong kisim baptais. Ating ol papamama Kristen i save amamas tru taim pikinini bilong ol i stap namel long ol lain i laik kisim baptais. Long sevis yia bilong 2017, winim 284 tausen “manmeri em bel bilong ol i gutpela,” ol i dediketim laip bilong ol long Jehova na kisim baptais. (Apo. 13:48) Dispela i soim olsem ol nupela disaipel i kliagut olsem baptais em samting ol Kristen i mas mekim. Ol i winim wanem ol mak na kisim baptais?

12. Baibel sumatin i mas mekim wanem ol samting paslain long em i kisim baptais?

¹² Paslain long sumatin i kisim baptais, em i mas kisim stretpela save long God na ol samting Em i tingting pinis long mekim, na rot God i stretim bilong kisim bek ol manmeri. Dispela bai helpim sumatin long kisim pasin bilong bilip. (1 Tim. 2:3-6) Dispela bilip bai kirapim em long bihainim ol stretpela lo bilong Jehova na sakim ol pasin em God i no laikim. (Apo. 3:19) Em i klia tru olsem man i no inap truim dediket bilong em long God taim em i mekim ol pasin i no stret, em ol pasin we i pasim man long go insait long Kingdom. (1 Kor. 6:9, 10) Sapos yumi laik truim dediket bilong yumi, yumi mas bihainim ol stretpela lo bilong Jehova na mekim sampela samting moa. Kristen husat i wok strong long bihainim stretpela pasin, em bai wok strong long i go long ol miting bilong kongrigesen na givim bel long autim tok na kamapim disaipel. Jisas i tok ol disaipel tru bilong em bai mekim dispela wok. (Apo. 1:8) Taim wanpela nupela disaipel i mekim ol dispela samting, orait nau em i redi long dediket long Jehova long rot bilong beten, na em i kamapim long ples klia dediket bilong em taim em i kisim baptais.

13. Bilong wanem tisa bilong Baibel i mas tingim olsem baptais em samting ol Kristen i mas mekim?

¹³ Taim yumi helpim ol pikinini bilong yumi na ol narapela Baibel sumatin long winim ol mak, yumi mas tingim olsem baptais em wanpela mak bilong ol disaipel tru. Sapos yumi tingim olsem dispela em i bikpela samting, yumi inap stori gut wantaim Baibel sumatin bilong yumi. Taim rot i op, yumi ken tokim ol long risen na dediket na baptais i bikpela samting. Tru tumas, yumi laik bai ol pikinini na ol Baibel sumatin bilong yumi i winim mak na kisim baptais!

14. Bilong wanem yumi no ken subim wanpela long kisim baptais?

¹⁴ Ol papamama, tisa bilong Baibel sumatin, na ol narapela insait long kongrigesen i no ken subim wanpela long kisim baptais. Jehova i no save subim man long lotuim em. (1 Jon 4:8) Taim yumi skulim ol pikinini na ol Baibel sumatin, yumi laik kirapim ol long luksave olsem em i bikpela samting long pas gut wantaim God. Sumatin i mas  pilim tok i tru na em i mas i gat laik long mekim wok bilong i stap olsem wanpela disaipel, na dispela bai kirapim em long kisim baptais.—2 Kor. 5:14, 15.

15, 16. (a) Man i mas winim hamas krismas bilong kisim baptais? Stori long dispela. (b) Bilong wanem Baibel sumatin i mas kisim baptais olsem wanpela Witnes Bilong Jehova maski em i baptais pinis long narapela lotu?

¹⁵ Baibel i no kolim stret hamas krismas man i mas i gat na bai em i ken kisim baptais. Wan wan sumatin bai mekim ol samting long skel bilong ol yet long kamap strong long bilip. Planti i kisim baptais taim ol i yangpela, na ol i stap gut yet long Jehova. Sampela Baibel sumatin i kisim save long tok i tru bilong Baibel taim ol i gat bikpela krismas—sampela i winim 1 handret krismas pinis—na nau ol i luksave olsem em i bikpela samting long ol i kisim baptais!

¹⁶ Wanpela sista i stadi wantaim wanpela meri husat i gat bikpela krismas, na dispela meri i askim sista sapos i stret em i baptais gen;insait long ol yia i go pinis, em i bin baptais long ol narapela lotu. Sista i skelim sampela skripsa bilong Baibel wantaim dispela meri we i stret long askim bilong em. Nau, em i kliagut olsem Baibel i tokaut stret olsem em i mas baptais gen, olsem na i no longtaim na em i kisim baptais. Maski krismas bilong em i winim pinis 75 yia, em i luksave olsem em i mas kisim baptais. Tru tumas, taim wanpela i kisim stretpela save long laik bilong Jehova, em i mas baptais. Ol nupela disaipel i mas baptais gen maski ol i bin baptais pinis long narapela lotu.—Ritim Aposel 19:3-5.

17. Yumi mas tingim wanem samting long de wanpela i kisim baptais?

¹⁷ Taim wanpela i kisim baptais, em taim bilong amamas. Na tu, em taim bilong tingim dediket bilong yumi. Man i mas wok hat long inapim dediket bilong em. Olsem na Jisas i tok, pasin bilong i stap olsem disaipel i olsem man i karim hap plang. Ol disaipel bilong Jisas “i no ken bihainim laik bilong ol yet, nogat. Ol i mas bihainim laik bilong dispela man husat i kisim ples bilong ol na i dai na i kirap bek.”—2 Kor. 5:15; Mat. 16:24.

18. Yumi bai skelim wanem ol askim long neks stadi?

¹⁸ Mama bilong Maria i tingim ol samting yumi stori pinis long en taim em i mekim ol askim i stap long kirap bilong stadi. Sapos yu wanpela papa o mama, ating yu bai askim yu yet olsem: ‘Tru tru pikinini bilong mi i redi long kisim baptais? Em i save gut long ol bikpela tok bilong Baibel bambai em i ken inapim dediket bilong em? Em i laik winim wanem ol mak long sait bilong skul na wok mani? Olsem wanem sapos pikinini i baptais na bihain em i mekim wanpela bikpela rong?’ Long neks stadi, yumi bai stori long ol dispela samting na olsem wanem ol papamama Kristen inap helpim pikinini long holim stretpela tingting long baptais.