1. Ol papamama Kristen i laik save long wanem samting paslain long pikinini i baptais?

WANPELA sista nem bilong em Blossom Brandt. Em i stori long ol samting i kamap taim em i laik kisim baptais, em i tok: “Inap planti mun mi wok long tokim Papa na Mama olsem mi laik kisim baptais, na oltaim ol i save toktok wantaim mi long dispela samting. Ol i laik bai mi save olsem dispela em bikpela disisen. Long Disemba 31, 1934, de i kamap long mi bai kisim baptais.” Long nau, ol papamama Kristen i gat wankain tingting long helpim ol pikinini long mekim gutpela disisen. Taim ol i surikim nating taim bilong pikinini long kisim baptais, dispela inap bagarapim em long sait bilong bilip. (Jems 4:17) Tasol papamama i mas bihainim gutpela tingting na luksave sapos pikinini i redi long mekim wok olsem wanpela disaipel paslain long em i baptais.

2. (a) Sampela wasman sekit i tok wanem? (b) Yumi bai stori long wanem samting long dispela stadi?

² Sampela wasman sekit i tok olsem ol i bungim ol yangpela em ol i gat 18 i go 22 krismas samting, na ol i kamap bikpela insait long famili Witnes, tasol ol i no kisim baptais. Planti bilong ol i go long ol miting bilong kongrigesen na mekim wok autim tok, na ol i tingim ol yet olsem ol i Witnes Bilong Jehova. Tasol sampela  samting i mekim na ol i surik long dediket long Jehova na kisim baptais. Bilong wanem ol pikinini inap surik long baptais? Sampela taim, papamama i tokim ol long ol i no ken baptais hariap. Long dispela stadi, yumi bai stori long 4-pela samting we i pasim ol papamama Kristen long helpim pikinini long winim mak na kisim baptais.

3. Papamama bilong Blossom i skelim wanem samting?

³ Papamama bilong Blossom em yumi stori long paragraf 1, ol i gat gutpela tingting. Ol i skelim gut sapos Blossom i winim krismas we em inap kliagut long risen na em i bikpela samting long em i mas kisim baptais. Olsem wanem ol papamama inap save olsem pikinini i redi long dediketim laip bilong em?

4. Olsem wanem tok bilong Jisas long Matyu 28:19, 20 inap helpim ol papamama taim ol i skulim ol pikinini?

⁴ Ritim Matyu 28:19, 20. Olsem yumi stori pinis long stadi i kamap paslain, Baibel i no kolim stret krismas man i mas i gat bambai em i kisim baptais. Tasol ol papamama inap save sapos pikinini i redi long baptais taim ol i skelim ol samting pikinini i mas mekim taim em i kamap disaipel. Tok Grik ol i trensletim olsem “kamapim ol disaipel” long Matyu 28:19 i makim olsem yumi skulim ol man na yumi laik bai ol i kamap disaipel. Taim man i kamap disaipel, em i kliagut long ol skultok bilong Jisas na em i tingting strong long bihainim ol dispela tok. Olsem na ol papamama Kristen i mas putim mak long skulim pikinini bilong ol taim pikinini i bebi yet na bai em inap kamap disaipel bilong Krais taim em i go bikpela. Em tru olsem ol bebi i no inap long kisim baptais. Tasol Baibel i soim olsem ol liklik pikinini inap kliagut long ol tok i tru bilong Baibel na bihainim.

5, 6. (a) Wanem samting i helpim Timoti long winim mak na kisim baptais? (b) Olsem wanem ol papamama inap helpim pikinini long winim mak na kisim baptais?

⁵ Timoti em wanpela disaipel husat i mekim disisen long kamap Kristen taim em i yangpela yet. Aposel Pol i tok olsem Timoti i kisim save long tok i tru bilong Baibel taim em i bebi yet. Papa bilong Timoti i no wanpela Kristen, tasol Mama na bubu meri bilong em i bilong lain Juda. Ol Juda i kliagut long tok bilong Baibel, olsem na tupela i skulim Timoti long kisim pasin bilong laikim ol tok bilong Rait Holi. Dispela i mekim na bilip bilong Timoti i kamap strong. (2 Tim. 1:5; 3:14, 15) Taim Timoti i gat 19 o 20 krismas samting, ol brata i luksave olsem em i stap olsem wanpela Kristen husat inap mekim ol gutpela wok insait long kongrigesen.—Apo. 16:1-3.

⁶ Olgeta pikinini i no wankain; sampela i kamap bikpela long tingting paslain long ol narapela. Sampela pikinini i save wokim tingting hariap o ol inap pilim tru ol tok ol i harim, olsem na bel i kirapim ol long winim mak na kisim baptais. Sampela bai i no redi long baptais inap long taim ol i kamap bikpela. Olsem na papamama i gat gutpela tingting i no save subim pikinini long kisim baptais, nogat. Ol bai skelim pasin bilong pikinini long mekim ol wok lotu na helpim em long kamap strong long bilip. Ol papamama i ken amamas taim pikinini i bihainim gutpela tingting na i mekim gutpela disisen. (Ritim Sindaun 27:11.) Ol i no ken lusim tingting long nambawan wok bilong ol—em long helpim pikinini long kamap disaipel. Olsem na ol papamama i ken askim ol yet olsem, ‘Pikinini bilong mi i save gut long tok bilong Baibel bambai em i ken  dediket long God na kisim baptais?’

7. Yu ting pikinini i mas kliagut long olgeta tok bilong Baibel bambai em i kisim baptais? Stori long dispela.

⁷ Insait long famili, ol papamama i mekim wok tisa. Olsem na ol i mas helpim pikinini long kliagut long ol bikpela tok bilong Baibel bambai pikinini inap dediketim laip bilong em long bihain. Tasol dispela i no makim olsem pikinini i mas save gut long olgeta tok bilong Baibel paslain long em i dediket long God na kisim baptais. Bihain long wanpela i kisim baptais, em i mas wok yet long kisim stretpela save. (Ritim Kolosi 1:9, 10.) Olsem na man i mas kisim save inap long wanem mak na em i ken kisim baptais?

8, 9. Yumi inap kisim wanem skul long stori bilong Pol na woda?

⁸ Stori bilong wanpela famili long taim bilong ol aposel inap helpim ol papamama long nau. (Aposel 16:25-33) Long 50 C.E. samting, Pol i mekim namba 2 misineri raun bilong em long Filipai. Ol man long dispela taun i sutim tok long Pol na Sailas, olsem na ol i kalabusim tupela. Long nait, bikpela guria i kamap na i mekim ol dua bilong haus kalabus i op. Taim woda i lukim dispela samting i kamap, em i ting ol kalabusman i ranawe pinis. Olsem na em i laik kilim em yet, tasol Pol i singaut na tokim em olsem olgeta kalabus lain i stap yet. Pol na Sailas i autim tok long woda na famili bilong em. Ol i amamas long save ol i kisim long ol tok i tru em Jisas i autim, olsem na kwiktaim ol i kisim baptais. Yumi inap kisim wanem skul long dispela stori?

⁹ Long bipo, ol lain i ritaia long ami i save was long haus kalabus. I luk olsem dispela woda i bin wok long ami long pastaim. Dispela woda i no gat save long Tok Bilong God. Olsem na sapos em i laik kliagut long ol tok bilong Rait Holi, em i mas kisim save long ol bikpela tok bilong Baibel, kliagut long samting em i mas mekim bilong i stap olsem wokman bilong God, na tingting strong long bihainim tok bilong Jisas. Insait long liklik haptaim tasol, save em i kisim long Rait Holi i kirapim em long kisim baptais. Em i kisim sampela save moa bihain long em i kisim baptais. Papamama Kristen bai mekim wanem sapos pikinini i soim olsem em i pilim tru ol bikpela tok bilong Baibel na em i kliagut long risen na pasin bilong dediket na baptais em i bikpela samting? Ol i ken helpim em long lukim ol elda bambai ol i ken skelim sapos em i winim mak bilong baptais. * Wankain olsem ol Kristen i baptais pinis, em bai kisim sampela save moa long samting Jehova i tingting pinis long mekim, na em bai mekim olsem inap oltaim oltaim.—Rom 11:33, 34.

10, 11. (a) Sampela papamama i gat wanem tingting? (b) Papamama i mas tingim wanem samting olsem namba 1 samting?

¹⁰ Sampela papamama i ting olsem i gutpela long pikinini i kisim bikpela skul na holim gutpela wok mani pastaim, na bihain em i ken baptais. Dispela i soim olsem ol i tingim tru pikinini, tasol yu ting dispela bai helpim pikinini long kisim amamas tru long bihain? Dispela tingting i stret wantaim stiatok bilong Baibel? Tok Bilong Jehova i kirapim yumi long mekim wanem?—Ritim Saveman 12:1.

¹¹ Yumi mas luksave olsem dispela graun na ol pasin bilong en i pait wantaim laik bilong Jehova na ol samting em i tingting pinis long mekim. (Jems 4:7, 8; 1 Jon 2:15-17; 5:19) Taim pikinini i pas gut wantaim Jehova, dispela bai helpim em long sakim Satan,  na ol pasin na tingting bilong dispela graun. Sapos papamama i putim wok mani i stap namba 1 samting, dispela inap paulim tingting bilong pikinini na em bai i no wok strong long winim ol mak long sait bilong bilip. Papamama i gat pasin laikim bai i no larim tingting bilong dispela graun i stiaim tingting bilong pikinini bilong ol. Yumi bai stap amamas tru taim yumi putim Jehova i stap namba 1 long laip bilong yumi.—Ritim Song 1:2, 3.

12. Bilong wanem sampela papamama i surikim taim bilong ol pikinini long baptais?

¹² Wanpela mama Kristen i stori long risen na em i no laik bai pikinini meri bilong em i kisim baptais. Em i tok: “Mi sem long tokaut olsem wanpela risen em mi no laik bai kongrigesen i rausim em.” Olsem dispela mama, sampela papamama i ting i gutpela moa long surikim taim bilong pikinini long kisim baptais i go inap long taim em i lusim pasin bilong ol liklik pikinini. (Stt. 8:21; Snd. 22:15) Ating ol i gat kain tingting olsem, ‘Sapos pikinini bilong mi i no kisim baptais, em i no inap raus long kongrigesen.’ Bilong wanem dispela tingting i no stret?—Jems 1:22.

13. Maski pikinini i no kisim baptais, yu ting em i no gat asua long ai bilong Jehova? Stori long dispela.

¹³ Ol papamama Kristen i no laik bai pikinini i kisim baptais sapos em i no redi long truim dediket bilong em. Tasol i no stret long holim kain tingting olsem, sapos pikinini i no kisim baptais, em bai no gat asua long ai bilong Jehova. Bilong wanem? Maski man i kisim baptais o nogat, sapos em i no bihainim stretpela pasin, Jehova bai kotim em. Olsem na sapos pikinini i save long wanem pasin i stret na wanem pasin i no stret, tasol em i mekim pasin i no stret, Jehova bai i no orait long em. (Ritim Jems 4:17.) Papamama i gat gutpela tingting i no inap pasim pikinini long kisim baptais. Ol bai wok strong long i stap gutpela piksa long pikinini i ken bihainim. Taim pikinini i bebi yet, ol bai skulim em long kisim pasin bilong laikim tru ol stretpela lo bilong Jehova. (Luk 6:40) Taim pikinini i laikim tru ol dispela lo, em bai wok strong yet long bihainim stretpela pasin bilong Jehova.—Ais. 35:8.

14. Olsem wanem ol elda inap helpim ol papamama long stiaim pikinini long winim mak na kisim baptais?

¹⁴ Ol elda long kongrigesen i stap olsem ol wasman bilong sipsip, olsem na ol i ken strongim ol papamama taim ol i stori wantaim ol long ol blesing yumi kisim taim yumi winim ol mak long sait bilong bilip. Wanpela sista i bin mekim wok painia winim 70 yia, na em i tingim bek amamas em i kisim taim em i toktok wantaim Brata Charles T. Russell taim em i gat 6-pela krismas. Sista i tok: “Em i toktok wantaim mi inap 15 minit long ol mak bilong bilip mi laik winim.” Tru tumas, gutpela tok yumi mekim inap strongim ol narapela inap planti yia bihain. (Snd. 25:11) Na tu, ol elda inap givim sampela wok long ol papamama na ol pikinini long lukautim na stretim Haus Kingdom. Ol i ken tingim tu krismas na save bilong ol pikinini taim ol i givim wok long ol.

15. Olsem wanem ol narapela insait long kongrigesen i ken strongim ol yangpela?

¹⁵ Olgeta insait long kongrigesen inap toktok gut wantaim ol yangpela na strongim ol. Na tu, ol i mas luksave long ol gutpela wok em ol yangpela insait long kongrigesen i mekim. Olsem wanem? Wanpela yangpela i redi gut na bekim tok long miting o em i insait long wanpela hap bilong miting namel long  wik? O wanpela yangpela i sanap strong long traim i painim em o em i autim tok long skul taim rot i op? Kwiktaim yumi mas mekim tok amamas long em. Yu ken putim mak long toktok wantaim wanpela yangpela paslain o bihain long miting bilong soim olsem yu tingim em. Long dispela rot, ol yangpela bai luksave olsem ol i stap “namel long planti lain manmeri i bung wantaim” olsem wanpela kongrigesen.—Sng. 35:18.

16, 17. (a) Taim wanpela i kisim baptais, olsem wanem dispela inap helpim em long bihain? (b) Ol papamama Kristen i amamas tru taim pikinini i mekim wanem disisen? (Lukim piksa long kirap bilong stadi.)

¹⁶ Wanpela blesing ol papamama Kristen i kisim em long mekim bikpela long ol pikinini, na “trenim ol olsem Jehova i makim, na putim tingting bilong em long bel bilong ol.” (Efe. 6:4; Sng. 127:3) Ol pikinini bilong ol Israel long bipo i stap olsem ol lain i dediket pinis long God, tasol ol pikinini bilong ol papamama Kristen long nau i no bon insait long wanpela lain i dediket long Jehova. Na tu, ol i no bon wantaim pasin bilong laikim God na tok i tru. Olsem na taim pikinini i bebi yet, papamama i gat wok long helpim em long kamap wanpela disaipel, na stiaim em long dediket na kisim baptais olsem wanpela wokman bilong Jehova. Dispela em namba 1 wok papamama i mas mekim bilong helpim pikinini. Taim man i dediket, kisim baptais, na mekim wok bilong God, dispela bai opim rot long God i ken kisim bek em long taim bilong traipela hevi tru.—Mat. 24:13.

¹⁷ Taim Blossom Brandt i laik kisim baptais, papamama bilong em i laik save sapos tru tru em i redi long mekim dispela bikpela disisen. Taim ol i luksave olsem em i redi long kisim baptais, ol i sapotim disisen bilong em. Long nait paslain long em i baptais, papa bilong em i mekim wanpela gutpela pasin tru. Blossom i tok: “Em i tokim mipela long brukim skru na em i beten. Em i tokim Jehova olsem em i amamas tru long disisen bilong pikinini meri long dediket long Em.” Winim 60 yia bihain, Blossom i tok: “Mi no inap lusim tingting long dispela nait maski hamas yia i lus pinis!” Yupela ol papamama i ken amamas tru long lukim ol pikinini bilong yupela i dediket na kisim baptais olsem ol wokman bilong Jehova.