1. Jisas i gat wanem gutpela pasin?

WANPELA gutpela pasin bilong Jisas em olsem, em inap pilim tru ol hevi i painim yumi. Taim Jisas i stap long graun, em i “amamas wantaim ol man i amamas, na krai wantaim ol man i krai.” (Rom 12:15) Taim 70 disaipel bilong Jisas i go autim tok na ol i amamas wantaim na kam bek, Jisas tu i “amamas na holi spirit i pulap long em.” (Luk 10:17-21) Taim Lasarus i dai na susa bilong em, Maria i krai, “bel bilong [Jisas] i sori tru na em i wari.”—Jon 11:33.

2. Wanem samting i kirapim Jisas long pilim hevi bilong ol manmeri?

² Jisas i gutpela olgeta, tasol em i sori tru na pilim hevi bilong ol manmeri. Wanem samting i kirapim Jisas long pilim olsem? Em i laikim tru ol manmeri. Olsem stadi i kamap paslain i stori pinis, “samting i givim bikpela amamas long [Jisas], em ol manmeri.” (Prov. 8:31) Pasin laikim i kirapim em long save gut long tingting tru bilong ol. Aposel Jon i tok: “Em yet i save long bel bilong ol.” (Jon 2:25) Jisas i gat pasin bilong sori tru long ol narapela. Ol manmeri i pilim tru pasin laikim bilong Jisas na ol i putim yau long tok bilong Kingdom. Sapos yumi wok strong long kisim pasin bilong pilim tingting bilong ol manmeri, wok autim tok bilong yumi bai kamapim planti gutpela samting.—2 Tim. 4:5.

3-4. (a) Sapos yumi pilim hevi bilong narapela, yumi bai holim wanem tingting long wok autim tok? (b) Long dispela stadi, yumi bai stori long wanem samting?

³ Aposel Pol i save olsem em i gat wok long autim tok, na yumi tu i mas mekim dispela wok. (1 Kor. 9:16) Sapos yumi pilim hevi bilong narapela, yumi bai tingim wok autim tok olsem wanpela bikpela samting. Yumi bai soim klia olsem yumi tingim tru ol manmeri na yumi laik helpim ol. Yumi  save olsem “amamas bilong givim samting i winim amamas bilong kisim samting.” (Apo. 20:35) Sapos yumi holim dispela tingting, yumi bai amamas moa yet long mekim dispela wok.

⁴ Long dispela stadi, yumi bai stori long hau yumi inap soim olsem yumi pilim hevi bilong ol manmeri yumi bungim long wok autim tok. Pastaim yumi bai stori long skul yumi inap kisim long pasin bilong Jisas long pilim tingting bilong ol manmeri. Bihain yumi bai stori long 4-pela rot bilong bihainim eksampel bilong Jisas.—1 Pita 2:21.

5-6. (a) Jisas i pilim hevi bilong husat lain? (b) Olsem Aisaia 61:1, 2 i tok profet long en, wai na Jisas i sori long ol manmeri em i autim tok long ol?

⁵ Wanpela taim Jisas na ol disaipel i pilim taiet tru bikos ol i autim tok na ol i no malolo. Na tu, “ol i no gat taim bilong kaikai.” Olsem na Jisas i kisim ol disaipel i go long “wanpela hap i no gat man bai ol yet i ken i stap” na “malolo liklik.” Tasol bikpela lain manmeri i ran i go pas long hap we Jisas na ol disaipel i laik go long en. Taim Jisas na ol disaipel i go kamap, Jisas i mekim wanem taim em i lukim ol manmeri? “Em i sori * tru long ol, long wanem, ol i olsem sipsip i no gat wasman. Em i kirap skulim ol long planti samting.”—Mak 6:30-34.

⁶ Jisas i sori long ol manmeri. Em i tok ol i “olsem sipsip i no gat wasman.” Ating Jisas i luksave olsem sampela bilong ol i stap rabis na ol i wok hat tru long lukautim famili bilong ol. Ating sampela narapela i bel hevi tru bikos wanfamili o pren bilong ol i dai. Sapos olsem, Jisas inap pilim hevi bilong ol. Olsem yumi stori long stadi i kamap paslain, sampela bilong ol dispela hevi i bin painim Jisas. Em i tingim tru ol narapela, olsem na em i autim ol tok we inap mekim gut bel bilong ol.—Ritim Aisaia 61:1, 2.

7. Olsem wanem yumi inap bihainim eksampel bilong Jisas?

 ⁷ Yumi kisim wanem skul long eksampel bilong Jisas? Yumi tu i stap namel long ol manmeri em “ol i olsem sipsip i no gat wasman.” Ol i gat planti hevi. Yumi save long tok bilong Kingdom, em samting we inap helpim ol. (Rev. 14:6) Yumi bihainim eksampel bilong Jisas na autim tok bikos yumi “sori long ol man i no gat nem na ol rabisman.” (Sng. 72:13) Olsem na yumi laik helpim ol.

8. Taim yumi autim tok, yumi ken mekim wanem bilong soim olsem yumi pilim hevi bilong narapela? Stori long tok piksa.

⁸ Taim yumi autim tok, wanem samting inap helpim yumi long pilim hevi bilong ol manmeri? Yumi ken traim long tingim: Sapos yumi yet i stap olsem ol, yumi bai pilim olsem wanem? Dispela bai kirapim yumi long mekim pasin we yumi laik bai ol narapela i mekim long yumi. * (Mat. 7:12) Yumi ken skelim 4-pela samting yumi inap mekim. Namba 1: Tingim ol samting ol narapela i nidim. Taim yumi autim gutnius, yumi mekim wankain wok olsem dokta. Gutpela dokta i save skelim gut ol samting em olgeta wan wan sikman i nidim. Em i save givim askim na putim gut yau taim man i stori long sik bilong em. Dokta i no inap givim kwik marasin. Em bai larim sampela haptaim i lus na bai em inap skelim ol samting i kamap long sikman na bihain em bai makim marasin i stret. Olsem tasol, taim yumi autim tok long ol manmeri, yumi no ken mekim wankain tok long olgeta taim, nogat. Sindaun na tingting bilong olgeta wan wan man i no wankain, olsem na yumi mas mekim tok i stret long sindaun bilong ol.

9. Taim yumi autim tok na bungim man, yumi no ken holim wanem tingting? Eksplenim.

⁹ Taim yu autim tok na bungim man, no ken ting olsem yu save pinis long sindaun bilong em, ol samting em i bilip long en, na risen bilong bilip em i holim. (Prov. 18:13) Mobeta yu givim ol askim we inap kirapim em long kamapim ol tingting bilong em. (Prov. 20:5) Sapos i stret long kalsa bilong yu, givim ol askim long sait bilong wok, famili, ekspiriens, na tingting em i holim long ol samting i kamap. Taim man i kamapim tingting bilong em, yumi inap luksave long olsem wanem tok bilong gutnius inap mekim gut bel bilong em. Yumi ken soim olsem yumi pilim hevi bilong em na givim helpim i stret.—Skelim 1 Korin 9:19-23.

10-11. Olsem 2 Korin 4:7, 8 i kamapim, wanem namba 2 samting yumi inap mekim bilong soim olsem yumi pilim hevi bilong narapela? Stori long eksampel.

¹⁰ Namba 2: Traim long tingim ol samting  i kamap long laip bilong ol. Yumi inap pilim tingting bilong ol manmeri bikos yumi sinman na yumi tu i bungim ol hevi i painim ol. (1 Kor. 10:13) Yumi save olsem long nau planti hevi tru inap painim yumi. Jehova i helpim yumi, olsem na yumi inap sanap strong na karim hevi. (Ritim 2 Korin 4:7, 8.) Tasol ol manmeri husat i no stap pren bilong Jehova, ol i no gat strong long karim hevi. Wankain olsem Jisas, yumi sori long ol na dispela i kirapim yumi long autim “gutnius long ol samting i gutpela moa.”—Ais. 52:7.

¹¹ Tingim eksampel bilong Sergey. Paslain long Sergey i kisim tok i tru, em i gat pasin bilong sem na em i no man bilong toktok. Em i save pilim hatwok long kamapim tingting bilong em. Bihain em i kirap stadi long Baibel. Sergey i tok: “Mi stadi long Baibel na mi kisim save olsem ol Kristen i gat wok long autim bilip bilong ol. Mi ting mi bai no inap tru long mekim dispela wok.” Maski i olsem, em i tingim ol manmeri husat i no harim yet tok i tru, na ating ol i karim planti hevi bikos ol i no save long Jehova. Em i tok moa: “Mi kisim save long ol nupela samting na dispela i givim bikpela amamas long mi na mi stap bel isi. Mi pilim olsem ol narapela tu i mas kisim dispela save.” Sergey i pilim tru hevi bilong ol narapela, olsem na em i strongim bel na autim tok. Sergey i tok: “Mi kirap nogut olsem taim mi skulim ol narapela long tok bilong Baibel, mi lusim pasin bilong pret na sem. Na tu, dispela i strongim bilip bilong mi.” *

12-13. Bilong wanem yumi no ken les kwik long skulim man?

¹² Namba 3: No ken les kwik. Ating sampela manmeri i no save long ol tok bilong Baibel em yumi save gut long en. Planti man i laikim tru ol bilip bilong lotu ol i stap long en. Ol i pilim olsem ol dispela bilip i sapotim kastam bilong ol, na ol inap stap wanbel wantaim ol wanfamili na komiuniti. Hau bai yumi inap helpim ol?

 ¹³ Tingim: Ol man i save mekim wanem taim wanpela bris i kamap olpela tru na i laik bruk? Ol i save wokim nupela bris, laka? Tasol maski ol i mekim wok bilong sanapim nupela bris, ol bai larim olpela bris i stap yet. Taim ol i wokim pinis nupela bris, ol bai rausim olpela bris. Olsem tasol, paslain long yumi kirapim ol man long lusim olpela bilip, yumi mas kirapim ol long laikim nupela bilip, em ol tok i tru bilong Baibel em pastaim ol i no save long en. Taim ol i pilim tru nupela save ol i kisim, dispela bai kirapim ol long lusim olpela bilip. Longpela haptaim inap lus taim yumi laik helpim ol.—Rom 12:2.

14-15. Hau bai yumi inap helpim man husat i no save o em i holim liklik save tasol long hop bilong i stap oltaim long paradais?

¹⁴ Sapos yumi bihainim pasin isi taim yumi skulim man, yumi bai holim tingting olsem sampela haptaim inap lus paslain long em i kliagut o bilipim tok i tru bilong Baibel. Yumi pilim tingting bilong em, olsem na yumi bai lusim sampela haptaim long helpim em long skelim gut tok bilong Baibel na bai em inap wokim tingting. Kain olsem: Yumi laik helpim man long kliagut long hop bilong i stap oltaim long paradais long graun. Planti man i no save long dispela tok na sampela i holim liklik save tasol. Ating ol i bilip olsem taim man i dai, em i pinis olgeta; i no gat kirap bek bilong em. O ating ol i bilip olsem olgeta gutpela man bai go long heven. Hau bai yumi inap helpim ol?

¹⁵ Tingim ekspiriens bilong wanpela brata. Em i save ritim Stat 1:28. Bihain, em i save askim man olsem, ‘Taim God i wokim ol manmeri, em i laik bai ol i stap long wanem hap na laip bilong ol bai olsem wanem?’ Planti man i save tok, “Em i laik bai ol i stap long graun na ol bai stap amamas.” Bihain em i save ritim Aisaia 55:11 na askim olsem, ‘Yu ting laik bilong God long graun i senis?’ Planti man i save tok nogat. Bihain, em i save ritim Song 37:10, 11, na em i save askim olsem, ‘Sindaun bilong ol manmeri long graun bai olsem wanem?’ Long dispela rot, brata i helpim sampela manmeri long kliagut olsem God i laik bai ol stretpela man i stap oltaim long Paradais long graun.

16-17. Olsem Provep 3:27 i tok long en, yumi ken mekim wanem bilong soim olsem yumi pilim hevi bilong narapela? Stori long ekspiriens.

¹⁶ Namba 4: Soim olsem yu tingim ol. Yu ken mekim wanem sapos yu luksave olsem man i bisi o yu kamap long rong taim? Yu ken tok sori na tokim em olsem yu bai kam visitim em long narapela taim. O olsem wanem sapos man i nidim helpim long mekim wanpela liklik wok? O olsem wanem sapos man i sik o em i lapun na em i nidim wanpela long i go long sampela hap olsem stua o haus sik? Long kain taim olsem, yumi ken givim helpim.​—Ritim Provep 3:27.

 ¹⁷ Wanpela sista i givim liklik helpim long ol narapela na gutpela samting i kamap. Mama long wanpela famili i karim bebi na bebi i dai. Olsem na sista i pilim tru hevi bilong ol na em i raitim wanpela pas. Em i kamapim sampela skripsa bilong mekim gut bel bilong ol. Famili i pilim olsem wanem taim ol i ritim pas? Mama i bekim pas bilong sista na em i tok: “Mi bel hevi tru long asde. Tasol pas bilong yu i strongim tru bel bilong mipela. Mi pilim tru ol tok i stap long pas na mi laik tok tenkyu tru long yu. Asde mi ritim dispela pas winim 20 taim. Yu mekim ol gutpela tok tru bilong strongim na mekim isi bel bilong mipela. Mipela i laik tok tenkyu tru long yu.” Taim yumi pilim hevi bilong narapela na mekim sampela samting bilong helpim em, gutpela samting bai kamap.

18. Olsem 1 Korin 3:6, 7 i kamapim, yumi mas holim wanem kain tingting?

¹⁸ Yumi mas holim stretpela tingting long wok autim tok. Yumi inap helpim ol manmeri long kisim save long God. (Ritim 1 Korin 3:6, 7.) Tasol Jehova yet i save kirapim ol manmeri long kam long em. (Jon 6:44) Bel bilong man bai kirapim em long putim yau long gutnius. (Mat. 13:4-8) Jisas em nambawan gutpela Tisa winim ol narapela man long graun, tasol planti manmeri i no putim yau long tok bilong em! Olsem na yumi no ken bel hevi sapos planti manmeri i no laik putim yau long tok yumi autim.

19. Wanem gutpela samting inap kamap taim yumi soim olsem yumi pilim tru hevi bilong ol manmeri?

¹⁹ Gutpela samting inap kamap taim yumi soim olsem yumi pilim tru hevi bilong ol manmeri yumi bungim long wok autim tok. Yumi bai laikim tru dispela wok. Yumi bai kisim bikpela amamas moa taim yumi yusim taim na strong bilong yumi long helpim ol narapela. Yumi bringim gutnius i go long ol man em “bel bilong ol i gutpela long kisim laip oltaim.” (Apo. 13:48) Olsem na “taim rot i op yet, yumi mas mekim gutpela pasin long olgeta man.” (Gal. 6:10) Yumi bai belgut olsem yumi givim glori long Papa bilong yumi long heven.—Mat. 5:16.