1. (a) Adam na Iv i lusim wanem ol blesing? (b) Disisen bilong ol i kamapim wanem samting?

HUSAT i gat rait long putim lo bilong makim wanem pasin i gutpela na wanem pasin i nogut? Taim Adam na Iv i kaikai prut bilong diwai bilong givim save long wanem samting i gutpela na wanem samting i nogut, ol i kamapim klia olsem ol i no trastim Jehova na ol lo bilong em. Tupela yet i laik makim wanem samting i gutpela na wanem samting i nogut. (Stt. 3:22) Tasol tingim ol blesing ol i lusim. Ol i lusim pasin bilong i stap pren bilong Jehova. Ol i lusim tu blesing bilong i stap laip oltaim, na sin i kalap long ol pikinini bilong ol na ol tu i dai. (Rom 5:12) Disisen bilong Adam na Iv i kamapim bikpela pen na hevi.

2-3. (a) Man Itiopia i mekim wanem taim Filip i autim tok long em? (b) Yumi kisim wanem ol blesing taim yumi kisim baptais? (c) Yumi bai skelim wanem ol askim?

² Disisen bilong Adam na Iv i narapela kain long disisen bilong man Itiopia taim Filip i autim tok long em. Man Itiopia i pilim tru ol samting Jehova na Jisas i mekim bilong helpim em, olsem na kwiktaim em i kisim baptais. (Apo. 8:34-38) Taim yumi dediket long God na mekim wankain disisen olsem man Itiopia na yumi kisim baptais, dispela i kamapim klia olsem yumi pilim tru ol samting em Jehova na Jisas i mekim bilong helpim yumi. Na tu, yumi soim olsem yumi trastim Jehova na yumi luksave olsem em i gat rait long putim lo long wanem pasin i gutpela na wanem pasin i nogut.

³ Tingim ol blesing yumi kisim taim yumi mekim wok bilong Jehova! Yumi gat rot long kisim olgeta blesing em  Adam na Iv i bin lusim, na yumi inap kisim tu laip oltaim. Yumi bilip long Jisas Krais, olsem na Jehova i save fogivim ol rong bilong yumi na maus bilong bel bilong yumi inap i stap klin. (Mat. 20:28; Apo. 10:43) Jehova i orait long yumi na yumi gat hop bilong kisim gutpela sindaun long bihain. (Jon 10:14-16; Rom 8:20, 21) Sampela i kisim save pinis long Jehova, tasol ol i surik long bihainim eksampel bilong man Itiopia. Wanem ol samting inap pasim ol long kisim baptais? Ol i ken mekim wanem na bai ol dispela samting i no pasim ol?

4-5. Avery na Hannah i bungim wanem ol hevi?

⁴ Pasin bilong pret na sem. Papamama bilong Avery ol i Witnes Bilong Jehova. Papa i gat gutpela pasin tru na em i mekim gut wok elda. Tasol Avery i surik long kisim baptais. Em i tok: “Mi no ting mi inap kisim gutnem olsem Papa.” Na tu, Avery i pilim olsem em i no inap mekim gut ol asainmen bilong em. Em i tok moa: “Mi tingting planti long beten long pablik, mekim ol tok, o go pas long grup bilong autim tok.”

⁵ Hannah i gat 18 krismas, na em tu i gat pasin bilong pret na sem. Papamama bilong em i mekim wok bilong Jehova. Maski i olsem, em i pilim olsem em i no inap bihainim stret ol lo bilong Jehova. Hannah i no holim stretpela tingting long em yet. Sampela taim bel bilong em i bagarap tru na em i save givim pen long em yet, na dispela i mekim em i bel hevi moa yet. Em i tok: “Mi no tokim wanpela man long dispela samting na mi no tokim tu papamama. Mi pilim olsem Jehova i no inap orait long mi long kamap wokmeri bilong em.”

6. Wanem samting i pasim Vanessa long kisim baptais?

⁶ Ol poroman nogut. Vanessa i gat 22 krismas na em i tok: “Mi gat wanpela bes pren na mitupela i stap pren inap olsem 10-pela yia.” Tasol pren bilong Vanessa i no strongim Vanessa long kisim baptais. Dispela i bagarapim bel bilong Vanessa, na em i tok: “Mi pilim hatwok long kisim ol nupela pren, na mi wari olsem sapos mi lusim dispela pren, mi bai no gat bes pren.”

7. Makayla i pret long wanem samting? Bilong wanem?

⁷ Pret long mekim rong. Makayla i gat 5-pela krismas taim brata bilong em i raus long kongrigesen. Taim em i kamap bikpela, em i lukim olsem disisen bilong brata bilong em i mekim papamama i bel hevi. Makayla i tok: “Mi pret olsem sapos mi baptais, mi bai mekim rong, raus long  kongrigesen, na mekim papamama i bel hevi moa yet.”

8. Miles i pret long wanem samting?

⁸ Pret long pasin birua. Miles em yangpela man, na papa na nupela mama bilong em i mekim wok bilong Jehova, tasol mama tru bilong em i no wanpela Witnes. Miles i tok: “Mi stap wantaim Mama inap 18 yia na mi pret long tokim em olsem mi laik kisim baptais. Mi lukim pasin em i bin mekim taim Papa i kamap wanpela Witnes. Mi pret olsem nogut em bai mekim wankain pasin long mi.”

9. Wanem samting bai kamap taim yu kisim save long pasin isi na pasin laikim bilong Jehova?

⁹ Sapos Adam na Iv i bin strongim pasin bilong ol long laikim Jehova, ol bai bihainim tok bilong em. Maski tupela i sakim tok, Jehova i larim ol i stap longpela taim liklik na bai ol inap kamapim ol pikinini na putim ol lo bilong ol yet long pasin bilong lukautim pikinini. Disisen bilong Adam na Iv long bosim wokabaut bilong ol yet i kamapim planti hevi, na dispela i soim olsem ol i bihainim longlong tingting. Fesbon bilong tupela i kilim i dai brata bilong em yet husat i no gat asua, na bihain pasin bilong pait i kamap bikpela na ol manmeri i tingim laik bilong ol yet. (Stt. 4:8; 6:11-13) Tasol Jehova i stretim rot bilong kisim bek olgeta pikinini bilong Adam na Iv, em ol i laik lotuim em. (Jon 6:38-40, 57, 58) Taim yu kisim sampela save moa long pasin isi na pasin laikim bilong Jehova, yu bai laikim em moa yet. Yu bai sakim pasin em Adam na Iv i bihainim na yu bai dediket long Jehova.

10. Sapos yu tingim tingim tok bilong Song 19:7, hau bai dispela i helpim yu long mekim wok bilong Jehova?

¹⁰ Wok yet long kisim save long Jehova. Taim yu kisim sampela save moa long Jehova, yu bai bilip strong moa olsem yu inap mekim gut wok bilong em. Avery i tok: “Bilip bilong mi i kamap strong moa taim mi ritim na tingim tingim tok promis i stap long Buk Song 19:7.” (Ritim.) Taim Avery i lukim olsem Jehova i truim dispela tok promis, dispela i strongim tru pasin bilong em long laikim God. Pasin  laikim bai strongim bilip bilong yumi na helpim yumi long tingim tasol Jehova na ol samting em i laik bai yumi mekim. Hannah i tok: “Taim mi yet i ritim na stadi long Baibel, mi luksave olsem taim mi givim pen long mi yet, i olsem mi givim pen long Jehova.” (1 Pita 5:7) Hannah i mekim disisen long “bihainim tok” bilong God. (Jems 1:22) Em i kisim wanem blesing? Em i tok: “Taim mi bihainim tok bilong Jehova na mi luksave long ol gutpela samting i kamap, dispela i kirapim mi long laikim em. Nau mi save olsem oltaim Jehova bai stiaim mi taim mi nidim em long helpim mi.” Hannah i lusim pasin bilong givim pen long em yet. Em i dediket long Jehova na kisim baptais.

11. (a) Vanessa i mekim wanem na em i kisim ol gutpela pren? (b) Dispela i givim wanem skul long yumi?

¹¹ Makim ol gutpela pren. Vanessa i luksave olsem pren bilong em i pasim em long mekim wok bilong Jehova. Olsem na em i lusim dispela pren. Vanessa i mekim sampela samting moa. Em i wok strong long kisim ol nupela pren insait long kongrigesen. Em i bihainim eksampel bilong Noa na famili bilong em. Vanessa i tok: “Ol i stap namel long ol manmeri husat i no laikim Jehova, tasol ol yet i pas gut wantaim narapela narapela.” Vanessa i kisim baptais na em i kamap painia. Em i tok: “Dispela i helpim mi long kisim ol gutpela pren long kongrigesen bilong mi yet na long ol narapela kongrigesen.” Yu tu inap kisim ol gutpela pren sapos yu givim bel tru long mekim wok em Jehova i tokim yumi long mekim.—Mat. 24:14.

12. (a) Adam na Iv i no kisim wanem pasin? (b) Wanem samting i kamap?

¹² Holim stretpela tingting long pasin bilong pret. Sampela kain pasin bilong pret inap lukautim yumi. Yumi mas pret long mekim ol samting em Jehova i no orait long en. (Sng. 111:10) Adam na Iv i no kisim dispela pasin. Sapos tupela i bin kisim dispela pasin, ol i no inap bikhet long Jehova. Tasol tupela i bikhet, na bihain ol i luksave olsem ol i mekim rong. Pasin bikhet bilong ol i kamapim sin na dai long ol pikinini bilong ol. Taim ol i luksave  olsem ol i stap as nating, ol i sem na ol i karamapim ol yet.—Stt. 3:7, 21.

13-14. (a) Olsem 1 Pita 3:21 i kamapim, wai na yumi no ken pret long dai? (b) Wai na yumi mas laikim Jehova?

¹³ I stret long yumi pret long mekim ol samting Jehova i no laikim, tasol i no stret long yumi pret long dai. Jehova i stretim rot pinis long yumi inap kisim laip oltaim. Maski sapos yumi mekim rong, taim yumi tanim bel tru na bilip long ofa bilong Jisas long baim bek yumi, Jehova bai fogivim yumi. Nambawan rot bilong kamapim bilip bilong yumi em long dediketim laip bilong yumi long God na kisim baptais.—Ritim 1 Pita 3:21.

¹⁴ I stret long yumi laikim Jehova bikos em i mekim planti samting bilong helpim yumi. Long olgeta de, em i givim ol gutpela samting yumi amamas long en, na tu, em i skulim yumi long ol pasin tru bilong em na samting em i tingting pinis long kamapim. (Jon 8:31, 32) Em i givim kongrigesen bilong stiaim na sambai long yumi. Em i helpim yumi long karim ol hevi long nau, na em bai givim laip oltaim long yumi na olgeta samting long graun bai kamap gutpela olgeta. (Sng. 68:19; Rev. 21:3, 4) Taim yumi tingim tingim planti samting Jehova i mekim bilong soim olsem em i laikim tru yumi, dispela bai kirapim yumi tu long laikim em. Olsem na yumi bai holim stretpela tingting long pasin bilong pret. Yumi laikim tru God, olsem na yumi bai pret long mekim em i bel hevi.

15. Wanem samting i kirapim Makayla long holim wanpela tingting tasol long bihainim stretpela pasin?

¹⁵ Makayla i pilim tru pasin bilong Jehova long fogivim yumi, olsem na em i holim wanpela tingting tasol long bihainim stretpela pasin na no ken mekim rong. Em i tok: “Mi luksave olsem sin i stap long yumi, olsem na yumi save mekim rong. Tasol mi luksave tu olsem Jehova i laikim yumi, na ofa bilong Krais i opim rot long em inap fogivim yumi.” Pasin bilong Makayla long laikim Jehova i kirapim em long dediket na kisim baptais.

16. Olsem wanem Miles i daunim pret bilong pasin birua?

¹⁶ Miles i pret olsem Mama bai birua sapos em i mekim disisen long kisim baptais, tasol em i kisim helpim long wasman sekit. Miles i tok: “Wasman tu i bin kamap bikpela long famili we mama bilong em i no wanpela Witnes. Em i helpim mi long tingim tok mi inap mekim bilong kirapim Mama long luksave olsem em disisen bilong mi yet long kisim baptais, na Papa i no fosim mi.” Mama bilong Miles i no amamas. Olsem na Miles i lusim haus bilong Mama na em i go stap em yet, na em i kisim baptais. Miles i tok: “Mi pilim tru gutpela pasin bilong Jehova taim mi kisim save long ol gutpela samting em i mekim bilong helpim mi. Taim mi tingim tingim  ofa bilong Krais, mi luksave olsem Jehova i laikim mi tru. Dispela i kirapim mi long dediketim laip bilong mi long Jehova na kisim baptais.”

17. Yumi olgeta i gat rot long mekim wanem?

¹⁷ Iv i sakim tok na em i kaikai prut bilong diwai em God i bin tambuim long gaden Iden. Taim Adam i bihainim Iv, em i soim olsem em i no pilim tru olgeta gutpela samting Jehova i mekim long em. Yumi olgeta i gat rot long soim olsem yumi pilim tru olgeta samting Jehova i mekim bilong helpim yumi. Taim yumi kisim baptais, yumi soim Jehova olsem yumi bilip tru olsem em i gat namba long putim lo bilong wanem pasin i stret na wanem pasin i no stret. Yumi soim klia olsem yumi laikim na trastim Papa bilong yumi.

18. Hau bai yu inap mekim gut wok bilong Jehova?

¹⁸ Taim yumi kisim baptais, oltaim yumi mas bihainim lo bilong Jehova na i no lo bilong yumi yet. Planti milion manmeri i mekim olsem long olgeta yia. Yu inap kamap olsem ol sapos yu wok yet long kisim sampela save moa long tok bilong God long Baibel, bung oltaim wantaim ol bratasista, na wok strong long tokim ol narapela long save yu kisim long gutpela Papa bilong yu. (Hib. 10:24, 25) Taim yu mekim ol disisen, bihainim edvais Jehova i givim long yu long rot bilong Baibel na oganaisesen bilong em. (Ais. 30:21) Sapos yu mekim olsem, olgeta samting yu mekim bai kamap gutpela.—Prov. 16:3, 20.

19. Oltaim yu mas tingim wanem samting?

¹⁹ Taim yu tingim tingim hau ol stiatok bilong Jehova i helpim yu, dispela bai strongim pasin bilong yu long laikim God na ol lo bilong em. I no gat wanpela trik bilong Satan bai pulim yu long lusim Jehova. Tingim laip bilong yu bihain long wan tausen yia. Yu bai tingim gen disisen bilong yu long kisim baptais na yu bai luksave olsem dispela em nambawan gutpela disisen yu mekim!