Sampela Kristen i yusim ol teknoloji bilong nau long toktok wantaim ol wanfamili na ol narapela Witnes. Tasol ol strongpela Kristen i ken tingim dispela tok kaunsel: “Man i gat pasin bilong tingting gut na mekim samting, em i lukim hevi na em i haitim em yet, tasol man i sot long save, em bai wokabaut stret i go na karim hevi.”—Prov. 27:12.

Yumi amamas olsem Jehova i laik protektim yumi. Olsem na yumi no laik bung wantaim ol lain i save brukim lain, ol raus man o meri, o ol man i save kamapim ol bilip giaman i paulim ol bilip i tru. (Rom 16:17; 1 Kor. 5:11; 2 Jon 10, 11) Sampela husat i save bung wantaim kongrigesen inap bihainim ol pasin i no klin. (2 Tim. 2:20, 21) Taim yumi laik kisim ol gutpela pren, yumi mas tingim dispela. Tasol i hatwok long makim ol gutpela pren long rot bilong salim teks mesis.

Yumi mas makim gut ol pren taim yumi laik bung wantaim wanpela bikpela grup we yumi bai salim ol teks mesis i go i kam. Sampela Kristen i insait long ol bikpela grup, na ol hevi i kamap. Olsem wanem wanpela brata o sista inap was gut sapos em i laik insait long wanpela grup i gat planti handret o planti tausen narapela? Em bai hatwok long em i save long ol lain long dispela grup ol i husat tru na ol i strong long bilip o nogat. Buk Song 26:4 i tok: “Mi no save bung wantaim ol man bilong giaman, na mi no save raun wantaim ol man i save haitim pasin tru bilong ol.” Dispela i makim olsem em savetingting long yumi salim ol teks mesis long ol lain em yumi save long ol.

Maski sapos wanpela Kristen i laik insait long wanpela liklik grup bilong salim teks mesis i go i kam, em i mas skelim hamas haptaim em bai lusim na wanem intres bilong em. Yumi mas was gut na abrusim ol lain i mekim ol tok i no stret na lusim bikpela haptaim long salim ol teks mesis i go i kam. Pol i givim tok lukaut long Timoti long was gut long ol lain “i save tok baksait na subim nus bilong ol long ol samting ol arapela i mekim.” (1 Tim. 5:13) Long nau, em i isi long ol man i mekim olsem long rot bilong teks mesis.

Strongpela Kristen i no inap mekim ol tok i daunim ol narapela o putim yau long ol tok i no stret, o go nabaut na tokaut long ol tok hait bilong ol wanbilip. (Sng. 15:3; Prov. 20:19) Na em i no inap mekim wanpela liklik stori nating i kamap olsem bikpela stori o kamapim ol stori i no tru. (Efe. 4:25) Long rot bilong jw.org websait na ol program bilong wan wan mun long JW Broadcasting^®, yumi save kisim planti tok bilong strongim bilip bilong yumi na ol apdeit we yumi inap bilip long en.

Sampela Witnes i save yusim ol fon samting long salim teks mesis, na ol i salim ol samting, baim ol samting, na toksave long ol prodak ol i salim o ol wok samting. Em ol samting ol i mekim long sait bilong wok bisnis na i no wok tiokratik. Ol Kristen husat i no laik “bihainim pasin bilong laikim tumas mani” i no inap yusim ol bratasista bilong ol long wok bisnis samting.—Hib. 13:5.

Olsem wanem long pasin bilong salim ol teks mesis na askim long kisim mani long helpim ol wanbilip i nidim helpim o long wok bilong disasta rilif? Yumi save soim pasin laikim taim yumi strongim na helpim narapela narapela. (Jems 2:15, 16) Tasol taim yumi laik givim helpim long rot bilong salim ol teks mesis long ol bikpela grup samting, dispela inap pasim rot bilong brens ofis long hap bilong yumi na ol kongrigesen long givim helpim. (1 Tim. 5:3, 4, 9, 10, 16) Na tru tumas, yumi no laik ol narapela i ting olsem yumi kisim spesel wok long lukautim ol sipsip bilong God.

Yumi laik mekim ol samting i givim glori long God. (1 Kor. 10:31) So taim yumi laik yusim ol fon samting o ol narapela teknoloji, yumi laik tingim gut ol hevi inap kamap, na yumi laik was gut taim yumi mekim olsem.