1. Ol wokman bilong Jehova i save bungim wanem ol hevi?

OLSEM WANEM? Yu wok long karim wanpela hevi? Ating wanpela long kongrigesen i bin mekim yu bel hevi. (Jems 3:2) O ating wanpela wanwok o wanskul i bin tok bilas long yu long yu mekim wok bilong Jehova. (1 Pita 4:3, 4) O ating wanpela long famili i traim long stopim yu long kam long ol miting o autim tok long ol narapela long bilip bilong yu. (Mat. 10:35, 36) Sapos wanpela hevi i daunim yu tru, yu inap pilim olsem yu laik givap tasol. Tasol yu ken save tru olsem, maski wanem wanem hevi i painim yu, Jehova bai givim yu savetingting long karim ol dispela hevi na em bai strongim yu long winim ol dispela hevi.

2. Olsem Rom 15:4 i kamapim, taim yumi ritim Tok Bilong God, dispela inap mekim wanem long yumi?

² Long Baibel, Jehova i kamapim stori bilong ol samting ol wokman bilong em i mekim bilong karim ol hevi. Wai? Em i mekim olsem bambai yumi ken kisim skul long ol. Em as na Jehova i bin kirapim aposel Pol long raitim dispela hap bilong Baibel. (Ritim Rom 15:4.) Taim yumi ritim ol dispela tok, dispela inap mekim gut bel bilong yumi na helpim yumi long wetim ol gutpela samting i kamap bihain. Tasol sapos yumi laik ol tok yumi ritim long Baibel i helpim yumi, yumi mas mekim sampela samting moa. Yumi mas larim ol tok bilong Baibel i stretim stretim tingting bilong yumi na i go daun long bel bilong yumi. Yumi ken mekim wanem sapos yumi wok long painim sampela stiatok bilong helpim yumi long karim wanpela hevi? Yumi ken bihainim dispela 4-pela wei: (1) Beten, (2) Piksaim long tingting, (3) Tingim tingim long bel, na (4) Bihainim. Nau yumi ken skelim wanem ol samting i insait long dispela 4-pela wei. * Bihain yumi ken skelim olsem wanem yumi ken bihainim dispela 4-pela wei bilong kisim skul long ol samting i bin kamap long laip bilong King Devit na aposel Pol.

3. Paslain long yu ritim Baibel, yu mas mekim wanem, na bilong wanem?

 ³ (1) Beten. Paslain long yu ritim Baibel, askim Jehova long helpim yu long lukim hau dispela tok i ken helpim yu. Olsem, sapos yu wok long painim wanpela tok bilong Baibel long helpim yu long karim wanpela hevi, orait askim Jehova long helpim yu long painim ol stiatok long Baibel we i ken stiaim yu.—Fili. 4:6, 7; Jems 1:5.

4. Olsem wanem yu ken piksaim yu yet insait long wanpela stori bilong Baibel?

⁴ (2) Piksaim long tingting: Jehova i wokim yumi na putim kru bilong yumi long piksaim ol samting long tingting. Bilong helpim yu long piksaim wanpela stori bilong Baibel, traim piksaim yu yet olsem yu em dispela man o meri em Baibel i stori long en. Traim long lukim ol samting em i lukim, na traim long pilim ol samting dispela man o meri i pilim.

5. (a) Tingim tingim long bel i makim wanem samting? (b) Olsem wanem yu ken tingim tingim long bel?

⁵ (3) Tingim tingim long bel. Dispela tok tingim tingim long bel i makim pasin bilong tingim gut ol tok yu ritim na lukim hau dispela tok i stret long yu. Em i helpim yu long konektim ol tok yu ritim wantaim na kliagut long mining bilong samting yu ritim. Taim yu ritim Baibel na yu no tingim tingim long bel, dispela i olsem wanpela jigso pasol we i slip nabaut long tebol. Tasol taim yu ritim tok na yu tingim tingim long bel, i olsem yu bungim dispela olgeta pises wantaim na ol i kamapim wanpela piksa. Bilong helpim yu long tingim tingim ol tok long bel, yu ken mekim ol dispela askim na painim bekim bilong ol. Ol askim i olsem: ‘Dispela man o meri em Baibel i stori long em, em i mekim wanem samting bilong helpim em yet? Olsem wanem Jehova i bin helpim em? Olsem wanem mi ken yusim ol tok mi kisim skul long en bilong helpim mi long karim ol hevi?’

6. Bilong wanem yumi mas bihainim ol tok yumi kisim skul long en?

⁶ (4) Bihainim. Jisas i tok sapos yumi no bihainim ol tok yumi kisim skul long en, yumi olsem man i wokim haus antap long wesan. Em i wok hat tru, tasol wok bilong em i lus nating. Wai? Bikos taim bikpela ren i pundaun, wara i tait na i sakim haus bilong em na haus bilong em i pundaun na bagarap olgeta. (Mat. 7:24-27) Olsem tasol, sapos yumi beten, piksaim long tingting, na tingim tingim long bel, tasol sapos yumi no bihainim ol tok yumi kisim skul long en, olgeta dispela hatwok bilong yumi bai lus nating. Taim pasin birua i kamap o ol traim i kamap na i putim hevi long yumi, bilip bilong yumi bai i no inap stap strong. Tasol taim yumi stadi na bihainim ol tok yumi kisim skul long en, yumi bai mekim ol gutpela disisen, yumi bai stap bel isi, na bilip bilong yumi bai kamap strong. (Ais. 48:17, 18) Yumi ken yusim 4-pela wei yumi stori long en na yumi ken skelim wanpela samting i bin kamap long laip bilong King Devit na skul yumi ken kisim.

7. Bai yumi skelim wanem stori long Baibel?

⁷ Olsem wanem? Wanpela pren o wanpela insait long famili i bin birua long yu? Sapos olsem, yu ken kisim sampela helpim taim yu skelim stori bilong pikinini man bilong King Devit—em Apsalom—husat i bin birua long papa bilong em na em i bin traim long stilim wok king bilong papa bilong em.—2 Sml. 15:5-14, 31; 18:6-14.

8. Yu inap mekim wanem na bai Jehova i ken helpim yu?

⁸ (1) Beten. Tingim stori yu ritim, na tokim Jehova long yu bin pilim olsem wanem taim ol narapela i bin birua long yu. (Sng. 6:6-9) Autim stret tingting i stap long bel bilong yu. Bihain askim Jehova long helpim yu long painim ol stiatok we inap stiaim yu long karim dispela hevi i painim yu.

9. Wanem samting i bin kamap long Devit na Apsalom?

⁹ (2) Piksaim long tingting. Tingim ol samting i bin kamap long dispela taim na piksaim long  tingting samting King Devit i bin pilim. Apsalom em pikinini man bilong Devit, na em i bin wok strong inap planti yia long pulim ol manmeri long laikim em. (2 Sml. 15:7) Taim Apsalom i pilim olsem taim i stret long em inap kirap long mekim wok king, em i salim ol spai i go long olgeta hap bilong Israel long redim ol manmeri long ekseptim em olsem king bilong ol. Em i bin grisim wanpela gutpela pren bilong Devit na em edvaisa bilong Devit tu—em Ahitofel—long joinim dispela pasin bikhet bilong em. Apsalom i tokaut olsem em i king, na em i traim long kisim na kilim i dai Devit—ating long dispela taim Devit i bin sik nogut tru. (Sng. 41:1-9) Devit i kisim save long dispela samting na em i ranawe lusim Jerusalem. Bihain, ami bilong Apsalom i pait wantaim ol man em ol i stap gut long Devit. Ami bilong Apsalom i lus long pait na ol i kilim i dai Apsalom em pikinini man bilong Devit.

10. King Devit inap mekim wanem?

¹⁰ Nau piksaim long tingting samting Devit i mas pilim taim ol dispela samting i wok long kamap long em. Em i laikim tru Apsalom na em i trastim Ahitofel. Tasol maski dispela tupela man i bin poroman gut wantaim Devit, ol i bin givim baksait long em. Ol i bin bagarapim tru bel bilong em na ol i laik kilim em i dai. Ating Devit inap lusim pasin bilong em long trastim ol narapela pren bilong em, na em inap saspek long ol olsem ol tu i bin joinim Apsalom. Na ating em bai laik tingim em yet na tingting long em wanpela bai lusim kantri. O ating em inap givap na lusim hop. Tasol Devit i no mekim ol dispela samting, nogat. Em i sanap strong na winim dispela hevi. Wanem samting i bin helpim em long mekim olsem?

11. Devit i mekim wanem bilong stretim dispela hevi?

¹¹ (3) Tingim tingim long bel. Yu inap kisim skul long wanem ol stiatok long dispela stori? Traim bekim dispela askim, “Devit i mekim wanem samting bilong helpim em yet?” Devit i no penik na hariap long mekim wanpela disisen we em i no tingting gut long en pastaim, nogat. Na tu, Devit i no pret na larim longpela haptaim i lus nating. Em i beten na askim Jehova long helpim em. Na tu, em i askim ol pren bilong em long helpim em. Na kwiktaim em i bihainim ol disisen em i mekim. Maski Devit i bel hevi tru, em i no lusim pasin bilong em long trastim ol narapela na em i no holim bel kros. Em i wok yet long trastim Jehova na trastim ol pren bilong em.

12. Jehova i mekim wanem bilong helpim Devit?

¹² Hau Jehova i bin helpim Devit? Sapos yu mekim sampela wok painimaut, yu bai kisim save olsem Jehova i givim Devit strong em i nidim bilong karim dispela hevi na winim. (Sng. 3:1-8, supaskripsen) Jehova i blesim ol disisen Devit i bin mekim. Na em i bin sapotim gut ol gutpela pren bilong Devit taim ol i bin pait long lukautim king bilong ol.

13. Olsem wanem yu ken bihainim pasin bilong Devit sapos narapela i bin bagarapim bel bilong yu? (Matyu 18:15-17)

¹³ (4) Bihainim. Askim yu yet: ‘Olsem wanem mi ken bihainim pasin bilong Devit?’ Yu mas hariap long mekim ol samting bilong stretim hevi. Maski wanem samting i kamap, yu ken bihainim stret tok bilong Jisas i stap long Matyu sapta 18 o yu ken bihainim stiatok bilong en. (Ritim Matyu 18:15-17.) Tasol yu no ken hariap long mekim ol disisen bikos bel bilong yu i kirapim yu long mekim. Yu mas beten long Jehova long givim yu bel isi na savetingting yu nidim bilong karim dispela hevi. No ken givap long ol pren bilong yu. Redi long kisim helpim ol i givim. (Prov. 17:17) Bikpela samting moa, bihainim edvais bilong Jehova i stap long Tok bilong em long Baibel.—Prov. 3:5, 6.

14. Wanem ol hevi inap kamap na dispela i mekim na yu mas tingim ol tok i stap long 2 Timoti 1:12-16; 4:6-11, 17-22?

¹⁴ Olsem wanem? Yu wok long karim hevi long  wanpela long famili i birua long yu? O yu stap long wanpela kantri we gavman i tambuim wok bilong ol Witnes Bilong Jehova? Sapos olsem, yu ken kisim strong taim yu ritim tok bilong 2 Timoti 1:12-16; 4:6-11, 17-22. * Pol i bin raitim dispela hap bilong Baibel taim em i stap long kalabus.

15. Yu inap askim Jehova long wanem samting?

¹⁵ (1) Beten. Paslain long yu ritim ol dispela tok, tokim Jehova long wanem hevi yu karim na dispela i bin mekim yu pilim olsem wanem. Kamapim samting yu pilim long bel. Bihain askim Jehova long helpim yu long luksave long ol stiatok i stap long stori bilong Pol long ol hevi em i bin karim na dispela bai helpim yu long save long hau yu ken karim hevi bilong yu.

16. Wanem ol samting i bin painim Pol?

¹⁶ (2) Piksaim long tingting. Piksaim long tingting olsem yu stap long situesen bilong Pol. Ol i pasim hanlek bilong em long sen na em i stap kalabus long Rom. Bipo em i bin stap kalabus tu, tasol nau em i save olsem ol bai kilim em i dai. Sampela pren bilong em i bin lusim em, na em i pilim taiet tru.—2 Tim. 1:15.

17. Pol inap mekim wanem?

¹⁷ Pol inap tingting i go bek long bipo, na em inap tingting olsem sapos em i bin mekim narapela disisen long dispela taim, ating nau em bai i no inap stap long kalabus. Ating em inap kirap long bel nogut long ol man long distrik Esia husat i bin lusim em, na ating em inap kirap long heitim ol pren bilong em. Tasol Pol i no mekim wanpela bilong ol dispela samting. Wanem samting i helpim Pol long stap strong na holimpas bilip?

18. Pol i mekim wanem taim hevi i painim em?

¹⁸ (3) Tingim tingim long bel. Traim bekim dispela askim, ‘Pol i mekim wanem bilong helpim em yet?’ Maski klostu nau Pol bai i dai, Pol i no lusim tingting long bikpela samting em i mas mekim—em long givim glori long Jehova. Na em i wok long tingim hau em inap strongim ol narapela. Em i bilip na wetim Jehova long rot bilong beten long em oltaim. (2 Tim. 1:3) Pol i no tingting oltaim long ol dispela man i bin lusim em, nogat, em i tok tenkyu tru long sapot bilong ol gutpela pren bilong em husat i bin helpim em long ol samting em i nidim. Na tu, Pol i wok yet long stadi long Tok Bilong God. (2 Tim. 3:16, 17; 4:13) Bikpela samting moa, em i save tru olsem Jehova na Jisas i laikim em. Tupela i no bin lusim em, na tupela bai givim gutpela pe long em long pasin bilong em long stap gut long wok bilong em.

19. Olsem wanem Jehova i bin helpim Pol?

¹⁹ Jehova i bin givim tok lukaut long Pol olsem ol man bai birua long em bikos em i kamap wanpela Kristen. (Apo. 21:11-13) Olsem wanem Jehova i bin helpim Pol? Em i bin bekim ol beten bilong Pol na em i givim strong long em. (2 Tim. 4:17) Pol i save tru olsem em bai kisim dispela prais em i wok hat tru long en. Na tu, Jehova i bin kirapim ol gutpela pren bilong Pol long helpim em long ol samting em i nidim.

20. Olsem Rom 8:38, 39 i kamapim, olsem wanem yumi ken bihainim pasin bilong Pol?

²⁰ (4) Bihainim. Askim yu yet, ‘Olsem wanem mi ken bihainim pasin bilong Pol?’ Olsem Pol, yumi ken save olsem ol man bai birua long yumi bikos long bilip bilong yumi. (Mak 10:29, 30) Bilong holimpas bilip bilong yumi taim traim i kamap—yumi mas wet long Jehova long rot bilong beten, na holimpas pasin bilong yumi long mekim pesenel stadi. Na oltaim yumi mas tingim olsem, wanpela bikpela samting tru yumi mas mekim, em long givim glori long Jehova. Na yumi ken save tru olsem Jehova i no inap tru long lusim yumi na i no gat wanpela samting inap tekewe yumi long pasin laikim bilong em.—Ritim Rom 8:38, 39; Hib. 13:5, 6.

21. Wanem samting i helpim Aya na Hector long winim ol hevi bilong ol?

²¹ Maski wanem samting i painim yumi, ol stori bilong Baibel i ken strongim yumi. Olsem, Aya em wanpela painia sista long Japan, na em i tok stori bilong Jona i helpim em long daunim pasin bilong pret long autim tok long ol pablik ples. Hector em wanpela yangpela long Indonesia em papamama bilong em i no lotuim Jehova, em i tok stori bilong Rut i kirapim em long kisim save long Jehova na mekim wok bilong em.

22. Olsem wanem yu ken kisim helpim long ol Baibel drama o ol atikol long hap “Bihainim Bilip Bilong Ol”?

²² Yu inap painim we ol eksampel bilong Baibel we inap strongim yu? Ol vidio na ol odio drama na ol atikol long hap “Bihainim Bilip Bilong Ol” inap helpim yu long piksaim ol stori bilong Baibel. * Paslain long yu watsim vidio, harim odio o ritim stori bilong ol, askim Jehova long helpim yu long painim ol poin stret em yu ken bihainim. Piksaim yu yet insait long dispela stori. Tingim tingim long bel wanem samting em dispela ol wokman bilong Jehova i bin mekim na hau Jehova i bin helpim ol long winim ol hevi. Na bihain, bihainim ol dispela lesen yu lainim long laip bilong yu. Tok tenkyu long Jehova long helpim em i givim yu pinis. Na soim olsem yu amamas long helpim em i givim yu long rot bilong helpim ol narapela na strongim ol.

23. Olsem Aisaia 41:10, 13 i kamapim, Jehova i promis long mekim wanem long yumi?

²³ Laip long graun bilong Satan i hatwok tru, na sampela taim dispela inap putim hevi long yumi. (2 Tim. 3:1) Tasol yumi no ken pret na tingting planti. Jehova i save long ol samting i painim yumi. Taim yumi pundaun, em i tok promis long holim han bilong yumi wantaim strongpela rait han bilong em. (Ritim Aisaia 41:10, 13.) Yumi ken bilip tru olsem em bai sapotim yumi, na ol tok bilong Baibel bai strongim yumi na yumi ken karim na winim ol hevi i painim yumi.