1. Ol yangpela brata inap mekim wanem, na bilong wanem?

OL YANGPELA brata, yupela inap mekim planti wok. Planti bilong yupela i gat bikpela strong. (Prov. 20:29) Yu inap helpim tru kongrigesen bilong yu. Ating yu luk fowed long dispela taim we ol bai makim yu long kamap wanpela kongrigesen sevan. Tasol yu inap pilim olsem ol narapela i tingim olsem yu yangpela tumas o yu no gat planti ekspiriens long mekim dispela bikpela wok. Maski yu yangpela yet, yu inap mekim sampela samting long nau na bai ol narapela insait long kongrigesen bilong yu i ken trastim na rispektim yu.

2. Yumi bai stori long wanem samting long dispela atikol?

² Long dispela atikol, yumi bai stori long laip bilong King Devit. Na tu, yumi bai stori liklik long ol samting i kamap long laip bilong Asa na Jehosafat—em 2-pela king bilong Juda. Yumi bai skelim ol hevi em dispela 3-pela man i bin karim, samting ol i mekim, na skul ol yangpela inap kisim long eksampel bilong ol.

3. Wanem wanpela rot ol yangpela inap helpim ol lapun bratasista insait long kongrigesen?

³ Taim Devit i yangpela man yet, em i kisim save long mekim ol wok em ol narapela i amamas long en. I klia tru olsem em i save tingim ol samting bilong lotu, na em i kamap gut moa long save bilong em long pilaim musik na em i yusim dispela save long helpim Sol, em king God i bin makim. (1 Sml. 16:16, 23) Olsem wanem? Yupela ol yangpela man i gat save long mekim sampela  wok bilong helpim ol narapela insait long kongrigesen? Planti bilong yupela i gat save long mekim ol wok. Olsem, ating yu luksave olsem sampela lapun bratasista insait long kongrigesen i save amamas taim ol narapela i soim ol hau long yusim gut ol teblet na fon samting bilong ol long mekim pesenel stadi na long yusim long taim bilong miting. Save bilong yu long yusim ol teblet na fon samting inap helpim tru ol lapun bratasista.

4. Olsem Devit, ol yangpela brata i mas kisim wanem ol pasin? (Lukim fran pes piksa.)

⁴ Long olgeta de long laip bilong em, Devit i mekim gut ol wok na ol narapela inap trastim em. Olsem, taim em i yangpela man, em i givim bel tru long lukautim ol sipsip bilong papa bilong em. Dispela wok i gat hevi bilong en. Bihain, Devit i tokim King Sol olsem: “Bikman bilong mi, mi bin lukautim ol sipsip bilong papa bilong mi na wanpela taim wanpela laion i kam na i kisim wanpela sipsip i go na narapela taim bea i kam na kisim sipsip i go. Orait mi ranim laion na bea na paitim ol na kisim bek sipsip.” (1 Sml. 17:34, 35) Devit i pilim olsem em i mas lukautim gut ol sipsip, na em i strongim bel na pait bilong lukautim ol. Ol yangpela brata i ken bihainim eksampel bilong Devit na givim bel tru long mekim wanem wanem asainmen ol i kisim.

5. Olsem Buk Song 25:14 i kamapim, ol yangpela brata i mas mekim wanem nambawan bikpela samting?

⁵ Yangpela Devit i kisim pasin bilong pas gut tru wantaim Jehova. Dispela pasin pren i bikpela samting moa winim pasin bilong Devit long strongim bel o save bilong em long pilaim musik. Jehova i stap olsem God bilong Devit, na tu, Em i stap olsem Pren bilong em—gutpela Pren bilong em. (Ritim Buk Song 25:14.) Yupela ol yangpela brata, nambawan bikpela samting yu inap mekim em long strongim pasin bilong yu long pas gut wantaim Papa bilong yu long heven, na dispela inap opim rot long yu inap kisim planti moa asainmen.

6. Sampela i holim wanem ol tingting kranki long Devit?

⁶ Devit i karim hevi long ol narapela i holim ol tingting kranki long em. Olsem, taim Devit i volantia long i go pait wantaim Goliat, King Sol i traim long stopim em, na em i tokim Devit: “Yu mangi nating tasol.” (1 Sml. 17:31-33) Paslain long dispela, brata bilong Devit i sutim tok long em olsem em i no mekim gut wok bilong em. (1 Sml. 17:26-30) Tasol Jehova i no tingim Devit olsem yangpela man tumas o em i no mekim gut wok bilong em. Em i save gut long  Devit, dispela yangpela man. Devit i trastim tru Pren bilong em Jehova long strongim em, olsem na Devit i kilim i dai Goliat.—1 Sml. 17:45, 48-51.

7. Yu inap kisim wanem skul long stori bilong Devit?

⁷ Yu inap kisim wanem skul long ekspiriens bilong Devit? Yumi kisim skul olsem yumi mas no ken les kwik. Ating sampela haptaim i mas lus na bai ol lain em ol i save long yu taim yu pikinini yet i ken tingim yu olsem man i bikpela pinis. Tasol yu ken bilip tru olsem Jehova i no save skelim lukluk bilong yu. Em i save long pasin tru bilong yu na em i save long ol wok yu inap mekim. (1 Sml. 16:7) Strongim pasin pren bilong yu wantaim God. Devit i bin mekim olsem taim em i skelim ol samting Jehova i bin wokim. Devit i skelim ol samting Krieta i bin wokim na em i kisim save long ol pasin bilong Em. (Sng. 8:3, 4; 139:14; Rom 1:20) Narapela samting yu ken mekim em long lukluk long Jehova long strongim yu. Olsem wanem? Sampela wanskul bilong yu i tok bilas long yu bikos yu wanpela Witnes Bilong Jehova? Sapos olsem, beten askim Jehova long helpim yu long karim dispela hevi. Na bihainim ol gutpela edvais i stap long Baibel na ol pablikesen bilong Baibel na ol vidio. Long olgeta wan wan taim yu lukim hau Jehova i helpim yu long karim ol hevi, pasin bilong yu long trastim em bai kamap strong moa. Na tu, taim ol narapela i lukim olsem yu trastim Jehova, ol tu bai trastim yu.

8-9. (a) Taim Devit i wet long kamap king, wanem samting i helpim em na em i no les kwik? (b) Ol yangpela brata inap kisim wanem skul long eksampel bilong em?

⁸ Tingim narapela hevi em Devit i mas karim. Bihain long ol i makim em long kamap king, em i mas wet inap planti yia bilong em inap mekim wok king long Juda. (1 Sml. 16:13; 2 Sml. 2:3, 4) Insait long dispela haptaim, wanem samting i helpim em long wet i stap na i no les kwik? Em i no larim pasin bilong bel hevi i daunim em, nogat, Devit i putim tingting i go long ol samting em i ken mekim. Olsem, taim em i stap olsem ranaweman long Filistia, em i pait long ol birua bilong lain Israel. Taim em i mekim olsem, em i lukautim hap graun bilong Juda.—1 Sml. 27:1-12.

⁹ Ol yangpela brata inap kisim wanem skul long eksampel bilong Devit? Taim rot i op, mekim wok bilong helpim ol bratasista bilong yu. Tingim ekspiriens bilong wanpela brata, nem bilong em Ricardo. * Kirap long taim Ricardo i stap tineja yet, em i laik mekim wok olsem painia oltaim. Tasol em i no redi long mekim dispela wok. Em i no larim dispela i mekim em i givap o bel hevi, nogat, Ricardo i insait moa long wok autim tok. Em i tok: “Taim mi lukluk i go bek, mi luksave olsem em gutpela long sampela haptaim i lus na bai mi inap kamap gut moa long mekim dispela wok. Mi wok strong long go bek na lukim ol man i gat intres na long mekim ol gutpela gobek. Na tu, mi kirapim fes Baibel stadi bilong mi. Taim mi kisim ekspiriens, nau mi save gut tru long mekim dispela wok.” Long nau Ricardo i mekim wok olsem wanpela painia oltaim na wanpela kongrigesen sevan.

10. Wanpela taim, Devit i bin mekim wanem samting paslain long em i mekim wanpela bikpela disisen?

¹⁰ Tingim narapela samting i bin kamap long laip bilong Devit. Insait long dispela haptaim taim em na ol man bilong em i stap olsem ol ranaweman, ol i lusim ol famili bilong ol long i go long mekim wanpela wok. Taim ol i no stap, wanpela birua lain i kam long taun bilong ol na i stilim olgeta samting long haus bilong ol na kisim ol famili bilong ol i go olsem ol kalabus lain. Devit i gat ekspiriens long pait, olsem na em inap ting olsem em i ken mekim wanpela gutpela plen bilong i go na pait na kisim bek ol famili bilong ol. Tasol Devit i no mekim olsem,  em i lukluk long Jehova long helpim em. Em i kisim helpim long pris Abiatar, na Devit i askim Jehova olsem: “Em orait long mi go ranim ol dispela soldia i kam stilim ol samting na bagarapim taun o nogat?” Jehova i tokim Devit olsem em i ken mekim olsem na em i tokim em olsem em bai pait na winim ol dispela lain. (1 Sml. 30:7-10) Yu inap kisim wanem skul long dispela stori?

11. Yu ken mekim wanem paslain long yu wokim ol disisen?

¹¹ Yu mas kisim edvais paslain long yu wokim ol disisen. Toktok wantaim papamama bilong yu. Yu inap kisim gutpela edvais taim yu toktok wantaim ol elda i gat ekspiriens. Jehova i trastim ol dispela man em ol i makim bilong mekim wok, na yu ken trastim ol tu. Jehova i tingim ol olsem “ol presen” insait long kongrigesen. (Efe. 4:8) Yu bai kisim helpim taim yu bihainim pasin bilong ol long bilip na taim yu putim yau long ol gutpela edvais ol i givim long yu. Orait nau yumi ken stori long skul yumi inap kisim long King Asa.

12. King Asa i gat wanem ol pasin taim em i kirap long mekim wok king?

¹² Taim King Asa i yangpela man, em i gat pasin daun na strongpela bel. Olsem, taim em i kisim ples bilong papa bilong em, Abiya, em i mekim wanpela kempein long pinisim pasin bilong lotuim ol giaman god. Na tu, “em i tokim ol Juda long ol i mas painim Jehova, God bilong ol tumbuna papa bilong ol, na long bihainim Lo na tok bilong God.” (2 Sto. 14:1-7) Na taim Sera, em dispela man Itiopia, i kam pait long Juda wantaim 1 milion soldia bilong em, Asa i bihainim savetingting na em i lukluk long Jehova long helpim em, na em i tok: “O Jehova, yu save helpim ol man maski ol i planti o ol i no gat strong. Olsem na helpim mipela, O Jehova, God bilong mipela, long wanem, mipela i trastim yu.” Dispela naispela tok i soim klia olsem Asa i bilip tru long strong bilong Jehova long kisim bek em na ol manmeri bilong em. Asa i trastim Papa bilong em long heven, na “Jehova i . . . daunim ol Itiopia.”—2 Sto. 14:8-12.

13. Bihain wanem samting i painim Asa, na bilong wanem?

¹³ Yu bai wanbel long dispela tok olsem em i no isi long pait na daunim lain ami i gat 1 milion soldia, tasol Asa i bin mekim olsem. Tasol sori tru, taim wanpela hevi i no bikpela tumas i painim Asa, em i no askim Jehova long helpim em. Taim King Basa bilong Israel i mekim ol tok  bilong pretim em, Asa i lukluk i go long king bilong Siria long helpim em. Dispela disisen i bringim bikpela hevi long em! Long rot bilong profet Hanani, Jehova i tokim Asa: “Yu bin trastim king bilong Siria na yu no trastim Jehova, God bilong yu, olsem na ami bilong king bilong Siria i no stap moa long han bilong yu, ol i ranawe pinis.” Kirap long dispela taim na i go, oltaim ol birua i save kam pait long Asa. (2 Sto. 16:7, 9; 1 Kin. 15:32) Yumi kisim wanem skul long dispela stori?

14. (a) Olsem wanem yu inap trastim Jehova? (b) Olsem 1 Timoti 4:12 i kamapim, yu bai stap olsem wanem kain man taim yu mekim olsem?

¹⁴ Yu mas wok yet long mekim pasin daun na trastim Jehova. Taim yu bin kisim baptais, yu soim olsem yu gat strongpela bilip na yu trastim Jehova. Na Jehova i amamas tru long larim yu kisim blesing bilong stap insait long lain famili bilong em. So nau yu mas wok yet long trastim Jehova. Ating em isi long trastim Jehova taim yu mas mekim ol bikpela disisen, tasol olsem wanem long ol narapela taim? Bikpela samting em yu mas trastim Jehova taim yu wokim ol disisen, dispela i makim tu ol disisen long sait bilong ol amamas yu kisim, wok mani, na ol mak em yu laik winim long laip! No ken trastim save bilong yu yet. Painim ol stiatok bilong Baibel em yu inap bihainim long i stap bilong yu, na bihainim ol dispela stiatok. (Prov. 3:5, 6) Taim yu mekim olsem, yu bai mekim Jehova i amamas na ol narapela insait long kongrigesen bai rispektim yu.—Ritim 1 Timoti 4:12.

15. Olsem 2 Stori 18:1-3; 19:2 i kamapim, King Jehosafat i mekim wanem ol popaia?

¹⁵ Wankain olsem yumi olgeta, yupela ol yangpela i no gutpela olgeta, olsem na sampela taim yu bai mekim ol popaia. Tasol no ken larim dispela i pasim yu long mekim olgeta samting yu ken mekim long wok bilong Jehova. Tingim eksampel bilong King Jehosafat. Em i gat planti gutpela pasin. Taim em i yangpela man, em “i painim God bilong papa bilong em na bihainim ol lo bilong God.” Na tu, em i bin salim ol prins i go long ol taun bilong Juda long skulim ol manmeri long Jehova. (2 Sto. 17:4, 7) Jehosafat i mekim ol gutpela wok, tasol sampela taim em i no mekim ol gutpela disisen. Wanpela taim em i no mekim gutpela disisen, olsem na wanpela mausman bilong Jehova i kam lukim Jehosafat na i stretim em.  (Ritim 2 Stori 18:1-3; 19:2.) Yu inap kisim wanem skul long dispela stori?

16. Yu inap kisim wanem skul long ekspiriens bilong Rajeev?

¹⁶ Yu mas putim yau long tok kaunsel na bihainim dispela tok. Olsem planti yangpela man, ating yu pilim hatwok long tingim wanem ol samting em bikpela samting yu mas mekim. Tasol yu no ken bel hevi. Tingim ekspiriens bilong wanpela yangpela brata, nem bilong em Rajeev. Em i stori long taim em i bin stap tineja, na em i tok: “Long ol dispela yia, mi pilim olsem mi no save long wanem samting mi bai mekim. Olsem planti narapela yangpela, mi gat bikpela laik moa long pilai spots na kisim amamas na mi no tingim tumas pasin bilong i go long ol miting o mekim wok autim tok.” Wanem samting i bin helpim Rajeev? Wanpela elda i tingim em na em i givim em sampela tok kaunsel. Rajeev i tok: “Em i helpim mi long skelim stiatok i stap long 1 Timoti 4:8.” Long pasin daun, Rajeev i kisim dispela tok kaunsel na em i skelim wanem ol samting i bikpela samting long laip bilong em. Em i tok: “Mi putim ol samting bilong bilip i stap olsem nambawan samting.” Wanem samting i kamap? Rajeev i tok: “Sampela yia bihain long mi kisim dispela tok kaunsel, mi winim mak long kamap wanpela kongrigesen sevan.”

17. Ol bratasista i gat bikpela krismas i pilim olsem wanem long ol yangpela man em ol i mekim wok bilong Jehova?

¹⁷ Ol bratasista i gat bikpela krismas i amamas tru long yupela ol yangpela man husat i “wanbel wantaim” ol long mekim wok bilong Jehova! (Sef. 3:9) Ol i laikim pasin bilong yupela long amamas tru na givim bel tru long mekim ol wok em yupela i kisim insait long kongrigesen. Yupela i stap olsem samting i dia tru long ai bilong ol.—1 Jon 2:14.

18. Olsem Provep 27:11 i kamapim, Jehova i pilim olsem wanem long ol yangpela man husat i mekim wok bilong em?

¹⁸ Yupela ol yangpela brata, no ken lusim tingting olsem Jehova i laikim yu na em i trastim yu. Em i tok profet olsem long taim bilong las de, ol yangpela man bai stap olsem bikpela lain ami na ol bai redi long givim ol yet long mekim wok bilong em. (Sng. 110:1-3) Em i save olsem yupela i laikim em na yupela i laik yusim gut save bilong yupela long mekim wok bilong em. So no ken les kwik long ol narapela, na no ken les kwik long yu yet tu. Taim yu mekim ol popaia, redi long kisim trening na tok bilong stretim yu; tingim olsem ol dispela helpim i kam long Jehova. (Hib. 12:6) Givim bel tru long mekim olgeta asainmen yu kisim. Na bikpela samting moa, long olgeta samting yu mekim, mekim ol samting bilong amamasim Papa bilong yu long heven.—Ritim Provep 27:11.