1. Wanem nambawan samting i save stiaim ol pasin bilong yumi?

 YUMI olgeta i laik kisim ol gutpela pasin em Jehova i laikim, maski yumi baptais long sampela de i go pinis o planti yia i go pinis. Bilong kisim ol gutpela pasin, yumi mas bosim gut tingting bilong yumi. Bilong wanem? Long wanem, nambawan samting i save stiaim ol pasin bilong yumi em ol samting yumi tingting long en. Sapos oltaim yumi tingting tasol long ol samting bilong amamasim yumi yet, yumi bai mekim ol tok i no stret na ol pasin nogut. (Efe. 4:17-19) Tasol sapos yumi tingim ol gutpela samting, bai yumi mekim ol tok i stret na bihainim ol pasin we i amamasim Papa bilong yumi, Jehova.​—Gal. 5:16.

2. Bai yumi skelim wanem ol askim long dispela atikol?

² Olsem yumi bin stori long atikol i go pinis, yumi no inap stopim olgeta tingting nogut long kam insait long tingting bilong yumi. Tasol yumi yet inap makim sapos yumi laik bihainim ol dispela tingting kranki o nogat. Paslain long yumi kisim baptais, yumi mas stop long mekim ol tok na ol pasin em Jehova i heitim. Em nambawan bikpela samting yumi ken mekim bilong rausim olpela pasin. Bilong amamasim Jehova long bel olgeta, yumi mas bihainim dispela tok: “Yupela i mas werim nupela pasin olsem yupela i werim klos.” (Kol. 3:10) Long dispela atikol, yumi bai bekim ol dispela askim: “Nupela pasin” i makim wanem samting? Hau bai yumi ken kisim nupela pasin na lukautim gut?

3. (a) Olsem Galesia 5:22, 23 i kamapim, man i gat “nupela pasin” i save mekim wanem? (b) Hau man i kisim nupela pasin?

³ Man i gat “nupela pasin,” em i save bihainim ol tingting na pasin bilong Jehova. Em i kisim nupela pasin taim em i bihainim ol pasin em holi spirit bilong God i kamapim, em i larim holi spirit i  stiaim ol tingting bilong em, ol samting em i pilim long bel, na ol pasin bilong em. (Ritim Galesia 5:22, 23.) Olsem, em i laikim Jehova na ol manmeri bilong Em. (Mat. 22:36-39) Dispela kain man i save holimpas amamas bilong em maski em i karim ol hevi. (Jems 1:2-4) Em i man bilong mekim i dai kros. (Mat. 5:9) Em i no save les kwik na em i save mekim gutpela pasin long ol narapela. (Kol. 3:13) Em i save laikim gutpela pasin na mekim gutpela pasin. (Luk 6:35) Em i save kamapim klia olsem em i bilip tru long Papa bilong em long heven long ol samting em i mekim. (Jems 2:18) Em i save stap isi taim ol narapela i sikirapim bel bilong em na em i save bosim bel taim traim i painim em.​—1 Kor. 9:25, 27; Tai. 3:2.

4. Bilong kisim nupela pasin, yu ting yumi mas bihainim tasol ol pasin em Galesia 5:22, 23 i kamapim? Stori long dispela.

⁴ Bilong kisim nupela pasin, yumi mas kisim olgeta pasin em Galesia 5:22, 23 i kamapim na ol pasin em ol narapela skripsa long Baibel i kamapim. * Ol dispela pasin i no olsem ol klos em yumi werim wanpela, rausim, na werim narapela, nogat. Planti bilong ol dispela pasin i wankain long ol narapela pasin. Olsem, sapos yu laikim tru narapela, yu no inap les kwik long em na bai yu mekim gutpela pasin long em. Na long mekim gutpela pasin em yu pilim tru long bel, yu mas mekim pasin isi na bosim bel.

5. (a) Dispela tok kisim “tingting bilong Krais” i makim wanem samting? (b) Bilong wanem yumi mas kisim tingting olsem bilong Jisas? (1 Korin 2:16)

⁵ Ritim 1 Korin 2:16. Bilong kisim nupela pasin, yumi mas kisim “tingting bilong Krais.” O yumi ken tok, yumi mas kisim save long tingting bilong Jisas na bihainim pasin bilong em. Jisas i bihainim gut tru ol pasin em holi spirit bilong God i kamapim. Olsem wanpela gutpela mira, em i bihainim stret ol pasin bilong Jehova. (Hib. 1:3) Taim yumi wok long kisim tingting olsem bilong Jisas, yumi bai bihainim tingting na pasin bilong em, na long dispela rot yumi wok long kisim nupela pasin.​—Fili. 2:5.

6. Yumi mas tingim wanem ol samting taim yumi laik kisim nupela pasin?

⁶ Yu ting yumi inap bihainim eksampel bilong Jisas? Yumi inap ting olsem: ‘Jisas em i gutpela olgeta. Mi no inap tru long bihainim ol pasin bilong em!’ Sapos yu pilim olsem, tingim ol dispela samting. Namba 1, Jehova i wokim yu long bihainim ol pasin bilong Em na bilong Jisas. So  yu inap makim long bihainim pasin bilong tupela, na yu inap mekim olsem inap long skel bilong yu. (Stt. 1:26) Namba 2, holi spirit bilong God em samting i gat bikpela strong long yunives. Na em inap helpim yu long mekim ol samting em yu yet i no inap mekim long strong bilong yu. Namba 3, long nau Jehova i no ekspektim yu long kamapim stret olgeta pasin bilong holi spirit. Papa bilong yumi i gat pasin laikim i makim 1 tausen yia bilong ol man em ol bai kisim laip long graun long kamap gutpela olgeta. (Rev. 20:1-3) Long nau, Jehova i laik bai yumi givim bes bilong yumi na trastim em long helpim yumi.

7. Nau bai yumi stori long wanem samting?

⁷ Yumi ken bihainim pasin bilong Jisas i go inap long wanem mak? Yumi bai stori liklik long 4-pela pasin em holi spirit bilong God i kamapim. Long olgeta wan wan bilong ol, yumi bai stori long samting yumi ken lainim long hau Jisas i bihainim ol dispela pasin. Na yumi bai skelim sampela askim we inap helpim yumi long kamap gutpela moa long bihainim nupela pasin.

8. Jisas i soim pasin laikim long wanem rot?

⁸ Jisas i laikim tru Jehova, olsem na em i daunim laik bilong em yet na bihainim laik bilong Papa bilong em na helpim yumi. (Jon 14:31; 15:13) Jisas i soim olsem em i laikim tru ol manmeri long rot bilong ol samting em i mekim taim em i stap long graun. Long olgeta wan wan de, em i mekim pasin laikim na sori long ol manmeri, maski sampela i birua long em. Namba wan rot em i mekim pasin laikim long ol manmeri em long rot bilong skulim ol long Kingdom Bilong God. (Luk 4:43, 44) Na tu, Jisas i soim olsem em i laikim God na ol manmeri taim em i redi long karim bikpela pen na dai long han bilong ol sinman. Taim em i mekim olsem, em i opim rot long yumi olgeta inap kisim laip oltaim.

9. Hau yumi ken bihainim pasin bilong Jisas long soim pasin laikim?

⁹ Yumi dediketim laip bilong yumi long Jehova na kisim baptais bikos yumi laikim Papa bilong yumi long heven. So olsem Jisas, yumi mas soim olsem yumi laikim Jehova long rot bilong pasin yumi mekim long ol manmeri. Aposel Jon i tok: “Man i no laikim brata bilong em we em i bin lukim, em i no inap laikim God em man em i no bin lukim.” (1 Jon 4:20) Yumi ken askim yumi yet olsem: ‘Mi kisim pasin bilong laikim tru ol manmeri? Mi save mekim pasin sori long ol narapela, maski ol i mekim pasin i no stret long mi? Pasin laikim i kirapim mi long yusim taim bilong mi na ol samting mi gat long helpim ol narapela long kisim save long Jehova? Mi redi long mekim olsem yet maski planti man i no amamas long ol hatwok bilong mi o ol i birua long mi? Mi inap painim sampela rot long insait moa long wok bilong kamapim disaipel?’​—Efe. 5:15, 16.

10. Hau Jisas i stap olsem man bilong mekim i dai kros?

¹⁰ Jisas em i man bilong stap bel isi wantaim olgeta man. Taim ol man i mekim pasin i no stret long em, em i no bekim pasin nogut bilong ol, nogat. Em i mekim gut long ol na em i mekim sampela samting moa. Em i go pas long kamapim bel isi taim ol man i tok pait wantaim em, na tu, em i kirapim ol narapela long stretim kros i kamap namel long ol. Olsem, em i skulim ol long kamap wanbel wantaim brata bilong ol sapos ol i laik bai Jehova i orait long lotu bilong ol. (Mat. 5:9, 23, 24) Na planti taim em i helpim ol aposel long stretim kros i kamap namel long ol olsem husat i stap nambawan long ol.​—Luk 9:46-48; 22:24-27.

11. Hau yumi ken stap olsem man bilong mekim i dai kros?

¹¹ Bilong stap olsem man bilong mekim i dai kros, yumi mas abrusim pasin bilong kirapim kros pait na yumi mas mekim sampela samting moa. Yumi mas go pas long kamapim bel isi wantaim  ol narapela na yumi mas kirapim ol bratasista bilong yumi long stretim kros i kamap namel long ol. (Fili. 4:2, 3; Jems 3:17, 18) Yumi ken askim yumi yet olsem: ‘Mi redi long daunim sampela laik bilong mi long stap bel isi wantaim ol narapela? Taim wanpela brata o sista i bagarapim bel bilong mi, mi save holim yet bel kros? Mi save wet long narapela i go pas long kamapim bel isi o mi yet i save go pas long kamapim bel isi maski em i gat asua long dispela samting? Taim rot i op long kamapim bel isi, mi save kirapim ol narapela long stretim kros i kamap namel long ol?’

12. Olsem wanem Jisas i mekim gutpela pasin?

¹² Jisas i gat gutpela pasin. (Mat. 11:28-30) Em i mekim gutpela pasin long rot bilong mekim pasin isi na putim laik bilong ol narapela i go pas long laik bilong em yet, maski sampela taim i hatwok long mekim olsem. Olsem, taim wanpela meri Fonisia i askim em long oraitim pikinini bilong em, pastaim Jisas i no mekim samting dispela meri i askim em long en, tasol taim em i soim olsem em i gat strongpela bilip, long gutpela pasin Jisas i oraitim pikinini bilong em. (Mat. 15:22-28) Maski Jisas i mekim gutpela pasin, em i givim sampela tok kaunsel. Sampela taim em i mekim gutpela pasin long ol man em i laikim taim em i stretim ol. Olsem, taim Pita i mekim ol tok bilong pasim Jisas long mekim laik bilong Jehova, Jisas i mekim strongpela tok bilong stretim em long ai bilong ol narapela disaipel. (Mak 8:32, 33) Em i no mekim olsem bilong daunim Pita, nogat. Em i mekim olsem bilong trenim em na long kirapim ol narapela disaipel long no ken kisim pasin hambak. Pita i pilim sem, tasol em i bin kisim helpim long dispela tok bilong stretim em.

13. Olsem wanem yumi ken mekim gutpela pasin?

¹³ Bilong mekim gutpela pasin long ol lain yu laikim, sampela taim yu mas givim tok kaunsel long ol. Taim yu mekim olsem, yu ken bihainim pasin bilong Jisas long givim ol tok kaunsel em ol stiatok bilong Baibel i as bilong en. Mekim pasin isi. Yu mas bilip olsem ol bai mekim ol samting i stret, na yu ken save tru olsem ol lain i laikim Jehova na laikim yu, ol bai redi long bihainim gutpela tok kaunsel yu givim long ol. Yu ken askim yu yet olsem: ‘Mi save strongim bel na tokaut taim mi lukim wanpela mi laikim i mekim wanpela samting i no stret? Sapos i stret long mi mas givim tok kaunsel, mi save toktok long gutpela pasin, o mi save mekim long hatpela pasin? Wanem astingting bilong mi long givim tok kaunsel? Mi givim tok kaunsel bikos pasin bilong em i sikirapim bel bilong mi, o mi tingim em na mi givim tok kaunsel?’

14. Long wanem rot Jisas i mekim gutpela pasin?

¹⁴ Jisas i save long gutpela pasin em i mas mekim na em i mekim dispela pasin. Jisas i laikim Papa bilong em, olsem na oltaim em i save mekim samting i stret na em i gat gutpela risen bilong mekim olsem. Man i gat gutpela pasin, oltaim em i save painim rot bilong helpim ol narapela na mekim gut long ol. Yumi no ken save tasol long gutpela pasin em yumi mas mekim, nogat. Yumi mas mekim gutpela pasin na yumi mas i gat gutpela risen bilong mekim olsem. Wanpela inap askim olsem, ‘Yu ting man inap mekim samting i stret, tasol em i no gat gutpela risen bilong mekim olsem?’ Yes, kain samting inap kamap. Olsem, Jisas i stori long ol man em ol i givim presen long ol rabisman, tasol ol i mekim ples klia so ol narapela i ken save long ol presen ol i givim. Maski ol i mekim ol gutpela samting, Jehova i no amamas long ol.​—Mat. 6:1-4.

15. Long wanem rot yumi ken mekim gutpela pasin?

¹⁵ Yumi ken mekim gutpela pasin taim yumi mekim samting i stret na yumi mekim olsem bilong helpim ol narapela. Yu ken askim yu yet olsem: ‘Mi save long samting i stret em mi mas mekim na mi save mekim dispela samting?  Wanem astingting bilong mi long mekim ol gutpela samting?’

16. Long olgeta wan wan de, yumi mas mekim wanem na bilong wanem?

¹⁶ Yumi no ken ting olsem wok bilong kisim nupela pasin em i stop long taim yumi kisim baptais, nogat. Yumi mas lukautim gut nupela pasin bilong yumi olsem yumi lukautim klos na bai em i no ken bagarap. Wanpela rot yumi ken mekim olsem em long kamapim ol pasin bilong holi spirit bilong God long olgeta wan wan de. Wai? Bikos Jehova em i God bilong mekim samting, na holi spirit bilong em i save kirapim man long mekim samting. (Stt. 1:2) So olgeta pasin bilong holi spirit bilong God inap kirapim yumi long mekim samting. Olsem, disaipel Jems i tok: “Bilip i no kamapim ol gutpela wok, dispela bilip i dai pinis.” (Jems 2:26) Na dispela i stret tu long olgeta narapela pasin em holi spirit bilong God i kamapim. Long olgeta taim yumi mekim ol dispela pasin, yumi soim olsem holi spirit bilong God i stiaim yumi.

17. Yumi mas mekim wanem taim yumi no kamapim ol pasin bilong holi spirit?

¹⁷ Sampela taim, ol Kristen em ol i baptais inap planti yia i go pinis ol i no kamapim ol pasin bilong holi spirit. Maski i olsem, bikpela samting em olsem yumi no ken givap. Tingim dispela tok piksa. Sapos yu brukim feiveret klos bilong yu, bai yu hariap long tromoi i go? Nogat. Ating bai yu laik stretim sapos yu inap long mekim olsem. Na bihain ating bai yu was gut tru taim yu werim dispela klos. Olsem tasol, sapos sampela taim yu no mekim gutpela pasin, o yu les kwik, o yu no mekim pasin laikim long narapela, no ken larim dispela i mekim yu bel hevi. Taim yu pilim tru long bel na yu tok sori long dispela man o meri, dispela inap helpim yu long stretim bek pasin pren bilong yutupela. Na yu ken tingting strong long mekim dispela pasin bilong yu i kamap gutpela moa long bihain.

18. Yumi ken save tru long wanem samting?

¹⁸ Yumi tenkyu tru olsem Jisas i stap gutpela eksampel! Taim yumi wok long bihainim tingting bilong em, yumi bai pilim olsem em isi moa long bihainim ol pasin bilong em. Taim yumi wok long bihainim ol pasin bilong Jisas, yumi bai kamap gutpela moa long kisim nupela pasin. Long dispela atikol, yumi bin stori long 4-pela pasin em holi spirit bilong God i kamapim. I gutpela yu lusim haptaim long skelim gen ol pasin em holi spirit i kamapim na lukim hau yu ken bihainim ol dispela pasin. Yu bai lukim lista bilong ol dispela atikol long dispela topik long Research Guide for Jehovah’s Witnesses aninit long het tok “Christian Life” na bihain “Fruitage of the Spirit.” Yu ken save tru olsem taim yu mekim olsem, Jehova bai helpim yu long kisim nupela pasin na yu bai wok yet long bihainim.