1. Laip bilong yu i olsem wanem paslain long yu kirap stadi long Baibel?

 LAIP bilong yu i olsem wanem paslain long yu kirap stadi long Baibel wantaim ol Witnes Bilong Jehova? Planti bilong yumi bai pret long tingim dispela samting. Ating pasin na tingting bilong ol man bilong dispela graun i bin stiaim tingting na pasin bilong yumi long wanem samting i rait na wanem samting i rong. Pastaim ‘yumi stap namel long ol manmeri na yumi no save long God na yumi no wetim wanpela gutpela samting.’ (Efe. 2:12) Tasol taim yumi kirap stadi long Baibel, laip bilong yumi i senis olgeta!

2. Taim yu kirap stadi long Baibel, yu kisim save long wanem samting?

² Taim yu kirap stadi long Baibel, yu kisim save olsem yu gat wanpela Papa long heven husat i laikim yu tru. Yu luksave olsem sapos yu laik amamasim Jehova na stap insait long lain famili bilong em i lotuim em, yu mas mekim ol bikpela senis long laip bilong yu na long tingting na pasin bilong yu. Yu mas lain long bihainim ol stretpela lo bilong Em.—Efe. 5:3-5.

3. (a) Olsem Kolosi 3:9, 10 i kamapim, Jehova i laik yumi mas mekim wanem? (b) Yumi bai stori long wanem samting long dispela atikol?

³ Jehova em i Krieta na Papa bilong yumi long heven, olsem na em i gat rait long makim ol pasin em bikpela lain famili bilong em i mas bihainim. Na paslain long yumi baptais, Jehova i laik yumi mas wok hat tru long “rausim olpela pasin wantaim ol samting [yumi] bin mekim bipo.” * (Ritim Kolosi 3:9, 10.) Dispela atikol bai helpim ol lain husat i laik kisim baptais long bekim 3-pela askim: (1) “Olpela pasin” i makim wanem samting? (2) Wai na Jehova i tokim yumi long rausim olpela pasin? (3) Hau yumi ken mekim olsem? Yumi ol lain husat i kisim  baptais pinis, dispela stadi bai helpim yumi long no ken kisim gen olpela pasin.

4. Man em “olpela pasin” i bosim em, em i save mekim wanem?

⁴ Man em “olpela pasin” i bosim em, em i save bihainim ol laik na tingting bilong bodi. Ating em i save tingim em yet, em i save belhat kwik, em i no gat pasin bilong tok tenkyu, na em i gat pasin antap. Ating em i amamas long lukim ponografi na ol muvi i soim pasin pamuk na pasin bilong pait. Em i gat sampela gutpela pasin, na ating bel i kotim em long ol pasin nogut na ol tok nogut em i save mekim. Tasol em i no gat strongpela laik long senisim tingting na pasin bilong em.—Gal. 5:19-21; 2 Tim. 3:2-5.

5. Taim yumi rausim olpela pasin, dispela i makim wanem samting? (Aposel 3:19)

⁵ Yumi olgeta i gat sin, so i no gat wanpela bilong yumi i ken rausim na pinisim olgeta tingting na laik nogut i stap long bel na tingting bilong yumi. Sampela taim, yumi bai mekim pasin o tok em bihain yumi bel hevi long en. (Jer. 17:9; Jems 3:2) Tasol taim yumi rausim olpela pasin, dispela i makim olsem ol laik nogut bilong bodi na ol tingting nogut i no inap bosim yumi moa. Pasin na tingting bilong yumi i senis olgeta.—Ais. 55:7; ritim Aposel 3:19.

6. Wai na Jehova i laik yumi mas rausim ol tingting nogut na ol pasin nogut?

⁶ Jehova i laik yumi mas rausim ol tingting nogut na ol pasin nogut bikos em i laikim yumi tru na em i laik bai yumi stap amamas. (Ais. 48:17, 18) Em i save olsem ol man husat i bihainim ol laik nogut bilong ol, ol i mekim ol yet i bel hevi na ol i mekim ol famili na ol pren bilong ol tu i bel hevi. Jehova i save bel hevi tru taim em i lukim olsem yumi mekim yumi yet i bel hevi na ol narapela tu i bel hevi.

7. Olsem Rom 12:1, 2 i kamapim, yumi mas mekim wanem disisen?

⁷ Ating pastaim sampela pren na ol wanfamili bai tok bilas long yumi taim ol i lukim olsem yumi laik senisim ol pasin bilong yumi. (1 Pita 4:3, 4) Ating ol bai tok yumi gat rait long mekim wanem samting yumi laik mekim na yumi no ken larim ol narapela i tokim yumi long ol samting yumi mas mekim. Tasol ol man i sakim ol lo bilong Jehova, ol i no stap fri, nogat. Tru tru, ol i larim ol pasin bilong dispela graun em Satan i bosim long stiaim ol pasin na tingting  bilong ol. (Ritim Rom 12:1, 2.) Yumi olgeta i gat disisen long mekim: Yumi bai larim olpela pasin bilong yumi i stap yet, em sin na graun bilong Satan i stiaim dispela pasin, o yumi bai larim Jehova i senisim yumi na bai yumi stap olsem gutpela man o meri long nau.—Ais. 64:8.

8. Wanem samting i ken helpim yumi long abrusim ol tingting nogut na ol pasin nogut?

⁸ Jehova i save olsem yumi mas lusim bikpela haptaim na strong long abrusim ol tingting nogut na ol pasin nogut. (Sng. 103:13, 14) Tasol long rot bilong Baibel, holi spirit bilong em, na oganaisesen bilong em, Jehova i givim yumi savetingting, strong, na sapot yumi nidim bilong senisim ol pasin bilong yumi. Ating em i bin helpim yu pinis long mekim olsem. Nau yumi bai stori long sampela samting yu ken mekim bilong helpim yu long wok yet long rausim olpela pasin na bai yu ken winim mak bilong kisim baptais.

9. Baibel inap helpim yu long mekim wanem?

⁹ Yusim Baibel long skelim gut yu yet. Tok Bilong God i olsem mira; em i ken helpim yu long skelim wei bilong yu long tingting na ol tok na ol pasin yu mekim. (Jems 1:22-25) Baibel tisa bilong yu na ol narapela Kristen i stap strong long bilip i ken givim edvais long yu. Olsem, ol i ken yusim tok bilong Baibel long helpim yu long luksave long ol gutpela pasin bilong yu na ol pasin kranki bilong yu. Ol i ken skulim yu long hau yu inap painim ol atikol samting em Baibel i as bilong ol tok bilong en we inap helpim yu long lusim ol pasin nogut bilong yu. Na tu, oltaim Jehova i redi long helpim yu. Em i save long nambawan gutpela rot bilong helpim yu; em i save long ol tingting na laik i stap long bel bilong yu. (Prov. 14:10; 15:11) Olsem na kisim pasin bilong beten long Jehova na stadi long Baibel long olgeta de.

10. Yu kisim wanem skul long ekspiriens bilong Elie?

¹⁰ Bilip tru olsem ol lo bilong Jehova i nambawan tru. Yumi bai stap amamas sapos yumi bihainim olgeta tok bilong Jehova. Ol man i bihainim ol lo bilong em ol i rispektim ol yet, laip bilong ol i gat as tru, na ol i stap amamas tru. (Sng. 19:7-11) Tasol ol man i sakim ol lo bilong Jehova, ol i karim pen na hevi taim ol i bihainim ol pasin em laik nogut bilong bel i kamapim. Wanpela man nem bilong em Elie i stori long samting i kamap taim yumi sakim ol lo bilong God. Papamama i mekim bikpela long em na ol i laikim tru Jehova. Tasol taim Elie i kamap tineja, em i bung wantaim ol poroman nogut. Em i stat long kisim drak, mekim pasin pamuk, na em i save stil. Elie i kamap man bilong belhat tru na em i save pait long ol narapela. Em i tok: “Mi mekim olgeta pasin em papamama i bin skulim mi olsem i no stret long ol Kristen i mekim.” Tasol Elie i no lusim tingting long ol samting em i lainim taim em i liklik mangi. Bihain, em i kirap stadi gen long Baibel. Em i wok hat tru long lusim ol pasin nogut bilong em, na em i baptais long yia 2000. Em i bihainim ol lo bilong Jehova na hau dispela i helpim em? Elie i tok: “Nau tingting na bel bilong mi i stap isi na i no kotim mi moa.” * Dispela ekspiriens i soim olsem ol man husat i sakim ol lo bilong Jehova, ol bai bel hevi tru. Maski i olsem, Jehova i redi long helpim ol long senisim ol pasin bilong ol.

11. Jehova i heitim wanem ol pasin?

¹¹ Heitim ol pasin Jehova i heitim. (Sng. 97:10) Baibel i tok Jehova i heitim “ai i save mekim pasin antap, maus i save giaman, na ol han i save kapsaitim blut bilong ol man i no gat asua.” (Prov. 6:16, 17) Na tu, em i “nolaik tru long ol man bilong pait na kilim man i dai na ol man bilong giamanim ol arapela.” (Sng. 5:6) Jehova i  heitim ol dispela pasin, olsem na em i pinisim olgeta man nogut long taim bilong Noa bikos graun i pulap tru long pasin bilong pait. (Stt. 6:13) Tingim narapela eksampel. Long rot bilong profet Malakai, Jehova i tok em i heitim tru ol manmeri em ol i brukim tok promis bilong ol na ol i painim eskius long divosim poroman marit i no gat asua. God i sakim lotu bilong ol na em bai kotim ol long dispela pasin ol i mekim.—Mal. 2:13-16; Hib. 13:4.

12. Wanem mining bilong dispela tok “heitim tru pasin nogut”?

¹² Jehova i laik yumi mas “heitim tru pasin nogut.” (Rom 12:9) Dispela tok “heitim tru” em strongpela tok; em i makim olsem yumi no laik tru long wanpela samting, i olsem dispela samting i sting long ai bilong yumi. Tingim, yu bai pilim olsem wanem sapos wanpela i tokim yu long kaikai wanpela kaikai i sting na bagarap pinis? Ating yu bai pilim sik taim yu tingim dispela, a? Olsem tasol, ol pasin em Jehova i tok ol i pasin nogut, ol i olsem ol samting i sting na i bagarap pinis na yumi heitim tru ol dispela pasin.

13. Bilong wanem yumi mas was gut long tingting bilong yumi?

¹³ Was gut long tingting bilong yu. Tingting bilong yumi i save stiaim ol pasin bilong yumi. Em risen na Jisas i skulim yumi long sakim ol tingting we inap kirapim yumi long mekim bikpela rong. (Mat. 5:21, 22, 28, 29) Yumi laik tru long amamasim Papa bilong yumi long heven. Olsem na em i bikpela samting tru long yumi mas rausim kwik ol tingting nogut i stap long tingting bilong yumi!

14. (a) Toktok bilong yumi i kamapim wanem samting? (b) Yumi mas givim wanem ol askim long yumi yet?

¹⁴ Bosim gut toktok bilong yu. Jisas i tok: “Ol samting i kamaut long maus i save kam long tingting bilong bel.” (Mat. 15:18) Tru tumas, toktok bilong yumi i kamapim ol samting i stap insait long bel bilong yumi. So yu ken askim yu yet olsem: ‘Mi save sakim pasin bilong tok giaman, maski hevi bai painim mi sapos mi mekim tok tru? Olsem wanpela maritman o maritmeri, mi save was gut na sakim pasin bilong tok gris wantaim wanpela husat i no poroman marit bilong mi? Mi save abrusim ol tok pilai doti wankain olsem mi abrusim wanpela sik nogut? Mi save bekim tok long pasin isi taim wanpela i mekim mi bel hevi?’ Yu bai luksave olsem em i gutpela samting long tingim tingim ol dispela askim. Toktok bilong yu i olsem tret i joinim 2-pela laplap. Sapos yu rausim tret, yu bai  seperetim dispela 2-pela laplap. Olsem tasol, sapos yu traim bes long rausim pasin bilong mekim ol tok nogut, ol tok giaman, na ol tok pilai doti, orait yu bai rausim olpela pasin.

15. Wanem mining bilong dispela tok nilim olpela pasin bilong yumi “long pos”?

¹⁵ Redi long mekim ol samting i stret. Aposel Pol i yusim wanpela gutpela tok piksa bilong skulim yumi olsem em i bikpela samting tru long yumi mas senisim ol pasin bilong yumi. Em i tok yumi mas nilim olpela pasin bilong yumi “long pos.” (Rom 6:6) Pol i kirapim yumi long bihainim eksampel bilong Krais. Yumi mas kilim i dai, o lusim olgeta, ol pasin em Jehova i heitim. Taim yumi mekim olsem, yumi bai gat klinpela maus bilong bel na yumi bai bilip na wet long kisim laip oltaim long bihain. (Jon 17:3; 1 Pita 3:21) Tingim, Jehova i no inap senisim ol lo bilong em bilong amamasim yumi, nogat. Yumi mas senisim ol pasin bilong yumi na bihainim ol lo bilong em.—Ais. 1:16-18; 55:9.

16. Wai na yu mas wok strong yet long sakim ol laik nogut?

¹⁶ Wok strong yet long sakim ol laik nogut. Maski yu baptais pinis, yu mas wok strong yet long sakim ol laik nogut bilong bodi. Tingim ekspiriens bilong wanpela man, nem bilong em Maurício. Taim em i yangpela man, em i kamap wanpela gei. Bihain, em i bungim ol lain bilong Jehova na kirap stadi long Baibel. Em i mekim ol bikpela senis long laip bilong em, na em i kisim baptais long 2002. Maski em i mekim wok bilong Jehova inap planti yia nau, Maurício i tok: “Tru, sampela taim ol laik nogut i save kamap long bel bilong mi, tasol mi save wok strong long daunim ol dispela laik.” Maski i olsem, em i no larim dispela i daunim em, nogat. Em i tok: “Mi save olsem taim mi no bihainim ol dispela laik nogut, Jehova inap orait long mi na dispela i save strongim tru mi.” *

17. Olsem wanem ekspiriens bilong Nabiha i strongim yu?

¹⁷ Beten long Jehova na trastim holi spirit bilong em long helpim yu, na no ken bilip long strong bilong yu yet. (Gal. 5:22; Fili. 4:6) Yumi mas tingting strong long rausim olpela pasin na yumi no ken tru kisim gen dispela pasin. Tingim ekspiriens bilong wanpela meri, nem bilong em Nabiha. Papa bilong em i lusim em taim em i gat 6-pela krismas tasol. Nabiha i tok: “Bel na tingting bilong mi i bagarap olgeta.” Taim Nabiha i kamap bikpela meri, em i kamap meri bilong  belhat kwik na kros pait. Em i kirap insait long pasin bilong salim drak, so polis i bin arestim em na em i stap kalabus inap sampela yia. Ol Witnes i visitim haus kalabus em i stap long en na ol i kirap stadi wantaim em long Baibel. Dispela i helpim Nabiha long mekim ol bikpela senis long laip bilong em. Em i tok: “Sampela pasin nogut bilong mi i isi long mi lusim. Tasol mi hatwok tru long lusim pasin bilong smok.” Nabiha i hatwok long lusim pasin bilong smok winim 1-pela yia, tasol bihain em i lusim dispela pasin olgeta. Wanem samting i bin helpim em long mekim olsem? Em i tok: “Nambawan bikpela samting i helpim mi long lusim smok em pasin bilong beten oltaim long Jehova.” Nau em i save tokim ol narapela: “Mi bilip tru olsem sapos mi inap mekim ol senis bilong amamasim Jehova, ol arapela tu inap mekim olsem!” *

18. Olsem 1 Korin 6:9-11 i kamapim, planti wokman bilong God i bin mekim wanem?

¹⁸ Long taim bilong ol aposel, sampela manmeri em Jehova i bin makim ol long mekim wok king na pris wantaim Krais, pastaim ol i larim ol pasin nogut i bosim ol. Olsem, ol i bin mekim pasin adaltri, sampela i stap olsem ol stilman na ol man bilong slip wantaim ol narapela man. Tasol holi spirit bilong God i helpim ol long lusim ol dispela pasin nogut. (Ritim 1 Korin 6:9-11.) Olsem tasol, long nau Baibel i helpim planti milion manmeri long mekim ol bikpela senis long laip bilong ol. * Ol i bin lusim ol pasin nogut we i hatwok tru long ol i lusim. Eksampel bilong ol i soim olsem yu tu i ken senisim ol pasin bilong yu na daunim ol pasin nogut, na long dispela rot yu bai winim mak bilong kisim baptais.

19. Neks atikol bai stori long wanem samting?

¹⁹ Ol lain i laik kisim baptais, ol i mas rausim olpela pasin, na tu, ol i mas wok strong long kisim nupela pasin. Neks atikol bai stori long hau yumi ken kisim nupela pasin na hau ol narapela i ken helpim yumi long mekim olsem.