Sampela man i ritim dispela stori na ol i tingting planti long dispela. Tasol long ol dispela ves, yumi bai kisim save olsem i gat 2-pela narapela narapela man em ol i gat nem Mefiboset. Na yumi bai kisim skul tu long narapela samting.

King Sol bilong Israel i bin gat 7-pela pikinini man na 2-pela pikinini meri. Fesbon pikinini man bilong Sol em Jonatan. Bihain Sol i gat narapela pikinini man, nem bilong em Mefiboset. Mama bilong Mefiboset em Rispa, em i wanpela bilong nambatu lain meri bilong Sol. Nau stori i go intresting bikos Jonatan i gat wanpela pikinini man, na nem bilong em tu Mefiboset. So King Sol i gat wanpela pikinini man em nem bilong em Mefiboset na wanpela tumbuna pikinini man em nem bilong em tu Mefiboset.

King Sol i stat long heitim lain Gibeon em ol i stap namel long lain Israel na em i laik kilim i dai olgeta manmeri bilong lain Gibeon. Na em i bin kilim i dai sampela bilong ol. Dispela samting em i mekim i no stret. Wai? Bikos long taim bilong Josua, ol hetman bilong lain Israel i mekim kontrak bilong stap bel isi wantaim lain Gibeon.​—Jos. 9:3-27.

Dispela kontrak i stap yet taim King Sol i mekim wok king. Tasol em i sakim dispela kontrak na em i traim long pinisim olgeta manmeri bilong lain Gibeon. Dispela plen bilong Sol i mekim na “em wantaim famili bilong em i gat asua long blut bilong ol” Gibeon. (2 Sml. 21:1) Bihain Devit i kamap king. Na ol manmeri bilong lain Gibeon em ol i stap laip yet, ol i tokim Devit long dispela bikpela rong em Sol i bin mekim. Devit i askim ol long wanem rot bilong stretim dispela rong em Sol i bin mekim, na dispela bai opim rot long Jehova i blesim lain Israel. Lain Gibeon i no askim long mani, nogat. Ol i askim Devit long givim ol 7-pela pikinini man long lain famili bilong Sol, em man husat i laik “kilim [ol] i dai,” na bai ol i kilim i dai ol dispela 7-pela man. (Nam. 35:30, 31) Na Devit i bin mekim olsem.​—2 Sml. 21:2-6.

Long dispela taim, Sol na Jonatan i dai pinis; ol birua i kilim ol i dai long wanpela pait. Tasol pikinini man bilong Jonatan, Mefiboset, i stap laip yet. Taim Mefiboset i liklik mangi, em i bin pundaun na kisim bagarap na em i kamap lek nogut, na tu, em i no bin helpim tumbuna papa bilong em, Sol, long pinisim lain Gibeon. Devit i wokim kontrak bilong stap gutpela pren bilong Jonatan, na dispela kontrak i lukautim lain famili bilong Jonatan, dispela i makim tu pikinini man bilong Jonatan, em Mefiboset. (1 Sml. 18:1; 20:42) Baibel i tok: “King [Devit] i sori long Mefiboset, pikinini man bilong Jonatan. Jonatan em i pikinini man bilong Sol. Devit i mekim olsem, long wanem, em i tingim tok tru antap em . . . i bin mekim long ai bilong Jehova.”​—2 Sml. 21:7.

Maski i olsem, Devit i mekim samting em lain Gibeon i askim em long en. Em i kisim 2-pela pikinini man bilong Sol, wanpela bilong ol nem bilong em Mefiboset, na 5-pela tumbuna pikinini man bilong Sol na givim ol long han bilong lain Gibeon. (2 Sml. 21:8, 9) Taim Devit i mekim olsem, dispela i pinisim asua em lain Israel i gat long blut bilong lain Gibeon.

Yumi kisim save long histori, na yumi kisim skul tu long wanpela samting. Lo bilong God i klia tru. Em i tok: “Sapos papa i mekim sin, orait yupela i no ken kilim i dai pikinini bilong em.” (Lo 24:16) Tasol Jehova i orait long lain Gibeon i kilim i dai 2-pela pikinini man na 5-pela tumbuna pikinini man bilong Sol bikos ol i gat asua. Dispela lo i tok moa: “Yupela i mas kilim i dai tasol man i mekim sin.” I luk olsem dispela 7-pela man long lain famili bilong Sol i bin helpim Sol long sampela kain rot long traim long pinisim ol manmeri bilong lain Gibeon. Yes, 7-pela bilong ol i dai bikos ol i bin mekim sin.

Yumi kisim skul long dispela stori: Maski sapos wanpela man i tok em i bihainim tok bilong narapela man na em i mekim samting, sapos samting em i mekim i rong, orait dispela i makim olsem em tu i gat asua. Wanpela provep i tok: “Stretim rot bilong lek bilong yu, na olgeta pasin bilong yu bai kamap gutpela.”​—Prov. 4:24-27; Efe. 5:15.