1. Ol lain i save pilim tru wanem samting taim ol i kam festaim long ol miting bilong yumi? (Lukim tu piksa.)

 PIKSAIM long tingting olsem tupela marit i go long fes miting bilong ol long Haus Kingdom bilong ol Witnes Bilong Jehova. Tupela i pilim tru gutpela pasin ol bratasista i mekim bilong welkamim ol, na ol i pilim tru pasin laikim ol i lukim namel long ol bratasista. Taim ol i go bek long haus, meri i tokim man bilong em olsem, ‘Dispela lain ol i narapela kain long ol lain yumi bin save long ol, na mi amamas tru long stap wantaim ol.’

2. Wanem samting i mekim na sampela i pundaun?

² Tru tumas, pasin laikim i stap namel long ol bratasista insait long kongrigesen em i spesel tru. Em tru olsem ol Witnes Bilong Jehova ol i no gutpela olgeta. (1 Jon 1:8) Olsem na taim yumi save gut moa long ol narapela insait long kongrigesen, ating bai yumi luksave long sampela pasin kranki bilong ol. (Rom 3:23) Sori tru, sampela i bin larim ol pasin kranki bilong ol narapela i pundaunim ol.

3. Wanem samting i stap olsem mak bilong ol disaipel tru bilong Jisas? (Jon 13:34, 35)

³ Lukim gen tim skripsa bilong dispela atikol. (Ritim Jon 13:34, 35.) Wanem samting i stap olsem mak bilong ol disaipel tru bilong Krais? Em pasin laikim, na i no olsem ol i mas gutpela olgeta. Na lukim tu olsem, Jisas i no tok: ‘Orait yupela bai save olsem yupela i disaipel bilong mi,’ nogat. Em i tok: “Orait olgeta bai save olsem yupela i disaipel bilong mi.” Jisas i kamapim klia olsem ol disaipel bilong em, na tu, ol manmeri ausait long kongrigesen Kristen, ol bai luksave long ol disaipel tru bilong  em long rot bilong pasin laikim tru ol i mekim long narapela narapela.

4. Sampela inap i gat wanem ol askim long ol Kristen tru?

⁴ Sampela manmeri em ol i no Witnes Bilong Jehova, ol inap tingting olsem: ‘Hau na pasin laikim inap stap olsem mak bilong ol disaipel tru bilong Jisas? Hau Jisas i mekim pasin laikim long ol aposel bilong em? Na hau yumi ken bihainim pasin bilong Jisas long nau?’ Yumi ol Witnes i ken tingim gut bekim bilong ol dispela askim. Taim yumi mekim olsem, dispela bai helpim yumi long mekim moa yet pasin laikim long ol narapela, na moa yet long taim ol i mekim ol pasin kranki.​—Efe. 5:2.

5. Wanem insait bilong tok bilong Jisas long Jon 15:12, 13?

⁵ Jisas i kamapim klia olsem wanpela kain spesel pasin laikim bai stap olsem mak bilong ol disaipel bilong em. (Ritim Jon 15:12, 13.) Jisas i tokim ol olsem: “Yupela i mas laikim narapela narapela olsem mi bin laikim yupela.” Dispela i makim wanem samting? Jisas i stori moa long en olsem, dispela kain pasin laikim i save kirapim man long daunim laik bilong em yet na em kain pasin laikim we i kirapim wanpela Kristen long redi long dai bilong helpim wanbilip bilong em. b

6. Olsem wanem Baibel i kamapim klia olsem pasin laikim em i bikpela samting?

⁶ Baibel i kamapim klia olsem pasin laikim em i bikpela samting. Planti manmeri i save laikim tru ol dispela Baibel ves: “God em i pasin laikim.” (1 Jon 4:8) “Yu mas laikim ol arapela man olsem yu laikim yu yet.” (Mat. 22:39) “Pasin laikim i karamapim planti sin.” (1 Pita 4:8) “Pasin laikim i no inap pinis.” (1 Kor. 13:8) Ol dispela ves na ol narapela ves i soim klia long olgeta manmeri olsem em i bikpela samting long yumi mas kisim dispela pasin na mekim dispela naispela pasin.

7. Wai na Satan i no inap tru long mekim wanpela lain i laikim tru narapela narapela?

 ⁷ Planti man i gat askim olsem: ‘Hau mi ken luksave long lotu i tru? Olgeta lotu i tok ol i skulim ol man long tok i tru, tasol olgeta wan wan i skulim ol man long narapela narapela tingting long God.’ Satan i paulim ol manmeri long rot bilong kamapim planti lotu giaman. Tasol em i no inap tru long mekim wanpela lain brata i stap long olgeta hap bilong graun i laikim tru narapela narapela. Jehova tasol inap mekim olsem. I stret long yumi tok olsem bikos pasin laikim tru i kam long Jehova—em i givim holi spirit bilong em na blesing bilong em long wanpela lain i lotuim em. (1 Jon 4:7) Em risen na Jisas i tok ol disaipel bilong em bai laikim tru narapela narapela.

8-9. Olsem wanem planti lain i pilim tru pasin laikim ol i lukim namel long ol Witnes Bilong Jehova?

⁸ Olsem Jisas i bin tok profet long en, planti man i luksave long ol disaipel tru bilong em long rot bilong pasin laikim tru ol i mekim long narapela narapela. Olsem, wanpela brata nem bilong em Ian, em i stori long fes kibung em i bin go long en we i kamap long wanpela spots stediam klostu long haus bilong em. Sampela mun paslain, Ian i bin go long dispela stediam bilong watsim wanpela gem. Em i tok: “Dispela kibung i narapela kain olgeta. Ol Witnes i mekim gutpela pasin na ol i bilas gut na ol pikinini bilong ol i gat gutpela pasin bilong bihainim tok.” Em i tok moa: “Tasol bikpela samting moa, dispela lain i amamas long samting ol i gat na ol i stap bel isi, em samting mi gat laik tru long en. Mi no tingim ol tok i bin kamap long dispela de, tasol mi tingim pasin bilong ol Witnes na dispela i stap longpela taim long tingting.” c Tru tumas, kain ol gutpela samting i kamap bikos yumi laikim tru narapela narapela. Yumi laikim ol bratasista bilong yumi, olsem na yumi mekim gutpela pasin long ol na yumi rispektim ol.

⁹ Wanpela brata nem bilong em John, em i tu i pilim olsem long festaim em i go long wanpela miting bilong kongrigesen, em i tok: “Mi kirap nogut long gutpela pasin pren . . . bilong olgeta long miting—ol i olsem ol santuman. Pasin laikim bilong ol i mekim na mi bilip olsem mi painim pinis lotu i tru.” d Planti taim, ol kain ekspiriens olsem i kamapim klia olsem lain bilong Jehova ol i Kristen tru.

10. Long wanem kain taim rot i op long yumi ken soim pasin laikim Kristen? (Lukim tu futnot.)

¹⁰ Olsem yumi stori pinis long kirap bilong dispela atikol, ol wanbilip bilong yumi ol i no gutpela olgeta. Sampela taim, ol bai mekim ol tok o ol pasin we i bagarapim bel bilong yumi. e (Jems 3:2) Long ol kain taim olsem, rot i op long yumi ken soim pasin laikim Kristen long ol long rot bilong pasin yumi mekim long ol. Bilong mekim olsem, yumi ken kisim wanem skul long pasin bilong Jisas?​—Jon 13:15.

11. Jems na Jon i soim olsem tupela i gat wanem ol pasin kranki? (Lukim tu piksa.)

¹¹ Jisas i no ting olsem ol disaipel bilong em i mas gutpela olgeta, nogat. Long pasin laikim em i helpim ol long stretim ol pasin kranki bilong ol na bai Jehova i ken orait long ol. Wanpela taim, tupela aposel em Jems na Jon, ol i tokim mama bilong ol long askim Jisas long givim ol wok i gat namba long Kingdom. (Mat. 20:20, 21) Pasin bilong Jems na Jon i soim olsem tupela i gat pasin antap na ol i laik winim ol narapela.​—Prov. 16:18.

12. Yu ting Jems na Jon tasol i bin mekim ol pasin kranki? Stori long dispela.

¹² Long dispela taim, i no Jems na Jon tasol i soim olsem ol i gat ol pasin kranki. Lukim pasin ol arapela aposel i mekim, Baibel i tok: “Taim 10-pela arapela disaipel i harim tok long dispela samting, ol i no amamas long dispela tupela brata.” (Mat. 20:24) Yumi ken piksaim long tingting olsem kros i kamap namel long Jems, Jon, na ol arapela aposel. Ating ol arapela aposel i mekim kain ol tok olsem: ‘Yutupela i ting yupela i husat na yupela i askim long wok i gat namba insait long Kingdom? I no yutupela tasol i bin wok hat wantaim Jisas. Mipela tu i winim mak wankain olsem yutupela long kisim ol wok i gat namba!’ Maski wanem samting i kamap, long dispela taim ol aposel i lusim tingting olsem oltaim ol i mas mekim gutpela pasin na pasin laikim long narapela narapela.

13. Jisas i mekim wanem pasin taim ol aposel bilong em i mekim ol pasin kranki? (Matyu 20:25-28)

¹³ Jisas i mekim wanem long hevi i kamap? Em i no belhat long ol. Na em i no tok em bai lusim ol na go painim ol gutpela aposel, em ol man i gat pasin daun tru na oltaim ol i save mekim pasin laikim long narapela narapela, nogat. Jisas i no les kwik long ol na em i toktok gut long ol. (Ritim Matyu 20:25-28.) Em i wok yet long mekim pasin laikim long ol, maski dispela em i no festaim o laspela taim ol aposel i kros long husat namel long ol i winim ol arapela.​—Mak 9:34; Luk 22:24.

14. Ol aposel bilong Jisas i kamap bikpela long wanem kain hap?

¹⁴ Em i klia tru olsem, Jisas i tingim bekgraun bilong ol aposel bilong em. (Jon 2:24, 25) Ol i kamap bikpela long hap we ol bikman bilong lotu i skulim ol man olsem ol i bikpela samting sapos ol i holim ol wok i gat namba. (Mat. 23:6; skelim atikol “Sinagog—Ples we Jisas na Ol Disaipel Bilong Em i Autim Tok” long Wastaua bilong Epril 1, 2010, p. 16-18.) Na tu, ol hetman bilong lotu Juda i ting olsem ol yet i stretpela man olgeta. f (Luk 18:9-12) Jisas i kliagut olsem hap ol aposel i kamap bikpela long en inap stiaim tingting ol i gat long ol yet na ol narapela. (Prov. 19:11) Em i no holim tingting olsem ol disaipel bilong em i mas gutpela olgeta, olsem na taim ol i mekim ol popaia, em i no les kwik long ol. Em i save ol i gat gutpela bel, olsem na em i no les kwik long helpim ol long lusim pasin antap na pasin bilong ting olsem ol i nambawan tru, na em i helpim ol long kisim pasin bilong laikim narapela narapela.

15. Yumi ken lainim wanem samting long pasin Jems na Jon i bin mekim?

¹⁵ Yumi ken lainim planti samting long pasin Jems na Jon i bin mekim. Em i no stret long ol i askim long wok i gat namba insait long Kingdom. Tasol ol arapela aposel tu i no mekim pasin i stret taim ol i larim dispela samting i bagarapim pasin wanbel namel long ol. Maski i olsem, Jisas i mekim gutpela pasin na pasin laikim long olgeta 12-pela aposel bilong em. Yumi kisim wanem skul long dispela? Em tru olsem, ol narapela inap mekim ol pasin kranki na ol popaia, tasol pasin yumi mekim long dispela em i bikpela samting. Wanem samting inap helpim yumi? Taim yumi bel hevi long pasin bilong wanpela wanbilip olsem, orait yumi ken askim yumi yet olsem: ‘Wai na pasin bilong em i mekim mi bel hevi tru? Dispela i kamapim klia wanpela pasin kranki bilong mi yet we mi mas wok strong long rausim? Nogut dispela brata o sista i mekim mi bel hevi, em yet i wok long karim wanpela hevi? Maski mi pilim olsem i stret long mi bel hevi long dispela, mi ken mekim yet gutpela pasin laikim na larim dispela i karamapim rong em i mekim long mi?’ Taim yumi wok yet long mekim pasin laikim long ol narapela, yumi kamapim klia olsem yumi ol disaipel tru bilong Jisas.

16. Yumi ken kisim wanem narapela skul long pasin bilong Jisas?

¹⁶ Pasin bilong Jisas i skulim yumi tu olsem, yumi mas wok strong long kliagut long tingting na pasin bilong ol wanbilip bilong yumi. (Prov. 20:5) Jisas i ken lukim tingting i stap long bel bilong ol man. Yumi no inap mekim olsem. Tasol yumi ken soim pasin bilong i no les kwik long ol bratasista bilong yumi taim ol i mekim ol popaia. (Efe. 4:1, 2; 1 Pita 3:8) Em bai isi moa long yumi mekim olsem taim yumi kisim save long bekgraun bilong ol. Skelim wanpela eksampel.

17. Wanpela wasman raun i save gut moa long wanbilip bilong em na dispela i helpim em olsem wanem?

¹⁷ Wanpela wasman raun long Is Afrika i tingim wanpela brata we em yet i pilim olsem dispela brata i no gat gutpela pasin. Dispela wasman raun i mekim wanem? Em i tok: “Mi no laik abrusim dispela brata, mi pasim tok long bel olsem mi mas save gut moa long em.” Taim dispela wasman raun i mekim olsem, em i kisim  sampela save moa long bekgraun bilong dispela brata we i stiaim pasin bilong em. Wasman raun i tok moa olsem: “Taim mi bin kliagut long bikpela hatwok brata i bin mekim bilong sakim dispela pasin em i lainim kirap long taim em i liklik yet, na long ol senis em i bin mekim pinis, mi rispek tru long em. Na mipela i bin kamap gutpela pren tru.” Tru tumas, taim yumi save gut moa long ol bratasista bilong yumi, em bai isi moa long yumi mekim pasin laikim long ol.

18. Yumi ken givim wanem ol askim long yumi yet taim wanpela wanbilip i bagarapim bel bilong yumi? (Provep 26:20)

¹⁸ Sampela taim, ating bai yumi laik i go stret na toktok wantaim wanpela wanbilip husat i mekim yumi bel hevi. Tasol pastaim, i gutpela yumi askim yumi yet ol kain askim olsem: ‘Mi save long olgeta samting i bin kamap?’ (Prov. 18:13) ‘Nogut em no min long bagarapim bel bilong mi?’ (Ekl. 7:20) ‘Mi tu bin mekim wankain popaia bipo?’ (Ekl. 7:21, 22) ‘Taim mi go toktok long em, bai mi mekim hevi i go bikpela moa winim hevi i kamap pinis?’ (Ritim Provep 26:20.) Taim yumi lusim haptaim long skelim ol kain askim olsem, dispela bai helpim yumi long tingim olsem pasin laikim i ken kirapim yumi long no ken tingim popaia bilong em.

19. Yu tingting strong long mekim wanem?

¹⁹ Olsem wanpela lain, ol Witnes Bilong Jehova i soim olsem ol i disaipel tru bilong Jisas. Yumi wan wan i soim olsem yumi ol disaipel tru bilong Jisas taim yumi mekim pasin laikim long ol bratasista bilong yumi maski ol i mekim ol popaia. Taim yumi mekim olsem, dispela inap kirapim ol narapela long luksave long lotu i tru na ol i ken joinim yumi long lotuim Jehova, em God bilong pasin laikim. Yumi ken tingting strong long wok yet long mekim pasin laikim we i stap olsem mak bilong ol Kristen tru.