1-2. (a) Wanem samting i save kamap taim ol man i kisim baptais? (b) Bai yumi stori long wanem samting long dispela atikol?

 YU BIN lukim sampela lain i kisim baptais? Yu ken harim amamas long nek bilong ol taim ol i bekim 2-pela askim paslain long ol i kisim baptais. Yu lukim ol wanfamili na ol pren bilong ol i amamas tru long ol. Taim ol i kisim baptais pinis na lusim wara na kam ausait, yu harim ol narapela i paitim han long ol na yu lukim bikpela amamas long pes bilong ol lain i kisim baptais. Long olgeta wik, planti tausen manmeri i save dediket na kisim baptais na kamap ol Witnes Bilong God Jehova.

² Olsem wanem long yu? Sapos yu tingting long kisim baptais, yu stap olsem samting i dia tumas long dispela graun nogut, long wanem, yu “wok long painim Jehova.” (Sng. 14:1, 2) Ol tok bilong dispela atikol i stret long yu maski yu yangpela o yu lapun. Tasol yumi ol lain i baptais pinis, yumi tu i laik tingting strong long mekim wok bilong Jehova inap oltaim oltaim. I gat planti risen na yumi laik mekim wok bilong Jehova, tasol yumi ken stori long 3-pela bilong ol.

3. Bilong wanem lain bilong Jehova i laikim tok tru na stretpela pasin? (Buk Song 119:128, 163)

³ Jehova i tokim lain bilong em long “laikim tok tru.” (Sek. 8:19) Jisas i kirapim ol disaipel bilong em long bihainim stretpela pasin. (Mat. 5:6) Dispela i makim olsem man i mas i gat strongpela laik long mekim ol samting i stret, i gutpela, na i klin long ai bilong God. Yu laikim tok i tru na stretpela pasin? Mipela i save olsem yu gat dispela laik. Yu heitim olgeta tok giaman na ol pasin i no stret na ol pasin nogut. (Ritim Buk Song 119:128, 163.) Man bilong tok giaman em i bihainim pasin bilong Satan, em hetman bilong dispela graun. (Jon 8:44; 12:31) Wanpela samting Satan i wok strong tru long mekim em long bagarapim nem holi bilong God Jehova. Kirap long taim pasin bikhet i kamap long Iden na i kam inap long nau, Satan i wok long mekim  ol tok giaman long God. Em i kirapim ol man long tingim Jehova olsem God husat i tingim em yet tasol, na em i no save mekim stretpela wok bos na em i pasim ol gutpela samting long painim ol manmeri. (Stt. 3:1, 4, 5) Ol tok giaman Satan i mekim long Jehova i wok yet long mekim ol manmeri i tingim God olsem wanpela man nogut. Taim ol man i no “laikim tok tru,” Satan inap stiaim ol long mekim olgeta kain pasin i no stret na ol pasin nogut.​—Rom 1:25-31.

4. Olsem wanem Jehova i kamapim klia olsem em i “God bilong mekim pasin tru tasol”? (Lukim tu piksa.)

⁴ Jehova em i “God bilong mekim pasin tru tasol,” na em i save skulim ol manmeri i laikim em long tok i tru. (Sng. 31:5) Taim em i mekim olsem, em i helpim ol na ol tok giaman bilong Satan i no paulim ol. Na tu, Jehova i save skulim ol wokman bilong em long mekim tok tru na bihainim stretpela pasin. Dispela i helpim ol long i gat rispek long ol yet na stap belgut. (Prov. 13:5, 6) Olsem wanem? Em i bin helpim yu long pilim olsem taim yu stadi long Baibel? Yu bin lainim olsem ol pasin bilong Jehova ol i gutpela long helpim olgeta man na ol inap helpim yu tu. (Sng. 77:13) Em as na yu laik bihainim stretpela pasin bilong God. (Mat. 6:33) Yu laik sambai long tok i tru, na yu laik soim olsem tok Satan i mekim bilong daunim gutnem bilong God Jehova em i no tru. Hau yu ken mekim olsem?

5. Hau yu ken sambai long tok i tru na stretpela pasin?

⁵ Ol pasin yu bihainim long laip bilong yu inap kamapim klia olsem yu sakim ol tok giaman bilong Satan na yu sapotim tok i tru. Yu ken soim olsem yu laik bai Jehova i stap Bosman bilong yu na yu laik mekim ol samting we em i tok i stret long mekim. Hau yu ken mekim olsem? Toktok wantaim Jehova long rot bilong beten na dediketim laip bilong yu long em na bihain kamapim klia dispela dediket long rot bilong kisim baptais. Taim yu laikim tok i tru na stretpela pasin, dispela bai kirapim yu long kisim baptais.

6. Olsem Buk Song 45:4 i kamapim, wanem sampela risen na yu laikim Jisas Krais?

⁶ Bilong wanem yu laikim Jisas Krais? Skelim sampela gutpela risen i stap long Buk Song 45:4. (Ritim.) Jisas i laikim tok i tru, pasin daun, na stretpela pasin. Sapos yu laikim tok i tru na stretpela pasin, em i klia olsem yu laikim Jisas Krais tu. Tingim hau Jisas i strongim bel na sambai long tok i tru na stretpela pasin.  (Jon 18:37) Tasol olsem wanem Jisas i skulim yumi long mekim pasin daun?

7. Bilong wanem yu laikim pasin daun bilong Jisas?

⁷ Jisas i skulim yumi long mekim pasin daun long rot bilong ol samting em i mekim. Olsem, em i save givim glori i go long Papa bilong em long olgeta samting em i mekim, na i no long em yet. (Mak 10:17, 18; Jon 5:19) Yu pilim olsem wanem long pasin daun bilong Jisas? Tru tumas, dispela i kirapim yu long laikim Pikinini Bilong God na bihainim pasin bilong em! Bilong wanem Jisas i gat pasin daun? Jisas i gat pasin daun, long wanem, em i laikim Papa bilong em na em i bihainim pasin bilong Em, em Man husat i gat pasin daun. (Sng. 18:35; Hib. 1:3) Olsem wanem? Dispela i kirapim yu long laikim Jisas, em man i bihainim gut tru ol pasin bilong Jehova?

8. Wai na yumi laikim Jisas olsem King bilong yumi?

⁸ Yumi laikim Jisas olsem King bilong yumi, long wanem, em i gutpela Bosman. Jehova yet i bin skulim Pikinini bilong em na makim em long mekim wok king. (Ais. 50:4, 5) Tingim tu pasin laikim Jisas i soim long givim laip bilong em yet bilong helpim yumi. (Jon 13:1) Jisas em i King bilong yu, olsem na i stret long yu mas laikim em. Em i tok ol man husat i laikim em tru—em ol lain em i tingim ol olsem ol pren bilong em—ol i save soim olsem ol i laikim em long rot bilong bihainim ol tok bilong em. (Jon 14:15; 15:14, 15) Em gutpela blesing tru long stap olsem pren bilong Pikinini bilong Jehova!   

9. Olsem wanem baptais bilong ol Kristen i wankain long baptais bilong Krais?

⁹ Wanpela samting Jisas i tok ol disaipel bilong em i mas mekim em long kisim baptais. (Mat. 28:19, 20) Em yet i stap gutpela eksampel. Long sampela rot, baptais bilong em i no wankain long baptais bilong ol disaipel bilong em. (Lukim blok “ Baptais Bilong Jisas na Baptais Bilong Ol Disaipel Bilong Em—Hau Ol i No Wankain.”) Tasol long ol narapela rot, baptais bilong ol i wankain. Taim Jisas i kisim baptais, em i givim em yet long mekim laik bilong Papa bilong em. (Hib. 10:7) Olsem tasol, taim ol disaipel bilong Krais i kisim baptais, ol i soim klia olsem ol i dediketim ol yet long God Jehova. Nau nambawan samting long laip bilong ol em long mekim laik bilong God, na i no laik bilong ol yet. Olsem na ol i bihainim eksampel bilong Bikman bilong ol.

10. Bilong wanem pasin bilong yu long laikim Jisas i mas kirapim yu long kisim baptais?

¹⁰ Yu bilip olsem Jisas em i dispela Pikinini God i laikim tumas na em King em God i makim bilong bosim yumi. Yu save olsem Jisas i gat pasin daun, na oltaim em i save bihainim pasin bilong Papa bilong em. Yu bin kisim save olsem em i givim kaikai long ol man i stap hangre, mekim gut bel bilong ol man i bel hevi, na tu, em i oraitim ol sikman. (Mat. 14:14-21) Yu luksave long hau em i stiaim kongrigesen bilong em long nau. (Mat. 23:10) Na yu save olsem em bai mekim planti gutpela samting moa taim em i stap King bilong Kingdom Bilong God. Olsem wanem yu ken soim olsem yu laikim em? Taim yu bihainim pasin bilong em. (Jon 14:21) Yu ken mekim olsem long rot bilong dediketim laip bilong yu long Jehova na kisim baptais.

11. Wanem nambawan risen na yu mas kisim baptais, na bilong wanem?

¹¹ Wanem nambawan risen na yu mas kisim baptais? Jisas i kamapim klia nambawan lo bilong God taim em i tok: “Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu, na long strong olgeta bilong yu.” (Mak 12:30) Olsem wanem? Ol dispela tok i kamapim klia pasin bilong yu long laikim God?

12. Wai na yu laikim Jehova? (Lukim tu piksa.)

¹² I gat planti risen na yu laikim Jehova. Olsem, yu kisim save na yu kliagut olsem em i “as bilong laip” na em i Man bilong givim “olgeta gutpela presen na olgeta presen i nambawan tru.” (Sng. 36:9; Jems 1:17) Olgeta gutpela samting yu kisim, ol i kam long gutpela God bilong yu.

13. Wai na pe bilong baim bek man em i naispela presen tru?

¹³ Pe bilong baim bek man em i naispela presen tru em Jehova i bin givim long yumi. Wai na yumi tok olsem? Tingim pasin pren i stap namel long Jehova na Pikinini bilong em. Jisas i tok: “Papa i laikim mi” na “mi laikim Papa.” (Jon 10:17; 14:31) Pasin pren i stap namel long tupela i kamap strong moa insait long planti bilion yia. (Prov. 8:22, 23, 30) Tingim bikpela bel hevi tru em God i bin pilim taim em i larim Pikinini bilong em i karim pen na hevi na i dai. Jehova i laikim tru olgeta manmeri—em i laikim yu tu—olsem na em i redi long givim Pikinini em i laikim tumas olsem ofa na bai yu na ol narapela i ken stap laip oltaim. (Jon 3:16; Gal. 2:20) Dispela em nambawan risen na yumi mas laikim God.

14. Wanem gutpela samting yu ken mekim long laip bilong yu?

¹⁴ Taim yu kisim save moa long Jehova, pasin bilong yu long laikim em i wok long kamap  strong moa. Dispela i mekim na yu laik stap gutpela pren bilong em long nau na inap oltaim bihain. Na yu ken mekim olsem. Em i kirapim yu long mekim bel bilong em i amamas. (Prov. 23:15, 16) Yu ken mekim olsem long rot bilong pasin bilong yu na toktok bilong yu. Ol pasin yu bihainim long i stap bilong yu bai soim klia olsem yu laikim tru Jehova. (1 Jon 5:3) Dispela em gutpela samting yu ken mekim long laip bilong yu.

15. Olsem wanem yu ken soim olsem yu laikim Jehova?

¹⁵ Olsem wanem yu ken soim olsem yu laikim Jehova? Pastaim, yu ken mekim wanpela spesel beten na dediketim yu yet i go long God tru. (Sng. 40:8) Na bihain, yu kamapim klia dispela dediket long rot bilong kisim baptais. Olsem yumi stori pinis long dispela atikol, baptais bilong yu em i bikpela samting tru long laip bilong yu na yu amamas tru long en. Dispela em kirap bilong nupela laip bilong yu, em long bihainim laik bilong Jehova na i no laik bilong yu yet. (Rom 14:8; 1 Pita 4:1, 2) Dispela em wanpela bikpela disisen yu mekim long laip bilong yu. Na em i opim rot long yu inap i gat gutpela laip tru. Bilong wanem yumi tok olsem?   

16. Olsem Buk Song 41:12 i kamapim, Jehova bai mekim wanem bilong blesim ol manmeri i givim laip bilong ol yet long mekim wok bilong em?

¹⁶ Jehova em Man bilong redi long givim ol samting long yumi. Maski yu givim wanem samting long em, oltaim em bai givim yu planti samting moa. (Mak 10:29, 30) Em bai givim yu gutpela laip tru we bai mekim yu stap amamas, na em i ken givim yu dispela laip long nau tu. Na dispela em kirap tasol bilong en. Taim yu kisim baptais, yu kirap long mekim wok bilong Jehova. Na yu ken mekim yet wok bilong gutpela Papa bilong yu inap oltaim oltaim. Pasin laikim namel long yu na Papa bilong yu bai wok yet long kamap strong na yu bai stap oltaim oltaim, wankain olsem God i save stap oltaim oltaim.​—Ritim Buk Song 41:12.

17. Yu ken givim wanem samting long Jehova we em i no gat?

¹⁷ Taim yu dediket na kisim baptais, rot i op long yu ken givim wanpela samting i dia tumas long Papa bilong yu. Em i bin givim yu olgeta gutpela samting na pasin bilong belgut na amamas.  Long bekim ol gutpela pasin bilong Papa bilong heven na graun, yu ken givim em wanpela samting em i no gat—em pasin bilong yu long redi long givim bel tru long wok bilong em. (Jop 1:8; 41:11; Prov. 27:11) Dispela em nambawan gutpela rot tru long yusim laip bilong yu! Tru tumas, pasin bilong yu long laikim Jehova em nambawan gutpela risen long yu kisim baptais.

18. Yu inap givim wanem ol askim long yu yet?

¹⁸ Hau bai yu bekim dispela askim, Yu bai kisim baptais? Yu tasol i ken bekim dispela askim. Tasol i gutpela yu ken askim yu yet olsem, ‘Wai na mi wet?’ (Apo. 8:36) Tingim 3-pela samting yumi stori pinis long en. Namba 1, yu laikim tok i tru na stretpela pasin. Askim yu yet, ‘Mi laik lukim dispela de we olgeta manmeri bai laikim tok i tru na bihainim stretpela pasin?’ Namba 2, yu laikim Jisas Krais. Askim yu yet, ‘Mi laik bai Pikinini Bilong God i stap King bilong mi, na mi laik bihainim pasin bilong em?’ Namba 3, bikpela samting moa em yu laikim Jehova. Askim yu yet, ‘Mi laik mekim bel bilong Jehova i amamas long rot bilong mekim wok bilong em?’ Sapos yu bekim olsem yes, orait wai na yu no kisim baptais? Wai na yu wet?​—Apo. 16:33.

19. Wai na yu no ken surik long kisim baptais? Stori long dispela. (Jon 4:34)

¹⁹ Sapos yu surik long kisim baptais, orait tingim wanpela tok piksa em Jisas i bin mekim. (Ritim Jon 4:34.) Jisas i tok bilong mekim laik bilong Papa bilong em, dispela i wankain olsem kaikai. Bilong wanem? Long wanem, kaikai em i gutpela samting bilong helpim yumi. Jisas i save olsem olgeta samting Jehova i tokim yumi long mekim ol i gutpela bilong helpim yumi. Jehova i no laik yumi mekim wanpela samting we inap nogutim yumi. Yu ting Jehova i laik bai yu kisim baptais? Yes. (Apo. 2:38) Olsem na yu ken save tru olsem taim yu bihainim dispela tok bilong kisim baptais, em bai helpim yu. Sapos yu no surik long kaikai wanpela naispela kaikai, orait wai na yu surik long kisim baptais?

20. Yumi bai stori long wanem samting long neks atikol?

²⁰ Wai na yu wet? Planti inap bekim dispela askim olsem, “Mi no redi.” Disisen yu mekim long dediketim yu yet long Jehova na kisim baptais em nambawan bikpela disisen yu inap mekim. Olsem na yu mas lusim sampela haptaim, tingting gut, na wok strong long redim yu yet. Tasol sapos yu gat laik long mekim dispela disisen, orait yu ken mekim wanem nau bilong redim yu yet? Yumi bai kisim bekim bilong dispela askim long neks atikol.