1. Ol papamama i laik helpim ol pikinini bilong ol long mekim wanem?

 OL PAPAMAMA, mipela i save olsem yu laik helpim ol pikinini bilong yu long kisim save long Jehova na laikim em. Tasol yumi no inap lukim God. So hau yupela i ken helpim ol pikinini bilong yupela long tingim God olsem wanpela Man i stap tru na go klostu long em?​—Jems 4:8.

2. Olsem wanem ol papamama i ken skulim ol pikinini bilong ol long ol pasin bilong Jehova?

² Wanpela nambawan rot bilong helpim ol pikinini long go klostu long Jehova em long stadi long Baibel wantaim ol. (2 Tim. 3:14-17) Tasol Baibel i stori long narapela rot tu we ol yangpela i ken kisim save long Jehova. Long Buk Provep, wanpela papa i kirapim pikinini bilong em long no ken lusim tingting long ol pasin bilong Jehova i stap ples klia long ol samting Em i wokim. (Prov. 3:19-21) Yumi bai stori long sampela rot we ol papamama i ken yusim kriesen long helpim ol pikinini bilong ol long kisim save long ol pasin bilong Jehova.

3. Ol papamama i ken givim wanem helpim long ol pikinini bilong ol?

³ Baibel i tok olsem “ol man i lukim ol samting God i bin wokim na long dispela rot ol inap save long ol pasin bilong em i stap hait.” (Rom 1:20) Ol papamama, ating yupela i save amamas long lusim haptaim ausait long haus wantaim ol liklik pikinini bilong yupela. Yupela i ken yusim dispela haptaim long helpim ol pikinini bilong yupela long lukim ol naispela pasin bilong Jehova long rot bilong “ol samting God i bin wokim.” Bilong mekim olsem, yumi ken stori long wanem skul ol papamama i ken kisim long pasin bilong Jisas long skulim ol man.

4. Olsem wanem Jisas i yusim kriesen long skulim ol disaipel bilong em? (Luk 12:24, 27-30)

 ⁴ Lukim hau Jisas i yusim kriesen long skulim ol manmeri. Wanpela taim Jisas i tokim ol disaipel bilong em long lukim gut ol pisin kotkot na ol plaua lili. (Ritim Luk 12:24, 27-30.) Jisas inap stori long narapela animal o plaua samting, tasol em i stori long pisin na plaua em ol disaipel bilong em i save gut tru long en. Ating ol disaipel i lukim ol kotkot i flai antap na ating ol i lukim ol plaua namel long ol gras. Yu inap piksaim long tingting olsem Jisas i wok long poinim ol dispela samting taim em i toktok? Na em i mekim wanem bihain long em i stori long ol dispela samting? Em i skulim ol disaipel bilong em long wanpela bikpela lesen tru olsem Papa bilong ol long heven i save mekim gutpela pasin na redi long givim ol samting. Jehova bai givim kaikai na klos samting long ol gutpela wokman bilong em, wankain olsem em i mekim long ol kotkot na ol plaua long bus.

5. Ol papamama i ken yusim wanem samting long kriesen bilong skulim ol pikinini bilong ol long Jehova?

⁵ Ol papamama, olsem wanem yu ken bihainim pasin bilong Jisas taim yu skulim ol pikinini bilong yu? Ating yu inap stori long pikinini long wanpela samting Jehova i wokim em yu laikim tru, olsem wanpela animal o diwai o plaua samting. Taim yu mekim olsem, stori long hau dispela samting i skulim yu long wanpela pasin bilong Jehova. Bihain yu ken askim pikinini long wanem feiveret animal o plaua samting bilong em. Sapos yu stori long wanpela samting long kriesen em yet i save laikim, em bai putim gut yau long yu taim yu stori long ol gutpela pasin bilong Jehova.

6. Yumi ken kisim wanem skul long pasin bilong mama bilong Christopher?

⁶ Yu ting papamama i mas lusim bikpela haptaim long mekim wok painimaut long wanpela animal o plaua samting paslain long ol i stori long hau dispela samting i kamapim klia ol pasin bilong Jehova? I no gat wok long mekim olsem. Jisas i no mekim longpela stori long hau ol kotkot i save kaikai o hau ol plaua lili i save gro, nogat. Ating wan wan taim, pikinini i laik kisim save long olgeta liklik samting bilong kriesen, tasol sampela taim wanpela stori o wanpela askim tasol inap helpim pikinini long kliagut long ol bikpela poin. Tingim samting em wanpela brata nem bilong em Christopher i tingim taim em i liklik, em i tok: “Mama bilong mipela i save mekim sotpela stori tasol bilong helpim mipela long laikim ol samting God i wokim. Olsem, taim mipela i sanap klostu long ol maunten, em i save tok: ‘Lukim ol dispela maunten, ol i traipela na ol i luk nais tru! Jehova em i narakain tru, a?’ O taim mipela i stap klostu long solwara, em i save tok: ‘Lukim strong bilong ol dispela weiv! God i gat bikpela strong tru, a?’” Christopher i tok: “Ol dispela sotpela tok bilong kirapim tru tingting, ol i bin helpim mipela tru.”

7. Olsem wanem yu ken skulim pikinini bilong yu long tingim ol samting God i wokim?

⁷ Taim pikinini bilong yu i wok long kamap bikpela, yu ken skulim em long tingim gut ol samting Jehova i wokim na lain long ol pasin bilong em. Yu ken stori long wanpela samting God i wokim, na askim pikinini bilong yu olsem, “Dispela samting i skulim yu long wanem pasin bilong Jehova?” Yu bai kirap nogut long tingting ol i gat long dispela samting.​—Mat. 21:16.

8. Ol papamama Israel i gat rot long mekim wanem taim ol i “wokabaut long rot”?

⁸ God i tokim ol papamama Israel long skulim ol pikinini bilong ol long ol lo bilong Jehova taim ol i “wokabaut long rot.” (Lo 11:19) I gat ol rot long ol kantri sait bilong Israel. Long ol dispela rot, ol inap lukim kain kain ol animal, ol pisin, na ol plaua samting. Taim ol famili Israel i wokabaut long ol rot, ol papamama inap skulim  ol pikinini bilong ol long ol samting Jehova i wokim. Yupela ol papamama long nau tu i gat rot long yusim kriesen long skulim ol pikinini bilong yupela. Yumi ken stori long hau sampela papamama i bin mekim olsem.

9. Yu inap kisim wanem skul long Punitha na Katya?

⁹ Wanpela mama nem bilong em Punitha, em i save stap long wanpela biktaun long India, em i tok: “Taim mipela i go visitim famili bilong mipela long kantri sait, mipela i save tingim dispela olsem rot bilong helpim ol pikinini bilong mipela long kisim save long ol gutpela samting Jehova i wokim. Mi pilim olsem ol pikinini bilong mi i lain gut moa long kriesen taim ol i stap longwe long strit i gat planti manmeri na planti trafik.” Ol papamama, ol pikinini bilong yu i no inap lusim tingting long haptaim yu lusim long stap wantaim ol long wanpela naispela ples. Wanpela sista long Moldova, nem bilong em Katya, em i tok: “Ol gutpela memori bilong mi taim mi liklik em haptaim mi spendim wantaim papamama long kantri sait. Mi tenkyu tru olsem taim mi liklik yet, ol i bin skulim mi long stop na lukim gut ol samting Jehova i wokim, na long dispela rot mi ken kisim save long em.”

10. Ol papamama i ken mekim wanem sapos ol i pilim hatwok long lusim biktaun na raun i go long kantri sait? (Lukim blok “ Helpim Bilong Ol Papamama.”)

¹⁰ Olsem wanem sapos i no gat rot long yupela i go long kantri sait? Amol, em i save stap tu long India, em i tok: “Hap mi stap long en, ol papamama i save wok inap planti aua, na ol i mas tromoi planti mani sapos ol i laik raun i go long kantri sait. Tasol wanpela liklik pak o veranda antap long haus i ken stap olsem ples bilong lukim ol samting God i wokim na toktok long ol gutpela pasin bilong Jehova.” Taim yu lukim gut ol samting, yu bai luksave olsem i gat planti kriesen klostu long haus bilong yu we yu ken yusim bilong skulim ol pikinini. (Sng. 104:24) Yu bai lukim ol pisin, ol binatang, ol diwai na plaua na planti narapela samting. Karina bilong Jemani, em i tok: “Mama bilong mi i save laikim ol plaua,  olsem na taim mi liklik meri, em i save soim mi long ol naispela plaua taim mi wokabaut wantaim em.” Ol papamama, yupela i ken yusim planti vidio na ol pablikesen long kriesen em oganaisesen bilong yumi i bin redim bilong skulim ol pikinini bilong yupela. Maski yupela i gat wanem kain sindaun, yupela i ken helpim ol pikinini bilong yupela long lukim ol samting God i wokim. Nau yumi ken stori long sampela pasin bilong Jehova em yupela i ken skulim ol pikinini bilong yupela long en.

11. Olsem wanem ol papamama i ken helpim ol pikinini bilong ol long lukim pasin laikim bilong Jehova?

¹¹ Bilong helpim ol pikinini bilong yu long lukim pasin laikim bilong Jehova, yupela i ken stori long hau ol animal i save lukautim gut ol pikinini bilong ol. (Mat. 23:37) Yu ken stori tu long kain kain ol naispela samting em yumi enjoim long kriesen. Karina em yumi kamapim tok bilong em pinis, em i tok: “Taim mitupela mama bilong mi i wokabaut, em i save kirapim mi long stop na lukim gut hau olgeta wan wan plaua i narapela kain na hau naispela lukluk bilong ol i kamapim klia pasin laikim bilong Jehova. Maski planti yia i lus, mi save lukluk gut yet long ol plaua—ol i narapela narapela kain, naispela disain na kala bilong ol. Ol i wok yet long kirapim mi long tingim pasin bilong Jehova long laikim tru yumi.”

12. Olsem wanem ol papamama i ken helpim ol pikinini bilong ol long lukim savetingting bilong God? (Buk Song 139:14) (Lukim tu piksa.)

¹² Helpim ol pikinini bilong yu long lukim savetingting bilong God. Jehova i gat bikpela savetingting tru winim bilong yumi ol man. (Rom 11:33) Olsem, yu ken tokim pikinini bilong yu long hau wara i save kamapim ol klaut na hau klaut i save lusim wanpela ples na i go long narapela ples na i no gat hatwok bilong en. (Jop 38:36, 37) Yu ken stori tu long hau God i wokim bodi bilong yumi ol man i narakain tru. (Ritim Buk Song 139:14.) Lukim samting em wanpela papa nem bilong em Vladimir i mekim. Em i tok: “Wanpela taim pikinini man bilong mipela i pundaun long baisikol bilong em na em i kisim bagarap. Sampela de bihain, sua bilong em i drai. Mitupela meri bilong mi i stori long em olsem Jehova i wokim ol sel long bodi bilong yumi we i save stretim em yet. Mipela i tokim em olsem yumi no save lukim kain samting i kamap long ol samting ol man i wokim. Olsem, wanpela kar i no  save stretim em yet bihain long eksiden. Dispela ekspiriens i helpim pikinini man bilong mipela long kliagut long savetingting bilong Jehova.”

13. Olsem wanem ol papamama i ken helpim ol pikinini bilong ol long lukim strong bilong God? (Aisaia 40:26)

¹³ Jehova i kirapim yumi long apim ai bilong yumi na lukluk i go antap long skai na tingim hau bikpela strong bilong em i holim yunives i stap long ples bilong en. (Ritim Aisaia 40:26.) Yu ken kirapim ol pikinini bilong yu long lukluk i go antap long skai na tingim ol samting ol i lukim. Wanpela sista long Taiwan i tingim ol samting i kamap taim em i liklik, na em i tok: “Wanpela taim mama i kisim mi na mitupela i go wokim kem, na mitupela i lukim planti sta tru long skai long nait bikos i no gat ol lait bilong siti. Long dispela taim, mi wok long wari long presa bilong ol wanlain i laik pulim mi na mi wok long tingting bai mi stap gut yet long Jehova na mekim wok bilong em o nogat. Mama i kirapim mi long tingim bikpela strong Jehova i yusim bilong wokim ol dispela sta, na long tingim hau em i ken yusim dispela strong long helpim mi long karim wanem ol hevi i painim mi. Bihain long mi lukim ol samting God i wokim long dispela raun bilong mitupela, dispela i kirapim mi long save gut moa long Jehova na i strongim tingting bilong mi long mekim wok bilong em.”

14. Olsem wanem ol papamama i ken yusim kriesen bilong helpim ol pikinini bilong ol long tingim Jehova olsem God bilong amamas?

¹⁴ Ol samting Jehova i wokim i soim klia olsem em i God bilong amamas na em i laik yumi tu i stap amamas. Ol saientis i kisim save olsem planti animal i save pilai, dispela i makim tu ol pisin na ol pis. (Jop 40:20) Yu bin lukim ol pikinini bilong yu i lap taim ol i lukim ol animal i pilai? Ating ol i bin lukim ol bebi pusi i ron bihainim wanpela rop o ating ol i lukim ol bebi dok i pilai wantaim. Neks taim yu lukim ol pikinini bilong yu i lap taim ol i lukim animal i pilai, i gutpela long kirapim ol long tingim olsem yumi lotuim God bilong amamas.​—1 Tim. 1:11.

15. Wanem samting i ken helpim ol papamama long kirapim ol pikinini long kamapim tingting bilong ol? (Provep 20:5) (Lukim tu piksa.)

¹⁵ Sampela taim, ol papamama i save pilim hatwok long kirapim ol pikinini long stori long ol  hevi i painim ol. Sapos yu tu i pilim olsem, i gutpela long mekim ol tok we bai kirapim pikinini long kamapim tingting bilong ol. (Ritim Provep 20:5.) Sampela papamama i pilim isi long mekim olsem taim ol i lusim haptaim wantaim ol pikinini long enjoim kriesen. Bilong wanem? Wanpela risen em bikos i no gat planti samting bilong pulim nabaut tingting bilong ol pikinini na bilong ol papamama. Wanpela papa long Taiwan, nem bilong em Masahiko i stori long narapela risen olsem: “Taim mitupela meri bilong mi i lusim haptaim long stap wantaim ol pikinini ausait long haus, olsem kalapim maunten o wokabaut long nambis, ol i save pilim amamas na bel i stap isi. Dispela i mekim na em i isi long mipela i toktok wantaim ol na lain long wanem samting i stap long tingting bilong ol.” Katya, em mipela i kamapim pinis tok bilong em, em i tok: “Taim mi pinis skul, planti taim mama i save kisim mi go long wanpela naispela pak. Long kain naispela hap we mi pilim bel isi, em isi moa long mi tokim mama long wanem samting i kamap long skul o ol samting mi tingting planti long en.”

16. Olsem wanem ol famili i ken stap bel isi na amamas taim ol i enjoim kriesen bilong Jehova?

¹⁶ Ol samting Jehova i wokim i givim rot long ol famili long stap bel isi na amamas, na dispela i ken strongim pasin bilong ol long pas gut wantaim. Baibel i tok olsem i gat “taim bilong lap” na “taim bilong skip nabaut.” (Ekl. 3:1, 4, ftn.) Jehova i bin wokim ol naispela ples long graun we yumi ken amamas long mekim ol samting yumi laikim. Planti famili i save amamas long raun wantaim long ol pak, go long kantri sait, kalapim ol maunten, o raun long nambis. Sampela pikinini i save amamas long ran na pilai long pak, lukim ol animal, o go swim long wara, raun wara, o solwara. I gat planti gutpela rot long yumi kisim amamas taim yumi raun na lukim ol samting Jehova i wokim!

17. Wai na ol papamama i mas helpim ol pikinini bilong ol long enjoim kriesen bilong God?

¹⁷ Long nupela taim God i kamapim, ol papamama na ol pikinini bai amamas tru long enjoim ol samting Jehova i wokim, winim olgeta taim bipo. Long dispela taim, yumi no inap pret moa long ol animal na ol i no inap pret long yumi. (Ais. 11:6-9) Yumi bai i gat bikpela haptaim tru bilong enjoim ol samting Jehova i bin wokim. (Sng. 22:26) Tasol ol papamama, yupela i no ken wet inap long dispela taim bilong helpim ol pikinini long enjoim kriesen. Taim yu yusim kriesen long skulim ol pikinini bilong yu long Jehova, ol bai mekim wankain tok olsem King Devit i bin mekim olsem: “O Jehova, . . . i no gat wanpela inap mekim ol wok olsem bilong yu.”​—Sng. 86:8.