1-2. Bihain long wanpela i kisim baptais, olsem wanem laip bilong em i kamap gutpela moa?

 YUMI amamas taim yumi kisim baptais na kam insait long famili bilong Jehova. Ol lain i dediket na kisim baptais ol i wanbel long tok bilong Devit, em man bilong raitim song, em i tok: “Man yu [Jehova] makim na singautim long i kam klostu long yu, em i ken amamas long i stap long haus bilong yu.”—Sng. 65:4.

² Jehova i save bringim wanem kain ol manmeri i kam insait long haus bilong em? Olsem yumi stori long atikol i go pinis, em i save makim olsem em bai go klostu long ol man em ol i soim olsem ol i laik kamap pren bilong em. (Jems 4:8) Taim yu dediketim yu yet long Jehova na kisim baptais, yu go klostu long Jehova long wanpela spesel wei. Yu ken save tru olsem bihain long dispela, em bai “kapsaitim planti gutpela samting long [yu] inap long [yu] no sot long wanpela samting.”—Mal. 3:10; Jer. 17:​7, 8. 

3. Ol Kristen em ol i dediket na baptais pinis, ol i gat wanem bikpela wok? (Eklisiastis 5:​4, 5)

³ Baptais em kirap tasol bilong laip bilong yu olsem wanpela Kristen. Bihain long yu kisim baptais, yu mas wok strong long truim tok promis yu mekim taim yu dediket, na tu, long taim ol hevi i kamap na i traim bilip bilong yu. (Ritim Eklisiastis 5:​4, 5.) Olsem wanpela disaipel bilong Jisas, yu mas bihainim gut eksampel bilong Jisas na ol tok bilong em. (Mat. 28:​19, 20; 1 Pita 2:21) Dispela atikol bai helpim yu long mekim olsem.

‘BIHAINIM JISAS OLTAIM’ MASKI I GAT OL HEVI NA OL TRAIM

4. Long wanem rot ol disaipel bilong Jisas i karim “diwai pos”? (Luk 9:23)

⁴ Bihain long yu baptais, yu bai bungim ol hevi. Jisas i kamapim klia olsem ol disaipel bilong em bai karim “diwai pos.” Na ol  bai mekim olsem “long olgeta de.” (Ritim Luk 9:23.) Yu ting tok bilong Jisas i makim olsem oltaim ol disaipel bilong em bai karim pen na hevi? Nogat. Em i kamapim klia olsem ol bai kisim ol blesing, tasol ol bai karim ol hevi tu. Sampela bilong ol dispela hevi bai givim bikpela hatwok tru long ol.—2 Tim. 3:12.

5. Ol lain i lusim sampela samting bilong ol yet long mekim laik bilong God, Jisas i promis olsem ol bai kisim wanem ol blesing?

⁵ Ating ol wanfamili i birua long yu, o yu lusim mani kago o wok mani samting na bai yu ken putim wok bilong Kingdom i stap nambawan samting long laip bilong yu. (Mat. 6:33) Sapos yu bin mekim olsem, orait yu ken save tru olsem Jehova i luksave long ol gutpela wok yu mekim. (Hib. 6:10) Ating dispela tok bilong Jisas i bin kamap tru long yu, em i tok: “Olgeta man i ting long mi na long gutnius na i lusim haus o ol brata o ol susa o mama o papa o ol pikinini o ol gaden, ol bai kisim 100 taim moa long dispela taim, bai ol i kisim ol haus, ol brata, ol susa, ol mama, ol pikinini, na ol gaden. Na tu, ol man bai mekim nogut long ol. Na ol bai kisim laip oltaim long taim i kamap bihain.” (Mak 10:​29, 30) Tru tumas, ol blesing yu kisim ol i bikpela moa winim ol samting yu bin lusim.—Sng. 37:4.

6. Wai na yu mas wok yet long daunim “laik nogut bilong bel” bihain long yu kisim baptais?

⁶ Yu mas wok yet long daunim “laik nogut bilong bel” bihain long yu kisim baptais. (1 Jon 2:16) As na yumi mekim olsem bikos yumi tumbuna pikinini bilong Adam na yumi gat sin. Sampela taim yu inap pilim wankain olsem aposel Pol. Em i tok: “Long bel bilong mi, mi amamas long lo bilong God. Tasol mi lukim olsem narapela lo i stap insait long bodi bilong mi. Na dispela lo i save pait wantaim lo i stap long tingting bilong mi. Na dispela lo bilong sin i wok long kalabusim mi.” (Rom 7:​22, 23) Yu inap bel hevi bikos yu wok strong long daunim ol laik nogut bilong yu. Maski i olsem, taim yu tingim tok promis yu bin mekim long Jehova taim yu dediket long em, dispela bai strongim tingting bilong yu long wok strong long daunim ol laik nogut bilong bel. Dispela tok promis bilong dediket bai helpim yu long sanap strong taim ol traim i painim yu. Hau yu ken mekim olsem?

7. Taim yu dediket long Jehova, olsem wanem dispela bai helpim yu long stap gut yet long em?

⁷ Taim yu dediket long Jehova, yu givim baksait long ol laik bilong yu yet. Dispela i makim olsem yu tok nogat long ol laik bilong yu yet na ol samting yu gat laik long mekim we inap mekim Jehova i bel hevi. (Mat. 16:24) So taim yu bungim wanpela traim, yu no inap i gat tupela tingting long wanem samting yu bai mekim. Yu save pinis long wanpela samting tasol yu bai mekim, em long stap gut long Jehova. Yu bai tingting strong yet long amamasim Jehova. Long dispela rot, yu bihainim pasin bilong Jop. Maski em i bungim ol bikpela hevi tru, em i holim wanpela tingting tasol na em i tok: “Mi no inap lusim pasin bilong mi long i stap gut long God!”—Jop 27:5.

8. Taim yu tingim beten bilong dediket yu bin mekim, olsem wanem dispela inap helpim yu long sakim traim?

⁸ Taim yu tingim beten bilong dediket yu bin mekim long Jehova, dispela bai strongim yu long sakim olgeta kain traim. Olsem, yu ting yu bai tok gris wantaim poroman marit bilong narapela? Nogat tru! Yu tok nogat pinis long mekim kain pasin olsem. Sapos yu no larim ol laik nogut i kamap long bel bilong yu, orait bihain yu bai i no gat wok long rausim ol dispela laik nogut. Yu bai “tanim baksait” long “rot bilong ol man nogut.”—Prov. 4:​14, 15.

9. Taim yu tingim beten bilong dediket yu bin mekim, olsem wanem dispela inap helpim yu long putim ol wok lotu i stap nambawan samting?

⁹ Olsem wanem sapos rot i op long yu kisim  wanpela wok mani we inap pasim yu long go oltaim long ol miting Kristen? Yu no inap holim tupela tingting long samting yu bai mekim. Paslain long ol i givim yu dispela wok, yu save pinis olsem yu no inap kisim kain wok olsem. So yu no inap tingting long kisim dispela wok na long wankain taim traim long putim laik bilong Jehova i stap nambawan. Taim yu tingim pasin bilong Jisas long tingting strong long amamasim Papa bilong em, dispela bai helpim yu long sanap strong na hariap long sakim ol samting we i no amamasim God yu bin dediket long em.—Mat. 4:10; Jon 8:29.

10. Bihain long yu baptais, olsem wanem Jehova bai helpim yu long ‘bihainim Jisas oltaim’?

¹⁰ Ol traim na ol hevi i painim yu i opim rot long yu inap soim olsem yu tingting strong long ‘bihainim Jisas oltaim.’ Taim yu mekim olsem, yu ken save tru olsem Jehova bai helpim yu. Baibel i tok: “God i save bihainim ol tok bilong em, na em i no inap larim wanpela traim i kamap long yupela i winim strong bilong yupela, nogat. Taim traim i painim yupela, em bai wokim rot bilong helpim yupela na bai yupela i ken sanap strong na traim i no inap daunim yupela.”—1 Kor. 10:13.

ROT BILONG BIHAINIM JISAS OLTAIM

11. Wanem wanpela gutpela rot long bihainim Jisas oltaim? (Lukim tu piksa.)

¹¹ Jisas i givim bel olgeta long mekim wok bilong Jehova na em i pas gut wantaim em long rot bilong beten. (Luk 6:12) Wanpela gutpela rot we i ken helpim yu long bihainim Jisas oltaim bihain long yu baptais em long mekim yet ol samting bilong pas gut wantaim Jehova. Baibel i tok: “Yumi bin wok long kamap strong moa, olsem na yumi mas wokabaut stret yet long dispela wankain pasin.” (Fili. 3:16) Sampela taim, yu bai harim ekspiriens bilong ol bratasista em ol i mekim bikpela wok moa bilong  Jehova. Ating ol i go long Skul Bilong Ol Kingdom Evanselis o ol i muv i go long ol hap i sot long ol pablisa. Sapos yu inap putim kain mak olsem, orait mekim olsem. Lain bilong Jehova i laik tru long mekim bikpela wok moa bilong autim tok. (Apo. 16:9) Tasol olsem wanem sapos nau yet yu no inap long mekim olsem? No ken ting olsem ol narapela i mekim dispela wok, ol i winim yu, nogat. Bikpela samting em olsem, yu mas sanap strong na ran long dispela resis em ol Kristen i ran long en. (Mat. 10:22) Yu mas tingim olsem yu amamasim tru Jehova taim yu mekim ol samting inap long strong na sindaun bilong yu. Dispela em nambawan rot yu ken bihainim Jisas oltaim bihain long yu baptais.—Sng. 26:1.

12-13. Yu ken mekim wanem sapos yu no givim bel moa long mekim wok bilong God? (1 Korin 9:​16, 17) (Lukim tu blok “ Stap Yet Long Dispela Resis.”)

¹² Olsem wanem sapos bihain long sampela haptaim, yu pilim olsem yu wok long kolim nating ol tok long beten bilong yu o yu no givim bel moa long wok autim tok? Olsem wanem sapos yu pilim olsem yu no enjoim moa Baibel ritim bilong yu olsem long bipo? Sapos kain samting i painim yu bihain long yu kisim baptais, no ken kisim tingting olsem yu no gat holi spirit bilong Jehova. Yu no gutpela olgeta, olsem na ol samting yu pilim long bel inap senis senis. Sapos yu no givim bel moa long wok bilong God, orait tingim eksampel bilong aposel Pol. Maski em i wok strong long bihainim pasin bilong Jisas, em i save olsem sampela taim em i no inap i gat bikpela laik long mekim wok bilong God olsem long ol narapela taim. (Ritim 1 Korin 9:​16, 17.) Em i tok: “Maski sapos mi mekim taim mi no gat laik long mekim, mi holim yet dispela wok mi bin kisim.” Pol i tingting strong long inapim wok autim tok bilong em, maski sampela taim em i no gat laik long mekim olsem.

 ¹³ Wankain olsem, no ken larim ol samting yu pilim long bel i stiaim ol disisen bilong yu. Yu mas tingting strong olsem yu bai mekim samting i stret, maski yu no gat laik long mekim olsem. Sapos oltaim yu mekim samting i stret, orait isi isi ol samting yu pilim long bel inap senis. Tasol long nau yet, pasin bilong yu long mekim pesenel stadi, beten, go long ol miting, na autim tok, bai helpim yu long bihainim Jisas oltaim bihain long yu baptais. Taim yu givim bel long mekim olsem, dispela bai strongim tu ol wanbilip bilong yu.—1 Tes. 5:11.

“OLTAIM YUPELA I MAS SKELIM YUPELA YET . . . YUPELA I WANEM KAIN MAN”

14. Wai na oltaim yu mas skelim yu yet? (2 Korin 13:5)

¹⁴ Bihain long yu baptais, em i bikpela samting long oltaim yu mas skelim yu yet. (Ritim 2 Korin 13:5.) Sampela taim i gutpela long yu skelim gut laip bilong yu na ol pasin bilong yu na bai yu ken save sapos yu wok long beten oltaim, ritim na stadi long Baibel, go long ol miting, na insait long wok autim tok o nogat. Luksave long ol rot we yu inap mekim ol dispela hap bilong wok lotu bilong yu i kamap gutpela moa. Olsem, givim kain ol askim long yu yet olsem: ‘Mi inap eksplenim gut ol bikpela tok bilong Baibel long ol narapela? I gat sampela rot we mi ken mekim wok autim bilong mi i kamap gutpela moa? Taim mi beten mi save kolim stret ol samting mi pilim long bel, na ol i soim olsem mi trastim tru Jehova? Mi save go oltaim long ol miting Kristen? Mi ken mekim wanem bilong putim tingting olgeta na insait long ol hap bilong miting?’

15-16. Yu kisim wanem skul long ekspiriens bilong wanpela brata long pasin bilong sakim traim?

¹⁵ Em i bikpela samting tu long yu save long ol samting em yu no gat strong long sakim. Wanpela brata nem bilong em Robert, em i stori long ekspiriens bilong em we i kamapim klia dispela poin, em i tok: “Taim mi gat 20 krismas samting, mi mekim wanpela pat-taim wok. Wanpela taim bihain long wok, wanpela wanwok meri i singautim mi long i go long haus bilong em. Em i tok mitupela bai stap mipela yet na amamas wantaim. Pastaim, mi no strong tumas long sakim em na mi givim em sampela eskius, tasol bihain mi tok nogat na mi tokim em long risen na mi tok olsem.” Robert i sakim dispela traim, na i gutpela em i mekim olsem. Tasol bihain, em i tingim bek samting i bin kamap na em i luksave olsem em inap sakim dispela traim long rot i gutpela moa. Em i tok: “Mi no strong na mi no hariap long sakim dispela traim olsem Josep i bin sakim meri bilong Potifa. (Stt. 39:​7-9) Mi yet i kirap nogut olsem mi pilim hatwok long sakim dispela traim. Dispela  traim i helpim mi long luksave olsem mi gat wok long strongim pasin pren bilong mi wantaim Jehova.”

¹⁶ Gutpela samting inap kamap sapos yu skelim yu yet olsem Robert i bin mekim. Sapos yu bin sakim wanpela traim i painim yu, orait askim yu yet olsem, ‘Hamas haptaim i lus paslain long mi tok nogat?’ Sapos yu luksave olsem yu mas wok strong long stretim sampela samting, orait no ken bel hevi long yu yet. Em gutpela yu luksave long samting em yu no gat strong long sakim. Beten long dispela na mekim ol samting bilong strongim tingting bilong yu long bihainim ol stretpela lo bilong Jehova.—Sng. 139:​23, 24.

17. Olsem wanem ekspiriens bilong Robert i onarim nem bilong Jehova?

¹⁷ I gat sampela samting moa yumi inap lainim long stori bilong Robert. Em i tok moa: “Bihain long mi tok nogat long invatesen bilong dispela wanwok meri, em i tok, ‘Yu pasim tes!’ Mi askim em olsem tok bilong em i makim wanem. Em i tok wanpela pren bilong em, bipo em i wanpela Witnes, i tokim em olsem olgeta yangpela Witnes i gat pasin bilong tupela maus, na ol bai redi long lusim bilip bilong ol sapos ol i gat rot long inapim laik bilong ol yet. So dispela wanwok i tokim pren bilong em olsem em bai traim mi na lukim. Long dispela taim stret mi luksave olsem mi onarim nem bilong Jehova na mi amamas.”

18. Yu tingting strong long mekim wanem bihain long baptais? (Lukim tu blok “ Tupela Atikol Yu Bai Enjoim.”)

¹⁸ Taim yu dediketim yu yet long Jehova na kisim baptais, yu soim olsem yu laik mekim holi nem bilong em maski wanem samting i kamap. Na yu ken save tru olsem Jehova i save long ol hevi yu bungim na ol traim yu sakim. Em bai blesim hatwok bilong yu long stap gut yet long em. Yu ken bilip tru olsem long rot bilong holi spirit bilong em, em bai strongim yu long mekim olsem. (Luk 11:​11-13) Tru tumas, Jehova bai helpim yu long bihainim Jisas oltaim bihain long yu baptais.