God i ken fogivim ol sin bilong yumi long wanpela rot tasol, em long rot bilong blut bilong Jisas em i givim olsem ofa bilong baim bek yumi. (Efe. 1:7) Tasol Baibel i tok: “[God] i bin lusim sin ol man i bin mekim long bipo, long taim em i isi long ol man,” em ol haptaim paslain long Jisas i givim pe bilong baim bek man. (Rom 3:25) Olsem wanem Jehova i ken mekim olsem, na long wankain taim em i holimpas yet ol lo bilong stretpela pasin?

Long ai bilong Jehova, i olsem em i givim pinis pe bilong baim bek man long dispela taim stret em i tokaut long wanpela “pikinini” husat bai kisim bek ol manmeri i bilip. (Stt. 3:15; 22:18) God i save tru olsem long taim stret bilong en, Pikinini em i laikim tumas bai givim pe bilong baim bek man. (Gal. 4:4; Hib. 10:​7-10) Taim Jisas i stap long graun olsem mausman bilong God, em i gat namba long fogivim ol sin bilong ol manmeri paslain long em i givim ofa bilong baim bek ol manmeri. Jisas i fogivim ol manmeri bikos em i save olsem ofa em i givim bihain bai karamapim ol sin bilong ol manmeri husat i bilip.—Mat. 9:​2-6.