1. Wanem sampela blesing yumi kisim taim yumi stap insait long oganaisesen bilong Jehova?

 YUMI kisim planti gutpela blesing taim yumi stap insait long oganaisesen bilong Jehova long dispela taim bilong las de we i gat planti hevi tru. Laip long dispela graun i go nogut olgeta, tasol Jehova i givim yumi ol bratasista em ol i stap bilong helpim yumi. (Sng. 133:1) Em i helpim yumi long pas gut wantaim famili bilong yumi. (Efe. 5:33–6:1) Na em i givim yumi save bilong kliagut long ol samting na savetingting yumi nidim bilong stap bel isi tru.

2. Yumi mas mekim wanem, na bilong wanem?

² Yumi mas wok strong long stap gut long Jehova na mekim yet wok bilong em. Bilong wanem? Long wanem, sampela taim pasin kranki bilong ol narapela inap bagarapim bel bilong yumi. Na tu, yumi inap pilim hatwok long karim ol hevi long ol pasin kranki bilong yumi yet, na moa yet sapos yumi mekim ol wankain popaia planti taim. Yumi mas mekim yet wok bilong Jehova (1) taim wanpela wanbilip i rongim yumi, (2) taim poroman marit i bagarapim bel bilong yumi, na (3) taim yumi bel hevi long yumi yet. Long dispela atikol, yumi bai stori long ol dispela samting. Na tu, yumi bai stori long skul yumi ken kisim long ol bilipman na meri long Baibel.

MEKIM YET WOK TAIM WANBILIP I RONGIM YU

3. Wanem wanpela hevi em lain bilong Jehova i save karim?

³ Hevi. Sampela wanbilip i gat ol pasin we i save sikirapim bel bilong yumi. Ol narapela inap bagarapim tru bel bilong yumi o mekim tok o pasin i no stret long yumi. Ol man i go pas long mekim ol wok insait long kongrigesen inap mekim ol popaia. Ol dispela samting inap kirapim sampela long holim tupela tingting olsem tru tru dispela em i oganaisesen bilong God, o nogat. Dispela inap mekim na ol i no stap “wanbel wantaim long mekim  wok” bilong God, na ating ol i no bung moa wantaim ol bratasista i rongim ol o ol i stop long go long ol miting. (Sef. 3:9) Yu ting em savetingting long mekim olsem? Lukim skul yumi ken kisim long wanpela man em Baibel i stori long em i bin bungim ol wankain hevi.

4. Aposel Pol i bungim wanem ol hevi?

⁴ Eksampel long Baibel. Aposel Pol i save olsem ol bratasista Kristen bilong em ol i no gutpela olgeta. Olsem, ol Kristen i bin gat tingting kranki long em bihain long em i kirap long bung wantaim kongrigesen. (Apo. 9:26) Bihain sampela i tok baksait long em bilong bagarapim gutnem bilong em. (2 Kor. 10:10) Pol i lukim wanpela brata i holim wok insait long kongrigesen i mekim rong disisen we inap pundaunim ol narapela. (Gal. 2:​11, 12) Na wanpela gutpela pren bilong Pol em Mak, em i bin bagarapim tru bel bilong Pol. (Apo. 15:​37, 38) Pol inap larim ol dispela samting i pasim em long bung wantaim ol dispela man. Tasol nogat, em i holim stretpela tingting long ol bratasista bilong em na em i givim bel yet long mekim wok bilong Jehova. Wanem samting i helpim Pol long mekim yet wok bilong God?

5. Wanem samting i helpim Pol na em i no givap long ol bratasista bilong em? (Kolosi 3:​13, 14) (Lukim tu piksa.)

⁵ Pol i laikim ol bratasista bilong em. Pasin bilong Pol long laikim tru ol narapela i helpim em long tingim tasol ol gutpela pasin bilong ol, na em i no tingim ol pasin kranki bilong ol. Na tu, pasin laikim i kirapim Pol long mekim ol samting em yet i raitim olsem i stap long Kolosi 3:​13, 14. (Ritim.) Skelim hau em i bihainim dispela tok long pasin em i mekim long Mak. Maski Mak i lusim Pol long namba 1 misineri raun bilong em, Pol i no holim bel kros i stap longpela taim. Bihain taim Pol i raitim wanpela naispela pas i go long kongrigesen long Kolosi, em i tok amamas long Mak olsem em i wanpela gutpela wanwok husat i “stap olsem helpim bilong strongim” em. (Kol. 4:​10, 11) Taim Pol i stap kalabus long Rom, em i salim tok long Mak i mas kam bilong helpim em. (2 Tim. 4:11) I klia tru olsem Pol i no givap long ol brata Kristen bilong em. Yumi inap kisim wanem skul long Pol?

6-7. Olsem wanem yumi ken wok yet long laikim ol bratasista bilong yumi, maski ol i gat ol pasin kranki? (1 Jon 4:7)

⁶ Skul yumi kisim. Jehova i laik yumi mas wok yet long laikim ol bratasista bilong yumi. (Ritim 1 Jon 4:7.) Sapos sampela bratasista i no mekim ol pasin Kristen, yumi ken ting olsem ol i gat laik long bihainim ol stiatok bilong Baibel, tasol ol i popaia na mekim pasin i no stret. (Prov. 12:18) God i laikim ol gutpela wokman bilong em, maski ol i save mekim ol popaia. Em i no save lusim yumi i go longwe o belhat yet  long yumi taim yumi mekim ol popaia. (Sng. 103:9) Olsem na em i bikpela samting long yumi mas bihainim pasin bilong Papa bilong yumi long fogivim ol narapela!—Efe. 4:32–5:1.

⁷ Yumi mas tingim olsem taim bilong pinis i kam klostu tru, olsem na yumi mas pas gut wantaim ol bratasista bilong yumi. Yumi ken save olsem pasin birua bai go bikpela moa. Na tu, ol man inap kalabusim yumi bikos long bilip bilong yumi. Sapos kain samting i kamap, yumi bai nidim tru ol bratasista bilong yumi winim olgeta taim bipo. (Prov. 17:17) Skelim samting i kamap long Josep, a em wanpela elda long Spen. Ol i kalabusim em na ol narapela brata bikos long pasin bilong ol long stap niutrol. Em i tok: “Long kalabus, em i isi long wanpela wanbilip i sikirapim bel bilong narapela wanbilip bikos mipela i stap wantaim long wanpela hap tasol. Mipela i mas wok yet long karim hevi ol narapela i putim long mipela na amamas long fogivim ol. Dispela i helpim mipela long stap wanbel na lukautim gut narapela narapela. Mipela i stap namel long ol wankalabus em ol i no lotuim Jehova. Wanpela taim mi kisim bagarap na han bilong mi i bruk na ol i simenim, so mi no inap long mekim ol samting bilong lukautim mi yet. Tasol wanpela bilong ol brata i wasim klos bilong mi na lukautim mi long ol samting mi nidim. Em i mekim gutpela pasin laikim long mi long taim mi nidim tru helpim.” Tru tumas, em as na nau yet yumi mas lain long stretim ol hevi namel long yumi na ol narapela!

MEKIM YET WOK TAIM POROMAN MARIT I BAGARAPIM BEL BILONG YU

8. Ol marit i save karim wanem hevi?

⁸ Hevi. Olgeta marit i gat hevi bilong ol. Baibel i tokaut klia olsem olgeta marit bai “karim pen na hevi long bodi bilong ol.” (1 Kor. 7:28) Bilong wanem? Long wanem, marit i save bungim tupela man na meri em ol i no gutpela olgeta, tupela i gat ol pasin bilong ol yet, ol samting ol i laikim, na ol samting ol i no laikim. Ating man na meri marit i bikpela long narapela narapela kalsa o bekgraun. Bihain long sampela haptaim, sampela pasin bilong ol inap stap ples klia, em ol pasin we i no bin stap ples klia paslain long weding. Ol dispela samting inap kamapim hevi. Ating ol i kirap long sutim tok long poroman marit, na ol i no luksave olsem ol yet i gat sampela pasin kranki em ol yet i mas wok long stretim. Ating ol inap tingting long seperet o divos bilong stretim dispela hevi. Tasol taim ol i seperet o divos, dispela bai stretim hevi bilong ol? b Yumi ken kisim skul long wanpela meri em Baibel i stori long em i stap gut long Jehova, maski marit bilong em i gat hatwok bilong en.

9. Abigel i karim wanem hevi?

⁹ Eksampel long Baibel. Abigel i maritim Nabal, em man Baibel i stori long em olsem em i save mekim hatpela pasin na pasin nogut. (1 Sml. 25:3) Ating em i hatwok tru long Abigel i stap wantaim kain man olsem. Yu ting rot i op long Abigel i ken lusim man bilong em? Yes, Abigel i gat rot long mekim olsem taim Devit—man bai kamap king bilong Israel bihain—i kam bilong kilim i dai Nabal bikos Nabal i bin toknogutim em na ol soldia bilong em. (1 Sml. 25:​9-13) Abigel inap ranawe na larim Devit i karimaut plen bilong em. Maski i olsem, Abigel i mekim samting na em i askim Devit long larim Nabal i stap laip. (1 Sml. 25:​23-27) Wanem samting i kirapim Abigel long mekim olsem?

10. Wanem samting i helpim Abigel long stap yet long marit i gat hatwok bilong en?

¹⁰ Abigel i laikim Jehova na rispektim lo bilong  em long marit. Em i save gut long tok God i bin mekim long Adam na Iv taim em i bin kamapim namba 1 marit. (Stt. 2:24) Abigel i save olsem Jehova i tingim marit olsem samting i holi. Em i laik amamasim God, na dispela i kirapim em long mekim olgeta samting bilong lukautim ol wanhaus bilong em na man bilong em tu. Em i hariap long mekim ol samting bilong pasim Devit long kilim i dai Nabal. Na em i redi tu long tok sori long wanpela rong em yet i no bin mekim. I klia tru olsem Jehova i laikim dispela meri i gat strongpela bel husat i save tingim gut ol narapela. Ol man na meri marit i ken kisim wanem skul long eksampel bilong Abigel?

11. (a) Jehova i laik bai ol marit manmeri i mekim wanem? (Efesus 5:33) (b) Yu kisim wanem skul long pasin Carmen i mekim bilong lukautim marit bilong em? (Lukim tu piksa.)

¹¹ Skul yumi kisim. Jehova i tok long ol marit man na meri i mas rispektim marit bilong ol, maski poroman marit i gat sampela pasin na i hatwok long stap wantaim em. God i save amamas tru long lukim ol marit i wok strong long stretim ol hevi bilong ol na ol i laikim tru na rispektim narapela narapela. (Ritim Efesus 5:33.) Tingim stori bilong Carmen. Inap 6-pela yia bihain long Carmen i marit, em i kirap long stadi wantaim ol Witnes Bilong Jehova na bihain em i kisim baptais. Carmen i tok: “Man bilong mi i no amamas long mi mekim olsem. Em i bel nogut long mi lusim bikpela haptaim long go long ol miting na mekim wok bilong Jehova. Em i save krosim mi na em i tok long lusim mi.” Maski i olsem, Carmen i stap gut yet long marit bilong em. Inap 50 yia, em i wok strong long mekim pasin laikim na pasin rispek insait long marit bilong em. Em i tok: “Insait long ol yia i go, mi lain long kliagut long tingting bilong man bilong mi na mi mekim ol tok long pasin rispek. Mi save olsem marit em i holi long ai bilong Jehova, olsem na mi wok strong long lukautim gut. Mi no givap long marit bilong mi bikos mi laikim Jehova.” c Sapos i gat ol hevi i kamap insait long marit bilong yu, yu ken trastim Jehova long sapotim yu na helpim yu long stap strong yet.

MEKIM YET WOK TAIM YU BEL HEVI LONG YU YET

12. Yumi inap bungim wanem hevi taim yumi mekim wanpela bikpela sin?

¹² Hevi. Yumi inap pilim olsem yumi laik givap long yumi yet taim yumi mekim wanpela bikpela sin. Baibel i tok ol sin bilong yumi inap mekim bel bilong yumi i bagarap na mekim yumi pilim nogut tru. (Sng. 51:17) Wanpela brata nem bilong em Robert, em i bin wok strong inap planti yia bilong winim mak bilong kamap kongrigesen sevan. Tasol em i mekim wanpela  bikpela sin na em i luksave olsem em i givim baksait long Jehova. Em i tok: “Maus bilong bel bilong mi i kotim mi tru taim mi luksave long ol sin mi mekim. Bihain mi pilim nogut tru. Mi krai nogut tru na beten long Jehova. Mi ting olsem God bai no gat laik long putim yau gen long mi. Wai bai em i putim yau long mi? Mi bin bagarapim tru bel bilong em.” Sapos yumi pundaun na mekim sin, yumi inap pilim olsem yumi laik givap long yumi yet, bikos long bel yumi pilim olsem Jehova i givap pinis long yumi. (Sng. 38:4) Sapos yu bin pilim olsem, orait skelim stori bilong wanpela man long Baibel husat i bin mekim yet wok bilong Jehova, maski em i bin mekim bikpela sin.

13. Aposel Pita i mekim wanem bikpela sin, na em i bin mekim wanem ol popaia paslain long dispela?

¹³ Eksampel long Baibel. Nait paslain long ol man i kilim Jisas i dai, aposel Pita i mekim sampela bikpela popaia, na bikos long dispela em i mekim wanpela bikpela sin. Pastaim Pita i mekim pasin hambak, na em i tok olsem em bai stap gut long Jisas, maski ol narapela aposel i lusim Jisas. (Mak 14:​27-29) Bihain taim ol i stap long gaden Getsemani, planti taim Pita i no was i stap. (Mak 14:​32, 37-41) Na bihain long en, taim ol man i kam holim Jisas, Pita i lusim em na ranawe. (Mak 14:50) Na laspela samting, inap 3-pela taim Pita i tok em i no save long Jisas, na em i mekim tok tru antap bilong strongim dispela tok giaman bilong em. (Mak 14:​66-71) Pita i mekim wanem taim em i luksave olsem em i mekim bikpela sin tru? Bel bilong em i bagarap na em i krai nogut tru, ating em i pilim olsem bikos bel bilong em i kotim em. (Mak 14:72) Piksaim long tingting bikpela bel pen tru Pita i bin pilim taim em i kisim save olsem ol man i kilim i dai pren bilong em Jisas. Tru tumas, Pita i pilim olsem em i samting nating na em i no gutpela long ai bilong God!

14. Wanem samting i helpim Pita long mekim yet wok bilong Jehova? (Lukim piksa.)

¹⁴ I gat sampela risen na Pita i mekim yet wok bilong Jehova. Em i no stap wanpis, em i go long ol brata Kristen bilong em na ol i mekim gut bel bilong em. (Luk 24:33) Na tu, Jisas i kamap long Pita bihain long em i kirap bek, ating em bilong strongim em. (Luk 24:34; 1 Kor. 15:5) Bihain long en, Jisas i no kros long Pita long ol popaia bilong em, nogat, em i tokim pren bilong em Pita olsem em bai kisim ol bikpela wok moa. (Jon 21:​15-17) Pita i save olsem em i bin mekim bikpela sin, tasol em i no givap long em yet. Wai? Bikos Pita i bilip tru olsem Bikman bilong em Jisas i no bin givap long em. Na ol brata Kristen bilong Pita i wok yet long sapotim em. Yumi inap kisim wanem skul long stori bilong Pita?

15. Jehova i laik yumi mas bilip tru long wanem samting? (Buk Song 86:5; Rom 8:​38, 39) (Lukim tu piksa.)

 ¹⁵ Skul yumi kisim. Jehova i laik yumi mas bilip tru olsem em i laikim yumi na em i redi long fogivim yumi. (Ritim Buk Song 86:5; Rom 8:​38, 39.) Taim yumi mekim sin, bel bilong yumi i save kotim yumi. Em nomol na i stret long pilim olsem. Tasol yumi no ken ting olsem God i no inap laikim yumi o em i no inap fogivim yumi, nogat. Wantu tasol yumi mas kisim helpim. Robert em yumi stori pinis long em, em i tok: “Mi pundaun na mekim sin bikos mi bilip long strong bilong mi yet long sakim traim.” Em i luksave olsem em i mas toktok long ol elda. Em i tok: “Taim mi mekim olsem, wantu mi pilim pasin laikim bilong Jehova long rot bilong ol. Ol elda i no givap long mi. Ol i helpim mi long bilip olsem Jehova i no givim baksait long mi.” Yumi tu i ken bilip tru olsem Jehova i laikim yumi tru na em i save fogivim yumi taim yumi tanim bel long ol sin bilong yumi, kisim helpim long ol elda, na wok strong long no ken mekim ol wankain popaia. (1 Jon 1:​8, 9) Kain bilip olsem bai helpim yumi long no ken givap long yumi yet taim yumi mekim sin o yumi pundaun.

16. Wai na yu tingting strong long mekim yet wok bilong Jehova?

¹⁶ Jehova i amamas tru long pasin bilong yumi long mekim yet wok bilong em long dispela taim nogut bilong las de. Jehova inap helpim yumi na yumi ken mekim yet wok bilong em, maski yumi bel hevi. Yumi ken kisim pasin bilong laikim tru ol bratasista bilong yumi na fogivim ol, maski ol i bagarapim bel bilong yumi. Yumi ken soim olsem yumi laikim tru God na yumi rispektim marit bilong yumi taim yumi wok strong long stretim ol hevi i kamap insait long marit bilong yumi. Na sapos yumi mekim sin, yumi ken askim Jehova long helpim yumi, na larim em i laikim na fogivim yumi na yumi ken givim bel yet long mekim wok bilong em. Yumi ken save olsem yumi bai kisim planti gutpela blesing sapos yumi no “givap long mekim ol gutpela wok.”—Gal. 6:9.