1-2. Man i mas mekim wanem paslain long em i kisim baptais?

 INSAIT long 5-pela yia i go pinis, winim wan milion manmeri i bin kisim baptais olsem ol Witnes Bilong Jehova. Wankain olsem Timoti husat i bin stap long taim bilong ol aposel, planti bilong ol i lainim tok i tru “taim [ol i] stap bebi yet.” (2 Tim. 3:​14, 15) Ol narapela i kisim save long Jehova taim ol i kamap bikpela pinis, na sampela i mekim olsem taim ol i lapun pinis. Sampela yia i go pinis, wanpela meri husat i stadi long Baibel wantaim ol Witnes Bilong Jehova i kisim baptais taim em i gat 97 krismas!

² Sapos yu wanpela Baibel sumatin o papamama bilong yu ol i Witnes na ol i mekim bikpela long yu, orait olsem wanem? Yu tingting long kisim baptais? Dispela em gutpela mak yu putim! Tasol paslain long yu kisim baptais, yu mas dediketim yu yet long Jehova. Dispela atikol bai stori long dediket i makim wanem samting. Na tu, em bai helpim yu long save long as na yu no ken surik long dediket na baptais taim yu redi long mekim olsem.

DEDIKET EM WANEM SAMTING?

3. Stori long sampela manmeri long Baibel em ol i dediket long Jehova.

³ Long Baibel, dediket i makim olsem wanpela i givim em yet long God bilong mekim wok bilong em. Lain Israel em wanpela lain i dediket long Jehova. Tasol sampela manmeri namel long dispela lain i dediket long Jehova long wanpela spesel wei. Olsem, Aron i pasim wanpela medal gol long fran bilong laplap i raunim het bilong em, dispela em i “mak holi bilong dedikesen.” Dispela medal gol i soim olsem Aron bai mekim wok bilong God long wanpela spesel wei—em bai stap olsem hetpris bilong lain Israel. (Wkp. 8:9) Ol Nasarait tu i dediket long Jehova long wanpela spesel wei. Dispela tok “Nasarait” we i kam long dispela tok Hibru nazirʹ, mining bilong en “Wanpela Em i Stap Narapela Kain,” o “Wanpela i Dediket.” Ol Nasarait i mas bihainim ol spesel  lo em Lo Bilong Moses i makim bilong ol long bihainim.—Nam. 6:​2-8.

4. (a) Taim yu dediket long Jehova, yu givim yu yet long mekim wanem wok? (b) Wanem mining bilong dispela tok “givim baksait long ol laik bilong [yu] yet”? (Lukim tu piksa.)

⁴ Taim yu dediketim yu yet long Jehova, yu makim olsem yu bai kamap wanpela disaipel bilong Jisas Krais na putim laik bilong God i stap nambawan bikpela samting long laip bilong yu. Taim yu dediket olsem wanpela Kristen, dispela i makim olsem yu mas mekim wanem? Jisas i tok: “Sapos wanpela man i laik bihainim mi, orait em i mas givim baksait long ol laik bilong em yet.” (Mat. 16:24) Dispela tok Grik em ol i bin tanim olsem “em i mas givim baksait long ol laik bilong em yet,” ol i ken tanim tu olsem “em i mas tok nogat long em yet.” Olsem wanpela wokman bilong Jehova i dediket pinis long em, yu mas tok nogat long ol samting we i no stret wantaim laik bilong em. (2 Kor. 5:​14, 15) Dispela i makim olsem yu mas tok nogat long “ol pasin em laik nogut bilong bel i kamapim,” olsem pasin pamuk. (Gal. 5:​19-21; 1 Kor. 6:18) Taim yu bihainim ol dispela lo, yu ting dispela bai putim hevi long yu? Dispela i no inap putim hevi long yu sapos yu laikim tru Jehova na yu bilip tru olsem ol lo bilong em i bilong lukautim yu. (Sng. 119:97; Ais. 48:​17, 18) Wanpela brata nem bilong em Nicholas, em i tok: “Yu ken tingim ol lo bilong Jehova olsem banis i stopim yu long mekim samting yu laik mekim, o olsem banis i stap namel long yu na ol laion we i lukautim laip bilong yu na yu no kisim bagarap.”

5. (a) Olsem wanem yu ken dediketim yu yet long Jehova? (b) Olsem wanem dediket i no wankain long baptais? (Lukim tu piksa.)

⁵ Olsem wanem yu ken dediketim yu yet long Jehova? Yu ken dediket long Jehova taim yu beten na tok promis long em olsem yu bai lotuim em wanpela tasol na putim laik bilong em i stap nambawan samting long laip bilong yu. Taim yu mekim olsem, yu tok promis long Jehova olsem yu bai wok yet long laikim em “long bel olgeta  bilong yu, na long laip olgeta bilong yu, na long tingting olgeta bilong yu, na long strong olgeta bilong yu.” (Mak 12:30) Taim yu dediket long Jehova, dispela em samting namel long yu na Jehova tasol na ol narapela i no save long dispela. Tasol taim yu kisim baptais long ai bilong ol narapela, ol i save olsem yu dediket pinis long Jehova. Dediket bilong yu em wanpela spesel tok promis yu mekim, na Jehova i laik bai yu truim dispela tok promis bilong yu, wankain olsem yu tu i laik mekim olsem.—Ekl. 5:​4, 5.

WAI NA YU MAS DEDIKETIM YU YET LONG JEHOVA?

6. Wanem samting i save kirapim wanpela long dediketim em yet long Jehova?

⁶ Nambawan bikpela risen na yu dediketim yu yet long Jehova em bikos yu laikim em. I no olsem bel i kirapim yu long laikim em na em tasol, nogat. Yu kisim “stretpela save” na yu “kisimgut ol tok” we i stori long Jehova, na dispela i strongim tru pasin bilong yu long laikim em. (Kol. 1:9) Yu stadi long ol tok bilong Baibel na dispela i helpim yu long bilip tru olsem (1) Jehova i stap tru, (2) holi spirit bilong em i kamapim ol tok bilong Baibel, na (3) em i yusim oganaisesen bilong em long kamapim laik bilong em.

7. Yumi mas mekim wanem paslain long yumi dediketim yumi yet long God?

⁷ Ol lain i dediket long Jehova, ol i mas save long ol bikpela tok i tru i stap long Baibel na bihainim ol lo bilong God long i stap bilong ol. Maski sindaun bilong ol i narapela narapela, ol i wok strong long tokim ol narapela long bilip bilong ol. (Mat. 28:​19, 20) Pasin bilong ol long laikim Jehova i kamap strong moa, na long bel olgeta ol i laik tru long lotuim em wanpela tasol. Ating yu tu i pilim olsem. Taim yu laikim  tru Jehova, yu no inap tingim dediket na baptais olsem samting yu laik mekim bilong amamasim Baibel tisa bilong yu o papamama bilong yu, o ol pren bilong yu.

8. Olsem wanem pasin bilong tok tenkyu long Jehova i ken kirapim yu long dediket long em? (Buk Song 116:​12-14)

⁸ Taim yu tingim olgeta samting Jehova i bin mekim bilong helpim yu, dispela bai kirapim yu long dediketim yu yet long Jehova. (Ritim Buk Song 116:​12-14.) I stret Baibel i kolim Jehova olsem Man Bilong Givim “olgeta gutpela presen na olgeta presen i nambawan tru.” (Jems 1:17) Long olgeta presen em i givim long yumi, nambawan gutpela presen em i givim em ofa bilong Pikinini bilong em, Jisas. Tingim dispela! Pe bilong baim bek man i opim rot long yu inap pas gut wantaim Jehova. Na tu, dispela pe i opim rot long yu inap stap laip oltaim. (1 Jon 4:​9, 10, 19) Taim yu dediketim yu yet long Jehova, dispela em rot bilong soim tenkyu bilong yu long bikpela pasin laikim tru em i mekim long yu, na tu, long olgeta narapela blesing Em i givim long yu. (Lo 16:17; 2 Kor. 5:15) Long lesen 46 bilong buk Stap Amamas Oltaim!, poin 4 i stori long rot bilong soim tenkyu bilong yumi long God. Dispela lesen i gat tu wanpela 3-minit vidio, nem bilong en Givim Ol Presen Bilong Yu Long God.

YU REDI LONG DEDIKET NA BAPTAIS?

9. Wai na yu no ken pilim presa long dediket?

⁹ Ating yu pilim olsem yu no redi long dediket na baptais. Ating yu mas mekim sampela senis long laip bilong yu bilong bihainim ol lo bilong Jehova, o ating sampela haptaim i mas lus na bai yu ken strongim bilip bilong yu. (Kol. 2:​6, 7) Olgeta sumatin i no save kamap strong long bilip long wankain taim, na i no olgeta yangpela i redi long dediket na baptais long wankain krismas. Skelim ol samting yu inap mekim bilong winim ol mak bilong bilip yu putim na no ken skelim yu yet wantaim ol narapela.—Gal. 6:​4, 5.

10. Yu ken mekim wanem sapos yu pilim olsem yu no redi yet long dediket na baptais? (Lukim tu blok “ Bilong Ol Lain i Bikpela Insait Long Tok i Tru.”)

¹⁰ Sapos yu luksave olsem yu no redi yet long dediketim yu yet long Jehova, orait putim dispela olsem wanpela mak yu laik winim. Beten na askim Jehova long blesim ol hatwok bilong yu long mekim ol senis em yu mas mekim. (Fili. 2:13; 3:16) Yu ken save tru olsem em bai harim na bekim beten bilong yu.—1 Jon 5:14.

AS NA SAMPELA I SURIK

11. Olsem wanem Jehova bai helpim yumi long stap gut yet long em?

¹¹ Sampela em ol i redi long dediket na baptais, ol i surik yet long mekim olsem. Ating ol i tingting olsem, ‘Olsem wanem sapos mi dediket na baptais na bihain mi mekim wanpela bikpela sin na mi raus long kongrigesen?’ Sapos kain tingting olsem i mekim na yu surik, orait yu ken save tru olsem Jehova bai givim helpim yu nidim bilong yu ken “wokabaut olsem ol manmeri tru bilong [em] na olgeta samting [yu] mekim bai amamasim em.” (Kol. 1:10) Na tu, em bai givim strong long yu long mekim samting i stret. Em i bin helpim planti wokman bilong em long bipo long mekim olsem na em bai helpim yu tu. (1 Kor. 10:13) Em as na wan wan man tasol i save raus long kongrigesen Kristen. Jehova i save helpim lain bilong em long stap gut yet long em.

12. Yumi ken mekim wanem na bai yumi no mekim bikpela sin?

¹² Olgeta man i no gutpela olgeta na bel bilong ol i save traim ol long mekim pasin i no stret. (Jems 1:14) Tasol yu bai pundaun na mekim rong o nogat, dispela em disisen bilong yu yet. Tru tru em olsem, yu yet bai kontrolim olgeta samting i kamap long laip bilong yu. Sampela man inap tok i hatwok long mekim  olsem, tasol yu ken lain long kontrolim ol laik bilong yu. Na sapos sampela laik nogut i kirap long bel bilong yu, yu ken daunim ol na yu no bihainim ol dispela laik nogut. Bilong helpim yu long mekim olsem, yu mas beten long olgeta de. Bihainim yet gutpela sediul bilong mekim stadi bilong yu yet long Baibel. Go long ol miting Kristen. Tokim ol narapela long bilip bilong yu. Taim yu mekim ol dispela samting long olgeta taim, dispela bai strongim yu long inapim tok promis yu mekim taim yu dediket. Na oltaim tingim olsem Jehova bai helpim yu long mekim olsem.—Gal. 5:16.

13. Olsem wanem Josep i stap gutpela piksa em yumi ken bihainim?

¹³ Em bai isi long yu truim dediket bilong yu taim yu tingim pinis samting yu bai mekim taim traim i painim yu. Baibel i stori long planti manmeri em ol i bin mekim olsem, maski ol tu i no gutpela olgeta wankain olsem yumi. Olsem, planti taim meri bilong Potifa i traim long pulim Josep long slip wantaim em. Tasol Josep i no gat tupela tingting long samting em bai mekim. Baibel i tok em i “nolaik tru” na em i tok olsem: “Wai bai mi mekim dispela pasin nogut tru na mekim sin long ai bilong God?” (Stt. 39:​8-10) I klia tru olsem Josep i save pinis long samting em bai mekim paslain long meri bilong Potifa i traim long pulim em. Olsem na em isi moa long em i sakim dispela traim.

14. Long wanem rot yu ken lain long sakim ol traim?

¹⁴ Long wanem rot yu ken bihainim wankain pasin olsem Josep long sakim ol traim? Long nau yet yu ken tingim samting yu bai mekim sapos wanpela traim i kamap. Lain long tok nogat kwiktaim long ol samting em Jehova i heitim, na no ken tru tingim tingim ol dispela samting. (Sng. 97:10; 119:165) Taim yu mekim olsem, yu no inap pundaun taim traim i kamap long yu. Yu save pinis long samting yu mas mekim. Na yu bai mekim olsem.

15. Olsem wanem wanpela inap soim olsem em i “wok strong long painim” Jehova? (Hibru 11:6)

¹⁵ Ating yu luksave olsem yu painim pinis tok i tru na yu laik tru long givim bel olgeta long mekim wok bilong Jehova, tasol sampela samting i mekim na yu surik long dediket na baptais. Yu ken tingim eksampel bilong King Devit. Yu ken beten strong long Jehova olsem: “O God, skelim mi gut na yu bai save long tingting i stap long bel bilong mi. Skelim mi na yu bai save long ol samting mi tingting planti long en. Skelim mi gut, nogut i gat sampela tingting nogut i stap long bel bilong mi, na yu mas bringim  mi long rot bilong kisim laip bilong i stap oltaim oltaim.” (Sng. 139:​23, 24) Jehova i save blesim ol manmeri em ol i “wok strong long painim em.” Yu wok strong long winim mak bilong dediket na baptais, na long dispela rot yu soim Jehova olsem yu wok strong long painim em.—Ritim Hibru 11:6.

WOK YET LONG I GO KLOSTU LONG JEHOVA

16-17. Olsem wanem Jehova i save kirapim ol lain em ol i bikpela insait long tok i tru long i go klostu long em? (Jon 6:44)

¹⁶ Jisas i tok Jehova i save kirapim ol disaipel bilong em long i go klostu long Em. (Ritim Jon 6:44.) Tingim, dispela em narakain samting tru na dispela tok i stret long yu tu. Jehova i save lukim gutpela samting long bel bilong olgeta wan wan man na em i kirapim ol long i go klostu long em. Em i tingim ol olsem “spesel lain” bilong em o “lain manmeri i dia tumas” long em. (Lo 7:6; ftn.) Jehova i holim wankain tingting olsem long yu tu.

¹⁷ Ating yu wanpela yangpela na papamama i mekim bikpela long yu insait long tok i tru. Yu inap pilim olsem yu bihainim tasol papamama. Maski i olsem, Baibel i tok: “Yupela i mas i go klostu long God, na em bai kam klostu long yupela.” (Jems 4:8; 1 Sto. 28:9) Taim yu mekim ol samting bilong i go klostu long Jehova, em bai kam klostu long yu. Jehova i no tingim yu olsem yu hap bilong wanpela famili tasol, nogat. Em i save kirapim olgeta wan wan man long i go klostu long em na dispela i makim tu ol manmeri i kamap bikpela insait long tok i tru. Taim ol i mekim ol samting bilong i go klostu long Jehova, Em i save kam klostu long ol, olsem Jems 4:8 i kamapim.—Skelim 2 Tesalonaika 2:13.

18. Yumi bai stori long wanem samting long neks atikol? (Buk Song 40:8)

¹⁸ Taim yu dediketim yu yet long Jehova na kisim baptais, yu soim olsem yu bihainim pasin bilong Jisas. Em i amamas long mekim laik bilong Papa bilong em na em i redi long mekim olgeta samting Papa i askim em long mekim. (Ritim Buk Song 40:8; Hib. 10:7) Long neks atikol, yumi bai stori long sampela samting we bai helpim yu long stap gut long Jehova na mekim yet wok bilong em bihain long yu baptais.