EM FRAIDE moning long Septemba 1922. Inap 8,000 manmeri i kam bung na ples i hot. Siaman i toksave olsem sapos man i laik i go ausait, em i ken i go, tasol ol i no inap larim em i kam insait gen.

Long kirap bilong program, ol manmeri i singim ol song bilong givim biknem long God (“Praise Service”), na bihain Joseph F. Rutherford i go long pletfom. Planti manmeri i laik save long wanem samting bai kamap. Ples i hot, olsem na sampela i wokabaut i go i kam. Brata i mekim tok i kirapim ol long sindaun na putim yau. Taim program i kirap, yu ting sampela i lukim traipela laplap ol i bin rolim na pasim antap long rup bilong haus kibung?

Brata Rutherford i stori long dispela tok “Kingdom bilong heven i kam klostu.” Inap 90 minit, strongpela nek bilong em i go long olgeta hap long ples bung. Em i stori olsem ol profet bilong bipo i no pret long tokaut olsem Kingdom bai kam. Long namel bilong tok, em i askim olsem, “Yupela i bilip olsem King i gat glori i kirap pinis long mekim wok?” Olgeta long odiens i bekim long strongpela nek olsem: “Yes!”

Brata Rutherford i tok: “Orait yupela ol pikinini bilong God antap tru, yupela i go autim dispela tok! Harim, King i mekim wok! Yupela i mas i go na toksave long ol narapela. Olsem na yupela i mas autim tok, autim tok, autim tok.”

Long dispela taim stret, laplap ol i bin rolim na pasim long antap i op isi na ol manmeri inap lukim dispela tok: “Autim tok long King na Kingdom.”

Brata Ray Bopp i tok: “Olgeta long odiens i kirap nogut tru.” Sista Anna Gardner i tok: “Ol manmeri i amamas na paitim han strong tru.” Fred Twarosh i tok: “Olgeta manmeri i kirap sanap.” Brata Evangelos Scouffas i tok: “Mipela i pilim olsem wanpela samting i gat bikpela strong i apim mipela na mipela i sanap na aiwara i pulap long ai.”

Planti manmeri long dispela kibung i kirap pinis long autim gutnius bilong Kingdom. Tasol nau ol i kisim nupela strong long mekim dispela wok. Sista Ethel Bennecoff i tok, dispela kibung i strongim ol Sumatin Bilong Baibel long “laikim tru na givim bel moa yet long autim tok winim long bipo.” Sista Odessa Tuck i gat 18 krismas taim em i stap long dispela kibung, na taim em i lusim ples kibung, em i tingting strong long mekim wok i olsem bekim bilong dispela singaut “Husat bai i go?” Em i tok: “Mi no save mi bai autim tok long wanem hap, na mi bai autim tok olsem wanem, na mi bai autim wanem tok. Mi save long wanpela samting tasol, em olsem mi laik bihainim pasin bilong Aisaia, em i tok: ‘Mi stap! Salim mi.’” (Ais. 6:8, NW) Ralph Leffler i tok: “Long dispela de, mipela i kirapim wok bilong autim tok bilong Kingdom, na long nau dispela wok i inapim olgeta hap bilong graun.”

 Dispela kibung i kamap long 1922 long Cedar Point, Ohio, i stap olsem bikpela samting long histori bilong wok tiokratik! George Gangas i tok: “Dispela kibung i strongim laik bilong mi long i go long olgeta kibung.” Tru tumas, em i no bin misim wanpela kibung. Julia Wilcox i tok: “Taim mi lukim ol litresa bilong yumi i stori long kibung i kamap long Cedar Point long 1922, dispela i mekim mi amamas tru. Oltaim mi laik tok, ‘Tenkyu Jehova long yu larim mi i stap long dispela kibung.’”

Ating planti bilong yumi i tingim yet wanpela kibung we program bilong en i givim bikpela amamas long yumi, na strongim yumi long laikim tru na givim bel moa long mekim wok bilong nambawan God bilong yumi na Man em i makim bilong i stap King. Taim yumi tingim bek dispela kibung, yumi tu inap tok, “Tenkyu Jehova long yu larim mi i stap long dispela kibung.”