1, 2. (a) Bilong wanem ol yangpela Kristen i winim pait ol i mekim wantaim ol spirit nogut? (Lukim piksa long kirap bilong stadi.) (b) Yumi bai skelim wanem ol samting?

APOSEL POL i tok olsem ol Kristen i wankain long ol soldia i insait long wanpela pait. Yumi no pait long woa, tasol yumi pait long sait bilong bilip. Ol birua bilong yumi i stap tru. Satan na ol spirit nogut i save gut tru long pait na ol i bikpela lain ami. Yumi inap pilim olsem yumi no gat strong long winim ol. Moa yet, ol yangpela Kristen inap pilim olsem ol i no inap winim pait. Yu ting ol yangpela inap winim pait ol i mekim wantaim ol spirit nogut? Yes, ol inap winim ol spirit nogut! Wanem samting inap helpim ol yangpela? Ol i mas “wok yet long kisim strong long Bikpela.” Tasol ol i mas mekim sampela samting moa. Ol i mas pasim ol klos pait. Wankain olsem ol strongpela soldia i mekim, ol yangpela i mas “pasim olgeta klos pait i kam long God.”—Ritim Efesus 6:10-12.

² Taim Pol i mekim dispela tok piksa, ating em i tingim ol klos pait bilong ol soldia bilong Rom. (Apo. 28:16) Yumi ken skelim risen na tok piksa bilong Pol i stret. Taim yumi skelim dispela tok piksa, tingim ol tok sampela yangpela i mekim taim ol hevi i painim ol na ol gutpela samting i kamap taim ol i werim olgeta klos pait.

3, 4. Olsem wanem tok i tru bilong Baibel i olsem let em ol soldia i save pasim?

³ Ritim Efesus 6:14. Ol soldia bilong Rom i save pasim let i gat ol hap ain long en bilong lukautim bel bilong ol. Dispela let i helpim soldia long karim hevi bilong klos pait em i werim long bros na solda bilong em. Na tu, dispela let i gat ol strongpela liklik poket bilong karim bainat na naip. Taim soldia i pasim strong let bilong em, em i no inap surik long taim bilong pait.

⁴ Olsem tasol, taim yumi kisim save long tok i tru i stap long Tok Bilong God, dispela i lukautim yumi long sait bilong bilip na yumi inap sakim ol bilip giaman. (Jon 8:31, 32; 1 Jon 4:1) Taim yumi kisim pasin bilong laikim tok i tru, dispela bai helpim yumi long pasim “siot kapa long bros.” Dispela i makim olsem yumi wok long bihainim ol stretpela lo bilong God. (Sng. 111:7, 8; 1 Jon 5:3) Na tu, taim yumi kliagut long tok i tru bilong Baibel, yumi bai sanap strong na sakim ol birua.—1 Pita 3:15.

5. Bilong wanem yumi mas mekim tok tru tasol?

⁵ Taim yumi holimpas tok i tru bilong Baibel, dispela bai kirapim yumi long bihainim ol tok bilong en na mekim tok tru long olgeta taim. Bilong wanem yumi no ken mekim tok giaman? Pasin bilong giaman em nambawan tul bilong Satan. Pasin bilong giaman inap bagarapim man i tok giaman, na man husat i bilipim tok giaman. (Jon 8:44) Olsem na yumi mas wok strong long sakim pasin bilong tok giaman. (Efe. 4:25) Tasol i gat hatwok bilong en. Abigail i gat 18 krismas, na em i tok: “Sampela taim yu inap pilim olsem pasin bilong mekim tok tru i no inap helpim yu, moa yet taim yu save olsem sapos yu tok giaman, yu bai abrusim hevi.” Tasol bilong wanem Abigail i wok strong long mekim tok tru long olgeta taim? Em i tok: “Taim mi mekim tok tru, maus bilong bel bilong mi i stap klin long ai bilong Jehova. Na tu, papamama na ol pren bilong mi inap trastim mi.” Victoria i gat 23 krismas i tok: “Taim yu mekim tok tru na sanap strong long bilip bilong yu, ating ol narapela bai mekim pasin buli long yu. Tasol gutpela samting bai kamap: Yu bai gat strongpela bel, yu go klostu moa long Jehova, na ol lain husat i laikim yu bai rispektim yu.” Olsem na em i bikpela samting long ‘pasim tok i tru olsem let long bel bilong yu’ long olgeta taim.

6, 7. Bilong wanem stretpela pasin i olsem siot kapa?

⁶ Long taim bilong ol aposel, ol soldia bilong Rom i save pasim siot kapa we i gat ol longpela hap ain i slip antap long narapela narapela. Ol i bendim ol dispela ain bambai siot kapa i ken karamapim bros bilong soldia. Ol i yusim skin bilong animal long joinim ol dispela hap ain wantaim ol liklik huk. Dispela i mekim na soldia i no inap kisim bagarap long bros na solda bilong em. Siot kapa i mekim na soldia i no inap muv nabaut tumas, na oltaim em i mas sekim olsem olgeta hap ain i pas gut wantaim. Siot kapa bilong em i lukautim em bambai bainat o spia bilong birua i no inap bagarapim lewa na ol narapela hap bilong bodi.

⁷ Dispela tok piksa i stret tru long olsem wanem ol stretpela lo bilong Jehova inap lukautim bel na tingting bilong yumi! (Snd. 4:23) Soldia i no inap senisim siot kapa em ol i wokim long strongpela ain na werim siot kapa em ol i wokim long ain i no gat strong. Olsem tasol, yumi no laik senisim ol stretpela lo bilong Jehova na mekim ol samting em yumi ting i stret long mekim. Tingting bilong yumi inap giamanim yumi na hevi inap kamap. (Snd. 3:5, 6) Oltaim yumi mas sekim olsem yumi wok long bihainim ol stretpela lo bilong Jehova, o nogat.

8. Bilong wanem em i bikpela samting long bihainim ol lo bilong Jehova?

 ⁸ Olsem wanem? Sampela taim yu pilim olsem ol stretpela lo bilong Jehova i pasim yu long mekim ol samting yu laik mekim? Daniel i gat 21 krismas i tok: “Ol tisa na ol sumatin i tok bilas long mi bikos mi save bihainim ol stretpela lo bilong Baibel. Inap liklik haptaim, mi no strongim bel na mi bel hevi.” Wanem samting i helpim Daniel? Em i tok: “I no longtaim na mi luksave olsem mi bihainim ol lo bilong Jehova na dispela i helpim mi. Sampela wanskul i kirap long kisim drak, na sampela ol i pinisim ol long skul. Mi sori tru long lukim hevi i painim ol. Jehova i save lukautim gut yumi.” Madison i gat 15 krismas i tok: “Mi save taitim bun long bihainim ol stretpela lo bilong Jehova na mi no bung wantaim ol wanlain na mekim ol samting ol i ting i gutpela long mekim.” Wanem samting i helpim Madison long karim dispela hevi? Em i tok moa: “Mi save tokim mi yet olsem mi holim nem bilong Jehova, na ol traim i kamap i kain olsem Satan i tromoi ol spia long mi. Taim mi sakim ol traim, mi save amamas.”

9-11. (a) Ol Kristen i mekim wanem na i kain olsem ol i werim su? (b) Yumi inap mekim wanem bambai yumi no ken pret taim yumi autim gutnius?

⁹ Ritim Efesus 6:15. Soldia bilong Rom husat i no werim su i soim olsem em i no redi long i go long pait. Su bilong ol soldia i olsem sendol. Ol i samapim na pasim dispela su wantaim skin bilong animal inap 3-pela taim. Long dispela rot, su i karamapim gut lek bilong soldia, na tu, su inap i stap longpela taim.

¹⁰ Ol soldia bilong Rom i save werim su taim ol i redi long i go pait. Olsem tasol, pasin bilong redi gut long autim tok i helpim ol Kristen long autim gutnius bilong bel isi. (Ais. 52:7; Rom 10:15) Maski i olsem, yumi mas strongim bel na autim tok taim rot i op. Bo i gat 20 krismas i tok: “Mi save pret long autim tok long ol wanklas bilong mi. Ating mi pilim sem. Taim mi tingim bek dispela samting, mi no save wai na mi no bin autim tok. Nau mi amamas long autim tok long ol wanlain bilong mi.”

¹¹ Planti yangpela i pilim olsem pasin bilong redi gut i mekim na ol i no pret long autim tok. Yu inap mekim wanem bilong redi long autim tok? Julia i gat 16 krismas i tok: “Mi save putim ol litresa long skul beg, na mi save putim yau taim ol wanklas i autim tingting na bilip bilong ol. Long dispela rot, mi inap save long olsem wanem mi inap helpim ol. Taim mi redi gut, mi inap toktok wantaim ol long samting inap helpim ol.” Makenzie i gat 23 krismas i tok: “Sapos yu gat gutpela pasin na yu putim gut yau long narapela, yu inap kliagut long wanem samting i painim ol wanlain bilong yu. Mi save ritim olgeta pablikesen em oganaisesen i redim bilong ol yangpela. Taim mi mekim olsem, mi inap stiaim ol wanlain bilong mi i go long Baibel o long jw.org bilong kisim helpim.” Tok bilong ol dispela yangpela i soim olsem taim yumi redi gut long autim tok, dispela i kain olsem su yumi putim long lek na em i stap strong.

12, 13. Wanem sampela “spia paia” em Satan i save sutim long yumi?

¹² Ritim Efesus 6:16. “Hap plang” em ol soldia bilong Rom i save karim em i bikpela na longpela. Dispela plang i karamapim bodi bilong soldia kirap long solda na i go inap long skru bilong en. Dispela hap plang i lukautim em na ol spia bilong birua i no bagarapim em.

¹³ Sampela bilong ol “spia paia” em Satan inap sutim long yu em ol tok giaman em i mekim long Jehova—olsem God i no save tingim yu na em i no laikim yu. Ida i gat 19 krismas, na em i pilim olsem em i no gutpela  tumas. Em i tok: “Mi save pilim olsem Jehova i no stap klostu long mi, na em i no laik kamap Pren bilong mi.” Olsem wanem em i sanap strong long dispela traim? Ida i tok: “Ol miting i strongim tru bilip bilong mi. Mi save sindaun tasol na mi no bekim tok, na mi ting olsem i no gat wanpela man bai amamas long ol tok mi mekim. Tasol nau mi save redim gut ol miting na mi save bekim tok 2-pela o 3-pela taim. Em i hatwok, tasol bel bilong mi i stap isi taim mi mekim olsem. Na tu, ol bratasista i save strongim mi. Taim mi pinis miting na go bek long haus, mi save olsem Jehova i laikim mi.”

14. Ekspiriens bilong Ida i kamapim klia wanem bikpela samting?

¹⁴ Ekspiriens bilong Ida i kamapim klia wanpela bikpela samting: Hap plang ol soldia i karim i save stap wankain. Tasol bilip bilong yumi inap i go bikpela o i go liklik. Em disisen bilong yumi wan wan. (Mat. 14:31; 2 Tes. 1:3) Em i bikpela samting long yumi mas strongim bilip bilong yumi!

15, 16. Olsem wanem ol samting yumi bilip na wet long en i olsem hat kapa?

¹⁵ Ritim Efesus 6:17. Ol hat kapa em ol soldia bilong Rom i save werim i karamapim het, nek, na pes bilong ol. Sampela hat kapa i gat handel na ol soldia inap holim.

¹⁶ Hat kapa i lukautim het bilong soldia. Olsem tasol, “pasin bilong bilip na wetim God i kisim bek yumi” i lukautim tingting bilong yumi. (1 Tes. 5:8; Snd. 3:21) Ol samting yumi bilip na wet long en i helpim yumi long tingim ol tok promis bilong God, na yumi inap  holim stretpela tingting long ol hevi i kamap. (Sng. 27:1, 14; Apo. 24:15) Sapos yumi laik strongim “pasin bilong bilip na wetim God i kisim bek yumi,” orait yumi mas mekim ol samting bilong kamapim bilip bilong yumi. Long dispela rot, i olsem yumi mekim wok long “hat kapa.”

17, 18. (a) Olsem wanem Satan inap kirapim yumi long lusim pasin bilong bilip na wet long God i helpim yumi? (b) Olsem wanem yumi inap soim olsem yumi no larim Satan i giamanim yumi?

¹⁷ Olsem wanem Satan inap kirapim yumi long rausim hat kapa bilong yumi? Tingim samting em i mekim bilong traim Jisas. Satan i save olsem Jisas bai mekim wok king na bosim ol manmeri long graun, tasol em i mas wet i go inap long taim Jehova yet i makim. Na tu, em i mas karim pen na hevi na em i mas i dai. Olsem na Satan i traim Jisas long inapim samting em i bilip na wet long en. Satan i tok sapos Jisas i lotu long em, wantu tasol em bai givim olgeta samting em Jisas i wet long en. (Luk 4:5-7) Olsem tasol, Satan i save olsem Jehova bai lukautim yumi long ol samting bilong skin long nupela taim. Tasol yumi mas wet na karim ol hevi. Olsem na Satan i traim yumi long kisim olgeta dispela samting long nau yet. Em i laik bai yumi lusim bikpela haptaim long kisim ol samting bilong skin bambai yumi putim wok bilong Kingdom i stap namba 2.—Mat. 6:31-33.

¹⁸ Olsem planti yangpela long nau, Kiana i gat 20 krismas i no larim Satan i pundaunim em long dispela samting. Em i tok: “Mi save olsem Kingdom Bilong God tasol inap stretim ol hevi bilong yumi.” Olsem wanem dispela bilip i stiaim tingting na pasin bilong Kiana? Em i tok moa: “Bilip bilong mi long Paradais i helpim mi long holim stretpela tingting long sait bilong wok mani samting. Mi no laik wok strong long kisim planti mani, nogat. Mi lusim bikpela haptaim na strong long winim ol mak long sait bilong bilip.”

19, 20. Olsem wanem yumi inap yusim gut Tok Bilong God?

¹⁹ Long taim bilong Pol, ol soldia bilong Rom i save yusim bainat em longpela bilong en inap olsem 50 sentimita. Ol i wokim dispela bainat bilong man i ken holim long han na pait. Ol soldia bilong Rom i save gut long pait bikos ol i save prektis long yusim bainat long olgeta de.

²⁰ Pol i tok olsem Tok Bilong God i olsem wanpela bainat Jehova i givim long yumi. Tasol yumi mas lain long yusim gut dispela bainat long sapotim bilip bilong yumi, na long taim yumi stretim tingting bilong yumi yet. (2 Kor. 10:4, 5; 2 Tim. 2:15) Olsem wanem yu inap yusim gut Tok Bilong God? Sebastian em yangpela brata i gat 21 krismas. Em i tok: “Taim mi ritim wanpela sapta long Baibel, mi save raitim 1-pela ves long notbuk. Mi mekim lista bilong ol feiveret skripsa bilong mi. Long dispela rot, mi kliagut long tingting bilong Jehova.” Daniel em yumi stori pinis long em i tok: “Taim mi ritim Baibel, mi save makim wanpela ves we mi inap yusim long helpim ol manmeri taim mi autim tok. Mi luksave olsem ol manmeri i amamas long putim yau taim ol i lukim olsem yu laikim ol tok bilong Baibel na yu laik tru long helpim ol.”

21. Bilong wanem yumi no ken pret long Satan na ol spirit nogut?

²¹ Tok bilong ol yangpela long dispela stadi i soim olsem yumi no ken pret long Satan na ol spirit nogut. Satan na ol spirit nogut i gat strong, tasol yumi inap winim ol. Ol i no inap i stap oltaim. Long Wan Tausen Yia, ol bai stap kalabus na ol i no inap mekim wanpela samting, na bihain bai ol i bagarap na pinis olgeta. (Rev. 20:1-3, 7-10) Yumi save long birua bilong yumi, ol trik bilong em, na laik nogut bilong em. Jehova inap helpim yumi na yumi inap sanap strong na sakim Satan!