JISAS i tok profet olsem ol disaipel bilong em bai i gat bikpela wok bilong bungim planti kaikai i mau long dispela taim bilong pinis. (Mat. 9:37; 24:14) Skelim olsem wanem tok bilong em i kamap tru long Transcarpathia, Yukren. Long 3-pela taun long dispela hap, i gat 50 kongrigesen na winim 5 tausen 4 handret pablisa. * Long dispela 3-pela taun, 1-pela long 4-pela manmeri em Witnes Bilong Jehova!

Ol manmeri i stap long dispela teritori i gat wanem kain pasin? Brata Vasile em i wanpela asples, na em i tok: “Ol manmeri long dispela hap i save rispektim Baibel, laikim stretpela pasin, tingim tru famili, na ol i save helpim narapela narapela.” Em i tok moa: “Sampela taim ol i no save wanbel long ol bilip bilong yumi. Tasol taim yu soim tok bilong Baibel, ol bai putim gut yau.”

Long ol hap we i gat planti pablisa na i no gat planti manmeri, ol bratasista i hatwok long autim tok. Kain olsem: Long wanpela kongrigesen, i gat 134 pablisa, tasol i gat 50 haus long teritori bilong dispela kongrigesen! Olsem wanem ol pablisa long dispela hap i save autim tok?

Planti bratasista i autim tok long ol hap we i sot long ol pablisa. Ionash em wanpela lapun brata i gat 90 krismas. Em i tok: “Long teritori bilong mipela, wanpela pablisa i save autim tok long 2-pela haus. Mi save autim tok long ples bilong mi. I no longtaim i go pinis helt bilong mi i bagarap. Maski i olsem, mi save autim tok long wanpela ples i stap longwe inap olsem 1 handret 60 kilomita. Ol manmeri long dispela hap i mekim tokples Hangari.” Ol pablisa i mas lusim sampela samting bilong ol yet bambai ol i ken autim tok long ol narapela hap. Ionash i tok moa: “Mi save kirap long 4 klok long bikmoning bambai mi ken kalap long tren, na mi autim tok i go inap long 6 klok long apinun taim tren i go bek long ples. Mi save mekim olsem inap 2-pela o 3-pela taim long wik.” Yu ting hatwok bilong em i karim kaikai? Ionash i tok: “Mi amamas tru long autim tok long dispela rot. Mi tenkyu tru olsem mi inap helpim wanpela famili i stap longwe long kongrigesen long kisim save long tok i tru.”

Em tru olsem i no olgeta bratasista bilong ol dispela kongrigesen inap go long ol longwe hap na autim tok. Tasol olgeta pablisa, maski ol i yangpela o lapun, ol i givim bel long autim tok long hap ol i stap long en. Long 2017, dispela 3-pela taun i bung wantaim na mekim Memorial. Namba bilong ol manmeri i kam long Memorial i winim namba bilong ol pablisa inap 2-pela taim, em inap olsem 50 pesen bilong populesen long dispela hap. Maski yumi stap long wanem wanem hap, yumi inap mekim “planti wok bilong Bikpela.”—1 Kor. 15:58.