1. Wai na sampela i no gat laik long stadi?

LONG nau, ol man i mas wok hat tru long lukautim ol yet. Planti bratasista i wok inap planti aua na bai ol inap kisim mani bilong lukautim famili long sait bilong haus, klos, na kaikai. Planti bilong ol i lusim sampela aua long olgeta wan wan de long i go i kam long ples wok. Planti moa i mekim ol strongpela wok bilong lukautim ol yet. Long pinis bilong olgeta wan wan de, ol dispela bratasista i pilim olsem olgeta strong bilong ol i pinis. Olsem na planti i pilim olsem ol i no gat strong moa long stadi.

2. Yu save stadi long wanem taim?

² Yumi yet i mas makim taim bilong stadi—stadi gut—long Baibel na ol pablikesen bilong Baibel. Sapos yumi mekim olsem, yumi bai pas gut wantaim Jehova na yumi inap kisim laip oltaim! (1 Tim. 4:15) Sampela i save kirap long bikmoning long olgeta wan wan de na stadi taim i no gat planti nois long haus, na ol i redi long tingim gut ol samting. Ol narapela i yusim sampela minit long apinun na nait long stadi na tingim tingim samting ol i stadi long en.

3-4. Wanem ol senis i kamap long ol samting yumi inap ritim na lukim? Bilong wanem?

³ Ating yu bai wanbel olsem yumi mas makim taim bilong stadi. Tasol yumi bai stadi long wanem samting? Ating yu bai tok, ‘I gat planti tok tumas bilong ritim. Mi no gat taim long ritim olgeta samting.’ Sampela i yusim gut ol samting Jehova i givim bilong strongim yumi long sait bilong bilip, tasol planti bratasista i no gat taim bilong mekim olsem. Gavening Bodi i luksave long dispela hevi. Olsem na yumi kisim toksave olsem ol bai daunim namba bilong ol pablikesen ol i prinim na ol pablikesen i kamap long Intenet.

⁴ Long nau, yumi no wokim moa ol Yiabuk bikos planti  gutpela ekspiriens i stap long jw.org na ol program bilong JW Brodkasting. Nau ol i wokim nius Wastaua bilong pablik na Kirap! inap 3-pela taim tasol insait long wanpela yia. Dispela senis i kamap i no makim olsem yumi gat bikpela taim moa long mekim ol narapela samting. Dispela senis i kamap bilong helpim yumi long “skelim gut wanem ol samting i bikpela samting moa.” (Fili. 1:10) Yumi bai stori long olsem wanem yu inap makim ol bikpela samting, na olsem wanem yu inap kisim gut helpim taim yu mekim stadi bilong yu yet.

5-6. Yumi mas stadi gut long wanem ol pablikesen?

⁵ Yumi mas tingim wanem ol samting olsem bikpela samting? Long olgeta wan wan de, yumi mas lusim sampela haptaim long stadi long Tok Bilong God. Ol i daunim namba bilong ol ves long Baibel ritim bilong wik, na long dispela rot yumi gat sampela moa haptaim long tingim tingim ol tok yumi ritim na mekim ekstra wok painimaut. Yumi laik bai ol dispela samting i kirapim yumi long pilim tru ol tok bilong Baibel na helpim yumi long i go klostu moa long Jehova.—Sng. 19:14.

⁶ Yumi mas stadi gut long wanem ol narapela samting? Yumi mas redim Wastaua Stadi na Baibel Stadi Bilong Kongrigesen, na tu, yumi laik redim ol samting bilong skelim long miting namel long wik. Yumi mas ritim olgeta nupela Wastaua na Kirap!

7. Yu ting i stret long yumi bel hevi sapos yumi no inap ritim o watsim olgeta samting long websait na JW Brodkasting?

⁷ Ating yu bai tok, ‘Em tru, tasol olsem wanem long olgeta samting i stap long jw.org websait na JW Brodkasting? Em planti tumas!’ Tingim dispela tok piksa: Planti gutpela kaikai i stap long wanpela restron. Ol kastama i no inap teistim olgeta kaikai. Olsem na ol i teistim sampela kaikai tasol. Long wankain pasin, yu no ken bel hevi sapos yu no gat taim long ritim o watsim olgeta samting long websait. Ritim na watsim wanem samting yu inap ritim o watsim. Nau yumi ken stori long wanem ol samting yumi inap mekim taim yumi stadi, na olsem wanem yumi inap kisim gut helpim long rot bilong stadi.

8. (a) Yu ken mekim wanem taim yu stadi long Wastaua? (b) Hau bai dispela i helpim yu?

⁸ Stadi i makim olsem yu putim tingting olgeta long samting yu ritim bambai yu inap kisim save long wanpela bikpela samting. I no olsem yu mas rit hariap na makim nating ol bekim, nogat. Taim yu redim Wastaua Stadi, pastaim yu mas ritim priviu long kirap bilong atikol. Neks, skelim bikpela het tok, ol liklik het tok, na ol riviu askim. Lusim sampela haptaim long ritim atikol, ritim gut na no ken spit. Skelim gut fes sentens bilong olgeta paragraf. Dispela sentens i save kolim samting em paragraf bai stori long en. Taim yu ritim atikol, luksave long hau olgeta wan wan paragraf i sapotim ol liklik het tok na strongim bikpela tok bilong atikol. Raitim ol nupela tok na ol skul yu kisim em yu laik mekim sampela moa wok painimaut long en.

9. (a) Wai na yumi mas skelim gut ol skripsa taim yumi stadi long Wastaua? (b) Yumi inap mekim olsem wanem? (c) Olsem Josua 1:8 i tok, yumi mas ritim ol skripsa na mekim wanem samting moa?

⁹ Wastaua Stadi em wanpela rot bilong stadi long Baibel. Olsem na skelim gut ol skripsa ol i makim bilong ritim long taim bilong stadi. Luksave long olsem wanem  ol tok bilong skripsa i strongim bikpela tok bilong paragraf. Lusim sampela haptaim long tingim tingim ol skripsa yu ritim, na tingim olsem wanem yu inap bihainim ol dispela tok long laip bilong yu.—Ritim Josua 1:8.

10. Olsem Hibru 5:14 i kamapim, wai na papamama i mas yusim sampela haptaim bilong famili lotu long skulim pikinini long pasin bilong stadi na mekim wok painimaut?

¹⁰ Papamama i laik bai ol pikinini i amamas long insait long Famili Lotu long olgeta wik. Oltaim papamama i mas makim wanpela samting stret ol bai stadi long en, tasol i no gat wok long ol i oganaisim spesel projek long olgeta wik. Long taim bilong Famili Lotu, famili i ken lukim program bilong wan wan mun long JW Brodkasting o mekim spesel projek, olsem wokim model bilong sip bilong Noa. Tasol em i bikpela samting long ol pikinini i mas lain long pasin bilong stadi. Ol i mas lain long pasin bilong redim ol miting bilong kongrigesen o pasin bilong mekim wok painimaut long wanpela askim o hevi i kamap long skul. (Ritim Hibru 5:14.) Sapos ol i stap long haus na lusim sampela haptaim long stadi, dispela bai redim ol long putim gut yau long ol tok i kamap long miting na kibung, we sampela taim i no gat vidio long en. Papamama i mas tingim krismas na pasin bilong pikinini na skelim hamas minit o aua ol i lusim bilong mekim stadi.

11. Bilong wanem em i bikpela samting long skulim ol Baibel sumatin long pasin bilong mekim gut stadi bilong ol yet?

¹¹ Ol Baibel sumatin bilong yumi tu i mas lain long pasin bilong stadi. Taim ol i kirap stadi long namba 1 taim, yumi amamas long lukim ol i putim lain aninit long bekim bilong ol taim ol i redim Baibel stadi o miting bilong kongrigesen. Tasol taim ol i stadi i go moa, yumi mas skulim ol long olsem wanem ol inap mekim wok painimaut na mekim gut stadi bilong ol yet. Olsem na taim hevi i kamap, ol i no inap askim ol narapela long mekim disisen bilong ol, nogat. Ol yet inap mekim disisen taim ol i yusim ol pablikesen bilong yumi long mekim wok painimaut.

12. Wanem sampela risen bilong stadi?

¹² Sapos yu no man bilong stadi, ating yu bai pilim olsem yu no inap enjoim stadi bilong yu. Tasol yu inap. Pastaim yu ken stadi inap sotpela haptaim, na isi isi  yu ken surikim stadi taim i go longpela moa. Yu mas i gat risen bilong stadi. Yumi laik tru bai pasin bilong stadi i helpim yumi long i go klostu moa long Jehova. Na tu, yumi inap painim bekim bilong wanpela askim o mekim wok painimaut na kisim save long rot bilong karim wanpela hevi we i painim yumi.

13. (a) Stori long ol samting wanpela yangpela long skul i ken mekim bambai em i ken sambai long bilip bilong em. (b) Olsem wanem yu inap bihainim skultok i stap long Kolosi 4:6?

¹³ Olsem wanem? Yu wanpela yangpela long skul? Ating olgeta wanklas bilong yu i bilip long evolusen. Yu laik sambai long tok bilong Baibel, tasol yu pilim olsem yu no gat save long Baibel. Olsem na yu mas mekim wanpela stadi projek! Yu gat 2-pela risen bilong dispela stadi: (1) yu laik strongim bilip bilong yu olsem God i bin wokim olgeta samting, na (2) yu laik kamap gutpela moa long pasin bilong sambai long bilip bilong yu. (Rom 1:20; 1 Pita 3:15) Pastaim yu ken askim yu yet olsem, ‘Wai na ol wanklas i bilip long evolusen?’ Bihain, yusim ol pablikesen bilong yumi long mekim wok painimaut. Dispela bai helpim yu na yu bai inap tru long stori gut long bilip bilong yu. Planti lain i bilip long evolusen bikos ol i rispektim man i skulim ol long dispela bilip. Sapos yu painim 1-pela o 2-pela bekim, yu ken stori long wanklas husat i laik save long tok i tru.—Ritim Kolosi 4:6.

14-16. (a) Sapos yu no save tumas long wanpela buk bilong Baibel, yu ken mekim wanem na bai yu inap save gut moa? (b) Stori long olsem wanem yu inap yusim majinel referens long kisim gut save long Buk Amos. (Lukim blok “ Piksaim Ol Stori Bilong Baibel.”)

¹⁴ Tingim olsem long miting bilong kongrigesen, yumi bai ritim na stori long wanpela buk bilong Baibel em ol profet i raitim, na ating yu no save tumas long dispela profet. Pastaim, kirapim laik bilong yu long kisim sampela save moa long ol tok em i raitim. Yu ken mekim wanem?

¹⁵ Namba 1, askim yu yet: ‘Mi gat wanem save long man i raitim dispela buk? Em i husat? Em i stap we? Em i mekim wanem wok?’ Taim yu kisim sampela save moa long sindaun bilong em, yu inap kliagut long risen bilong ol tok na ol tok piksa em i yusim. Taim yu ritim Baibel, painim ol hap tok we i kamapim klia pasin bilong man i raitim buk.

¹⁶ Namba 2, i gutpela long save long wanem taim em i bin raitim dispela buk. Lukim pes 2370-2371 long Nupela Taim Trenslesen Bilong Ol Skripsa Holi na lukim seksen “Ol Buk Bilong Baibel.” Na tu, yu ken skelim sat i stori long ol profet na ol king long Apendiks A6. Sapos yu stadi long buk i stori long ol tok profet, i gutpela yu painimaut long ol samting i kamap taim man i wok long raitim dispela buk. Olsem, God i salim dispela profet long stretim wanem pasin bilong ol manmeri? Husat ol narapela manmeri i bin stap long taim bilong em? Sapos yu laik kisim gutpela save moa, yu mas skelim ol narapela buk bilong Baibel. Olsem, sapos yu laik kliagut long wanem samting i kamap long taim bilong profet Amos, yu ken skelim ol stori i stap long 2 King na 2 Stori. Yu inap lukim ol dispela skripsa long majinel referens bilong Amos 1:1—majinel referens em ol skripsa long blok i stap namel long pes bilong Baibel. Yu ken skelim tu buk em Hosea i raitim bikos ating em i stap long taim bilong Amos. Ol dispela buk bai helpim yu long kisim  gutpela save moa long ol samting i bin kamap long taim bilong Amos.—2 Kin. 14:25-28; 2 Sto. 26:1-15; Hos. 1:1-11; Amo. 1:1.

17-18. Tingim ol eksampel long paragraf o eksampel bilong yu yet, na stori long hau yu inap kisim amamas taim yu yet i stadi long Baibel na skelim gut olgeta liklik samting.

¹⁷ Taim yu ritim Baibel, em gutpela long holim tingting olsem yu laik kisim sampela save moa. Tingim olsem yu ritim sapta 12 bilong Buk Sekaraia na dispela sapta i tok profet olsem Mesaia bai dai. (Sek. 12:10) Ves 12 i tok “lain bilong Natan” bai krai sori nogut tru taim Mesaia i dai. Yu ken askim yu yet olsem: ‘Wai na Baibel i bungim lain bilong Natan wantaim Mesaia? I gat rot bilong kisim sampela save moa?’ Orait yu ken mekim sampela wok painimaut. Referens bilong skripsa i stiaim yu i go long 2 Samuel 5:13, 14, na dispela skripsa i soim olsem Natan em wanpela pikinini bilong King Devit. Namba 2 skripsa long referens em Luk 3:23, 31, na dispela skripsa i soim olsem Jisas em tumbuna pikinini bilong Natan long rot bilong Maria. Dispela save i kirapim tru laik bilong yu long stadi! Yu save long tok profet bilong Baibel olsem Jisas bai kamap long lain tumbuna pikinini bilong Devit. (Mat. 22:42) Tasol Devit i gat moa long 20 pikinini man. Sekaraia i gat risen long kolim stret lain bilong Natan na em i tok ol bai krai sori taim Jisas i dai.

¹⁸ Skelim narapela eksampel. Fes sapta bilong Luk i stori olsem ensel Gebriel i visitim Maria na tokim em long samting bai kamap long pikinini em bai karim: “Em  bai i gat biknem na ol bai kolim em Pikinini bilong God Antap Tru. Na God Jehova bai givim em sia king bilong papa bilong em Devit, na em bai stap King long lain bilong Jekop inap oltaim oltaim.” (Luk 1:32, 33) Ating yumi bai tingim tasol fes hap bilong dispela tok olsem ol man bai kolim Jisas olsem “Pikinini bilong God Antap Tru.” Tasol Gebriel i tok profet tu olsem Jisas bai “stap King.” Ating yumi laik save long tingting bilong Maria taim Gebriel i mekim dispela tok. Nogut em i ting olsem Jisas bai kisim ples bilong King Herot na kamap lida bilong Israel? Sapos Jisas i kamap king, Maria bai kisim biknem na famili bilong em bai stap long haus king. Tasol i no gat wanpela tok long Baibel i soim olsem Maria i kamapim ol dispela askim long Gebriel. Na tu, Maria i no askim long kisim biknem long Kingdom olsem 2-pela disaipel bilong Jisas i bin mekim. (Mat. 20:20-23) Dispela i soim olsem Maria i gat pasin daun tru!

19-20. Olsem Jems 1:22-25 na 4:8 i stori long en, wai na yumi mas stadi?

¹⁹ Yumi mas tingim olsem nambawan risen bilong yumi long stadi long Baibel na ol pablikesen bilong Baibel, em bilong i go klostu moa long Jehova. Na tu, yumi laik save gut moa long yumi yet i “wanem kain” na yumi mas senisim wanem ol pasin na bai God i orait long yumi. (Ritim Jems 1:22-25; 4:8.) Olsem na paslain long yumi kirap stadi, yumi mas askim Jehova long givim holi spirit long yumi. Yumi mas askim em long stiaim yumi na bai yumi inap kisim gut helpim long samting yumi stadi long en, na luksave long ol pasin yumi mas senisim.

²⁰ Yumi olgeta i laik kamap olsem wokman bilong God em man bilong raitim song i stori long en olsem: “Dispela man i save amamas long lo bilong Jehova, na em i save ritim isi isi dispela lo long san na long nait. . . . Olgeta samting em i mekim i save kamap gutpela.”—Sng. 1:2, 3.