1-3. (a) Olsem Song 5:4-6 i kamapim, Jehova i pilim olsem wanem long pasin nogut? (b) Bilong wanem yumi inap tok olsem “lo bilong Krais” bai stiaim man long heitim tru pasin bilong abiusim pikinini?

GOD JEHOVA i heitim olgeta kain pasin nogut. (Ritim Buk Song 5:4-6.) Em i heitim tru ol man i mekim pasin doti o pasin sem long ol pikinini—em stingpela pasin! Yumi ol Witnes i bihainim pasin bilong Jehova na heitim dispela pasin na yumi no larim dispela pasin i kamap insait long kongrigesen Kristen.—Rom 12:9; Hib. 12:15, 16.

² “Lo bilong Krais” bai stiaim man long heitim tru olgeta kain pasin doti ol man i mekim long ol pikinini! (Gal. 6:2) Bilong wanem yumi inap tok olsem? Olsem yumi skelim long atikol i kamap paslain, lo bilong Krais i strongim stretpela pasin, na pasin laikim i as tru bilong dispela lo. Dispela lo i makim olgeta samting Jisas i skulim ol disaipel long en long rot bilong ol tok na pasin em i mekim. Ol Kristen tru i bihainim dispela lo, na pasin ol i mekim bai kirapim ol pikinini long pilim olsem ol i stap gut na ol narapela i laikim ol. Taim man i abiusim pikinini, em i tingim laik bilong em yet, na pikinini i no inap pilim seif na em bai pilim olsem i no gat man i laikim em.

³ Sori tru olsem long olgeta hap bilong graun, ol man i abiusim ol pikinini na dispela i putim hevi long ol Kristen. Bilong wanem? “Ol man nogut na ol man bilong giaman” i pulap long olgeta hap, na sampela inap traim long kam insait long kongrigesen. (2 Tim. 3:13) Sampela i kam insait long kongrigesen, tasol ol i bihainim laik nogut bilong bodi na abiusim ol pikinini. Yumi ken stori long risen na dispela pasin em bikpela rong. Yumi bai stori long olsem wanem ol elda i save stretim ol bikpela rong, na rong bilong abiusim  pikinini, na olsem wanem papamama inap lukautim pikinini. *

4-5. Wai na yumi inap tok olsem pasin bilong abiusim pikinini em wanpela sin?

⁴ Taim man i abiusim pikinini, pikinini bai tingim dispela samting inap longpela taim. Dispela samting bai putim hevi long pikinini na ol lain husat i tingim tru pikinini—ol wanfamili na ol bratasista long kongrigesen. Pasin bilong abiusim pikinini em bikpela sin.

⁵ Man i mekim sin long pikinini. * Sin i makim pasin we i putim hevi o bagarapim bel bilong narapela. Olsem yumi bai skelim long neks atikol, dispela samting i save kamap taim man i abiusim pikinini—em i bagarapim tru tingting na filings bilong pikinini. Pikinini i no inap trastim ol narapela, na em i no inap moa long pilim seif. Yumi mas lukautim gut ol pikinini na bai ol narapela i no ken abiusim ol. Yumi mas helpim na mekim isi bel bilong ol pikinini em ol narapela i abiusim ol.—1 Tes. 5:14.

6-7. Taim man i abiusim pikinini, wai na yumi inap tok em i mekim sin long kongrigesen na gavman?

⁶ Man i mekim sin long kongrigesen. Sapos wanpela long kongrigesen i abiusim pikinini, em i bagarapim gutnem bilong kongrigesen. (Mat. 5:16; 1 Pita 2:12) Dispela pasin i bagarapim tru bel bilong ol Kristen husat i “pait strong long holimpas dispela wanpela bilip”! (Jut 3) Yumi no ken kamap wanbel wantaim ol manmeri namel long yumi em ol i mekim bikpela rong na ol i no tanim bel, na pasin nogut bilong ol i bagarapim gutnem bilong kongrigesen.

⁷ Man i mekim sin long gavman. Ol Kristen “i mas [stap] aninit long ol gavman.” (Rom 13:1) Yumi soim rispek long gavman taim yumi bihainim lo bilong en. Sapos wanpela long kongrigesen i brukim lo bilong gavman na em i abiusim pikinini, dispela i makim olsem em i mekim sin long gavman. (Skelim Aposel 25:8.) Ol elda i no gat namba long strongim lo bilong gavman, tasol ol i no inap stopim gavman long givim panismen long man i abiusim pikinini. (Rom 13:4) Man i mekim sin bai karim hevi bilong rong em i mekim.—Gal. 6:7.

8. Jehova i holim wanem tingting long rong em man i mekim long narapela man?

⁸ Samting i nogut moa, man i mekim sin long God. (Sng. 51:4) Taim man i mekim sin long narapela man, em i mekim sin tu long Jehova. Skelim eksampel i stap long Lo em God i givim long lain Israel. Lo i tok sapos man i stilim wanpela samting o giamanim neiba bilong em, i olsem “em i mekim sin long ai bilong Jehova.” (Wkp. 6:2-4) Olsem na taim wanpela long kongrigesen i abiusim pikinini, em i mekim sin long God bikos em i stilim o tekewe filing bilong pikinini long i stap seif. Dispela man i bagarapim tru gutnem bilong Jehova. Olsem na i stret long dispela man i kisim strafe long rong em i mekim—em i mekim bikpela sin long ai bilong God.

9. Inap planti yia, oganaisesen bilong Jehova i givim wanem helpim? Bilong wanem?

 ⁹ Inap planti yia, oganaisesen bilong Jehova i givim planti skultok bilong Baibel bilong stiaim yumi long stretim na karim hevi i kamap taim wanpela i abiusim pikinini. Ol atikol long Wastaua na Kirap! i stori long hau ol viktim inap karim dispela hevi, na hau ol narapela inap helpim na strongim ol, na hau ol papamama inap lukautim ol pikinini. Ol elda i kisim gut trening long olsem wanem ol inap yusim tok bilong Baibel long stretim dispela hevi. Oganaisesen i wok yet long skelim wei ol kongrigesen i ken bihainim bilong stretim hevi bilong abiusim pikinini. Yumi laik bai wei bilong yumi long stretim dispela hevi i stret wantaim lo bilong Krais.

10-12. (a) Taim ol elda i laik stretim ol bikpela rong, ol i save tingim wanem ol samting? (b) Ol i laik bai ol bratasista i pilim olsem wanem? (c) Olsem Jems 5:14, 15 i tok, ol elda i wok strong long mekim wanem?

¹⁰ Taim ol elda i laik stretim ol bikpela rong, ol i tingim samting em lo bilong Krais i makim long ol i mas mekim, olsem ol i mas soim pasin laikim long ol sipsip na mekim pasin i stret long ai bilong God. Olsem na i gat planti samting ol i mas skelim taim ol i kisim ripot olsem wanpela i mekim bikpela rong. Ol elda i no laik tru bai wanpela samting i bagarapim gutnem bilong God. (Wkp. 22:31, 32; Mat. 6:9) Na tu, ol i tingim tru bilip bilong ol bratasista insait long kongrigesen na ol i laik helpim olgeta husat i bin kamap viktim.

¹¹ Sapos wanpela long kongrigesen i bin abiusim pikinini, ol elda bai traim long helpim dispela man long stretim gen pasin bilong em long pas gut wantaim God. (Ritim Jems 5:14, 15.) Sapos wanpela Kristen i bihainim laik nogut na mekim bikpela rong, orait em i sik long sait bilong bilip. Dispela i makim olsem em i no pas gut moa wantaim Jehova. * Ol elda i stap olsem ol dokta long sait bilong bilip. Ol i traim long “mekim sikman [man i mekim rong] i kamap orait.” Ol bai givim tok kaunsel bilong Baibel long helpim em, tasol em inap pas gut gen wantaim God sapos em yet i tanim bel tru.—Apo. 3:19; 2 Kor. 2:5-10.

¹² Ol elda i gat bikpela wok long mekim. Ol i tingim tru ol sipsip em God i putim long han bilong ol. (1 Pita 5:1-3) Ol i laik bai ol bratasista i pilim olsem ol i stap gut insait long kongrigesen. Olsem na taim wanpela i mekim bikpela rong, olsem abiusim pikinini, kwiktaim ol elda bai mekim samting bilong stretim dispela hevi. Skelim ol askim i kamap long kirap bilong paragraf 13, 15, na 17.

13-14. Yu ting ol elda i bihainim lo bilong gavman taim ol i ripotim wanpela husat i abiusim pikinini? Eksplenim.

¹³ Yu ting ol elda i bihainim lo bilong gavman taim ol i ripotim wanpela husat i abiusim pikinini? Yes. Long ol kantri we i gat kain lo olsem, ol elda i bihainim dispela lo na bringim ripot i go long ol wokman bilong gavman. (Rom 13:1) Ol dispela lo i no pait wantaim lo bilong God. (Apo. 5:28, 29) Olsem na taim ol elda i kisim ripot long wanpela i mekim rong, kwiktaim ol i painim rot long hau ol inap bihainim lo bilong gavman.

¹⁴ Ol elda i toksave long viktim na papamama na ol narapela husat i save long dispela rong, olsem ol i fri long ripotim dispela  rong long ol wokman bilong gavman. Tasol olsem wanem sapos wanpela long kongrigesen i mekim rong na bihain ol narapela long komiuniti i harim stori bilong dispela rong? Yu ting Kristen husat i givim ripot long ol wokman bilong gavman i mas pilim olsem samting em i mekim i bagarapim gutnem bilong God? Nogat. Man i mekim rong, em tasol i bagarapim gutnem bilong God.

15-16. (a) Olsem 1 Timoti 5:19 i tok, wai na i mas i gat 2-pela aiwitnes paslain long ol elda i kamapim komiti bilong harim kot? (b) Ol elda i save mekim wanem taim ol i harim olsem wanpela long kongrigesen i abiusim pikinini?

¹⁵ Paslain long ol elda i kamapim komiti bilong harim kot, wai na i mas i gat 2-pela aiwitnes? Dispela i stret wantaim lo bilong Baibel long sait bilong stretpela pasin o jastis. Taim man i no tokaut long rong em i mekim, 2-pela aiwitnes i mas tokaut long dispela rong na bai ol elda i ken kamapim komiti bilong harim kot. (Lo 19:15; Mat. 18:16; ritim 1 Timoti 5:19.) Yu ting dispela i makim olsem i mas i gat 2-pela aiwitnes paslain long ol i ripotim man long ol wokman bilong gavman? Nogat. Ol wokman bilong gavman i no bihainim wankain lo olsem ol elda i bihainim insait long kongrigesen.

¹⁶ Taim ol elda i harim olsem wanpela long kongrigesen i abiusim wanpela pikinini, ol bai bihainim lo bilong gavman na ripotim man i mekim rong, na ol yet bai bihainim ol stiatok bilong Baibel na mekim wok painimaut. Sapos man i giaman olsem em i no mekim rong, ol elda bai harim stori bilong ol aiwitnes. Sapos i gat 2-pela aiwitnes na stori bilong ol i kamapim klia olsem man i bin mekim rong na em i abiusim tu ol narapela pikinini, orait ol elda bai kamapim komiti bilong harim kot. * Maski sapos i no gat namba 2 aiwitnes, dispela i no daunim tok bilong man i kamapim dispela rong long ol elda. Ol elda i luksave olsem ating man i bin mekim rong, na dispela rong inap bagarapim tru tingting na filings bilong ol narapela. Ol elda bai wok yet long strongim na mekim isi bel bilong ol viktim na wanfamili na ol pren. Na tu, ol elda bai was i stap na lukautim kongrigesen na bai man i mekim rong i no ken abiusim ol narapela.—Apo. 20:28.

17-18. Wanem wok bilong komiti bilong harim kot?

¹⁷ Wanem wok bilong komiti bilong harim kot? Dispela tok “kot” i no makim olsem ol elda i mekim wok jas na ol bai mekim disisen long man bai kisim panismen long han bilong lo, nogat. Taim wanpela i brukim lo bilong gavman, ol elda i no inap pasim ol wokman bilong gavman long inapim wok bilong ol long stretim man i mekim rong. (Rom 13:2-4; Tai. 3:1) Tasol ol elda bai skelim sapos man inap stap yet long kongrigesen.

¹⁸ Taim ol elda i kamapim komiti bilong harim kot, ol i laik helpim man long stretim pasin bilong em long pas gut gen wantaim God na ol wanbilip. Ol i larim tok bilong Baibel i stiaim ol long skelim sapos man i tanim bel o nogat. Sapos man i no tanim bel, kongrigesen bai rausim em, na ol elda bai toksave long kongrigesen. (1 Kor. 5:11-13) Sapos em i tanim bel, em inap stap yet insait long kongrigesen. Tasol ol elda bai toksave long em olsem ating em i no inap winim mak bilong kisim wok insait long  kongrigesen o mekim wok olsem kongrigesen sevan o elda. Ol elda i tingim tru ol pikinini, olsem na ol yet i ken toktok wantaim papamama na tokim ol long was gut long ol pikinini taim man bilong mekim rong i stap long kongrigesen. Ol elda i bihainim savetingting na ol i no inap autim nem bilong ol viktim long ol narapela.

19-22. Papamama i ken mekim wanem bilong lukautim ol pikinini? (Lukim fran pes piksa.)

¹⁹ Em wok bilong husat long lukautim pikinini na bai narapela i no ken abiusim em? Em wok bilong yupela ol papamama. * “Jehova i givim yupela ol pikinini . . . olsem presen.” (Sng. 127:3) Em wok bilong yupela long lukautim gut dispela presen. Olsem wanem yupela inap lukautim gut pikinini?

²⁰ Namba 1: Kisim save long ol samting man i save mekim taim em i abiusim pikinini. Painimaut long husat lain i save abiusim pikinini na ol trik ol i save yusim. Skelim na lukaut long ol manmeri husat inap abiusim pikinini. (Prov. 22:3; 24:3) Tingim, planti taim man i abiusim pikinini em man we pikinini i save gut long em na trastim em.

²¹ Namba 2: Toktok gut wantaim pikinini. (Lo 6:6, 7) Dispela i makim olsem yu mas putim gut yau long ol pikinini. (Jems 1:19) Tingim olsem ol pikinini i save pret long tokaut taim wanpela i abiusim ol. Ating ol i pret olsem ol narapela i no inap bilipim ol, o man i abiusim ol i pretim ol na tambuim ol long tokaut. Sapos yu luksave olsem sampela samting i no stret, givim sampela askim long kirapim ol long kamapim tingting bilong ol na putim gut yau taim ol i toktok.

²² Namba 3: Skulim pikinini. Skelim krismas bilong ol na tokim ol long sampela samting ol i mas save long en long sait bilong maritpasin. Skulim ol long tok na pasin ol i mas mekim taim narapela i tatsim ol long rong wei. Yusim ol tok em oganaisesen bilong God i redim long olsem wanem yu inap lukautim gut ol pikinini.—Lukim blok “ Skulim Yu Yet na Pikinini.”

23. (a) Yumi holim wanem tingting long pasin bilong abiusim pikinini? (b) Neks atikol bai bekim wanem askim?

²³ Yumi ol Witnes Bilong Jehova i tingim pasin bilong abiusim pikinini olsem wanpela bikpela sin na pasin i nogut tru. Ol kongrigesen bilong yumi i bihainim lo bilong Krais, olsem na taim man i abiusim pikinini, ol i larim dispela man i karim hevi bilong rong em i mekim. Yumi ken mekim wanem bilong helpim ol bratasista em narapela i bin abiusim ol? Neks atikol bai bekim dispela askim.