1. Tok Bilong God i helpim yumi olsem wanem?

YUMI inap karim olgeta kain hevi bikos Jehova em i Nambawan Bikpela Tisa bilong yumi. (Ais. 30:20, 21) Tok Bilong God i helpim yumi na yumi “inap tru na redi long mekim olgeta kain gutpela wok.” (2 Tim. 3:17) Taim yumi bihainim savetingting bilong Baibel, laip bilong yumi bai gutpela moa winim laip bilong ol man husat i bihainim “savetingting bilong dispela graun.”—1 Kor. 3:19; Sng. 119:97-100.

2. Long dispela atikol, yumi bai stori long wanem samting?

² Sampela taim savetingting bilong dispela graun inap kirapim laik bilong bodi. Olsem na yumi inap pilim hatwok long sakim tingting na pasin bilong dispela graun. Baibel i tok: “Yupela lukaut, nogut wanpela i trapim yupela long rot bilong savetingting bilong ol man na tok giaman. Kastam bilong ol man i as bilong ol dispela samting.” (Kol. 2:8) Long dispela atikol, yumi bai stori long olsem wanem planti man i stat long bilipim 2-pela tok giaman. Yumi bai luksave long wai na savetingting bilong dispela graun i olsem longlong samting na olsem wanem savetingting bilong Baibel i winim tru olgeta save bilong dispela graun.

3-4. Long haptaim namel long 1920 na 1930, wanem senis i kamap long tingting bilong ol manmeri long Amerika?

³ Long Amerika, bihain tasol long yia 1900, tingting bilong ol man long stretpela pasin i senis. Bipo, planti man i bilip olsem maritpasin em bilong ol marit lain tasol na ol i no save stori long dispela samting long pablik. Tasol long nau pasin bilong ol manmeri i senis olgeta.

 ⁴ Ol man i tingim haptaim namel long 1920 na 1930 olsem taim bilong kisim amamas na bungim mani kago. Wanpela savemeri i tok: “Ol muvi, ol pilai, ol singsing, ol buk, na ol edvetaismen i soim planti piksa bilong man na meri i slip wantaim.” Long dispela haptaim, stail bilong danis i kirapim laik bilong mekim maritpasin na bilas bilong ol manmeri i no karamapim gut bodi. Baibel i tok profet olsem long haptaim bilong las de, ol manmeri bai “laikim kain kain amamas.”—2 Tim. 3:4.

5. Long ol yia bihain long 1960, wanem samting i kamap long tingting bilong ol manmeri long stretpela pasin?

⁵ Long ol yia bihain long 1960, planti man na meri i slip wantaim maski ol i no marit, na man i slip wantaim man, na meri i slip wantaim meri, na em isi long kisim divos. Planti muvi i soim piksa bilong man na meri i slip wantaim. Ol dispela pasin i kamapim planti hevi. Wanpela meri bilong raitim buk i tok ol man i lusim stretpela pasin, olsem na ol famili i bruk, famili i gat papa o mama tasol, ol man i bel hevi tru, na ol i kalabus long lukim ponografi. Planti manmeri i kisim sik bilong pamuk, olsem AIDS, na dispela i soim klia olsem savetingting bilong dispela graun em longlong samting.—2 Pita 2:19.

6. Olsem wanem tingting bilong ol manmeri long maritpasin i stret wantaim laik bilong Satan?

⁶ Tingting bilong ol manmeri long maritpasin i stret wantaim laik bilong Satan. Marit na maritpasin em ol samting God i givim olsem presen, na Satan i laik bai ol manmeri i mekim nabaut long ol dispela presen. (Efe. 2:2) Taim ol manmeri i mekim pasin pamuk, ol i mekim nabaut long presen Jehova i givim bilong kamapim pikinini, na ol i pasim rot bilong ol yet long kisim laip oltaim.—1 Kor. 6:9, 10.

7-8. Olsem wanem Baibel i helpim yumi long holim stretpela tingting long maritpasin?

⁷ Ol man husat i bihainim savetingting bilong graun, ol i tok bilas long ol lo bilong Baibel long stretpela pasin, na ol i tok ol dispela lo i no stret. Ol inap askim olsem, ‘Wai na God i wokim yumi wantaim laik bilong mekim maritpasin na em i tok yumi no ken bihainim dispela laik?’ Ol i kamapim dispela askim bikos ol i pilim olsem i stret long ol manmeri i bihainim olgeta laik bilong ol. Tasol Baibel i tok ol i mas kontrolim ol laik bilong ol. Baibel i skulim yumi olsem yumi inap kontrolim ol laik nogut bilong yumi. (Kol. 3:5) Marit em presen i kam long Jehova, na em rot bilong ol  marit i ken inapim stretpela laik bilong ol long sait bilong maritpasin. (1 Kor. 7:8, 9) Ol marit i kisim amamas long dispela presen na i no gat wok long ol i tingting planti na wari long ol hevi we i save painim ol lain i mekim pasin pamuk.

⁸ Baibel i helpim yumi long holim stretpela tingting long maritpasin. Em rot bilong ol marit long kisim amamas. (Prov. 5:18, 19) Tasol Baibel i tok: “Yupela olgeta wan wan i mas save long rot bilong bosim bodi bilong yupela yet long pasin i holi na long pasin God i orait long en. Na i no long pasin bilong bel i kirap tru long slip wantaim narapela, olsem ol lain i no save long God i save mekim.”—1 Tes. 4:4, 5.

9. (a) Olsem wanem lain bilong Jehova long haptaim namel long 1920 na 1930 i bihainim nambawan gutpela savetingting i stap long Baibel? (b) Wanem gutpela edvais i stap long 1 Jon 2:15, 16? (c) Olsem Rom 1:24-27 i kamapim, yumi mas sakim wanem ol pasin doti?

⁹ Long haptaim namel long 1920 na 1930, ‘ol man i no sem moa long pasin ol i mekim,’ tasol lain bilong Jehova i no larim tingting bilong ol manmeri i paulim ol. (Efe. 4:19) Ol i bihainim gut ol lo bilong Jehova. Watch Tower bilong Me 15, 1926 i tok “ol Kristen i mas i stap klin long tingting na pasin, moa yet long sait bilong tingting em man na meri i gat long narapela narapela o pasin ol i mekim long narapela narapela.” Maski ol manmeri i lusim stretpela pasin, lain bilong Jehova i bihainim nambawan gutpela savetingting i stap long Baibel. (Ritim 1 Jon 2:15, 16.) Yumi amamas tru olsem yumi gat Tok Bilong God! Yumi tenkyu tru olsem Jehova i givim kaikai bilong strongim bilip bilong yumi long taim stret, na dispela i helpim yumi long sakim savetingting bilong dispela graun. *—Ritim Rom 1:24-27.

10-11. Baibel i tok wanem samting bai kamap long haptaim bilong las de?

¹⁰ Baibel i tok lukaut olsem long haptaim bilong las de, “ol man bai laikim ol yet tasol.” (2 Tim. 3:1, 2) Ol manmeri bilong dispela graun i gat dispela pasin bilong laikim ol yet. Wanpela buk i tok, long ol yia bihain long 1970, planti buk moa i “skulim ol man long olsem wanem ol yet inap mekim laip bilong ol i kamap gutpela.” Sampela buk i “kirapim ol man long save na amamas long pasin bilong ol yet na ol samting i kamap long laip bilong ol.” Wanpela buk i tok: “Yu mas laikim tru man i luk stail tru, em i save amamas, na em i gat gutnem winim olgeta narapela lain—yu yet i dispela man.” Dispela buk i kirapim “man long bihainim maus bilong bel na em yet i ken makim wanem ol pasin na kastam em i laik bihainim.”

¹¹ Yu bin harim kain tok olsem long bipo? Satan i bin kirapim Iv long mekim olsem. Satan i tokim Iv olsem em inap “kamap wankain olsem God, na bai [em] i save long wanem samting i gutpela na wanem samting i nogut.” (Stt. 3:5) Long nau, planti manmeri i tingim ol yet, olsem na ol i no laik bai ol narapela—o God—i tokim ol long wanem pasin i stret na wanem pasin i no stret. Dispela i kamap ples klia long tingting ol manmeri i holim long sait bilong marit.

12. Ol manmeri bilong dispela graun i holim wanem tingting long sait bilong marit?

¹² Baibel i kirapim ol poroman marit long  rispektim narapela narapela na inapim tok promis bilong ol. Baibel i kirapim ol long pas gut wantaim, na i tok: “Man bai lusim papa na mama bilong em na em bai pas wantaim meri bilong em, na tupela bai kamap wanpela bodi.” (Stt. 2:24) Tasol savetingting bilong dispela graun i kirapim ol poroman marit long tingim laik bilong ol yet tasol. Wanpela buk bilong divos i tok: “Long sampela bung bilong marit, pastaim ol i save tok promis olsem ‘inap long olgeta taim mitupela i stap laip,’ tasol ol i senisim na tok ‘inap long laikim bilong mitupela long narapela narapela i pinis.’” Dispela kain tingting i mekim na planti marit i bruk na famili i stap bel hevi. Dispela i soim klia tru olsem ol manmeri bilong graun i holim longlong tingting long sait bilong marit.

13. Wai na Jehova i heitim ol man i gat pasin antap?

¹³ Baibel i tok: “Olgeta man em pasin antap i stap long bel bilong ol, ol i stingpela samting long ai bilong Jehova.” (Prov. 16:5) Wai na Jehova i heitim ol manmeri i gat pasin antap? Wanpela risen em olsem, dispela em pasin bilong Satan. Tingim, Satan i laik tru bai Jisas—man God i yusim long wokim olgeta samting—i brukim skru na lotuim em! (Mat. 4:8, 9; Kol. 1:15, 16) Dispela kain tingting i soim klia tru olsem savetingting bilong dispela graun em longlong samting long ai bilong God.

14. Olsem wanem Rom 12:3 i helpim yumi long holim stretpela tingting long yumi yet?

¹⁴ Baibel i helpim yumi long holim stretpela tingting long yumi yet. Baibel i tok i no gat rong long laikim yumi yet. Jisas i tok: “Yu mas laikim ol arapela man olsem yu laikim yu yet,” na dispela i soim olsem i stret yumi tingim yumi yet long ol samting yumi nidim. (Mat. 19:19) Tasol Baibel i no kirapim yumi long apim nem bilong yumi yet na luk daun long ol narapela, nogat. Em i tok: “Yupela i  no ken kros o hambak. Nogat. Yupela i mas daunim yupela yet na tingim olsem ol arapela i winim yupela.”—Fili. 2:3; ritim Rom 12:3.

15. Wanem samting i mekim na yu pilim olsem skultok bilong Baibel i gutpela bilong helpim yumi?

¹⁵ Long nau, planti saveman bilong dispela graun i tok bilas long skultok bilong Baibel. Ol i tok sapos yu holim tingting olsem ol narapela i winim yu, ol narapela bai tingim yu olsem man i no gat strong na ol bai bosim yu. Tasol tru tru, tingting bilong dispela graun i kirapim ol manmeri long mekim wanem? Ol manmeri i stap olsem wanem? Taim ol i tingim ol yet tasol, yu ting ol i stap amamas? Yu ting famili bilong ol i stap amamas? Yu ting ol i gat ol gutpela pren? Yu ting ol i pas gut wantaim God? Wanem ol manmeri i stap amamas moa? Ol manmeri i bihainim savetingting bilong dispela graun, o ol manmeri i bihainim savetingting bilong Baibel?

16-17. Yumi ken tenkyu tru long wanem samting? Bilong wanem?

¹⁶ Ol man husat i bihainim skultok bilong dispela graun, ol i olsem ol turis em ol i paul long rot na ol i askim narapela narapela long soim rot i stret long bihainim. Jisas i tingim ol saveman long taim bilong em na em i tok: “Ol i aipas na ol i laik soim rot. Olsem na sapos wanpela aipas i soim rot long narapela aipas, orait tupela wantaim bai pundaun long hul.” (Mat. 15:14) Tru tumas, savetingting bilong dispela graun em longlong samting long ai bilong God.

¹⁷ Oltaim ol skultok bilong Baibel i “gutpela long skulim man, stretim man, mekim ol samting i kamap stret, na skulim ol man long stretpela pasin.” (2 Tim. 3:16) Yumi tenkyu tru olsem Jehova i yusim oganaisesen bilong em na helpim yumi long sakim savetingting bilong dispela graun! (Efe. 4:14) God i givim ol gutpela tok bilong strongim bilip bilong yumi na bai yumi bihainim yet ol lo bilong em long Baibel. Yumi gat gutpela blesing tru long bihainim nambawan gutpela savetingting i stap long Baibel!