1-2. Planti Witnes i bungim wanem ol hevi?

APOSEL POL i kirapim Timoti na olgeta Kristen long inapim wok bilong God ol i mekim. (2 Tim. 4:5) Yumi olgeta i laik bihainim edvais bilong Pol na givim bel olgeta long mekim wok bilong God. Tasol sampela taim i hatwok long mekim olsem. Planti bratasista bilong yumi i save strongim bel na mekim wok autim tok. (2 Tim. 4:2) Olsem, sampela bratasista bilong yumi i stap long ol kantri we gavman i putim tambu long wok lotu bilong yumi. Tasol ol i autim tok yet maski ol i save olsem ol inap i go kalabus!

² Ol lain bilong Jehova i karim planti hevi tru we inap daunim ol. Olsem, planti bilong ol i mas wok inap planti aua bilong kisim mani long baim ol samting em famili bilong ol i nidim. Ol i laik mekim bikpela wok moa long autim tok, tasol long pinis bilong wik ol i no gat strong long mekim olsem. Ol narapela i no inap mekim bikpela wok bilong lotuim Jehova bikos ol i gat bikpela sik o ol i lapun, na sampela i no inap lusim haus bilong ol. Sampela narapela i pilim olsem ol i no fit long mekim ol gutpela wok. Mary * em wanpela sista i stap long Midel Is, em i tok: “Taim mi bel hevi, mi mas wok hat stret long kontrolim filings bilong mi na dispela i save pinisim olgeta strong bilong mi. Mi save pilim gilti bikos dispela i pinisim taim na strong bilong mi long mekim wok autim tok.”

3. Yumi bai skelim wanem ol samting long dispela atikol?

³ Maski yumi karim wanem ol hevi, Jehova inap givim strong yumi nidim bilong mekim yet wok bilong em inap long skel bilong yumi wan wan. Paslain long yumi skelim hau Jehova inap helpim yumi, yumi ken skelim hau em i bin strongim Pol na Timoti long inapim tru wok bilong ol maski ol i karim ol hevi.

4. Pol i bin karim wanem ol hevi?

⁴ Pol i bin karim planti hevi. Olsem na em i nidim tru helpim bilong Jehova, moa yet taim ol birua i paitim em, stonim em, na kalabusim em. (2 Kor. 11:23-25) Pol i tok sampela taim em i mas wok hat tru long daunim ol tingting kranki bilong em yet. (Rom 7:18, 19, 24) Na tu, em i gat wanpela sik i olsem “nil i sutim skin” bilong em, na em i laik tru bai God i pinisim dispela sik bilong em.—2 Kor. 12:7, 8.

5. Pol i mekim wanem ol gutpela wok maski em i karim ol hevi?

⁵ Jehova i strongim Pol long inapim wok autim tok bilong em maski em i karim ol hevi. Tingim ol gutpela wok Pol i bin mekim. Taim em i kalabus long wanpela haus long Rom, em i givim bel tru long autim tok long planti man; em i autim tok long ol hetman bilong ol Juda na ol bikman bilong gavman tu. (Apo. 28:17; Fili. 4:21, 22) Na em i autim tok tu long lain Gad Bilong Sisar na long olgeta man husat i visitim em. (Apo. 28:30, 31; Fili. 1:13) Long dispela taim tu, Pol i bin raitim ol pas we i bin strongim tru ol Kristen long pastaim na i helpim ol Kristen long nau tu. Na tu, eksampel bilong Pol i bin strongim kongrigesen long Rom, na dispela i kirapim ol brata long “strong moa yet long autim tok bilong God na ol i no pret.” (Fili. 1:14) Maski sampela taim Pol i no inap mekim bikpela wok bilong God olsem em i laik mekim, em i mekim samting em inap long mekim, na dispela i bin “helpim wok bilong gutnius i go bikpela moa.”—Fili. 1:12.

6. Olsem 2 Korin 12:9, 10 i kamapim, wanem samting i bin helpim Pol long inapim wok bilong God?

⁶ Pol i luksave olsem em inap mekim wok bilong Jehova long strong bilong God, na i no long strong bilong em yet. Em i tok strong bilong God i “kamap gutpela olgeta taim [em i] no gat strong.” (Ritim 2 Korin 12:9, 10.) Long rot bilong holi spirit bilong em, Jehova i givim strong long Pol long inapim wok bilong em, maski ol man i bin mekim nogut long em, kalabusim em, na em i karim ol narapela hevi tu.

7. Timoti i karim wanem ol hevi we inap pasim em long inapim wok bilong em?

⁷ Timoti em yangpela poroman bilong Pol, na em tu i kisim helpim long strong bilong God long inapim wok bilong em. Em i bin go wantaim Pol long ol longwe ples bilong mekim wok autim tok. Na tu, Pol i bin salim Timoti i go visitim ol kongrigesen na strongim ol.  (1 Kor. 4:17) Ating Timoti i pilim olsem em i no inap mekim ol gutpela wok. Na ating em risen wai Pol i bin tokim em olsem: “No ken larim wanpela man i luk daun long yu bikos yu yangpela man.” (1 Tim. 4:12) Long dispela taim tu, Timoti i ‘kisim sik planti taim’—na dispela i olsem wanpela nil i sutim skin bilong em. (1 Tim. 5:23) Tasol em i save olsem holi spirit bilong Jehova bai strongim em long autim yet gutnius na mekim ol wok bilong helpim ol wanbilip Kristen bilong em.—2 Tim. 1:7.

8. Long nau Jehova i save strongim lain bilong em long wanem ol rot?

⁸ Long nau Jehova i save givim lain bilong em “strong i winim strong bilong yumi ol man” na bai ol i ken stap gut yet long em na mekim wok bilong em. (2 Kor. 4:7) Yumi ken stori long 4-pela rot Jehova i save strongim yumi na helpim yumi long stap gut yet long em: em beten, Baibel, bung wantaim ol wanbilip Kristen, na wok autim tok bilong yumi.

9. Olsem wanem beten inap helpim yumi?

⁹ Kisim strong long rot bilong beten. Long Efesus 6:18, Pol i kirapim yumi long beten long God “long olgeta kain taim.” Taim yumi mekim olsem, God bai strongim yumi. Jonnie i save stap long Bolivia, em i lukim olsem God i bin helpim em taim em i karim ol hevi. Meri bilong em na papamama bilong em i kisim bikpela sik long wankain taim. Jonnie i pilim hatwok long mekim ol samting bilong lukautim ol. Mama bilong em i dai, na longpela haptaim i lus long meri bilong em na papa bilong em long kamap orait long sik bilong ol. Jonnie i tingim bek ol samting i kamap, na em i tok: “Taim mi bel hevi tru, wanpela samting i bin helpim mi tru em long beten long God na tokim em stret long ol filings bilong mi.” Jehova i givim strong em Jonnie i nidim bilong karim hevi. Ronald em wanpela elda long Bolivia, em i painimaut olsem mama bilong em i gat sik kensa. Wanpela mun bihain, mama bilong em i dai. Wanem samting i helpim Ronald long karim dispela hevi? Em i tok: “Taim mi beten long Jehova, mi save tokim em long tingting na filings bilong mi. Mi save tru olsem Jehova i save gut moa long mi winim ol narapela, na em i save gut moa long mi winim mi yet tu.” Sampela taim, yumi inap pilim olsem yumi no inap karim ol hevi i painim yumi o yumi no save yumi bai tok wanem taim yumi beten. Tasol Jehova i laik bai yumi beten long em maski yumi pilim hatwok long tokim em long ol tingting na ol filings tru bilong yumi.—Rom 8:26, 27.

10. Olsem Hibru 4:12 i kamapim, wai na em i bikpela samting long ritim Baibel na tingim tingim ol tok bilong em?

¹⁰ Kisim strong long rot bilong Baibel. Pol i bin larim ol tok bilong Rait Holi i strongim em na mekim isi bel bilong em, na yumi tu ken mekim wankain. (Rom 15:4) Taim yumi ritim Baibel na tingim tingim long bel ol tok bilong en, Jehova i ken yusim holi spirit bilong em long helpim yumi long save gut long hau yumi ken bihainim ol dispela tok. (Ritim Hibru 4:12.) Ronald em yumi stori pinis long em, em i tok: “Mi amamas tru olsem mi kisim pasin bilong ritim sampela ves bilong Baibel long olgeta nait. Oltaim mi save tingim tingim long bel ol pasin bilong Jehova na hau em i save lukautim gut lain bilong em. Dispela i save strongim mi tru.”

11. Olsem wanem tok bilong Baibel i bin helpim wanpela sista i bel hevi?

¹¹ Yumi inap holim stretpela tingting long ol hevi i painim yumi taim yumi tingim tingim long bel ol tok bilong Baibel. Lukim olsem wanem Baibel i helpim wanpela wido husat i bin  bel hevi tru. Wanpela elda i tokim em olsem em inap kisim ol gutpela skul taim em i ritim Buk Jop. Taim em i stat long rit, em i lukim olsem Jop i gat ol tingting kranki. Long tingting bilong em, em i wok long tok olsem: “Jop! No ken tingting tumas long ol hevi bilong yu!” Tasol bihain em i luksave olsem em i mekim wankain pasin olsem Jop i bin mekim. Tok bilong Baibel i helpim em long senisim tingting em i gat na i strongim em long karim hevi long man bilong em i dai.

12. Olsem wanem Jehova i save yusim ol wanbilip long strongim yumi?

¹² Kisim strong long rot bilong bung wantaim ol wanbilip Kristen. Narapela rot Jehova i save strongim ol Kristen em long rot bilong ol wanbilip. Pol i gat laik tru long bungim ol bratasista bilong em na bai ol i ken strongim em na em i ken strongim ol. (Rom 1:11, 12) Mary em yumi stori pinis long em, em i save amamas tru long bung wantaim ol wanbilip Kristen. Em i tok: “Jehova i yusim ol bratasista em ol i no save long ol hevi bilong mi. Ol i mekim ol gutpela tok bilong strongim mi na ol i raitim kad na salim long mi, na em samting mi nidim tru. Mi kisim helpim tu taim mi toktok wantaim ol narapela sista em ol i karim ol wankain hevi olsem mi, na mi lainim planti samting long ekspiriens bilong ol. Na oltaim ol elda i helpim mi long pilim olsem mi dia tumas insait long kongrigesen.”

13. Yumi ken mekim wanem bilong strongim narapela narapela long ol miting bilong kongrigesen?

¹³ Wanpela gutpela ples we yumi ken strongim narapela narapela em long ol kongrigesen miting. Taim yu go long miting, yu ken strongim ol narapela long rot bilong tokim ol olsem yu laikim ol na yu pilim tru ol gutpela wok ol i mekim! Tingim dispela eksampel. Paslain long miting i kirap, wanpela elda nem bilong em Peter, i tokim wanpela sista em man bilong em i no wanpela brata, olsem: “Mipela i amamas tru long lukim yu long miting. Oltaim yu save redim 6-pela pikinini bilong yu na yu redim ol tu long bekim ol tok.” Em i aiwara wantaim na i tokim elda: “Mi pilim tru dispela tok yu mekim na dispela tok i strongim mi tru long nau.”

14. Olsem wanem wok autim tok i save helpim yumi?

¹⁴ Kisim strong long rot bilong autim tok. Taim yumi autim tok i tru bilong Baibel long ol narapela, yumi save amamas maski ol man i putim yau long ol tok yumi autim o nogat. (Prov. 11:25) Wanpela sista, nem bilong em Stacy, i luksave long hau wok autim tok i bin strongim em. Taim wanpela long famili bilong em i raus long kongrigesen, em i bel hevi tru na em i tingting olsem, ‘Ating mi no bin mekim olgeta samting mi inap mekim bilong helpim em.’ Oltaim Stacy i tingting long dispela samting. Wanem samting i helpim em long karim dispela hevi? Wok autim tok! Taim em i autim tok, em i putim tingting i go long ol manmeri long teritori em ol i nidim helpim bilong em. Em i tok: “Namel long dispela haptaim, Jehova i givim mi wanpela Baibel stadi husat i wok long bihainim ol tok em i lainim. Dispela i bin strongim mi tru. Wok autim tok em samting we i bin helpim mi tru.”

15. Yu kisim wanem skul long tok bilong Mary?

¹⁵ Sindaun bilong sampela i mekim na ating ol i pilim olsem ol i no inap mekim bikpela wok moa bilong autim tok. Sapos yu pilim olsem, tingim olsem Jehova i save amamas taim yu givim bes bilong yu. Tingim gen eksampel bilong Mary. Taim em i muv i go long wanpela ples we ol man i mekim narapela tokples, em i pilim olsem em i no inap mekim bikpela wok bilong autim tok. Em i tok: “Inap sampela haptaim mi save mekim sotpela tok tasol, o ritim wanpela Baibel ves, o givim wanpela liklik nius taim mi  autim tok.” Em i skelim em yet wantaim ol man i save mekim dispela tokples na em i pilim olsem em i no mekim bikpela wok. Tasol bihain em i senisim tingting bilong em. Em i luksave olsem Jehova inap yusim em maski em i no save gut long mekim dispela tokples. Em i tok: “Ol tok i tru bilong Baibel ol i simpol na ol inap senisim i stap bilong ol man.”

16. Wanem samting i ken helpim ol lain em ol i laik autim tok, tasol ol i no inap lusim haus?

¹⁶ Jehova i save olsem sampela bilong yumi i laik autim tok, tasol yumi no inap lusim haus bilong yumi. So em i ken opim rot na bai yumi inap autim tok long ol lain i lukautim yumi o yumi inap autim tok long ol dokta na ol nes. Sapos yumi skelim ol wok yumi mekim long nau wantaim ol wok yumi mekim long bipo, dispela inap mekim yumi bel hevi. Tasol sapos yumi luksave olsem Jehova i wok long helpim yumi long nau, yumi bai gat strong long karim wanem ol hevi i painim yumi na yumi bai amamas.

17. Olsem Eklisiastis 11:6 i kamapim, wai na yumi mas autim tok yet maski yumi no lukim gutpela samting i kamap?

¹⁷ Yumi no save wanem ol sid bilong tok i tru yumi planim bai kru na gro. (Ritim Eklisiastis 11:6.) Tingim eksampel bilong Barbara, em wanpela sista i gat 80 krismas samting na oltaim em i save autim tok long rot bilong telefon na raitim pas. Long wanpela pas em i raitim, em i salim tu Wastaua bilong Mas 1, 2014, we i gat atikol “Samting God i Mekim Bilong Helpim Yu.” Em i no save olsem em i salim dispela pas i go long tupela marit em ol i no stap moa olsem ol Witnes Bilong Jehova. Tupela i ritim dispela magasin planti taim. Dispela man marit i pilim olsem Jehova i toktok stret long em. Tupela i bin lusim ol miting Kristen winim 27 yia, tasol nau tupela i stat long kam long ol miting gen na bihain ol i stap gen olsem ol Witnes Bilong Jehova. Barbara i amamas tru na em i kisim bikpela strong taim em i luksave long gutpela samting i kamap long dispela pas em i raitim!

18. Yumi ken mekim wanem na bai God i ken strongim yumi?

¹⁸ Jehova i save strongim yumi long planti rot, olsem beten, Baibel, pasin bilong bung wantaim ol wanbilip, na wok autim tok. Taim yumi yusim gut ol dispela samting, yumi soim olsem yumi bilip tru olsem Jehova i laik helpim yumi na yumi save tru olsem em bai helpim yumi. Oltaim yumi mas trastim Papa bilong yumi long heven, em i save amamas tru long “soim strong bilong em long helpim ol man husat i givim bel olgeta long em.”—2 Sto. 16:9.