Samting i kamap long dispela nait i bin kirapim mi long kisim save long Man Bilong Wokim yumi. Tasol paslain long mi stori long samting i kamap long dispela nait i tudak nogut tru, bai mi stori long ol samting i bin painim mi taim mi liklik we i stiaim tingting bilong mi na redim bel bilong mi long painim God.

Mi bon long 1937 long Guesnain, em wanpela maining taun long noten Frans. Papa bilong mi i save wok long kol main. Na mi kisim skul long em long pasin bilong wok hat tru. Mi kisim pasin bilong em long strong long mekim stretpela pasin, dispela i bin kirapim em long helpim ol man em ol i bin wok long ol kol main we kampani i no bin mekim gut long ol. Papa i laik helpim ol, olsem na em i insait long ol oganaisesen we i pait long raits bilong ol man i save wok long ol main. Na tu, em i bel hevi long ol pasin nogut bilong ol pris long hap bilong mipela. Planti i gat gutpela sindaun; tasol ol i save askim long kaikai na mani long ol man i save wok long ol kol main em ol i no gat gutpela sindaun. Papa i belhat nogut tru long pasin bilong ol pris olsem na em i no skulim mi long ol samting bilong lotu. Na mipela i no save stori long God.

 Taim mi go bikpela, mi tu wok long heitim pasin i no stret. Dispela pasin i makim tu, pasin ol man i mekim long ol man bilong narapela kantri i kam stap long Frans. Mi save pilai soka wantaim ol pikinini bilong ol man bilong narapela kantri na mi save amamas long stap wantaim ol. Na mama bilong mi em bilong Polan, em i no bilong Frans. Olsem na mi laik tru long ol man bilong kain kain kantri i stap bel isi na sindaun gut wantaim.

Mi joinim ami long 1957. Em hau mi go stap antap long ol maunten bilong Aljiria long dispela nait i tudak nogut tru olsem mi bin stori pinis. Bihain long mi singaut strong olsem: “God! O, God!” Dispela samting i bin kam long mi em i no wanpela birua soldia, tasol em wanpela wel donki! Mi kisim bel isi! Tasol dispela samting i bin kamap na woa i mekim na mi tingim tru as bilong laip bilong yumi. Yumi stap bilong mekim wanem? God i save tingim yumi? Bai i gat bel isi i stap oltaim?

Bihain taim mi kisim malolo na stap long haus bilong papamama bilong mi, mi bungim wanpela Witnes Bilong Jehova. Em i givim mi wanpela kopi bilong La Sainte Bible, em Baibel bilong ol Katolik long tokples Frans, na mi stat long ritim taim mi go bek long Aljiria. Wanpela tok bilong Baibel i kirapim tru tingting bilong mi em Revelesen 21:3, 4. Em i tok: “Haus sel bilong God i stap wantaim ol manmeri . . . Na em bai mekim drai aiwara i stap long ai bilong ol, na bai i no gat dai moa, na ol bai i no bel hevi moa na krai moa, na ol bai i no inap pilim pen gen.” * Mi kirap nogut long ol dispela tok. Mi tingting: ‘Ol dispela samting bai kamap tru tru?’ Long dispela taim mi no save liklik long God na Baibel.

Taim mi pinis long ami long 1959, mi bungim wanpela Witnes nem bilong em François, na em i skulim mi long planti tok i tru bilong Baibel. Olsem, em i soim mi long Baibel olsem God i gat wanpela nem tru, em Jehova. (Sng. 83:18) François i eksplenim tu olsem Jehova bai bringim stretpela pasin long dispela graun, mekim graun i kamap paradais, na truim tok bilong Revelesen 21:3, 4.

Ol dispela tok mi lainim i klia tru na mi pilim tru long bel. Tasol mi belhat nogut tru long ol pris na mi laik mekim tok bilong daunim ol bikos ol tok ol i skulim ol man long en i no stap long Baibel! Mi holim wankain tingting olsem papa, na mi yet i laik stretim hevi bilong pasin i no stret na mi no laik wet. Mi laik mekim samting hariap!

François na ol narapela Witnes pren bilong mi i helpim mi long kisim bel isi. Ol i stori gut long mi olsem wok bilong yumi olsem ol Kristen em i no bilong mekim wok jas, tasol em bilong helpim ol man long bilip na wetim gutpela samting i kamap long rot bilong gutnius bilong Kingdom Bilong God. Em wok Jisas i bin mekim na em i givim dispela wok long ol disaipel bilong em long mekim. (Mat. 24:14; Luk 4:43) Na tu, mi lain long toktok gut wantaim ol lain long gutpela pasin, maski ol i gat wanem kain bilip. Olsem Baibel i tok: “Wokboi bilong Bikpela i no gat wok long pait, nogat. Em i gat wok long isi long olgeta man.”—2 Tim. 2:24.

Mi mekim ol senis na kisim baptais na kamap wanpela Witnes Bilong Jehova long wanpela  kibung sekit i kamap long 1959. Long dispela hap mi bungim wanpela yangpela sista nem bilong em Angèle, na mi laikim em tru. Mi stat long visitim kongrigesen we em i go long en, na long 1960, mitupela i marit. Em wanpela gutpela meri tru, naispela meri marit, na gutpela presen i kam long Jehova.—Prov. 19:14.

Long ol yia i go pinis, mi lainim planti samting long ol brata i gat savetingting na ekspiriens. Bikpela samting em olsem: Bilong mekim gut wanpela asainmen, yumi mas daunim yumi yet na bihainim savetok i stap long Provep 15:22, olsem: “Gutpela samting i kamap taim man i kisim tingting bilong planti edvaisa.”

Long 1964, mi stat long lukim hau ol dispela tok bilong Baibel i tru. Long dispela yia, mi kirap long mekim wok wasman sekit, na mi visitim ol kongrigesen bilong strongim ol bratasista na helpim ol long kamap strong long bilip. Long dispela taim, mi gat 27 krismas tasol na mi no gat ekspiriens. So mi mekim ol popaia. Tasol mi traim long kisim skul long ol popaia bilong mi. Bikpela samting moa, mi lainim planti gutpela samting long ol man i gat ekspiriens em ol i stap olsem ol “edvaisa.”

Mi tingim wanpela eksampel taim mi bin kirap tasol long mekim wok sekit. Bihain long mi visitim wanpela kongrigesen long Paris, wanpela gutpela brata i askim mi sapos em inap toktok liklik wantaim mi taim mitupela yet i stap. Na mi tok: “Em orait.”

Em i askim mi olsem: “Louis, taim wanpela dokta i go long haus bilong wanpela sikman, em i save go lukim husat?”

Mi tok: “Sikman.”

Em i tok: “Em stret. Tasol mi lukim olsem yu lusim planti taim moa long stap wantaim ol man i strong long bilip, olsem wasman bilong kongrigesen. Kongrigesen bilong mipela i gat planti bratasista em ol i bel hevi, ol i nupela insait long tok i tru, o ol i gat pasin bilong sem. Ol bai amamas tru sapos yu lusim taim long stap wantaim ol, o go kaikai long haus bilong ol.”

Edvais bilong dispela gutpela brata i helpim mi tru. Mi pilim tru long bel pasin bilong em long laikim ol sipsip bilong Jehova. So mi daunim mi yet na wantu tasol mi kirap long bihainim tok bilong em. Mi tenkyu tru long Jehova long kain ol brata olsem.

Long yia 1969 na 1973, ol i makim mi olsem ovasia bilong Dipatmen Bilong Kaikai long 2-pela  intenesenel kibung i kamap long Colombes, Paris. Long kibung i kamap long 1973, mipela i mas tilim kaikai long 60,000 manmeri insait long 5-pela de! Mi no save hau mipela bai mekim olsem. Tasol samting i helpim mipela tru em tok bilong Provep 15:22—kisim tingting bilong planti edvaisa. Mi kisim edvais bilong planti man em ol i strong long bilip na ol i gat ekspiriens long wok bilong tilim kaikai. I gat ol man bilong katim abus, ol fama, ol man bilong kuk, na ol man bilong baim kaikai. Mipela olgeta i wok bung wantaim bilong inapim dispela bikpela wok tru.

Long 1973, ol i singautim mi na meri bilong mi long go wok long Betel long Frans. Fes asainmen bilong mi long hap i gat bikpela hatwok bilong en. Mi mas bringim ol litresa i go long ol bratasista bilong yumi long Kamarun, em wanpela kantri long Afrika we gavman i bin tambuim wok bilong yumi namel long 1970 na 1993. Long dispela taim gen, mi no save bai mi mekim wanem. Ol brata i lukautim dispela wok long Frans i luksave long dispela na ol i strongim mi olsem: “Ol bratasista bilong yumi long Kamarun i nidim ol pablikesen bilong strongim bilip bilong ol. Yumi mas givim ol!” Na mipela i givim ol.

Mi mekim sampela raun i go long ol kantri i stap long boda bilong Kamarun long bungim sampela elda long dispela kantri. Ol dispela man i gat strongpela bel na savetingting i helpim mi long mekim ol arensmen bilong kisim ol pablikesen i go insait long Kamarun. Jehova i blesim hatwok bilong mipela. So insait long 20 yia olgeta, ol manmeri bilong God long dispela kantri i bin kisim Wastaua na Wok Kingdom Bilong Yumi long olgeta wan wan mun.

Stat long taim mi na Angèle i pren, mi lukim olsem em i save laikim tru Jehova. Taim mitupela i marit, mi lukim klia dispela pasin bilong em. Long apinun bilong de mitupela i marit, em i tokim mi long beten na tokim Jehova long laik  bilong mitupela long mekim wok bilong em inap oltaim olsem wanpela marit. Jehova i bekim dispela beten bilong mipela.

Angèle i helpim mi long trastim tru Jehova. Olsem: Long 1973 taim ol i singautim mipela long go long Betel, mi gat tupela tingting bikos mi laikim wok sekit. Tasol Angèle i helpim mi long tingim olsem mitupela i dediketim laip bilong mitupela long Jehova. Olsem na yumi mas mekim wanem wanem samting em oganaisesen bilong em i tokim yumi long mekim. (Hib. 13:17) Mi wanbel long dispela tok! So mipela i go long Betel. Mitupela i marit inap longpela taim nau, na insait long ol dispela yia savetingting bilong meri bilong mi, pasin bilong em long wokim gut tingting, na pasin bilong em long putim wok bilong God i stap nambawan i strongim marit bilong mitupela na helpim mitupela long mekim ol gutpela disisen.

Nau mitupela i lapun, na Angèle i wok yet long stap olsem gutpela meri marit na sapotim mi gut. Olsem, bilong insait long ol skul tiokratik, em planti bilong ol i save kamap long tok Inglis, mi na Angèle i mas wok strong long kamap gutpela moa long dispela tokples. Dispela i makim olsem mipela i mas joinim wanpela Inglis kongrigesen, maski mipela i gat 75 krismas long dispela taim. Mi mekim wok olsem wanpela memba bilong Brens Komiti bilong Frans, olsem na mi hatwok long painim taim long lainim dispela tokples. Tasol mi na Angèle i save helpim narapela narapela. Nau mitupela i winim pinis 80 krismas, tasol mipela i wok yet long redim ol miting long tok Inglis na tok Frans. Na tu, mipela i save wok strong long go long ol miting na autim tok wantaim kongrigesen bilong mipela. Jehova i blesim hatwok bilong mipela long lainim tok Inglis.

Mitupela i kisim gutpela blesing tru long 2017. Mitupela Angèle i amamas tru long go long Skul Bilong Ol Brens Komiti na Meri Bilong Ol i kamap long Watchtower Educational Center long Patterson, New York.

Tru tumas, Jehova em i Nambawan Bikpela Tisa. (Ais. 30:20) Olsem na maski yumi lapun o yangpela, yumi inap kisim nambawan gutpela ediukesen! (Lo 4:5-8) Na mi luksave olsem ol yangpela husat i save putim yau long Jehova na ol bratasista i gat ekspiriens, ol i save mekim ol gutpela disisen long laip na kamap ol gutpela wokman bilong Jehova. Olsem Provep 9:9 i tok: “Givim tok long man i gat savetingting na savetingting bilong em bai kamap bikpela moa. Skulim stretpela man, na em bai surikim save bilong em.”

Sampela taim mi save tingim dispela nait i tudak nogut tru long ol maunten bilong Aljiria inap 60 yia i go pinis. Long dispela taim mi no save long wanem samting bai painim mi bihain. Mi lainim planti samting long ol narapela! Jehova i givim mi na Angèle gutpela laip tru. Mitupela i strongim tingting olsem mipela bai wok yet long kisim skul long Papa bilong mipela long heven na ol bratasista em ol i gat savetingting na ekspiriens em ol i laikim em.