1-2. Stori long olsem wanem ol stiatok bilong Baibel inap i gat bikpela mining moa long yumi taim sindaun i senis.

 LONG de bilong marit, wanpela man marit na naispela meri bilong em i putim gut yau long tok bilong Baibel em elda i mekim long marit. Ol i save gut long ol stiatok em elda i kamapim. Tasol kirap long dispela de na i go, ol dispela tok i gat bikpela mining moa long ol. Bilong wanem? Long wanem, nau tupela bai bihainim ol dispela stiatok olsem wanpela marit.

² Dispela em wankain tu taim tupela marit Kristen i kamap papamama. Long ol yia i go pinis, ol i bin harim planti tok i stori long hau long mekim bikpela long ol pikinini. Tasol nau ol dispela stiatok i bikpela samting moa long ol. Ol bai i gat pikinini bilong ol yet na mekim bikpela long em. Em bikpela wok tru! Tru tumas, taim sindaun bilong yumi i senis, sampela stiatok bilong Baibel em yumi save gut long en, nau ol i gat bikpela mining moa long yumi. Dispela em wanpela risen na ol man i lotuim Jehova i save ritim Baibel, na olsem God i tokim ol king bilong Israel long mekim, ol i mas tingim tingim ol dispela tok “long olgeta de” long laip bilong ol.​—Lo 17:19.

3. Yumi bai stori long wanem samting long dispela atikol?

³ Ol papamama Kristen, yupela i gat nambawan gutpela wok tru, em long skulim ol pikinini bilong yupela long Jehova. Yupela i laik skulim ol long God, na mekim sampela samting moa. Yupela i laik helpim ol pikinini long laikim em tru. Yupela i ken mekim wanem long putim pasin bilong laikim Jehova long bel bilong ol pikinini? Long dispela atikol, yumi bai stori long 4-pela stiatok bilong Baibel we inap helpim yupela ol papamama.  (2 Tim. 3:16) Na tu, yumi bai stori long hau sampela papamama Kristen i bin kisim helpim taim ol i bihainim ol stiatok bilong Baibel.

4. Wanem wanpela stiatok inap helpim ol papamama long putim pasin bilong laikim Jehova long bel bilong ol pikinini? (Jems 1:5)

⁴ Stiatok 1: Askim Jehova long stiaim yu. Askim Jehova long givim yu savetingting em yu nidim bilong helpim ol pikinini bilong yu long kisim pasin bilong laikim em. (Ritim Jems 1:5.) Em i nambawan Man bilong givim edvais. Na i gat planti risen na yumi tok olsem. Skelim tupela risen. Namba wan, Jehova i gat bikpela ekspiriens long stap olsem papa. (Sng. 36:9) Na namba tu, oltaim ol gutpela edvais em i givim i save helpim yumi.​—Ais. 48:17.

5. (a) Oganaisesen bilong Jehova i kamapim wanem ol samting bilong helpim ol papamama? (b) Olsem vidio i soim, yu lainim wanem samting long pasin bilong Brata na Sista Amorim long mekim bikpela long ol pikinini?

⁵ Long rot bilong Baibel na oganaisesen bilong em, Jehova i givim yu planti tok bilong Baibel bilong helpim yu long skulim ol pikinini bilong yu long laikim Jehova. (Mat. 24:45) Olsem, yu ken kisim planti edvais long atikol siris “Bilong Helpim Famili,” em ol i prinim insait long sampela yia long nius Kirap! na nau em i stap long Web-sait bilong yumi. Na tu, planti vidio long jw.org i gat ol intaviu na ol drama inap helpim ol papamama long bihainim ol stiatok bilong Jehova taim ol i mekim bikpela long ol pikinini. *—Prov. 2:4-6.

6. Wanpela papa i pilim olsem wanem long helpim em na meri bilong em i kisim long oganaisesen bilong Jehova?

⁶ Planti papamama i tok ol i amamas tru long helpim Jehova i givim long rot bilong oganaisesen bilong em. Wanpela papa nem bilong em Joe, em i tok: “Em i no isi long mekim bikpela long 3-pela pikinini long tok i tru. Oltaim mi na meri bilong mi i save beten long Jehova i ken helpim mipela. Na planti taim mipela i pilim olsem wanpela atikol o vidio i kamap long rait taim stret long helpim mipela long hevi mipela i karim. Oltaim mipela i save larim Jehova i stiaim mipela.” Joe na meri bilong em i luksave olsem ol dispela atikol na ol vidio i helpim ol pikinini bilong ol long i go klostu long Jehova.

7. Wai na em i bikpela samting long ol papamama i mas stap gutpela piksa long ol pikinini? (Rom 2:21)

 ⁷ Stiatok 2: Stap gutpela piksa taim yu skulim ol. Ol pikinini i save lukim gut ol samting ol papamama i mekim na planti taim ol i save bihainim ol pasin bilong ol. Em tru olsem, ol papamama i no gutpela olgeta. (Rom 3:23) Maski i olsem, ol papamama i mas wok strong tru long stap gutpela piksa long ol pikinini bilong ol. (Ritim Rom 2:21.) Wanpela papa i tingim ol pikinini na em i tok: “Ol i olsem spans i kisim olgeta toktok na pasin yumi mekim, na ol bai tokim yumi taim pasin bilong yumi i no stret wantaim ol samting yumi skulim ol long en.” So sapos yumi laik bai ol pikinini bilong yumi i laikim Jehova, orait yumi yet mas laikim tru Jehova na dispela pasin i mas stap ples klia.

8-9. Yu kisim wanem skul long tok bilong Andrew na Emma?

⁸ I gat planti rot ol papamama inap skulim ol pikinini bilong ol long laikim Jehova. Lukim tok bilong Andrew em wanpela brata i gat 17 krismas, em i tok: “Oltaim papamama bilong mi i skulim mi olsem beten em i bikpela samting. Olgeta nait, papa i save beten wantaim mi, na tu, long taim mi yet i beten pinis. Oltaim papamama i save tokim mipela: ‘Yu ken toktok wantaim Jehova planti taim.’ Dispela i mekim na beten i kamap bikpela samting long mi. Na nau em i isi long mi beten na mi pilim olsem Jehova em i wanpela Papa i gat pasin laikim.” Ol papamama, oltaim tingim olsem pasin bilong yu long laikim Jehova inap helpim ol pikinini bilong yu long laikim em tu.

⁹ Skelim tu eksampel bilong Emma. Taim papa bilong em i lusim famili, em i gat bikpela dinau long ol narapela lain, olsem na mama bilong em i mas bekim ol dispela dinau. Emma i tok: “Sampela taim Mama i save sot tru long mani, tasol oltaim em i save stori long mipela long hau Jehova i save tingim tru na lukautim ol wokman bilong em. Na long i stap bilong em, mi ken lukim olsem em i bilip tru long dispela tok. Mama i bihainim ol tok em i skulim mipela long en.” Yumi kisim wanem skul? Ol papamama inap skulim ol pikinini taim ol i stap gutpela piksa, na tu, long taim ol i karim ol bikpela hevi.​—Gal. 6:9.

10. Long wanem ol taim ol papamama Israel inap skulim ol pikinini bilong ol long Jehova? (Lo 6:6, 7)

¹⁰ Stiatok 3: Toktok wantaim ol pikinini bilong yu long olgeta taim. Long bipo, Jehova i tokim lain Israel olsem oltaim ol i mas skulim ol pikinini na bai ol i ken save long Em. (Ritim Lo 6:6, 7.) Long de olgeta, ol dispela papamama i gat rot long toktok wantaim ol pikinini bilong ol na putim pasin bilong laikim Jehova long bel bilong ol. Olsem, wanpela liklik mangi Israel inap lusim sampela aua long helpim papa bilong em long planim kaikai o kamautim kaikai long gaden. Ating sista bilong em inap lusim sampela aua long de long helpim mama long samapim ol samting, lumim laplap, na mekim ol narapela wok bilong haus. Taim papamama na ol pikinini i wok wantaim, ol inap toktok long planti bikpela samting. Olsem, ol i ken stori long ol gutpela pasin bilong Jehova na hau em i wok long helpim famili bilong ol.

11. Wanem wanpela rot em papamama Kristen inap toktok wantaim ol pikinini?

¹¹ Long nau ol samting i senis. Long planti kantri, ol papamama na ol pikinini i no gat taim long stap wantaim namel long de. Ating papamama i stap long wok na ol pikinini i stap long skul. Dispela i mekim na ol papamama i mas painim rot na bai ol i ken toktok wantaim ol pikinini bilong ol. (Efe. 5:15, 16; Fili. 1:10) Famili lotu em wanpela rot bilong papamama long mekim olsem. Wanpela yangpela brata nem bilong em Alexander, em i tok: “Olgeta  taim papa bilong mi i save stretim rot long mipela i mekim famili lotu, na em i no save larim wanpela samting i stopim mipela long bung wantaim. Bihain long stadi, mipela i save stori gut wantaim.”

12. Het bilong famili i mas tingim wanem samting long taim bilong famili lotu?

¹² Sapos yu het bilong famili, orait yu ken mekim wanem na bai ol pikinini bilong yu i ken enjoim famili lotu? Yu ken stadi wantaim ol pikinini long nupela buk Stap Amamas Oltaim! Taim yu stadi wantaim ol long dispela buk, em inap opim rot long yupela long toktok gut wantaim. Yu laik bai ol pikinini i tokim yu long ol samting ol i pilim long bel na ol wari bilong ol, olsem na no ken yusim haptaim bilong famili lotu long stretim ol pikinini o krosim ol. Na no ken kros hariap sapos ol pikinini i kamapim wanpela tok i no stret wantaim ol stiatok bilong Baibel. Tasol yu ken amamas olsem ol i onest na kamapim tingting bilong ol long yu, na mekim ol samting na bai ol i pilim isi moa long toktok gut wantaim yu. Yu inap helpim gut ol pikinini bilong yu taim yu save long ol samting ol i pilim long bel.

13. Wanem ol narapela rot ol papamama inap helpim ol pikinini long i go klostu long Jehova?

¹³ Ol papamama, namel long de painim rot long helpim ol pikinini long i go klostu long Jehova. I no gat wok long yu wet inap long taim yu mekim Baibel stadi wantaim ol pikinini long skulim ol long God bilong pasin laikim. Lukim tok em wanpela mama nem bilong em Lisa i mekim, em i tok: “Mipela i yusim kriesen long skulim ol pikinini long Jehova. Olsem, taim dok bilong mipela i pilai na mekim ol pikinini i amamas, mipela i save tokim ol olsem Jehova tu em God bilong amamas na em i save enjoim laip, wankain olsem yumi ol man.”

14. Wai na em i bikpela samting long ol papamama i mas helpim ol pikinini bilong ol long makim gut ol pren? (Provep 13:20)

¹⁴ Stiatok 4: Helpim ol pikinini bilong yu long kisim ol gutpela pren. Tok Bilong God i helpim yumi long luksave olsem ol pren bilong yumi inap helpim yumi long bihainim gutpela pasin o pasin nogut. (Ritim Provep 13:20.) Ol papamama, yupela i save long ol pren bilong ol pikinini bilong yupela? Yupela i bin bungim ol  na lusim sampela haptaim long stap wantaim ol? Yupela i ken mekim wanem long helpim ol pikinini bilong yupela long kisim ol pren em ol i laikim Jehova? (1 Kor. 15:33) Yu ken helpim ol pikinini bilong yu long kisim ol gutpela pren long rot bilong invaitim ol lain i pas gut wantaim Jehova long mekim ol samting wantaim yu na ol pikinini bilong yu.​—Sng. 119:63.

15. Ol papamama i ken mekim wanem bilong helpim ol pikinini bilong ol long kisim ol gutpela pren?

¹⁵ Skelim ekspiriens bilong wanpela papa nem bilong em Tony. Em i stori long samting em na meri bilong em i bin mekim bilong helpim ol pikinini bilong ol long kisim ol gutpela pren, em i tok: “Long ol yia i go pinis, mi na meri bilong mi i bin invaitim ol bratasista bilong kain kain krismas na bekgraun long kam long haus bilong mipela. Ol i save kaikai wantaim mipela na insait long famili lotu bilong mipela. Dispela em gutpela rot long save long ol lain i laikim Jehova na amamas long mekim wok bilong em. Mipela i kisim ol gutpela blesing long invaitim ol wasman sekit, ol misineri, na ol narapela long kam stap long haus bilong mipela. Ol ekspiriens bilong ol, na pasin bilong ol long givim bel na daunim laik bilong ol i helpim tru ol pikinini bilong mipela long i go klostu long Jehova.” Ol papamama, yupela i mas tingting strong long helpim ol pikinini bilong yupela long kisim ol gutpela pren.

16. Olsem wanem sapos wanpela pikinini i tok em i no laik mekim wok bilong Jehova?

¹⁶ Olsem wanem sapos yu wok strong long skulim ol pikinini, tasol wanpela bilong ol i tok em i no laik mekim wok bilong Jehova? No ken givap na ting olsem yu no mekim gut wok olsem papa o mama. Jehova i givim yumi olgeta—na pikinini bilong yu tu—presen bilong i stap fri, na yumi yet inap makim olsem yumi laik mekim wok bilong God o nogat. Sapos pikinini bilong yu i mekim disisen long lusim Jehova, no ken givap, yu ken bilip olsem wanpela taim em bai kam bek. Tingim tok piksa bilong pikinini i lusim papa. (Luk 15:11-19, 22-24) Dispela yangpela man i mekim planti pasin nogut tru, tasol long bihain, em i kam bek. Ating sampela inap tok, “Dispela em stori nating! Em inap kamap tru?” Yes, em inap kamap tru!  Na dispela em ekspiriens bilong wanpela yangpela man nem bilong em Elie.

17. Hau ekspiriens bilong Elie i strongim yu?

¹⁷ Elie i tingim papamama bilong em na em i tok: “Ol i mekim olgeta samting ol inap mekim bilong putim pasin bilong laikim Jehova na tok bilong em long bel bilong mi. Maski i olsem, taim mi tineja, mi kirap long bikhet.” Long pasin hait, Elie i kirap long mekim ol samting i no stret. Papamama bilong em i wok hat long helpim em long stap klostu long Jehova, tasol em i no harim tok bilong ol. Bihain em i lusim haus, na em i insait long ol pasin nogut. Maski i olsem, sampela taim em i save stori long Baibel wantaim wanpela pren bilong em. Elie i tok: “Taim mi wok long stori long pren bilong mi long Jehova, dispela i kirapim mi moa yet long tingim Jehova. Ol tok i tru em papamama i bin planim long bel bilong mi, isi isi ol i kirap long gro.” I no longtaim, Elie i kam bek long tok i tru. * Papamama bilong em i amamas tru olsem ol i bin mekim olgeta samting ol inap mekim bilong skulim em long laikim Jehova taim em i liklik!​—2 Tim. 3:14, 15.

18. Yu pilim olsem wanem long ol papamama em ol i wok hat tru long skulim ol pikinini bilong ol long laikim Jehova?

¹⁸ Ol papamama, yupela i kisim gutpela blesing tru, em long helpim ol pikinini bilong yupela long lotuim Jehova. (Sng. 78:4-6) Dispela em i no liklik wok, na mipela i tok amamas long yupela long ol hatwok bilong yupela long helpim ol pikinini bilong yupela! Sapos yu wok yet long mekim ol samting yu inap mekim bilong helpim ol pikinini long laikim Jehova na long skulim ol long bihainim tok bilong em, yu ken save tru olsem Papa bilong yumi long heven, em God i gat pasin laikim, em bai amamas.​—Efe. 6:4.