1. Wai na yumi olgeta i mas kisim savetingting i kam long God? (Provep 4:7)

 ATING i bin gat wanpela taim we yu mas mekim wanpela bikpela disisen, na yu bin beten long kisim savetingting na i gutpela yu mekim olsem. (Jems 1:5) King Solomon i tok: “Savetingting em i bikpela samting tru.” (Ritim Provep 4:7.) Solomon i no stori long kain kain savetingting bilong dispela graun, nogat. Em i stori long savetingting i kam long God Jehova. (Prov. 2:6) Tasol yu ting savetingting bilong God inap helpim yumi long karim olgeta kain hevi yumi feisim long nau? Yes, em inap helpim yumi olsem dispela atikol bai stori long en.

2. Wanem wanpela rot yumi inap stap olsem man i gat gutpela savetingting tru?

² Wanpela rot yumi inap stap olsem man i gat gutpela savetingting tru em long stadim na bihainim ol tok bilong 2-pela man em planti man i rispektim ol bikos ol i gat bikpela savetingting. Namba 1 man yumi bai stori long en em Solomon. Baibel i tok “God i givim Solomon bikpela savetingting na pasin bilong skelim gut ol samting.” (1 Kin. 4:29) Namba 2 man yumi bai stori long en em Jisas, em man i gat bikpela savetingting tru winim olgeta narapela man long graun. (Mat. 12:42) Baibel i tok profet long Jisas olsem: “Spirit bilong Jehova bai kam stap long em, olsem na em bai i gat savetingting na pasin bilong kliagut tru long ol samting.”​—Ais. 11:2.

3. Yumi bai stori long wanem samting long dispela atikol?

³ God i givim bikpela savetingting long Solomon na Jisas, olsem na ol inap givim gutpela edvais long ol samting i bikpela samting long yumi. Long dispela atikol, yumi bai stori long 3-pela bilong ol dispela samting: Holim stretpela tingting long mani, long wok mani, na long yumi yet.

4. Olsem wanem sindaun bilong Solomon i no wankain long sindaun bilong Jisas?

⁴ Solomon i gat planti mani kago na em i stap long wanpela naispela haus i bikpela tru. (1 Kin. 10:7, 14, 15) Tasol Jisas i no gat planti samting na em i no gat haus bilong em yet. (Mat. 8:20) Maski i olsem, dispela tupela man i holim stretpela tingting long ol samting bilong skin bikos ol i kisim savetingting i kam long God Jehova.

5. Solomon i holim wanem stretpela tingting long mani?

⁵ Solomon i tok mani “i save lukautim man.” (Ekl. 7:12) Yumi inap yusim mani long baim ol samting yumi nidim bilong i stap laip na sampela samting em yumi laik kisim. Maski Solomon i gat planti mani kago tru, em i luksave olsem i gat sampela samting i bikpela samting moa winim mani. Em i tok: “I gutpela moa long man i makim na kisim gutpela nem, dispela i winim planti mani kago.” (Prov. 22:1) Solomon i luksave tu olsem ol man husat i laikim mani ol i no save amamas long ol samting ol i gat pinis. (Ekl. 5:10, 12) Em i tok lukaut olsem yumi no ken putim olgeta trast bilong yumi long mani bikos mani yumi gat inap pinis wantu tasol.​—Prov. 23:4, 5.

6. Jisas i holim wanem stretpela tingting long ol samting bilong skin? (Matyu 6:31-33)

⁶ Jisas i bin holim stretpela tingting long ol samting bilong skin. Em i amamas long kisim kaikai na dring. (Luk 19:2, 6, 7) Wanpela taim em i wokim gutpela wain tru—em fes mirakel em i bin wokim. (Jon 2:10, 11) Na long de em i dai, em i werim saket i gat bikpela pe. (Jon 19:23, 24) Tasol em i no tingim ol samting bilong skin olsem bikpela samting long laip bilong em. Em i tokim ol disaipel bilong em olsem: “I no gat wanpela man inap stap wokboi bilong tupela bosman . . . Yupela i no inap stap wokboi bilong God na Mani wantaim.” (Mat. 6:24) Jisas i skulim yumi olsem sapos yumi painim Kingdom pastaim, Jehova bai givim yumi ol samting yumi nidim.​—Ritim Matyu 6:31-33.

7. Wanem gutpela samting i kamap long wanpela brata taim em i holim stretpela tingting long mani?

⁷ Gutpela samting i kamap long planti  bratasista bilong yumi taim ol i bihainim savetingting i kam long God long sait bilong mani. Tingim eksampel bilong wanpela singel brata, nem bilong em Daniel. Em i tok: “Taim mi tineja, mi wokim disisen olsem mi bai putim wok bilong Jehova i stap nambawan bikpela samting long laip bilong mi.” Daniel i holim liklik kago tasol, olsem na em inap yusim taim na save bilong em long insait long planti tiokratik projek. Em i tok: “Mi ken tok tru olsem mi no gat rigret long disisen mi bin mekim. Tru, mi inap wok mani na kisim planti mani sapos dispela i stap olsem bikpela samting long laip bilong mi. Tasol sapos mi mekim olsem, mi no inap i gat ol gutpela pren em nau mi gat! Mi putim Kingdom i stap nambawan samting na mi stap amamas tru. Mi no inap long kisim kain amamas olsem sapos mani i stap bikpela samting long laip bilong mi! Jehova i mekim mi stap amamas tru na dispela i winim amamas mi inap kisim sapos mi gat planti mani.” I klia tru olsem gutpela samting i save kamap taim yumi putim tingting olgeta long ol wok lotu, na i no long mani.

8. Olsem wanem Solomon i soim olsem em i holim stretpela tingting long wok? (Eklisiastis 5:18, 19)

⁸ Solomon i tok olsem amamas yumi kisim taim yumi wok hat “em i presen i kam long God.” (Ritim Eklisiastis 5:18, 19.) Em i tok: “Taim man i wok hat long olgeta kain wok, em bai kisim gutpela samting.” (Prov. 14:23) Solomon i save olsem dispela tok em i tru. Em i man bilong wok hat! Em i wokim ol haus, planim ol gaden wain, na em i wokim ol gaden na ol raunwara. Na em i wokim tu ol taun. (1 Kin. 9:19; Ekl. 2:4-6) Em i wok hat tru na dispela i mekim em i amamas. Tasol Solomon i save olsem ol dispela wok tasol i no inap mekim em i stap amamas tru, em i mas mekim sampela samting moa. Em i bin mekim planti wok bilong Jehova. Olsem, em i bin lukautim wok konstraksen bilong wokim wanpela naispela tempel bilong lotuim Jehova—ol i mekim dispela projek insait long 7-pela yia! (1 Kin. 6:38; 9:1) Solomon i bin insait long olgeta kain wok—long sait bilong wok skin na wok lotu—na em i luksave olsem wok lotu em i bikpela samting moa winim wok skin. Em i tok: “Olgeta tok mi mas mekim, mi mekim pinis, na bilong pinisim tok, mi laik tok: Yu mas pret long God tru na bihainim ol lo bilong em.”​—Ekl. 12:13.

9. Olsem wanem Jisas i holim stretpela tingting long wok mani bilong em?

⁹ Jisas em i man bilong wok hat. Taim em i yangpela man, em i mekim wok kapenta. (Mak 6:3) Yumi ken save tru olsem papamama bilong em i amamas tru long em i helpim ol bikos ol i wok hat tru long lukautim bikpela famili bilong ol long ol samting bilong skin. Jisas em i gutpela olgeta na em i mekim gut tru wok kapenta, olsem na ating planti manmeri i laikim ol samting em i bin wokim! Jisas i amamas tru long wok em i mekim. Maski em i givim bel long wok mani bilong em, em i lusim sampela haptaim tu long mekim ol wok lotu. (Jon 7:15) Bihain em i autim tok fultaim na em i tokim ol man i harim tok bilong em olsem: “Yupela i mas wok bilong kisim kaikai i no save bagarap na i save givim laip oltaim.” (Jon 6:27) Na long Bikpela Tok Long Maunten, Jisas i tok: “Bungim ol gutpela gutpela samting bilong yupela long heven.”​—Mat. 6:20.

10. Sampela inap bungim wanem hevi long wok mani bilong ol?

¹⁰ Savetingting i kam long God i helpim yumi long holim stretpela tingting long wok mani bilong yumi. Yumi ol Kristen i kisim skul olsem yumi mas “wok hat na mekim ol gutpela wok.” (Efe. 4:28) Planti taim ol bos i luksave long  onest pasin na pasin bilong yumi long wok hat na ating ol i tokim yumi olsem ol i amamas tru long pasin bilong yumi long givim bel long wok. Dispela inap kirapim yumi long lusim planti aua moa long wok mani bilong yumi bikos yumi laik bai bos i mekim ol gutpela tok long ol Witnes Bilong Jehova. Tasol bihain ating yumi luksave olsem yumi no lusim haptaim long mekim ol wok bilong yumi insait long famili na ol wok lotu. Sapos olsem, orait yumi mas mekim ol senis na bai yumi gat inap taim long mekim ol bikpela samting.

11. Wanpela brata i kisim wanem skul long pasin bilong holim stretpela tingting long wok?

¹¹ Wanpela yangpela brata, nem bilong em William, i kisim skul long risen na em i bikpela samting long holim stretpela tingting long wok mani. Em i stori long wanpela elda i bin stap bos bilong em long pastaim, na em i tok: “[Dispela brata] i stap gutpela eksampel tru long pasin bilong balensim gut wok mani wantaim ol narapela samting. Em i save wok hat, na em i gat gutpela nem wantaim ol kastama bikos em i save mekim gut wok. Tasol long pinis bilong de taim wok i pinis, em i save lusim wok na putim tingting olgeta long famili bilong em na wok lotu bilong em. Na yu save wanem? Dispela i mekim em i stap amamas tru!” *

12. (a) Olsem wanem Solomon i soim olsem em i bin holim stretpela tingting long em yet? (b) Wanem samting i kamap na em i lusim dispela pasin?

¹² Taim Solomon i stap gut long lotuim Jehova, em i bin holim stretpela tingting long em yet. Taim em i yangpela man, long pasin daun em i luksave olsem i gat sampela samting em i no inap mekim na em i askim Jehova long helpim em. (1 Kin. 3:7-9) Taim em i kirap long mekim wok king, Solomon i luksave tu long hevi inap kamap taim man i mekim pasin antap. Em i tok: “Pasin hambak i bringim man i go long bagarap, na pasin antap i save mekim man i pundaun.” (Prov. 16:18) Tasol sori tru, bihain Solomon i no bihainim edvais bilong  em yet. Sampela yia bihain long em i kirap mekim wok king, em i mekim pasin antap na sakim ol lo bilong God. Olsem, wanpela bilong ol dispela lo i tok king bilong ol Hibru “i no ken maritim planti meri, nogut em i givim baksait long God.” (Lo 17:17) Tasol Solomon i sakim dispela lo na em i maritim 700 meri na kisim 300 namba tu lain meri, na planti bilong ol dispela meri em ol meri haiden! (1 Kin. 11:1-3) Ating Solomon i pilim olsem dispela disisen i no inap nogutim em. Yumi no save long tingting em i gat, tasol Solomon i karim ol bikpela hevi tru bikos em i bin sakim ol lo bilong Jehova.​—1 Kin. 11:9-13.

13. Yumi inap kisim wanem skul taim yumi tingim tingim pasin daun bilong Jisas?

¹³ Oltaim Jisas i holim stretpela tingting long em yet na em i daunim em yet. Paslain long em i kam long graun, em i mekim planti gutpela samting long wok bilong Jehova. Long rot bilong Jisas, “God i wokim olgeta arapela samting long heven na long graun.” (Kol. 1:16) Taim Jisas i baptais, em i tingim bek olgeta samting em i bin mekim taim em i stap wantaim Papa bilong em. (Mat. 3:16; Jon 17:5) Tasol Jisas i no kisim pasin antap taim em i tingim bek olgeta dispela samting, nogat. Em i no mekim ol samting bilong soim olsem em i winim ol narapela. Em i tokim ol disaipel bilong em olsem em “i no kam [long graun] bilong ol man i mas helpim em, nogat, em i kam bilong helpim ol man na givim laip bilong em olsem pe bilong baim bek planti manmeri.” (Mat. 20:28) Na tu, em i tokaut olsem em i no inap wokim wanpela samting long tingting bilong em yet. (Jon 5:19) Jisas i mekim pasin daun tru! Em i stap gutpela piksa em yumi ken bihainim.

14. Yumi inap kisim wanem skul long Jisas long pasin bilong holim stretpela tingting long yumi yet?

¹⁴ Jisas i skulim ol disaipel bilong em long holim stretpela tingting long ol yet. Wanpela taim Jisas i tokim ol: “[God] i kaunim pinis olgeta gras long het bilong yupela.” (Mat. 10:30) Dispela tok i mekim gut bel bilong yumi, na moa yet sapos yumi pilim olsem yumi samting nating. Tok bilong Jisas i soim klia olsem Papa bilong yumi long heven i tingim tru yumi —yumi dia tru long ai bilong em. Jehova i orait long yumi lotuim em na em i tingim olsem yumi gutpela inap long kisim laip oltaim long nupela taim, olsem na yumi no ken holim tupela tingting long disisen bilong Jehova long dispela samting.

15. (a) Wastaua i kirapim yumi long holim wanem stretpela tingting long yumi yet? (b) Olsem ol piksa long pes 24 i soim, yumi no inap kisim wanem ol blesing sapos oltaim yumi tingim yet tasol?

¹⁵ Inap 15 yia i go pinis, Wastaua i kirapim yumi long kisim pasin bilong holim stretpela tingting long yumi yet. Em i tok: “Tru, yumi no laik tingim tumas yumi yet na ting yumi nambawan, tasol yumi no ken ting yumi samting nating. Yumi mas kisim stretpela tingting long yumi yet; yumi mas tingim ol samting yumi inap mekim na ol samting yumi no inap mekim. Wanpela meri Kristen i tok: ‘Mi no gutpela meri na mi no meri nogut. Mi gat sampela gutpela pasin na sampela pasin i no gutpela, na olgeta narapela manmeri ol tu i olsem.’” * Yumi luksave olsem i gutpela moa yumi holim stretpela tingting long yumi yet!

16. Wai na Jehova i givim savetingting bilong stiaim yumi?

¹⁶ Long rot bilong Baibel, Jehova i givim yumi savetingting bilong stiaim yumi. Em i laikim yumi, na em i laik bai yumi stap amamas. (Ais. 48:17, 18) Nambawan disisen yumi ken mekim em long putim wok bilong Jehova i stap namba 1 samting long laip bilong yumi, dispela bai mekim yumi stap amamas tru. Na tu, yumi bai abrusim planti hevi em ol manmeri i karim bikos ol i tingting tumas long mani, long wok mani, na long ol yet. Yumi olgeta wan wan i ken tingting strong long bihainim savetingting na mekim bel bilong Jehova i amamas!​—Prov. 23:15.