1. Jehova i kirapim ol wokman bilong em long mekim wanem? (Lukim tu piksa.)

 YUMI ken askim husat long givim yumi ol tok bilong mekim gut bel bilong yumi na stiaim yumi? Yumi save long bekim bilong dispela askim. Yumi ken toktok wantaim God Jehova long rot bilong beten. Jehova i kirapim yumi long mekim olsem. Em i laik yumi mas “beten oltaim.” (1 Tes. 5:17) Yumi ken toktok wantaim Jehova long olgeta kain taim na askim em long stiaim yumi long olgeta samting long laip bilong yumi. (Prov. 3:5, 6) Jehova em God bilong amamas long givim samting, olsem na em i no makim stret hamas taim yumi mas beten long em—yumi ken beten long olgeta kain taim.

2. Bai yumi stori long wanem samting long dispela atikol?

² Yumi tenkyu tru long gutpela presen bilong beten. Tasol ating yumi gat planti wok na yumi no makim stret taim bilong beten. Na ating yumi pilim olsem yumi mas mekim ol beten bilong yumi i kamap gutpela moa. Yumi amamas olsem yumi ken kisim ol tok bilong strongim yumi na stiaim yumi long Baibel. Long dispela atikol, yumi bai stori long hau yumi ken bihainim pasin bilong Jisas long makim stret taim bilong beten. Na tu, yumi bai stori long 5-pela bikpela samting we bai helpim yumi long mekim beten bilong yumi i kamap gutpela moa.

3. Jisas i kliagut long wanem samting long beten?

³ Jisas i kliagut olsem Jehova i tingim beten olsem bikpela samting tru. Paslain tru long Jisas i kam long graun, em i bin lukim Papa bilong em i bekim beten bilong ol bilipman na meri. Olsem, Jisas i bin stap wantaim Papa bilong em taim Em i bekim beten bilong Hana, Devit, Elaija, na planti narapela.  (1 Sml. 1:10, 11, 20; 1 Kin. 19:4-6; Sng. 32:5) Em as na Jisas i skulim ol disaipel bilong em long beten planti taim na bilip olsem God bai harim beten bilong ol.​—Mat. 7:7-11.

4. Yumi inap kisim wanem skul long ol beten bilong Jisas?

⁴ Long ol beten Jisas i mekim long Jehova, em i stap olsem gutpela piksa ol disaipel bilong em i ken bihainim. Long wok autim tok bilong Jisas, em i beten planti taim. Em i bin makim taim bilong beten, long wanem, planti taim em i save bisi na planti manmeri i save stap wantaim. (Mak 6:31, 45, 46) Em i save kirap long bikmoning bambai em i ken i gat taim bilong stap em yet na beten. (Mak 1:35) Wanpela taim, em i beten long nait olgeta paslain long em i mekim wanpela bikpela disisen. (Luk 6:12, 13) Long nait paslain long Jisas i dai, em i beten planti taim tru bambai em i ken tingting gut long pinisim laspela hap bilong wok bilong em long graun we i hatwok tru long em i mekim.​—Mat. 26:39, 42, 44.

5. Hau yumi ken bihainim pasin bilong Jisas taim yumi beten?

⁵ Pasin bilong Jisas i skulim yumi olsem yumi mas makim stret taim bilong beten, maski yumi bisi tru. Olsem Jisas, yumi mas makim stret taim bilong beten, na bilong mekim olsem yumi ken kirap long bikmoning o stap inap long biknait. Taim yumi mekim olsem, yumi soim Jehova olsem yumi tenkyu tru long pasin bilong beten. Wanpela sista nem bilong em Lynne, em i amamas taim em i kisim save olsem yumi inap toktok wantaim God long rot bilong beten. Em i tok: “Taim mi kisim save olsem mi ken toktok wantaim Jehova long olgeta kain taim, dispela i helpim mi long tingim em olsem wanpela gutpela Pren bilong mi na mi laik mekim ol beten bilong mi i kamap gutpela moa.” Planti bilong yumi i pilim wankain olsem. So yumi ken stori long 5-pela bikpela samting yumi ken kolim long beten bilong yumi.

6. Olsem Revelesen 4:10, 11 i kamapim, i stret long Jehova i kisim wanem samting?

⁶ Preisim Jehova. Long wanpela narakain visen, aposel Jon i lukim 24 hetman i stap long heven na ol i wok long lotuim Jehova. Ol i preisim God na ol i tokaut olsem i stret tru long em i kisim “glori na ona na strong.” (Ritim Revelesen 4:10, 11.) Ol ensel i stap  gut long God, ol tu i gat planti risen long preisim na onarim Jehova. Ol i stap long heven wantaim em na ol i save gut long em. Ol i lukim ol pasin bilong God i stap ples klia long ol samting em i wokim. Ol i lukim ol wok bilong Jehova na dispela i kirapim ol long preisim em.​—Jop 38:4-7.

7. Yumi ken preisim Jehova long wanem samting?

⁷ Yumi tu i laik preisim Jehova long ol beten bilong yumi na tokim em long wanem ol pasin bilong em we yumi laikim na rispektim. Taim yu ritim na stadi long Baibel, traim long luksave long ol pasin bilong Jehova em yu laikim tru. (Jop 37:23; Rom 11:33) Na tokim Jehova long yu pilim olsem wanem long ol dispela pasin bilong em. Na tu, yumi ken preisim Jehova long ol samting em i mekim bilong lukautim yumi na long lukautim bikpela lain bratasista i stap long olgeta hap. Oltaim em i save tingim tru yumi na lukautim yumi.​—1 Sml. 1:27; 2:1, 2.

8. I gat wanem sampela risen na yumi tok tenkyu long Jehova? (1 Tesalonaika 5:18)

⁸ Tok tenkyu long Jehova. I gat planti risen long yumi ken tok tenkyu long Jehova long rot bilong beten. (Ritim 1 Tesalonaika 5:18.) Yumi ken tok tenkyu long Jehova long ol gutpela samting yumi gat, long wanem, olgeta gutpela presen i kam long em. (Jems 1:17) Olsem, yumi ken tok tenkyu long naispela graun bilong yumi na olgeta gutpela samting em i wokim. Na tu, yumi ken tok tenkyu long ol gutpela samting em i givim long yumi olsem laip, ol famili, ol pren, na bilip bilong yumi. Na yumi laik tok tenkyu long Jehova long em i larim yumi stap gutpela pren bilong em.

9. Wai na yumi mas kisim pasin bilong tok tenkyu long Jehova?

⁹ I gutpela yumi skelim gut ol samting long i stap bilong yumi na tok tenkyu long Jehova long en. Yumi stap namel long ol manmeri em ol i no gat pasin bilong tok tenkyu. Planti taim ol i save tingting tasol long ol samting ol i laik kisim, na ol i no save soim tenkyu bilong ol long ol samting ol i gat pinis. Sapos yumi gat kain pasin olsem, ol beten bilong yumi inap kamap olsem wanpela lista bilong ol askim tasol. Bilong abrusim kain pasin olsem, yumi mas wok yet long kisim pasin bilong tok tenkyu long Jehova long olgeta samting em i mekim long yumi.​—Luk 6:45.

10. Olsem wanem pasin bilong tok tenkyu i bin helpim wanpela sista long sanap strong na karim hevi? (Lukim tu piksa.)

¹⁰ Pasin bilong tok tenkyu i ken helpim yumi long sanap strong na karim ol bikpela hevi. Skelim stori bilong wanpela sista nem bilong em Kyung-sook i stap long Wastaua bilong Janueri 15, 2015. Em i gat sik kensa bilong waitlewa. Em i tok: “Dispela sik i daunim mi olgeta na mi pret nogut tru.” Wanem samting i helpim em long sanap strong na karim dispela hevi? Long olgeta nait paslain long em i slip, em i save go antap long rup bilong haus na em i save kolim beten long maus na kolim 5-pela samting i kamap long dispela de na em i tenkyu  tru long en. Dispela i save strongim bel bilong em na i kirapim em long soim olsem em i laikim tru Jehova. Em i luksave olsem Jehova i save strongim yumi long taim bilong hevi na ol blesing em i givim i winim tru ol hevi i painim yumi. Olsem Kyung-sook, i gat planti risen long yumi ken tok tenkyu long Jehova long en, maski yumi wok long karim wanpela hevi i stap. Pasin bilong beten na tok tenkyu long Jehova i ken helpim yumi long sanap strong na karim hevi na long holimpas yet bel isi na amamas bilong yumi.

11. Wai na ol disaipel bilong Jisas i mas strongim bel bihain long Jisas i go bek long heven?

¹¹ Askim Jehova long strongim bel bilong yu taim yu autim tok. Paslain long Jisas i go bek long heven, em i kirapim ol disaipel bilong em long tingim gen wok bilong autim tok long em “long Jerusalem na long olgeta hap bilong Judia na Samaria, na i go inap long olgeta hap bilong graun.” (Apo. 1:8; Luk 24:46-48) Liklik taim bihain long dispela, ol hetman bilong lotu Juda i arestim aposel Pita na aposel Jon na bringim tupela i go long Sanhedrin na ol i stopim tupela long autim tok na ol i tok strong bilong pretim ol. (Apo. 4:18, 21) Pita na Jon i mekim wanem?

12. Olsem Aposel 4:29, 31 i kamapim, ol disaipel i mekim wanem?

¹² Pita na Jon i bekim tok em ol hetman bilong Juda i mekim bilong pretim ol, na ol i tok: “Yupela i ting wanem pasin i stret long ai bilong God? Mitupela i mas bihainim tok bilong yupela o mitupela i mas bihainim tok bilong God? Yupela yet i ken skelim. Tasol mitupela i no inap pasim maus long ol samting mitupela i bin lukim na harim.” (Apo. 4:19, 20) Taim ol i rilisim Pita na Jon i go, ol disaipel i bungim nek na ol i beten long Jehova olsem ol bai tingting strong long mekim laik bilong em. Ol i beten olsem: “Helpim ol wokboi bilong yu long autim yet tok bilong yu na no ken pret.” Jehova i bekim dispela beten em ol i pilim tru long bel na mekim.​—Ritim Aposel 4:29, 31.

13. Yumi ken kisim wanem skul long eksampel bilong Jin-hyuk?

¹³ Yumi ken bihainim pasin bilong ol disaipel long wok yet long autim tok maski gavman i stopim yumi long mekim olsem. Skelim stori bilong Jin-hyuk, em wanpela brata em gavman i bin kalabusim em bikos em i no laik insait long ami. Long haus kalabus, ol i makim em long lukautim sampela kalabusman em ol i stap long soliteri konfainmen, tasol ol i tambuim em long toktok wantaim ol long ol narapela samting na Baibel tu—em ol samting we i no hap bilong dispela wok. Em i beten askim Jehova long givim em savetingting na strongpela bel bambai em i ken autim tok long olgeta taim rot i op. (Apo. 5:29) Em i tok: “Jehova i bekim ol beten bilong mi na em i strongim bel bilong mi na givim mi savetingting na mi inap mekim ol sotpela 5-minit Baibel stadi long ol dua bilong sel. Na long nait, mi save raitim ol pas bilong givim long ol wankalabus long neks de.” Yumi tu i ken bilip tru olsem Jehova bai helpim yumi long inapim wok autim tok bilong yumi. Olsem Jin-hyuk, yumi ken beten askim Jehova long strongim bel bilong yumi na givim yumi savetingting.

14. Wanem samting i ken helpim yumi taim yumi karim ol hevi? (Buk Song 37:3, 5)

¹⁴ Askim Jehova long helpim yu long karim ol hevi. Planti bilong yumi i karim hevi bilong sik, tingting planti na bel hevi, wanpela yumi laikim tru i dai, hevi insait long famili, ol birua i mekim nogut long yumi, o sampela narapela hevi. Na ol bikpela hevi olsem ol pendemik na ol woa i mekim na i hatwok moa long karim ol dispela hevi. Sapos olsem, orait autim olgeta samting yu pilim long bel long Jehova. Tokim em long dispela hevi yu karim wankain olsem  yu bai tokim wanpela gutpela pren bilong yu. Yu ken bilip tru olsem Jehova “bai helpim yu.”​—Ritim Buk Song 37:3, 5.

15. Olsem wanem pasin bilong beten inap helpim yumi long “sanap strong long taim bilong hevi”? Stori long wanpela eksampel.

¹⁵ Pasin bilong beten oltaim bai helpim yumi long “sanap strong long taim bilong hevi.” (Rom 12:12) Jehova i save long ol hevi em ol wokman bilong em i wok long karim—“em i save harim krai bilong ol long kisim helpim.” (Sng. 145:18, 19) Kristie em wanpela painia i gat 29 krismas, em i wanbel long dispela tok. Em i karim ol bikpela hevi bilong sik, em samting em i no bin ting long en. Dispela i mekim na em i bel hevi tru. Bihain em i painimaut olsem mama bilong em i kisim wanpela sik nogut we em inap lusim laip bilong em. Kristie i tok: “Mi beten strong long Jehova na askim em long helpim mi long karim ol hevi bilong wan wan de. Mi traim long bihainim gut sediul bilong mi long mekim ol wok lotu, olsem go long ol miting na mekim pesenel stadi.” Em i tok moa olsem: “Beten i helpim mi long taim bel na tingting bilong mi i bagarap tru. Mi save olsem oltaim Jehova i stap bilong helpim mi, na dispela i mekim isi tru bel bilong mi. Hevi bilong mi long sait bilong helt i no pinis hariap, tasol Jehova i bin bekim ol beten bilong mi long rot bilong givim mi bikpela bel isi tru.” Oltaim yumi mas tingim olsem “Jehova i save long rot bilong kisim bek ol man i save givim bel tru long em taim traim i painim ol.”​—2 Pita 2:9.

16. Wai na yumi nidim helpim bilong Jehova long sakim traim?

¹⁶ Askim Jehova long helpim yu long sakim traim. Yumi no gutpela olgeta, olsem na oltaim yumi save pait strong long sakim laik bilong mekim pasin nogut. Satan i wok strong tru long daunim yumi bambai yumi no winim dispela pait. Wanpela rot em i traim long bagarapim tingting bilong yumi em long rot bilong ol piksa na ol musik nogut. Ol kain muvi na musik olsem inap pulapim tingting bilong yumi  long ol tingting i doti—em ol tingting we inap mekim yumi kamap doti long ai bilong Jehova na i ken kirapim yumi long mekim ol bikpela sin.​—Mak 7:21-23; Jems 1:14, 15.

17. Yumi mas mekim wanem bihain long yumi beten askim Jehova long helpim yumi long sakim traim? (Lukim tu piksa.)

¹⁷ Yumi nidim helpim bilong Jehova sapos yumi laik sakim traim bilong mekim pasin i no stret. Long beten Jisas i mekim bilong skulim ol disaipel bilong em, em i tok: “No ken larim mipela i pundaun long traim, tasol kisim bek mipela long han bilong Satan.” (Mat. 6:13) Jehova i laik helpim yumi, olsem na yumi mas askim em long helpim yumi. Na tu, yumi mas mekim samting i stret wantaim ol beten bilong yumi. Yumi ken wok strong long sakim pasin bilong ritim ol buk na harim ol musik i stori long ol tingting i no stret em ol man long graun bilong Satan i amamas long en. (Sng. 97:10) Yumi ken pulapim tingting bilong yumi wantaim ol gutpela samting long rot bilong ritim na stadi long Baibel. Taim yumi go long ol miting na insait long wok autim tok, dispela tu bai lukautim tingting bilong yumi. Na Jehova i tok promis olsem em i no inap larim wanpela traim i kamap long yumi i winim strong bilong yumi, nogat tru.​—1 Kor. 10:12, 13.

18. Yumi olgeta i mas mekim wanem long sait bilong beten?

¹⁸ Yumi olgeta wan wan i mas beten planti taim moa bambai yumi ken stap gut long Jehova long dispela taim nogut bilong las de. Makim taim long olgeta wan wan de bilong mekim ol beten em yu pilim tru long bel. Jehova i laik bai yumi “autim olgeta tingting i stap long bel bilong [yumi] long em.” (Sng. 62:8) Preisim Jehova na tok tenkyu long em long olgeta samting em i mekim bilong helpim yu. Askim em long helpim yu long strongim bel taim yu autim tok. Beten strong na askim em long helpim yu long sanap strong na karim ol hevi na long sakim ol traim em yu wok long feisim long nau. No ken larim wanpela samting o wanpela man i stopim yu long beten long Jehova. Tasol Jehova i save bekim ol beten bilong yumi long wanem rot? Yumi bai kisim bekim bilong dispela bikpela askim long neks atikol.