1. Baibel i tok wanem long pasin laikim tru tru?

 “PASIN LAIKIM i strong olsem paia i lait strong tru, em paia bilong Ja. Bikpela tait wara i no inap kilim i dai paia bilong pasin laikim, na wara i no inap wasim na rausim i go.” b (Sol. 8:6, 7) Em naispela tok Baibel i mekim long pasin laikim tru tru! Long dispela tok, ol marit i ken lainim wanpela tok bilong mekim gut bel bilong ol olsem: Yu ken laikim tru poroman bilong yu inap oltaim.   

2. Tupela marit i mas mekim wanem bambai pasin laikim bilong ol i no ken i dai?

² Pasin laikim bilong man na meri marit i ken stap strong tru sapos ol yet i mekim samting bilong strongim dispela pasin. Yumi ken tok piksa olsem, sapos yumi laitim wanpela paia, em bai lait i stap oltaim sapos yumi wok yet long putim paiawut long en. Sapos yumi lusim tasol i stap, paia bai dai. Olsem tasol, pasin laikim namel long man na meri marit i ken stap strong inap oltaim sapos ol i mekim samting bilong strongim dispela pasin. Sampela taim, tupela marit inap pilim olsem pasin laikim bilong ol i wok long i dai, moa yet long taim ol i gat hevi bilong mani, hevi bilong helt, o wok bilong mekim bikpela long ol pikinini. So sapos yu marit, olsem wanem yu ken larim “paia bilong Ja” i lait yet i stap insait long marit bilong yu? Long dispela atikol, yumi bai stori long 3-pela rot we yu ken strongim pasin pren bilong yu wantaim poroman marit bilong yu na mekim marit bilong yu i stap amamas. c

3. Taim tupela marit i strongim pasin pren bilong ol wantaim Jehova, hau dispela i strongim pasin laikim bilong tupela? (Eklisiastis 4:12) (Lukim tu piksa.)

³ Bilong wok yet long larim “paia bilong Ja” i lait yet i stap, tupela marit i mas wok strong long strongim pasin pren bilong ol wantaim Jehova. Olsem wanem pasin pren bilong ol wantaim Jehova i strongim marit bilong ol? Taim tupela marit i tingim pasin pren bilong ol wantaim Papa bilong ol long heven olsem bikpela samting, ol bai redi long bihainim edvais bilong em. Dispela bai helpim ol long abrusim na winim ol hevi we i laik kilim i dai pasin bilong ol long laikim narapela narapela. (Ritim Eklisiastis 4:12.) Ol man i gat strongpela bilip, ol i wok strong long bihainim ol pasin bilong Jehova olsem mekim pasin helpim long narapela, i no les kwik, na fogivim narapela. (Efe. 4:32–5:1) Tupela marit husat i bihainim ol dispela pasin, em isi long pasin laikim bilong ol i kamap strong moa. Wanpela sista nem bilong em Lena, em i marit inap 25 yia, em i tok: “Em isi long laikim na rispektim poroman marit husat i laikim Jehova.”

4. Wai na Jehova i makim Josep na Maria long kamap papamama bilong Mesaia?

⁴ Skelim wanpela eksampel long Baibel. Taim Jehova i laik makim tupela man na meri long kamap papa na mama bilong Mesaia, em i makim Josep na Maria namel long planti tumbuna pikinini bilong Devit. Bilong wanem? Josep na Maria wantaim i gat pasin bilong pas gut wantaim Jehova, na Jehova i save olsem marit bilong ol bai stap strong taim ol i wok yet long laikim Em tru. Yupela ol marit, yupela inap kisim wanem skul long Josep na Maria?

5. Ol man marit inap kisim wanem skul long Josep?

⁵ Josep i redi long bihainim ol tok Jehova i givim long em, na dispela i mekim em i kamap gutpela man marit. Inap 3-pela taim, Josep i kisim tok i kam long God long hau em i ken lukautim famili bilong em. Long olgeta dispela taim, em i bihainim gut ol tok em i kisim, maski em i mas mekim ol bikpela senis. (Mat. 1:20, 24; 2:13-15, 19-21) Josep i bihainim ol tok God i givim long em, na em i lukautim gut Maria, sapotim em, na givim em ol samting em i nidim. Piksaim long tingting olsem ol pasin bilong Josep i mekim na Maria i laikim em tru na rispektim em! Ol man marit, yupela i ken bihainim pasin bilong Josep long rot bilong bihainim edvais i kam long Baibel bilong lukautim famili bilong yupela. d Taim yu bihainim ol dispela edvais, maski yu mas mekim ol bikpela senis, yu soim olsem yu laikim tru meri bilong yu na yu laik strongim marit bilong yu. Wanpela sista long Vanuatu husat i bin marit winim 20 yia, em i tok: “Taim man bilong mi i skelim ol tok bilong Baibel na bihainim tok bilong Jehova, mi rispektim em tru. Mi stap bel isi na mi bilip tru long ol disisen em i mekim.”

6. Ol meri marit i ken kisim wanem skul long Maria?

⁶ Maria yet i gat pasin bilong pas gut wantaim  Jehova, na bilip bilong em i no hangamap long ol samting Josep i mekim. Em i save gut long tok bilong Ol Rait Holi. (Lukim stadi nout long Luk 1:46, long Inglis Baibel.) Na tu, em i makim taim bilong tingim tingim ol tok long bel. (Luk 2:19, 51) Tru tumas, Maria i pas gut wantaim Jehova na dispela i mekim em i kamap gutpela meri marit. Long nau, planti meri marit i wok strong long mekim ol samting olsem Maria i mekim. Olsem, wanpela sista nem bilong em Emiko, em i tok: “Taim mi singel, mi yet i save mekim ol samting bilong pas gut wantaim Jehova. Tasol taim mi marit, mi luksave olsem man bilong mi i save beten bilong mitupela na em i go pas long mekim ol samting bilong lotu, olsem na bilip bilong mi i hangamap long ol samting em i mekim. Mi luksave olsem mi yet i mas mekim ol samting bilong strongim pasin pren bilong mi wantaim Jehova. So nau mi makim taim bilong strongim pasin pren bilong mi wantaim God, olsem beten, ritim Baibel, na tingim tingim long bel ol tok bilong em.” (Gal. 6:5) Ol meri marit, taim yupela i wok yet long strongim pasin pren bilong yupela wantaim Jehova, bai i gat planti risen long man bilong yupela i preisim yupela na laikim yupela.​—Prov. 31:30.

7. Ol marit inap kisim wanem skul long Josep na Maria long pasin bilong lotuim God wantaim?

⁷ Josep na Maria i wok wantaim bilong strongim pasin pren bilong ol wantaim Jehova. Ol i kliagut olsem em i bikpela samting long lotuim Jehova wantaim olsem famili. (Luk 2:22-24, 41; 4:16) Ating i hatwok long mekim olsem taim famili bilong ol i kamap bikpela, tasol ol i mekim. Ol i stap gutpela piksa tru long ol marit long nau! Sapos yu gat ol pikinini olsem Maria na Josep, ating i hatwok long go long ol miting o makim taim bilong mekim famili lotu. Na ating i hatwok moa long makim taim long stadi na beten wantaim olsem marit. Tasol tingim olsem taim yutupela i lotuim Jehova wantaim, yutupela bai go klostu moa long Jehova na pas gut wantaim narapela narapela. Olsem na putim pasin bilong lotuim God i stap nambawan samting long laip bilong yupela.

8. Sapos marit bilong yu i gat hevi, yu ken mekim wanem bilong kisim gutpela helpim long famili lotu?

⁸ Olsem wanem sapos marit bilong yu i gat hevi? Ating bai yupela i no gat laik long mekim famili lotu wantaim. Sapos olsem, yutupela i ken kirap long mekim famili lotu long rot bilong skelim wanpela sotpela topik em yutupela i laikim na yupela i wanbel long stori long en. Dispela bai strongim pasin pren bilong yupela na laik bilong yupela long mekim ol wok lotu wantaim olsem marit.

9. Wai na man na meri marit i mas spendim taim wantaim?

⁹ Ol marit, yupela i ken mekim pasin laikim bilong yupela olsem paia i lait yet long rot bilong spendim taim wantaim. Taim yu mekim olsem, dispela bai helpim yu long tingim gut ol laik na tingting bilong poroman marit bilong yu. (Stt. 2:24) Tingim samting em Lilia na Ruslan i bin luksave long en taim ol i marit nupela inap 15 yia i go pinis. Lilia i tok: “Mipela i luksave olsem mipela i no inap spendim taim wantaim olsem mipela i bin ting long en. Mipela i bisi tru long mekim wok mani, ol wok bilong haus, na bihain lukautim ol pikinini. Mipela i luksave olsem sapos mipela i no spendim taim wantaim olsem marit, isi isi mipela inap drip i go longwe long narapela narapela.”

10. Olsem wanem ol marit i ken bihainim stiatok i stap long Efesus 5:15, 16?

¹⁰ Tupela marit i ken mekim wanem bambai ol i ken spendim taim wantaim? I gutpela long makim stret taim o wokim sediul bilong spendim taim wantaim narapela narapela. (Ritim Efesus 5:15, 16.) Wanpela brata long Naijiria, nem bilong em Uzondu, em i tok: “Taim mi wokim sediul bilong ol wok samting mi laik mekim, mi save makim tu haptaim bilong spendim taim  wantaim meri bilong mi, na mi putim dispela olsem bikpela samting.” (Fili. 1:10) Skelim hau Anastasia—em meri bilong wanpela wasman sekit long Moldova—i yusim gut taim bilong em. Em i tok: “Mi traim long mekim ol wok bilong mi taim man bilong mi i bisi long mekim ol wok bilong em. Long dispela rot, mipela i ken spendim taim wantaim long bihain.” Tasol olsem wanem sapos ol sediul bilong yupela i mekim na yutupela i hatwok long spendim taim wantaim?

11. Akwila na Prisila i mekim wanem ol wok wantaim?

¹¹ Planti marit long nau i ken kisim skul long pasin bilong Akwila na Prisila, em tupela marit we ol Kristen long pastaim i bin laikim tru. (Rom 16:3, 4) Tru Baibel i no stori planti long marit bilong ol, tasol em i kamapim klia olsem tupela i wok wantaim long mekim ol wok, autim tok, na helpim ol narapela. (Apo. 18:2, 3, 24-26) Long ol hap we Baibel i kolim Akwila na Prisila, oltaim em i save kolim nem bilong tupela wantaim.

12. Man na meri marit i ken mekim wanem bilong spendim bikpela haptaim wantaim? (Lukim tu piksa.)

¹² Olsem wanem ol marit i ken bihainim pasin bilong Akwila na Prisila? Tingim planti samting em yu na poroman marit bilong yu i ken mekim wantaim. Yu ting yutupela wantaim i ken mekim sampela bilong ol dispela wok na i no yutupela wan wan yet i mekim? Olsem, Akwila na Prisila i autim tok wantaim. Planti taim yutupela i save mekim plen bilong autim tok wantaim? Akwila na Prisila i mekim ol wok wantaim. Ating yu na poroman marit bilong yu i no save mekim wankain wok mani, tasol yu ting yutupela i ken mekim ol wok bilong haus wantaim? (Ekl. 4:9) Taim yutupela i helpim narapela narapela long mekim wanpela wok, yutupela i wok wantaim olsem tim na nau rot i op long yutupela i ken toktok wantaim. Robert na Linda i bin marit winim 50 yia. Robert i tok: “Mi pilim olsem mipela i no gat bikpela haptaim bilong spendim wantaim long kisim amamas. Tasol taim mi wasim plet na meri bilong mi i draim o taim mi klinim gras ausait long haus na meri bilong mi i kam wok wantaim mi, mi save amamas tru. Taim mipela i mekim ol samting wantaim, dispela i helpim mipela long pas gut wantaim. Pasin laikim bilong mipela i wok long kamap strong moa.”

13. Man na meri marit i mas mekim wanem bilong i stap wanbel wantaim?

¹³ Tingim dispela, maski man na meri marit i stap wantaim, dispela i no makim olsem tupela i stap wanbel. Wanpela meri marit long Brasil i tok: “Long nau, i gat planti samting i save pulim nabaut tingting, na mi luksave olsem em isi long ting olsem mipela i stap long seim haus so mipela i spendim taim wantaim, tasol dispela em i no tru. Mi luksave olsem tru mipela i stap wantaim, tasol i gat sampela samting moa mipela i mas mekim. Mi mas soim poroman marit bilong mi olsem mi laikim em na tingim em tru.” Skelim hau Bruno na meri bilong em Tays i mekim samting bilong soim olsem tupela i tingim tru narapela narapela. Bruno i tok: “Long ol fri taim bilong mipela, mipela i save putim ol mobail fon  i go longwe long mipela, na mipela i enjoim taim wantaim narapela narapela.”

14. Sapos tupela marit i no save amamas long spendim taim wantaim, ol i ken mekim wanem?

¹⁴ Olsem wanem sapos yu na poroman marit bilong yu i no save amamas long spendim taim wantaim? Ating yupela i no gat wankain laik long ol samting, o yupela i save sikirapim bel bilong narapela narapela. Yupela i ken mekim wanem? Tingim gen dispela stori bilong paia. Paia yet i no save lait bikpela. Isi isi yumi mas putim ol bikpela paiawut long en bambai em i ken lait bikpela. Olsem tasol, i gutpela long yutupela i kirap long spendim liklik haptaim wantaim long olgeta de. Traim long mekim ol samting we yutupela wantaim i enjoim, na i no ol samting we inap kirapim kros namel long yutupela. (Jems 3:18) Taim yutupela i mekim ol liklik samting wantaim, isi isi bai yutupela i kirapim gen dispela paia bilong pasin laikim bilong yutupela.

15. Wai na pasin rispek em i bikpela samting long mekim paia bilong pasin laikim namel long tupela marit i lait yet i stap?

¹⁵ Pasin rispek em bikpela samting insait long marit. Em i wankain olsem win oksijen we i helpim paia long lait bikpela. Taim i no gat win oksijen, paia i save dai hariap. Olsem tasol, taim i no gat pasin rispek, tupela marit bai pilim olsem pasin laikim bilong tupela i dai hariap. Tasol man na meri marit husat i wok strong long mekim pasin rispek long narapela narapela, ol i wok hat long mekim pasin laikim bilong ol olsem paia i lait strong yet i stap. Sampela taim yu inap ting olsem yu soim rispek long poroman marit, tasol bikpela samting em olsem poroman marit i mas pilim olsem yu rispektim em. Penny na Aret i bin marit winim 25 yia. Penny i tok: “Mipela i gat pasin bilong rispektim narapela narapela, olsem na i gat pasin laikim insait long famili bilong mipela. Mipela i pilim olsem mipela fri long kamapim ol tingting bilong mipela bikos mipela i save pilim tru tingting bilong narapela narapela.” So yu ken mekim wanem na bai poroman marit bilong yu i pilim olsem yu rispektim em tru? Tingim stori bilong Abraham na Sara.

16. Ol man marit i ken kisim wanem skul long pasin bilong Abraham? (1 Pita 3:7) (Lukim tu piksa.)

¹⁶ Abraham i save mekim pasin rispek long Sara. Em i tingim tru ol tingting Sara i kamapim na em i rispektim filings bilong em. Wanpela taim Sara i bel hevi tru, na em i kamapim filings bilong em long Abraham na em i sutim tok tu long em. Yu ting Abraham i bikmaus na kros long em? Nogat. Em i save olsem Sara i save daun tru long em na sapotim em. Abraham i putim gut yau long em na traim long stretim dispela hevi. (Stt. 16:5, 6) Yumi ken kisim wanem skul long dispela? Ol man marit, God i givim rait long yupela long mekim ol disisen bilong famili bilong yu. (1 Kor. 11:3) Tasol pasin laikim bai kirapim yu long skelim gut tingting bilong meri bilong yu paslain long yu wokim disisen, moa yet  taim dispela disisen bai mekim sampela samting long em. (1 Kor. 13:4, 5) Long ol narapela taim, ating meri bilong yu i pilim presa na em i laik kamapim tasol ol samting em i pilim long bel. Yu save rispektim filings bilong em long rot bilong putim gut yau long em? (Ritim 1 Pita 3:7.) Angela na Dmitry i bin marit klostu 30 yia. Angela i stori long hau em i pilim taim man bilong em i save rispektim em, em i tok: “Oltaim Dmitry i save putim yau long mi taim mi bel hevi, o taim mi laik toktok. Em i no save les kwik long mi maski mi bel hevi tru na toktok planti.”

17. Ol meri marit i ken kisim wanem skul long pasin bilong Sara? (1 Pita 3:5, 6)

¹⁷ Sara i rispektim Abraham long rot bilong sapotim ol disisen bilong em. (Stt. 12:5) Wanpela taim Abraham i redi long givim kaikai long sampela visita i kam em ol i no bin ekspektim. Em i askim Sara long lusim wok em i mekim na redim planti bret. (Stt. 18:6) Kwiktam Sara i mekim ol samting bilong sapotim disisen bilong Abraham. Ol meri marit, bihainim pasin bilong Sara na sapotim ol disisen man bilong yupela i mekim. Taim yu mekim olsem, yu strongim marit bilong yu. (Ritim 1 Pita 3:5, 6.) Dmitry em yumi stori pinis long em long paragraf antap, em i stori long hau em i save pilim taim meri bilong em i rispektim em. Em i tok: “Mi save amamas long Angela i sapotim ol disisen bilong mi, maski em i no wanbel long sampela disisen mi mekim. Sapos gutpela samting i no kamap long disisen bilong mi, em i no save sutim tok long mi.” Tru tumas, em isi tru long laikim wanpela husat i rispektim yu!

18. Ol marit inap kisim wanem helpim taim ol i mekim pasin laikim bilong ol olsem paia i lait yet i stap?

¹⁸ Long nau, Satan i wok strong long kilim i dai paia bilong pasin laikim i stap insait long ol marit Kristen. Em i save olsem taim man na meri marit i lusim pasin bilong laikim narapela narapela, em isi long ol i drip i go longwe long Jehova. Tasol i no gat wanpela samting inap kilim i dai paia bilong pasin laikim tru tru! So larim pasin laikim insait long marit bilong yu i wankain olsem pasin laikim em Song Bilong Solomon i stori long en. Tingting strong long putim Jehova i stap nambawan long marit bilong yupela, spendim taim wantaim narapela narapela, na rispektim filings na nid bilong narapela narapela. Taim yu mekim olsem, marit bilong yu bai onarim Jehova, em As bilong pasin laikim tru tru, na wankain olsem wanpela paia i lait gut i stap, pasin laikim bilong yu bai lait strong i stap inap oltaim oltaim.