1. Planti bilong yumi i bungim wanem hatwok?

 OLSEM WANEM? Yu bin putim wanpela mak bilong bilip, tasol yu hatwok long winim? b Sapos olsem, i no yu wanpela tasol i pilim olsem. Olsem, Philip i laik mekim ol beten bilong em i kamap gutpela moa na em i laik beten planti taim moa, tasol em i hatwok long painim taim bilong beten. Erika i putim mak long i go kamap paslain long bung bilong autim tok i kirap, tasol em i wok yet long i go kamap leit long klostu olgeta bung bilong autim tok. Planti taim Tomáš i wok strong long ritim Baibel olgeta. Em i tok: “Mi no save enjoim Baibel ritim bilong mi. Inap 3-pela taim mi bin traim long ritim Baibel olgeta, tasol long olgeta dispela taim mi go stop long Wok Pris.”

2. Wai na yumi no ken bel hevi sapos yumi no winim yet wanpela mak bilong bilip yumi putim?

² Sapos yu no winim yet wanpela mak yu putim, orait no ken bel hevi long dispela. Planti taim yu mas givim taim na strong bilong yu long winim wanpela liklik mak yu putim. Tasol tingim, yu wok strong yet long winim dispela mak na dispela i soim olsem yu tingim tru pasin pren bilong yu wantaim Jehova na yu laik givim bes bilong yu long em. Jehova i tingim tru ol hatwok bilong yu. Em i no ekspektim yu long mekim planti samting moa winim ol samting yu inap mekim. (Sng. 103:14; Mai 6:8) Olsem na yu mas putim mak em yu inap long winim. Taim yu mekim olsem, orait yu ken mekim wanem bilong winim dispela mak? Yumi ken stori long sampela rot yu ken bihainim.

3. Wai na em i bikpela samting long yu mas i gat laik long winim mak yu putim?

³ Em i bikpela samting long man i mas i gat laik long winim ol mak bilong bilip em i putim. Dispela bai helpim em long wok strong tru long winim dispela mak. Laik bilong yumi long mekim wanpela samting i wankain olsem win i save karim bot i go kamap long ples em i laik go long en. Sapos win i wok yet long blo, orait seila bai i go kamap long ples em i laik go long en. Na sapos win i strong moa, ating em bai go kamap hariap. Olsem tasol, taim yumi gat strongpela laik long mekim samting, dispela bai helpim yumi long winim mak yumi putim. David, em wanpela brata long El Salvado, em i tok: “Taim yu gat laik long mekim samting, bai yu wok strong moa. Yu no inap larim wanpela samting i pasim yu long winim mak yu putim.” So yu ken mekim wanem bilong i gat strongpela laik?

4. Yumi ken beten long wanem samting? (Filipai 2:13) (Lukim tu piksa.)

⁴ Beten long kisim strongpela laik. Long rot bilong holi spirit bilong em, Jehova i ken givim yu laik bilong winim mak yu putim. (Ritim Filipai 2:13.) Sampela taim yumi save putim wanpela mak bikos yumi save i stret long mekim olsem, na em gutpela samting. Tasol ating yumi no gat laik long winim dispela mak. Dispela samting i bin painim Norina, em wanpela sista long Yuganda. Em i putim mak long kirapim wanpela Baibel stadi, tasol em i no gat strongpela laik long mekim olsem bikos em i pilim olsem em i no gutpela tisa. Wanem samting i helpim em? Em i tok: “Long olgeta de, mi askim Jehova long strongim laik bilong mi long kirapim wanpela Baibel stadi. Mi mekim ol samting i stret wantaim ol beten bilong mi long kamap gutpela tisa moa. Bihain long sampela mun, mi luksave olsem mi gat strongpela laik tru long kirapim wanpela Baibel stadi. Long dispela seim yia, mi kirapim tupela Baibel stadi.”

5. Yumi ken tingim tingim long bel wanem samting na bai yumi gat strongpela laik long winim mak yumi putim?

⁵ Tingim tingim long bel samting Jehova i bin mekim long yu. (Sng. 143:5) Aposel Pol i tingim tingim long bel bikpela pasin laikim Jehova i mekim long em, na dispela i strongim laik bilong em long givim bel long mekim wok bilong Jehova. (1 Kor. 15:9, 10; 1 Tim. 1:12-14) Olsem tasol, taim yu tingim tingim long bel samting Jehova i bin mekim long yu, dispela bai strongim laik bilong yu long winim mak yu putim. (Sng. 116:12) Tingim samting i bin helpim wanpela sista long Honduras long winim mak em i putim long kamap painia oltaim. Em i tok: “Mi save tingim tingim pasin bilong Jehova long laikim mi tru. Em i bringim mi kam insait long lain bilong em. Em i save tingim mi na lukautim mi. Taim mi tingim tingim long bel ol dispela samting, dispela i strongim pasin bilong mi long laikim em na laik bilong mi long winim mak mi putim.”   

6. Yumi ken mekim wanem samting moa na bai yumi strongim laik long winim mak yumi putim?

⁶ Putim tingting long ol blesing yu bai kisim taim yu winim mak yu putim. Lukim samting  i helpim Erika—em yumi stori pinis long em—long winim mak em i putim long i go kamap long taim stret. Em i tok: “Mi luksave olsem mi mis-aut long planti samting taim mi go kamap leit long bung bilong autim tok. Sapos mi go kamap paslain long bung i kirap, mi inap gritim ol bratasista na lusim haptaim long toktok wantaim ol. Na tu, mi inap harim ol gutpela tok bilong helpim mi long enjoim wok autim tok bilong mi na kamap gutpela moa long dispela wok.” Erika i putim tingting long ol blesing em inap kisim sapos em i go kamap long taim stret, na dispela i helpim em long winim mak em i putim. Yu inap putim tingting long wanem ol blesing? Sapos yu putim mak long ritim Baibel o beten, orait tingim hau dispela inap strongim pasin pren bilong yu wantaim Jehova. (Sng. 145:18, 19) Sapos yu putim mak long kisim wanpela pasin Kristen, orait putim tingting long hau dispela inap helpim yu long pas gut wantaim ol narapela. (Kol. 3:14) Yu ken mekim wanpela lista na raitim olgeta risen na yu laik winim mak yu putim. Oltaim sekim dispela lista. Tomáš em yumi stori pinis long em, em i tok: “Taim mi gat planti risen long winim wanpela mak, dispela i helpim mi long wok strong na no ken givap.”

7. Wanem samting i helpim Julio na meri bilong em long winim mak ol i putim?

⁷ Spendim taim wantaim ol lain husat bai strongim yu long winim mak yu putim. (Prov. 13:20) Skelim samting i bin helpim Julio na meri bilong em long winim mak ol i putim long givim bel moa long autim tok. Em i tok: “Mipela i kisim ol pren husat i strongim mipela long winim mak mipela i putim, na mipela i save stori wantaim ol long dispela mak. Planti bilong ol i bin winim ol wankain mak olsem, so ol i givim ol gutpela tingting bilong helpim mipela. Na tu, ol i save askim long samting mipela i mekim bilong winim mak mipela i putim, na ol i mekim ol tok bilong strongim mipela taim mipela i nidim.”

8. Sapos yumi mekim ol samting bilong winim mak long taim yumi gat laik tasol long mekim, wanem samting inap kamap? (Lukim tu piksa.)

⁸ Sampela taim yumi save pilim olsem yumi no gat laik long mekim wanpela samting. Yu ting dispela i makim olsem yumi no inap winim mak yumi putim? Nogat. Tingim dispela tok piksa: Strong bilong win inap pusim bot i go long ples em i laik go long en. Tasol strong bilong win i save senis senis, na sampela taim i no gat win. Yu ting dispela i makim olsem seila i no inap stiaim bot i go? Nogat. Sampela bot i gat moto na ol narapela i gat ol pul. Seila i ken yusim ol dispela rot long stiaim bot i go long ples em i laik go long en. Olsem tasol, laik bilong yumi long winim mak inap senis senis; sampela taim yumi gat strongpela laik long winim mak yumi putim. Long ol narapela taim, yumi pilim skin les long mekim olsem. Sapos yumi mekim ol samting bilong winim mak long taim yumi gat laik tasol long mekim, ating yumi no inap long winim dispela mak. Wankain olsem seila i save painim ol narapela rot bilong stiaim bot i go, yumi ken mekim yet ol samting bilong winim mak yumi putim maski yumi no gat laik long mekim olsem. Ating yumi mas daunim sampela laik bilong yumi yet, tasol  gutpela samting bai kamap. Paslain long yumi stori long samting yumi ken mekim, yumi ken kisim bekim bilong wanpela askim.

9. Yu ting i stret long wok strong yet long winim wanpela mak maski yumi no gat laik long mekim olsem? Stori long dispela.

⁹ Jehova i laik bai yumi amamas long mekim wok bilong em na long laik bilong yumi yet yumi mekim olsem. (Sng. 100:2; 2 Kor. 9:7) Yu ting yumi mas wok strong yet long winim wanpela mak bilong bilip maski yumi no gat laik long mekim olsem? Tingim eksampel bilong aposel Pol. Em i tok: “Mi save paitim tru bodi bilong mi yet na mekim bodi i stap wokboi bilong mi.” (1 Kor. 9:25-27, lukim stadi nout bilong ves 27 long Inglis Baibel) Pol i subim em yet long mekim samting em i mas mekim maski sampela taim em i no gat laik long mekim olsem. Yu ting Jehova i amamas long wok lotu bilong Pol? Yes! Na Jehova i blesim hatwok bilong em.​—2 Tim. 4:7, 8.

10. Yumi inap kisim wanem ol blesing taim yumi wok strong yet long winim mak yumi putim maski yumi no gat laik long mekim olsem?

¹⁰ Jehova i amamas long lukim yumi wok strong yet long winim mak yumi putim maski yumi no gat laik long mekim olsem. Em i amamas, long wanem, maski yumi mekim wanpela wok we yumi no laikim, em i save olsem yumi mekim dispela wok bikos yumi laikim em. Wankain olsem Jehova i bin blesim Pol, Em bai blesim hatwok bilong yumi. (Sng. 126:5) Na taim yumi kisim ol blesing i kam long Jehova, dispela bai kirapim yumi long laik long winim mak yumi putim. Lucyna em wanpela sista long Polan, em i tok: “Sampela taim mi no save laik long go autim tok, moa yet long taim mi pilim taiet. Maski i olsem, amamas mi kisim taim mi go autim tok em naispela blesing tru.” Nau yumi ken stori long samting yumi ken mekim taim yumi no gat laik long winim mak yumi putim.

11. Olsem wanem Jehova inap helpim yumi long strongim pasin bilong bosim bel?

¹¹ Beten long kisim pasin bilong bosim bel. Man i gat pasin bilong bosim bel, em i save bosim gut ol filings na ol pasin bilong em. Planti taim dispela tok i makim pasin bilong stopim yumi yet long mekim wanpela samting i no stret. Tasol pasin bilong bosim bel inap kirapim yumi tu long mekim gutpela samting, moa yet long taim wanpela wok i hatwok long mekim o yumi no gat laik long mekim dispela wok. Tingim, pasin bilong bosim bel em wanpela pasin holi spirit i kamapim, so askim Jehova long givim yu holi spirit bilong helpim yu long kisim dispela pasin. (Luk 11:13; Gal. 5:22, 23) David, em yumi stori pinis long em, em i stori long hau beten i bin helpim em. Em i laik kisim pasin bilong mekim pesenel stadi long olgeta taim. Em i tok: “Mi save askim Jehova long helpim mi long kisim pasin bilong bosim bel. Wantaim helpim bilong em, mi inap mekim gutpela sediul bilong stadi na bihainim gut dispela sediul.”

12. Olsem wanem stiatok long Eklisiastis 11:4 i helpim yumi long winim ol mak bilong bilip yumi putim?

¹² No ken wetim gutpela taim. Long dispela graun, i no gat wanpela taim ol samting bai gutpela olgeta. Sapos yumi wetim gutpela taim, ating yumi no inap winim mak yumi putim. (Ritim Eklisiastis 11:4.) Wanpela brata nem bilong em Dayniel, em i tok: “I no gat wanpela taim ol samting bai gutpela olgeta. Olsem na yumi no ken wet, yumi mas kirap long mekim samting.” Paul, em wanpela brata long Yuganda, em i stori long narapela risen na yumi no ken surikim taim, em i tok: “Taim yumi mekim samting maski i gat hatwok i stap, yumi givim rot long Jehova long blesim yumi.”​—Mal. 3:10.

13. Wanem gutpela samting inap kamap taim yumi kirap long winim ol liklik mak pastaim?

¹³ Kirap long winim ol liklik mak pastaim. Ating yumi no gat laik long winim mak yumi putim bikos dispela mak i hatwok tru long winim. Sapos yu pilim olsem, yu ting yu ken winim ol liklik mak pastaim? Sapos yu putim mak long kisim wanpela pasin Kristen, orait yu ting yu  ken winim dispela mak long ol liklik samting yu mekim? Sapos yu putim mak long ritim Baibel olgeta, yu ting yu ken makim ol sotpela haptaim bilong ritim Baibel pastaim? Tomáš, em yumi stori pinis long em, em i hatwok long winim mak em i putim long ritim Baibel olgeta insait long wanpela yia. Em i tok: “Mi luksave olsem mi makim rot we mi laik hariap tasol long mekim samting na dispela i givim mi hatwok. So mi tingting long traim gen, tasol nau mi wokim plen long ritim sampela paragraf long olgeta de na tingim tingim long bel. Long dispela rot, mi enjoim Baibel ritim bilong mi.” Tomáš i kisim pasin bilong enjoim Baibel ritim bilong em, na dispela i kirapim em long lusim longpela haptaim moa long ritim Baibel. I no longtaim, em i ritim Baibel olgeta. c

14. Wanem samting inap mekim na i hatwok long winim mak yumi putim?

¹⁴ Maski yumi gat laik o yumi bosim bel, sampela taim i hatwok yet long winim mak yumi putim. Olsem, “ol samting we [yumi] no ting inap kamap” i ken pinisim taim yumi makim bilong mekim ol samting long winim mak yumi putim. (Ekl. 9:11) Yumi inap bungim wanpela hatwok we i mekim yumi bel hevi na pinisim strong bilong yumi. (Prov. 24:10) O yumi inap mekim popaia bikos yumi gat sin na dispela i mekim na i hatwok moa long winim mak yumi putim. (Rom 7:23) O yumi inap pilim taiet. (Mat. 26:43) Wanem samting inap helpim yumi long daunim wanpela hatwok yumi bungim?

15. Sapos yumi bungim wanpela hatwok, yu ting dispela i makim olsem yumi no inap mekim gut wanpela samting? Stori long dispela. (Buk Song 145:14)

¹⁵ Taim yu bungim wanpela hatwok, dispela i no makim olsem yu no inap mekim gut samting. Baibel i tok planti taim yumi inap bungim ol hevi na ol hatwok. Tasol em i tok tu olsem yumi ken sanap strong yet wantaim helpim bilong Jehova. (Ritim Buk Song 145:14.) Philip, em brata yumi stori pinis long em, em i tok: “Mi no save tingim ol taim we mi no winim mak mi putim. Mi  save putim tingting long ol taim we mi wok strong gen long winim mak mi putim.” David, em yumi stori pinis long em, em i tok: “Taim mi bungim ol hatwok, mi no save bel hevi long dispela, mi lukim dispela olsem rot mi ken soim Jehova olsem mi laikim em tru.” Yes, taim yu wok strong yet long winim mak yu putim maski i gat hatwok, yu soim Jehova olsem yu laik amamasim em. Jehova i amamas tru taim em i lukim olsem yu wok strong yet long winim mak yu putim!

16. Sapos yumi pilim hatwok long winim wanpela mak, dispela i ken skulim yumi long wanem samting?

¹⁶ Taim yu bungim wanpela hatwok, yu ken kisim skul long dispela. Tingim samting i bin kamapim dispela hatwok, na askim yu yet, ‘Mi ken mekim wanem na bai dispela samting i no ken kamap gen?’ (Prov. 27:12) Sapos yumi pilim hatwok long winim wanpela mak, dispela i ken skulim yumi olsem dispela mak i no stret long yumi. Sapos yu pilim olsem dispela em i tru long yu, orait skelim gen mak yu putim na lukim sapos dispela mak i stret long yu. d Jehova i no inap tingim olsem yu no mekim gut samting sapos yu hatwok long winim mak we i no stret long yu.​—2 Kor. 8:12.

17. Wai na yumi mas tingim ol mak yumi winim pinis?

¹⁷ Tingim ol mak yu winim pinis. Baibel i tok: “God i no man bilong mekim pasin i no stret na bai em i lusim tingting long ol wok yupela i bin mekim.” (Hib. 6:10) So no ken lusim tingting long ol wok yu mekim pinis. Tingim ol mak yu winim pinis—ating yu kisim pasin bilong pas gut wantaim Jehova, o yu tokim ol narapela long em, o yu kisim baptais. Wankain olsem yu bin mekim ol samting na winim ol mak bilong bilip long pastaim, yu ken wok strong yet long winim narapela mak em yu putim long nau.​—Fili. 3:16.

18. Yumi mas tingim wanem samting taim yumi wok strong long winim mak yumi putim? (Lukim tu piksa.)

¹⁸ Wankain olsem seila i amamas long i go kamap long ples em i laik go long en, yu ken winim mak yu putim wantaim helpim bilong Jehova. Tasol tingim, planti seila i save enjoim raun bilong ol. Olsem tasol, taim yu wok strong long winim mak bilong bilip yu putim, amamas tu long lukim hau Jehova i helpim yu na blesim yu taim yu mekim olsem. (2 Kor. 4:7) Sapos yu no givap, yu bai kisim planti blesing moa.​—Gal. 6:9.