1-2. (a) Ol singel Kristen i mas skelim wanem ol samting paslain long ol i kirap prenim wanpela bilong maritim? (b) Taim tupela man na meri i pren, dispela i makim wanem? (Lukim futnot.)

 YU GAT laik long marit? Marit tasol em i no rot bilong stap amamas, tasol planti singel Kristen—ol lapun na ol yangpela—i amamas long painim poroman bilong maritim. Tru tumas, paslain long yu painim wanpela poroman bilong maritim, em i bikpela samting long yu mas pas gut wantaim Jehova, save gut long yu yet, na yu mas i gat inap mani bilong lukautim yutupela bihain long yupela i marit. a (1 Kor. 7:36) Taim yu mekim olsem, marit bilong yu inap stap gut.

² Tasol em i no isi long painim wanpela gutpela poroman bilong maritim. (Prov. 31:10) Na maski yu painim pinis wanpela em yu laik save gut moa long em, ating em i no isi long yutupela i kirap long pren. b Long dispela atikol, yumi bai stori long wanem samting i ken helpim ol singel Kristen long painim wanpela gutpela poroman na kirap prenim em. Na tu, yumi bai stori long hau ol narapela long kongrigesen i ken sapotim ol dispela Kristen husat i laik marit.

PAINIM GUTPELA POROMAN BILONG MARITIM

3. Wanpela singel Kristen i mas skelim wanem ol samting taim em i laik painim wanpela poroman bilong maritim?

³ Sapos yu laik marit, em i gutpela long save long wanem ol pasin yu laik bai poroman bilong yu i gat paslain long yu kirap prenim wanpela. Sapos nogat, wanpela inap i gat ol dispela pasin  na yu no inap luksave olsem em i stap o yu inap kirap prenim wanpela husat i no gat ol dispela pasin. Na em i bikpela samting long yu mas prenim wanpela Kristen husat i baptais pinis. (1 Kor. 7:39) Tasol i no olgeta Kristen husat i baptais pinis bai stap olsem gutpela poroman marit bilong yu. So yu ken askim yu yet olsem: ‘Mi putim wanem ol mak bilong winim long laip bilong mi? Mi laik bai poroman mi maritim i mas i gat wanem ol pasin? Ol mak mi putim i stret o ol i antap tumas?’

4. Sampela i beten na askim long wanem samting?

⁴ Sapos yu tingting long marit, ating yu bin beten long painim wanpela poroman marit. (Fili. 4:6) Em tru olsem, Jehova i no promis long husat bai maritim husat. Tasol em i tingim tru samting yu nidim na filings bilong yu, na em inap helpim yu taim yu wok long painim wanpela poroman marit. So wok yet long tokim em long ol laik na filings bilong yu. (Sng. 62:8) Beten long kisim pasin bilong i no les kwik na savetingting. (Jems 1:5) John, c em wanpela singel brata long Amerika, em i stori long ol tok em i save kolim long beten bilong em, em i tok: “Mi save tokim Jehova long ol pasin em poroman mi laik maritim i mas i gat. Mi save beten long rot i mas op na bai mi ken bungim wanpela gutpela poroman em mi ken maritim. Na tu, mi save beten askim Jehova long helpim mi long kisim ol pasin we bai mekim mi kamap gutpela man marit.” Tanya, em wanpela sista long Sri Lanka, em i tok: “Taim mi wok long painim wanpela poroman bilong maritim, mi beten askim Jehova long helpim mi long stap gut long Em, holim stretpela tingting, na stap amamas.” Sapos nau yet yu no painim wanpela poroman i stret long yu bilong maritim, Jehova i tok promis olsem em bai wok yet long lukautim yu long sait bilong skin na bel na tingting.—Sng. 55:22.

5. Wanem ol rot i op bilong ol singel Kristen i ken bungim wanpela husat i laikim Jehova? (1 Korin 15:58) (Lukim tu piksa.)

 ⁵ Baibel i kirapim yumi long “bisi long mekim planti wok bilong Bikpela.” (Ritim 1 Korin 15:58.) Taim yu bisi long mekim wok bilong Jehova na lusim haptaim long stap wantaim kain kain bratasista, yu bai amamas long bung wantaim ol gutpela pren, na tu, rot bai op long yu inap bungim ol narapela singel Kristen em ol tu i putim tingting olgeta long mekim wok bilong Jehova olsem yu. Na taim yu givim bel olgeta long amamasim Jehova, yu bai stap amamas tru.

6. Ol singel Kristen i ken tingim wanem samting taim ol i wok long painim wanpela poroman bilong maritim?

⁶ Wanpela tok lukaut bilong tingim em olsem: No ken larim pasin bilong painim wanpela poroman i kisim bikpela haptaim na strong bilong yu. (Fili. 1:10) Sapos yu marit, dispela tasol i no inap mekim yu stap amamas, nogat. Pasin pren bilong yu wantaim Jehova bai mekim yu stap amamas tru. (Mat. 5:3) Na taim yu stap singel, yu stap fri long mekim bikpela wok moa bilong autim tok. (1 Kor. 7:​32, 33) Yusim gut dispela haptaim. Jessica, em wanpela sista long Amerika, em i bin gat 39 krismas samting taim em i marit, em i tok: “Mi bisi tru long mekim wok autim tok, na dispela i helpim mi long amamas long laip bilong mi, maski mi gat laik long marit.”

LUSIM HAPTAIM LONG SKELIM GUT

7. Wai na em i savetingting long skelim gut pasin bilong wanpela inap sampela haptaim paslain long yu tokim em olsem yu laik prenim em? (Provep 13:16)

⁷ Olsem wanem sapos yu ting wanpela inap stap olsem gutpela poroman marit bilong yu? Yu ting wantu tasol yu mas tokim em olsem yu laikim em? Baibel i tok man i gat savetingting, em i save kisim save paslain long em i mekim samting. (Ritim Provep 13:16.) So em i savetingting long yu yet i lusim sampela haptaim long skelim gut wanpela paslain long yu tokim em olsem yu laikim em. Aschwin em wanpela brata long Netelan, em i tok: “Filings inap kamap strong hariap, tasol em inap i go pinis kwiktaim. So taim yu lusim sampela haptaim long skelim gut pasin bilong wanpela, yu no inap larim filings bilong yu tasol i stiaim yu long prenim em.” Na moa yet, taim yu lusim haptaim long skelim gut pasin bilong em, yu inap luksave sapos dispela man o meri i no inap stap gutpela poroman marit bilong yu.

8. Olsem wanem wanpela singel inap skelim gut pasin bilong narapela em i laik poromanim? (Lukim tu piksa.)

⁸ Olsem wanem yu yet i ken skelim gut pasin bilong wanpela em yu laik poromanim? Long ol miting bilong kongrigesen o long ol bung bilong amamas, yu inap luksave long pasin bilong dispela man o meri long pas gut wantaim Jehova, ol pasin bilong em yet, na pasin em i mekim long ol narapela. Husat ol pren bilong em, na em i save stori long wanem samting? (Luk 6:45) Ol mak em i laik winim i wankain olsem ol mak em yu laik winim? Yu ken toktok wantaim ol elda long kongrigesen bilong em o ol narapela strongpela Kristen em ol i save gut long em. (Prov. 20:18) Yu ken askim ol olsem dispela man o meri i gat gutnem o nogat, na wanem ol pasin bilong em. (Rut 2:11) Taim yu wok long skelim pasin bilong em, was gut na no ken bihainim bihainim em tumas na mekim em i pilim sem o mekim na em i no pilim gut. Rispektim filings bilong em, na ol samting em yet i laik mekim, na taim em i laik stap em yet.

9. Paslain long yu tokim wanpela olsem yu laikim em, yu mas save long wanem samting?

⁹ Paslain long yu tokim wanpela olsem yu laikim em, yu mas skelim pasin bilong em inap hamas haptaim? Sapos yu tokim em hariap olsem yu laikim em, em inap ting olsem yu hariap tumas na yu no skelim gut tingting paslain long yu mekim dispela disisen. (Prov. 29:20) Tasol sapos dispela man o meri em yu laik poromanim,  em i luksave olsem yu laikim em na yu lusim longpela haptaim long tokim em, em inap ting olsem yu save isi isi tumas na yu no save mekim ol disisen hariap. (Ekl. 11:4) Tingim olsem, paslain long yu tokim wanpela olsem yu laikim em, no ken holim dispela tingting olsem yu bai maritim dispela man o meri. Tasol yu mas save olsem yu yet i redi long marit na dispela man o meri em yu laik poromanim, em bai stap olsem gutpela poroman marit bilong yu.

10. Yu mas mekim wanem sapos yu luksave olsem wanpela i gat laik long yu, tasol yu no gat laik long em?

¹⁰ Yu mas mekim wanem sapos yu luksave olsem wanpela i gat laik long yu? Sapos yu no gat laik long em, orait pasin bilong yu i mas kamapim klia dispela tingting bilong yu. Em i no gutpela pasin long mekim em i kisim tingting olsem yu bai prenim em, tasol tru tru yu no gat laik long em.—1 Kor. 10:24; Efe. 4:25.

11. Long ol kantri we ol narapela i save makim poroman marit em wanpela singel i ken maritim, ol i mas tingim wanem samting?

¹¹ Long sampela kantri, ol papamama o ol man i bikpela pinis i save makim poroman marit em wanpela singel wanblut bilong ol i ken maritim. Long ol narapela kantri, ol famili o ol pren i save painim wanpela bilong maritim singel man o meri em ol i save long em na ol i save stretim rot long tupela i ken bung wantaim bilong save olsem ol i stret long narapela narapela, o nogat. Sapos wanpela singel i askim yu long painim wanpela poroman bilong em i ken prenim o maritim, i gutpela yu skelim ol laik na ol samting tupela wantaim i nidim. Taim yu painim pinis wanpela, orait kisim save gut long em, ol pasin bilong em, na bikpela samting moa, em i pas gut wantaim Jehova, o nogat. Pasin bilong pas gut wantaim Jehova em i bikpela samting moa winim mani, ediukesen, o biknem na namba. Tasol tingim, dispela singel brata na singel sista yet i mas mekim disisen olsem tupela bai marit o nogat, na em i no disisen bilong ol narapela long mekim.—Gal. 6:5.

HAU YU KEN STAT LONG PRENIM WANPELA

12. Sapos yu gat laik long prenim wanpela, hau yu ken tokim em?

¹² Sapos yu laik prenim wanpela, olsem wanem yu ken kamapim dispela laik bilong yu long em? d Yu ken stretim rot long bungim em  long wanpela ples i gat ol narapela i stap na toktok wantaim em, o yu ken toktok wantaim em long rot bilong fon o mekim vidio kol long em. Kamapim klia tingting bilong yu. (1 Kor. 14:9) Sapos inap, givim sampela haptaim long em long wokim tingting na bekim tok bilong yu. (Prov. 15:28) Na sapos em i no laik prenim yu, orait rispektim filings bilong em.

13. Yu ken mekim wanem sapos wanpela i tokim yu olsem em i gat laik long yu? (Kolosi 4:6)

¹³ Olsem wanem sapos wanpela i tokim yu olsem em i gat laik long yu? Dispela man o meri i strongim bel na kam tokim yu, so mekim gutpela pasin na pasin rispek long em. (Ritim Kolosi 4:6.) Sapos yu nidim sampela haptaim long skelim gut tingting paslain long yu tok orait long prenim em, orait tok stret long em. Tasol tokim em hariap long tingting bilong yu na no ken larim bikpela haptaim i lus. (Prov. 13:12) Sapos yu no gat laik long prenim em, orait tokim em long dispela long gutpela pasin na tokaut klia long em. Lukim samting em Hans, wanpela brata long Ostria i mekim taim wanpela sista i tokim em olsem em i gat laik long em, em i tok: “Long gutpela pasin mi tokim em long disisen bilong mi na mi tokaut klia long em. Mi tokim em hariap long dispela samting bikos mi no laik em i ting olsem mi bai prenim em. Na mi was gut tu long ol tok na pasin mi mekim long em bihain long dispela.” Tasol sapos yu laikim tu dispela man o meri na yu laik prenim em, orait toktok gut wantaim em long tingting bilong yu na ol samting yu bai laikim insait long dispela pasin pren. Kalsa o ol narapela samting inap mekim na ol samting yu laikim bai i no wankain long ol samting em i laikim.

HAU OL NARAPELA I KEN SAPOTIM OL SINGEL KRISTEN?

14. Olsem wanem yumi ken mekim ol gutpela tok bilong sapotim ol singel Kristen?

¹⁴ Olsem wanem yumi olgeta i ken sapotim ol singel Kristen em ol i laik marit? Wanpela rot em long was gut long ol tok yumi mekim. (Efe. 4:29) Yumi ken askim yumi yet olsem: ‘Mi save tok pilai long ol lain em ol i laik marit? Taim mi lukim wanpela singel brata na wanpela singel sista i toktok, mi save kisim tingting olsem ol i gat laik long narapela narapela?’ (1 Tim. 5:13) Na tu, yumi no ken mekim ol singel Kristen i pilim olsem sampela samting i no stret long ol bikos ol i no marit. Hans, em yumi kamapim tok bilong em i go pinis, em i tok: “Sampela bratasista i save tok, ‘Wai na yu no laik marit? Yu no yangpela man moa.’ Kain ol tok olsem i save mekim ol singel i pilim olsem yumi no  tingim ol na ol i save pilim bikpela presa olsem ol i mas marit.” Em i bikpela samting long yumi mas painim rot long mekim ol gutpela tok bilong strongim ol singel Kristen!—1 Tes. 5:11.

15. (a) Olsem stiatok long Rom 15:2 i kamapim, yumi mas tingim wanem samting paslain long yumi helpim wanpela long painim poroman marit? (Lukim tu piksa.) (b) Yu laikim wanem ol tok long vidio? (Lukim futnot.)

¹⁵ Olsem wanem sapos yumi ting olsem wanpela brata na wanpela sista inap stap olsem gutpela poroman marit? Baibel i tokim yumi long tingim filings bilong ol narapela. (Ritim Rom 15:2.) Planti singel i no laik bai ol narapela i introdusim ol long wanpela brata o sista bilong poromanim ol, na yumi mas rispektim tingting bilong ol. (2 Tes. 3:11) Ol narapela inap amamas long yumi helpim ol, tasol yumi no ken mekim olsem inap long ol yet i askim yumi long helpim ol. e (Prov. 3:27) Sampela singel i no laikim pasin bilong introdusim ol long ol narapela. Lydia, wanpela singel sista long Jemani, em i tok: “Yu ken singautim dispela singel brata na sista i kam long wanpela bung we i gat ol narapela i stap. Yu ken opim rot tasol long tupela i bung, na ol narapela samting yu lusim long han bilong tupela.”

16. Ol singel Kristen i mas tingim wanem samting?

¹⁶ Yumi olgeta—ol singel na ol marit—i ken stap amamas tru na laip bilong yumi i gat as bilong en! (Sng. 128:1) So sapos yu laik marit, tasol yu no painim yet wanpela i stret long yu, orait wok yet long putim tingting olgeta long wok bilong Jehova yu mekim. Wanpela sista long Makau, nem bilong em Sin Yi, em i tok: “Taim yu skelim haptaim yu bai lusim long stap wantaim poroman marit bilong yu long Paradais, dispela em bai longpela haptaim moa winim haptaim yu stap singel. So amamas long haptaim yu stap singel, na mekim gutpela wok long en.” Tasol olsem wanem sapos yu painim pinis wanpela yu laikim na yu kirap pinis long prenim em? Long neks atikol, yumi bai stori long hau yutupela i ken mekim gutpela disisen long dispela haptaim yutupela i pren.