1, 2. (a) Sampela man i tok wanem taim ol i harim olsem God i gat wanpela oganaisesen? (b) Long dispela stadi, yumi bai stori long wanem ol samting?

YU TING God i gat wanpela oganaisesen? Ating sampela man i tok: “I no gat wok long wanpela oganaisesen i stiaim yumi. Yumi yet i mas i stap pren bilong God.” Yu ting dispela tingting i stret? Ol samting i kamap long bipo i givim wanem skul long yumi?

² Long dispela stadi, yumi bai skelim ol stori i soim klia olsem Jehova em God bilong mekim olgeta samting i wok gut na i no paul nabaut, na em tasol em nambawan Man bilong oganaisim ol samting. Na tu, yumi bai stori long pasin yumi mas bihainim taim yumi kisim ol tok i kam long oganaisesen bilong Jehova. (1 Kor. 14:33, 40) Long taim bilong ol aposel na long nau tu, Buk Bilong God i helpim oganaisesen bilong Jehova long graun long mekim wok bilong autim gutnius long olgeta hap bilong graun. Yumi save bihainim ol tok bilong Baibel na ol tok i kam long oganaisesen, olsem na yumi helpim kongrigesen long i stap klin, stap bel isi, na stap wanbel.

3. Wanem samting i kirapim yu long bilip olsem Jehova em Man bilong oganaisim gut ol wok?

³ Ol samting God i wokim i soim olsem em i Man bilong  oganaisim gut ol samting na i no gat narapela man i olsem em. Baibel i tok: “Long gutpela tingting na save bilong Bikpela yet, . . . em i bin wokim graun na skai.” (Snd. 3:19) Yumi save long “liklik hap tasol” bilong ol pasin bilong God, na save bilong em “i winim save bilong yumi.” (Jop 26:14) Yumi gat liklik save tasol long ol planet, ol sta, na ol galaksi, na dispela i kirapim yumi long luksave olsem i gat Man i oganaisim gut ol dispela samting. (Sng. 8:3, 4) Planti milion sta i bung na kamapim ol galaksi, na olgeta dispela sta i save bihainim stret rot bilong ol na ol i no paul nabaut. Ol planet long sola sistem bilong yumi i save bihainim gut rot bilong ol taim ol i raunim san, na i olsem ol i bihainim ol lo bilong trafik! Ol dispela samting i soim klia olsem “long save bilong [God] yet em i wokim skai na ol samting antap” na long graun, olsem na i stret long yumi preisim em, stap gut long em, na lotuim em.—Sng. 136:1, 5-9.

4. Wai na save bilong saiens i no bekim planti askim?

⁴ Saiens i helpim yumi long kisim save long planti samting long ples antap na long graun, na dispela i helpim yumi long planti samting long laip bilong yumi. Tasol i gat planti askim em saiens i no inap long bekim. Kain olsem: Ol saveman i no kliagut long hau ol samting long ples antap i kamap, o wai na yumi stap long Graun we planti samting i gat laip i stap long en. Na tu, ol manmeri i no save long wai na ol man i gat strongpela laik long i stap oltaim. (Sav. 3:11, NW) Wai na i gat planti bikpela askim, tasol i no gat man inap bekim? Wanpela risen em olsem, planti saientis na ol narapela saveman i sapotim dispela tingting olsem i no gat God, na ol i strongim bilip bilong evolusen. Tasol Jehova i yusim Buk bilong em yet long bekim ol askim i stap long tingting bilong ol manmeri long olgeta hap bilong graun.

5. Olsem wanem yumi kisim helpim long ol lo God i putim taim em i wokim ol samting?

⁵ Taim Jehova i wokim ol samting, em i putim tu sampela lo. Ol dispela lo i helpim ol elektrisen, ol plama, ol ensinia, ol pailot, na ol dokta long mekim wok bilong ol. Kain olsem, ol dokta i save olsem olgeta wan wan hap bilong bodi i stap long ples stret bilong ol. Olsem na taim dokta i laik katim man na stretim sik long lewa bilong man, em i save long lewa i stap long wanem hap bilong bodi. Yumi olgeta i save rispektim ol lo God i putim long ol samting em i wokim. Sapos yumi tromoi wanpela samting i go antap, graun i gat strong long pulim dispela samting i kam daun. Hevi inap painim yumi sapos yumi no tingim dispela lo!

6. Wai na i stret long ol manmeri bilong Jehova i oganaisim wok bilong ol?

⁶ Olgeta samting long ples antap na long graun i wok gut wantaim. Dispela i soim klia olsem Jehova i laik bai ol manmeri bilong em i mas oganaisim gut wok bilong ol. Olsem na God i stretim rot long yumi inap i gat Baibel long stiaim yumi. Sapos God i no oganaisim ol samting na putim ol lo, laip bilong yumi bai pulap long pen na hevi.

7. Wanem samting i soim olsem i gat Man i bin oganaisim wok bilong raitim ol tok bilong Baibel?

⁷ Baibel em i no wanpela buk nating em ol Juda na ol Kristen i raitim ol tok bilong en long tingting bilong ol yet, nogat. God yet i stiaim ol long raitim ol tok i stap long dispela buk. Ol tok i stap long ol buk bilong Baibel i poroman wantaim. Ol tok i stap long Buk Stat i go inap long Buk Revelesen i kamapim bikpela as tok bilong Baibel: Jehova bai soim klia olsem em i gat rait long i stap nambawan bos na em bai kamapim samting em i tingting pinis long mekim long dispela graun. Em bai mekim ol dispela samting long rot bilong Kingdom bilong Krais, em “pikinini” bilong  promis.—Ritim Stat 3:15 *; Matyu 6:10; Revelesen 11:15.

8. Wanem samting i soim olsem lain Israel i oganaisim wok bilong ol?

⁸ Lain Israel bilong bipo i oganaisim gut olgeta samting ol i mekim. Lo Bilong Moses i stiaim ol long oganaisim wok, olsem na “ol meri i save wok long dua bilong haus sel bilong bung wantaim God.” (Kis. 38:8) I gat ol lo i stiaim lain Israel taim ol i lusim wanpela hap na i go long narapela hap na ol i kisim haus sel i go wantaim ol. Bihain, King Devit i oganaisim ol Livai na ol pris na tilim ol long ol grup. (1 Sto. 23:1-6; 24:1-3) Taim lain Israel i bihainim tok bilong Jehova, em i blesim ol na wok bilong ol i kamap gut, ol i stap bel isi, na stap wanbel.—Lo 11:26, 27; 28:1-14.

9. Wanem samting i soim olsem ol Kristen long taim bilong ol aposel i oganaisim gut wok bilong ol?

⁹ Kongrigesen Kristen long taim bilong ol aposel i oganaisim ol samting ol i mekim, na ol i kisim helpim long tok i kam long gavening bodi—ol aposel i stap olsem gavening bodi. (Apo. 6:1-6) Bihain, sampela moa brata i kamap memba bilong gavening bodi long dispela taim bipo. (Apo. 15:6) Na tu, ol man husat i stap memba bilong gavening bodi o ol i wok bung wantaim gavening bodi, ol tu i raitim ol pas we i kamapim tok kaunsel na instraksen bilong stiaim ol Kristen. (1 Tim. 3:1-13; Tai. 1:5-9) Wanem gutpela samting i kamap taim ol kongrigesen i bihainim ol tok i kam long gavening bodi?

10. Long bipo, wanem gutpela samting i kamap taim ol kongrigesen i bihainim ol tok i kam long gavening bodi? (Lukim piksa long kirap bilong stadi.)

¹⁰ Ritim Aposel 16:4, 5. Ol brata husat i mekim wok olsem mausman bilong gavening bodi, “ol i save autim ol tok em ol lain long ol dispela hap i mas bihainim. Em ol tok ol aposel na ol hetman long Jerusalem i pasim pinis.” Taim ol kongrigesen i bihainim ol dispela tok, ol i “kamap strong moa long bilip, na long olgeta de ol i wok long i go bikpela.” Yu ting dispela stori bilong Baibel inap skulim yumi long pasin yumi ken bihainim long oganaisesen bilong God long nau?

11. Ol man i mekim wok olsem elda, wasman sekit, o memba bilong Brens Komiti, ol i mas mekim wanem taim ol i kisim tok i kam long oganaisesen bilong God?

¹¹ Long nau, ol memba bilong Brens Komiti, Kantri Komiti, ol wasman sekit, na ol elda long kongrigesen i mas mekim wanem taim ol i kisim ol tok i kam long oganaisesen bilong God? Buk Bilong Jehova yet i stiaim yumi olgeta long bihainim tok bilong em na stap daun long em. (Lo 30:16; Hib. 13:7, 17) Insait long oganaisesen bilong God, i no stret long sutim tok o bikhet bikos dispela kain pasin inap bagarapim pasin laikim, pasin bilong i stap bel isi, na pasin wanbel insait long kongrigesen. Em tru olsem olgeta Kristen i no laik bihainim pasin bilong Diotrefes long bikhet na i no stap gut long ol brata husat i go pas long stiaim wok. (Ritim 3 Jon 9, 10.) Yumi ken askim yumi yet: ‘Mi save mekim ol samting bilong helpim ol narapela long kamap strong long bilip? Mi save hariap long bihainim tok i kam long ol brata i go pas long ol wok?’

12. Wanem senis i kamap long pasin bilong makim ol elda na kongrigesen sevan?

¹² Tingim disisen em Gavening Bodi i mekim i no longtaim i go pinis. Ol i tokaut long wanpela senis long atikol i gat dispela het tok, “Askim,” long Wastaua bilong Novemba 15, 2014. Ol i mekim disisen long nupela rot bilong makim ol elda na kongrigesen sevan. Long taim bilong ol aposel, gavening bodi i givim wok long ol wasman sekit long makim ol elda na ol kongrigesen sevan. Olsem na kirap long Septemba 1, 2014, wasman sekit i mekim wok bilong makim ol elda na ol kongrigesen  sevan. Wasman sekit i traim long save gut long brata em lain elda i rekomendim, na sapos inap, wasman bai poromanim em long wok autim tok. Na tu, wasman bai skelim pasin bilong famili bilong brata. (1 Tim. 3:4, 5) Lain elda na wasman sekit bai skelim gut ol mak em Baibel i kolim long man i mas winim bilong kamap elda na kongrigesen sevan.—1 Tim. 3:1-10, 12, 13; 1 Pita 5:1-3.

13. Yumi inap mekim wanem bilong soim olsem yumi bihainim ol tok yumi kisim long ol elda?

¹³ Yumi mas bihainim tok bilong Baibel em ol elda i givim long yumi. Ol elda i stap olsem ol wasman insait long oganaisesen bilong God, na ol i bihainim “ol gutpela tok” i stap long Buk Bilong God. (1 Tim. 6:3) Long taim bilong ol aposel, Pol i givim tok kaunsel long ol man husat i no wokabaut stret insait long kongrigesen. Sampela man i no sindaun na mekim wok bilong ol yet, nogat, ol i bisi long stori long laip bilong ol narapela. Ol elda i givim tok kaunsel long ol, tasol ol dispela man i sakim tok kaunsel. Kongrigesen i mas mekim wanem long man i bihainim kain pasin olsem? Pol i tok: “Yupela i mas putim mak long dispela man. Na no ken poroman moa wantaim em.” Tasol Pol i tok lukaut olsem ol i no ken tingim dispela man olsem wanpela birua. (2 Tes. 3:11-15) Long nau, ating ol elda inap givim wanpela tok i stori long man i prenim meri o meri i prenim man husat i no wanbilip, na dispela inap putim hevi long ol narapela long kongrigesen. (1 Kor. 7:39) Bai yu mekim wanem taim ol elda i givim kain tok olsem? Sapos yu save long husat brata o sista i bihainim kain pasin olsem, bai yu abrusim pasin bilong bung wantaim em? Taim yu bihainim stretpela pasin na sanap strong, dispela inap kirapim em long stretim pasin bilong em. ^[1]

14. Hau bai yumi inap helpim kongrigesen long i stap klin?

¹⁴ Taim yumi bihainim ol tok i stap long Baibel, dispela bai helpim kongrigesen long i stap klin long sait bilong bilip. Tingim ol samting i kamap long Korin long bipo. Pol i givim bel tru long autim tok long dispela taun, na em i laikim tru “ol manmeri holi.” (1 Kor. 1:1, 2) Tasol ating em i bel hevi tru taim em i harim olsem wanpela man insait long kongrigesen i mekim pasin pamuk, na kongrigesen i no mekim wanpela samting long stretim dispela hevi! Pol i tokim ol elda long putim dispela man long han bilong Satan—ol i mas rausim em long kongrigesen. Sapos ol elda i laik bai kongrigesen i stap klin, orait ol i mas rausim pasin nogut i stap olsem “yis.” (1 Kor. 5:1, 5-7, 12) Taim yumi bihainim ol disisen ol elda i mekim long rausim man husat i mekim rong na i no tanim bel, yumi helpim kongrigesen long i stap klin, na dispela inap kirapim man long tanim bel na askim Jehova long fogivim em.

15. Hau bai yumi inap strongim bel isi insait long kongrigesen?

¹⁵ I gat narapela hevi tu i kamap namel long ol Kristen long Korin. Sampela Kristen i kisim ol wanbilip i go long kot. Tasol Pol i tok: “Mobeta yupela i larim ol brata i rongim yupela.” (1 Kor. 6:1-8) Wankain hevi i kamap long nau. Sampela taim ol brata i no stap wanbel bikos ol i wok bung wantaim long mekim wok bisnis, tasol bisnis i no wok gut na wanpela i sutim tok long narapela olsem em i paulim mani. Sampela i kisim ol wanbilip i go long kot, tasol Buk Bilong God i skulim yumi olsem mobeta yumi yet i karim hevi, na yumi no ken nogutim nem bilong God o bagarapim bel isi insait long kongrigesen. ^[2] Sapos yumi laik stretim ol bikpela hevi na ol tok pait, orait yumi mas bihainim tok kaunsel bilong Jisas. (Ritim Matyu 5:23, 24; 18:15-17.) Taim yumi mekim olsem, yumi strongim pasin wanbel namel long ol manmeri i lotuim Jehova.

16. Wai na i stret long ol manmeri bilong God i stap wanbel?

¹⁶ Buk Bilong Jehova i kolim risen na ol  manmeri bilong em i mas i stap wanbel. Man bilong raitim song i tok: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas, na ol i ken i stap belgut”! (Sng. 133:1) Taim lain Israel i bihainim tok bilong Jehova, ol i oganaisim ol samting ol i mekim na ol i stap wanbel. God i tok profet long sindaun bilong ol manmeri bilong em na em i tok: “Bai mi bungim yupela gen olsem ol sipsip wasman i bringim i kam bek long banis.” (Mai. 2:12) Long rot bilong profet Sefanaia, Jehova i tok: “Bai mi givim wanpela gutpela tokples [tok i tru bilong Baibel] long ol man, bambai olgeta i ken singaut long nem bilong Jehova na wok gut wantaim long mekim wok bilong em [o, “stap wanbel long lotuim em,” futnot].” (Sef. 3:9, NW) Yumi stap wanbel long lotuim Jehova, na dispela em wanpela blesing yumi ken amamas tru long en!

17. Sapos ol elda i laik strongim kongrigesen long i stap wanbel na bihainim klinpela pasin, orait ol i mas mekim wanem taim wanpela i mekim rong?

¹⁷ Sapos ol elda i laik strongim kongrigesen long i stap wanbel na bihainim klinpela pasin, orait ol i mas hariap long stretim ol hevi na mekim wantaim pasin laikim. Pol i save olsem God i save soim pasin laikim long olgeta kain man, na Em i save stretim man i mekim rong. (Snd. 15:3) Olsem na Pol i raitim Namba 1 Pas i Go Long Ol Korin—em i givim strongpela tok kaunsel, na em i mekim long pasin laikim. Sampela mun bihain, em i raitim Namba 2 Pas i Go Long Ol Korin, na ol tok i stap long dispela pas i soim olsem ol elda i bin bihainim tok kaunsel bilong Pol na ol i stretim hevi. Sapos wanpela Kristen i no luksave olsem em i laik mekim pasin i no stret, orait ol elda i mas bihainim pasin isi na stretim em.—Gal. 6:1.

18. (a) Olsem wanem tok kaunsel i stap long Buk Bilong God i helpim ol kongrigesen long taim bilong ol aposel? (b) Neks stadi bai stori long wanem samting?

¹⁸ Ol tok i stap long Buk Bilong God i helpim ol Kristen long Korin na long ol narapela hap tu long bihainim klinpela pasin, stap bel isi, na stap wanbel insait long kongrigesen. (1 Kor. 1:10; Efe. 4:11-13; 1 Pita 3:8) Olsem na ol bratasista long dispela taim bipo i mekim bikpela wok long autim tok. Pol i tok: “Ol i bin autim dispela gutnius long olgeta hap bilong graun aninit long skai.” (Kol. 1:23) Long nau, ol manmeri bilong wanpela oganaisesen i stap wanbel long autim tok long olgeta hap bilong graun, na ol i skulim ol manmeri long ol gutpela samting God i tingting pinis long mekim. Neks stadi bai stori long ol samting i soim klia olsem ol dispela manmeri i laikim tru tok bilong Baibel na ol i tingting strong long givim ona long Bikpela King Jehova.—Sng. 71:15, 16.