1-3. (a) Ating wanem samting i kamapim hevi namel long Yuodia na Sintike? (b) Olsem wanem yumi inap abrusim kain hevi olsem? (Lukim piksa long kirap bilong stadi.)

OL WOKMAN bilong Jehova i rispektim tru Baibel, em Buk Bilong God. Yumi olgeta i sinman, olsem na yumi save kisim tok kaunsel i kam long Baibel. Yumi bai mekim wanem taim yumi kisim tok kaunsel? Tingim stori bilong Yuodia na Sintike, em 2-pela meri Kristen long taim bilong ol aposel—God i bin makim tupela long holi spirit. Bikpela hevi i kamap namel long tupela. Baibel i no kolim dispela hevi. Tasol long tingting yumi ken piksaim wanpela bilong ol hevi we inap kamap.

² Ating Yuodia i invaitim sampela bratasista i go long haus bilong em long kaikai na amamas wantaim. Yuodia i no invaitim Sintike, tasol Sintike i harim stori bilong dispela bung. Ating Sintike inap tok: ‘Hau na Yuodia i no invaitim mi! Mi ting olsem mitupela i bes pren.’ Sintike i pilim olsem Yuodia i luk daun long em, olsem na em i bel nogut na em i no trastim Yuodia. Olsem na Sintike i stretim rot bilong mekim narapela bung na em i invaitim ol wankain bratasista em Yuodia i bin invaitim ol, tasol em i no invaitim  Yuodia! Dispela hevi namel long Yuodia na Sintike inap bagarapim bel isi insait long kongrigesen. Baibel i no stori long samting i kamap bihain, tasol yumi ken ting olsem dispela 2-pela sista i bihainim tok kaunsel bilong aposel Pol.—Fili. 4:2, 3.

³ Long nau, kain hevi olsem i save kamap namel long ol manmeri bilong Jehova. Tasol yumi inap stretim na abrusim ol dispela kain hevi sapos yumi bihainim tok kaunsel i stap long Baibel, em Tok Bilong God. Sapos yumi rispektim tru Buk Bilong Jehova, yumi bai bihainim ol tok bilong en.—Sng. 27:11.

4, 5. Baibel i givim wanem skultok long pasin bilong kontrolim belhat?

⁴ Yumi save hatwok long kontrolim tingting bilong yumi taim ol narapela i mekim yumi kros na bel hevi. Yumi inap bel hevi tru sapos ol narapela i mekim nogut long yumi bikos yumi bilong narapela lain, skin kala, o yumi luk narapela kain. Yumi bai bel hevi moa yet sapos wanpela wanbilip i mekim nogut long yumi! Yu ting Baibel i gat ol tok kaunsel bilong helpim yumi long karim kain hevi olsem?

⁵ Kirap long taim Jehova i wokim fes man na meri long graun, em i bin skelim pasin bilong ol manmeri. Em i luksave long ol tingting na ol pasin bilong yumi. Taim bel i no stap isi na tingting i bagarap, dispela inap kirapim yumi long mekim ol tok na ol pasin i no stret, na bihain yumi bai bel hevi long ol tok na ol pasin yumi mekim. Taim yumi belhat, yumi ken bihainim tok kaunsel bilong Baibel na kontrolim belhat bilong yumi, na yumi no ken hariap long bekim rong! (Ritim Sindaun 16:32; Saveman 7:9.) Yumi olgeta i mas wok strong long daunim pasin bilong bel hevi kwik, na kisim pasin bilong fogivim ol narapela. Jehova na Jisas i laikim tru ol manmeri i gat pasin bilong fogivim ol narapela. (Mat. 6:14, 15) Olsem wanem? Yu pilim hatwok long kontrolim belhat bilong yu na fogivim ol narapela?

6. Bilong wanem yumi mas kontrolim pasin bilong kros?

⁶ Sapos ol manmeri i hatwok long kontrolim belhat bilong ol, ol bai kros long olgeta taim. Olsem na ol narapela i no inap bung wantaim ol. Pasin bilong kros inap bagarapim pasin bilong ol narapela insait long kongrigesen. Maski man i traim long haitim kros bilong em, kongrigesen bai “save long pasin nogut bilong en.” (Snd. 26:24-26) Ol elda inap helpim kain lain olsem long luksave olsem i no stret long ol manmeri bilong God i bihainim pasin bilong kros, bel nogut, na heitim narapela. Buk Bilong Jehova i kamapim ol nambawan gutpela tok, na em i tokaut klia long dispela samting. (Wkp. 19:17, 18; Rom 3:11-18) Olsem wanem? Yu wanbel long ol tok bilong en?

7, 8. (a) Jehova i yusim wanem rot long stiaim oganaisesen bilong em hia long graun? (b) Baibel i kamapim wanem ol tok bilong stiaim, skulim, na helpim yumi? (c) Bilong wanem yumi mas bihainim ol dispela tok?

⁷ Jehova i stiaim na lukautim ol manmeri long oganaisesen bilong em hia long graun, na em i yusim “gutpela wokboi i gat savetingting,” na Krais i stiaim wok bilong dispela wokboi bikos em i “stap het bilong kongrigesen.” (Mat. 24:45-47; Efe. 5:23) Wankain olsem gavening bodi long taim bilong ol aposel, dispela wokboi i bihainim na rispektim tru ol tok i kam long God. (Ritim 1 Tesalonaika 2:13.) Baibel i kamapim wanem ol tok bilong stiaim, skulim, na helpim yumi?

⁸ Baibel i kirapim yumi long i go oltaim long ol miting. (Hib. 10:24, 25) Em i kirapim yumi long i stap wanbel long bilip bilong yumi. (1 Kor. 1:10) Baibel i kirapim yumi  long putim Kingdom i stap namba 1 samting long laip bilong yumi. (Mat. 6:33) Na tu, Baibel i kamapim klia olsem yumi gat gutpela wok tru long autim tok long ol haus, long ol pablik ples, na long kain kain taim na ples. (Mat. 28:19, 20; Apo. 5:42; 17:17; 20:20) Buk Bilong God i stiaim ol elda long wok ol i mekim bambai oganaisesen bilong God i stap klin. (1 Kor. 5:1-5, 13; 1 Tim. 5:19-21) Jehova i laik bai olgeta manmeri long oganaisesen bilong em i stap klin long bodi na long sait bilong bilip.—2 Kor. 7:1.

9. Jisas i yusim wanem rot long helpim yumi long kliagut long ol tok i stap long Buk Bilong God?

⁹ Sampela manmeri inap pilim olsem ol yet inap kamapim mining bilong ol tok i stap long Baibel. Tasol Jisas i makim “gutpela wokboi” long givim kaikai bilong strongim bilip. Kirap long 1919 na i kam inap long nau, Jisas Krais i yusim dispela wokboi long helpim ol disaipel long kliagut long ol tok i stap long Buk Bilong God na bihainim ol dispela tok. Taim yumi bihainim ol tok bilong Baibel, yumi helpim kongrigesen long i stap klin, stap bel isi, na stap wanbel. Yumi olgeta wan wan i ken askim yumi yet olsem, ‘Mi stap gut long “gutpela wokboi” em Jisas i yusim long nau?’

10. Buk Esekiel i stori olsem wanem long oganaisesen bilong Jehova long heven?

¹⁰ Tok Bilong Jehova long Baibel i givim sampela save long yumi long oganaisesen bilong God long heven. Long wanpela visen, profet Esekiel i lukim wanpela karis i olsem piksa bilong oganaisesen bilong God long heven. (Ese. 1:4-28) Jehova i sindaun long dispela karis, na karis i go long olgeta kain hap em spirit bilong God i stiaim em i go long en. Oganaisesen bilong God long heven i stiaim ol wok i kamap insait long oganaisesen bilong God hia long graun. Karis bilong God i mekim ol bikpela wok! Tingim planti senis i kamap long oganaisesen insait long 10-pela yia i go pinis—Jehova yet i kamapim ol dispela senis. Klostu nau Krais na ol lain ensel bai bagarapim ol manmeri nogut, na i olsem karis bilong Jehova i wok long spit i go long mekim holi nem bilong God na kamapim klia olsem i stret long God i stap nambawan bos!

11, 12. Wanem ol wok i kamap insait long oganaisesen bilong Jehova?

¹¹ Tingim ol wok em oganaisesen bilong God hia long graun i mekim long dispela haptaim bilong las de. Konstraksen. Planti handret bratasista i bisi tru long helpim wok bilong sanapim nupela hetkota bilong ol Witnes Bilong Jehova long Warwick, New York, Amerika. Dipatmen Bilong Disain na Konstraksen i stiaim wok bilong planti tausen bratasista husat i volantia long sanapim ol nupela Haus Kingdom na surikim ol brens ofis i go bikpela moa. Yumi amamas tru long planti bratasista husat i volantia long mekim ol kain wok olsem! Jehova i blesim wok bilong ol bratasista long olgeta hap bilong graun em ol i daunim laik bilong ol yet na  mekim ol samting ol inap mekim bilong sapotim ol dispela wok.—Luk 21:1-4.

¹² Skul. Skelim ol skul em God i yusim long skulim ol manmeri bilong em. (Ais. 2:2, 3) Yumi gat Skul Bilong Wok Painia, Skul Bilong Ol Kingdom Evanselis, Skul Gileat, Betel Entrans Skul, Skul Bilong Ol Wasman Sekit na Meri Bilong Ol, Skul Bilong Ol Elda Bilong Kongrigesen, Skul Bilong Wok Kingdom, na Skul Bilong Ol Brens Komiti na Meri Bilong Ol. Jehova i amamas tru long skulim lain bilong em! Web-sait bilong yumi, jw.org, i gat ol buk na nius long planti handret tokples, na dispela i bilong kirapim ol man long kisim skul long Baibel. Na tu, dispela Web-sait i gat seksen bilong ol pikinini, ol famili, na stori bilong ol samting i kamap long graun. Olsem wanem? Yu yusim jw.org taim yu mekim wok autim tok na long taim bilong famili lotu?

13. Ol manmeri bilong Jehova i mas mekim wanem?

¹³ Em gutpela blesing tru long yumi inap i stap insait long oganaisesen bilong Jehova! Yumi kisim save long ol lo bilong God na ol samting em i laik yumi mas mekim, olsem na yumi mas bihainim ol dispela lo na stap daun long wok bos bilong em. Pasin bilong ol manmeri bilong dispela graun i nogut pinis na i wok long i go nogut moa moa yet, tasol yumi mas bihainim pasin bilong Jehova na heitim pasin nogut. (Sng. 97:10) Yumi no ken bihainim pasin nogut bilong ol manmeri bilong dispela graun na tok olsem: “Pasin nogut em i gutpela na gutpela pasin em i nogut.” (Ais. 5:20) Yumi laik amamasim God, olsem na yumi mas i stap klin long bodi, long pasin, na long sait bilong bilip. (1 Kor. 6:9-11) Yumi laikim tru Jehova na yumi trastim em; yumi laik i stap gut long em, olsem na yumi bihainim ol lo i stap long Buk bilong em. Yumi wok strong long bihainim ol dispela lo long olgeta hap yumi stap long en—long haus, long kongrigesen, long ples wok, long skul, na long olgeta kain hap. (Snd. 15:3) Tingim ol narapela samting yumi ken mekim bilong soim olsem yumi stap gut long God.

14. Olsem wanem ol papamama Kristen inap soim olsem ol i stap gut long God?

¹⁴ Wok bilong lukautim pikinini. Ol papamama Kristen i bihainim ol stiatok bilong Baibel na skulim ol pikinini, na dispela i soim olsem ol i stap gut long Jehova. Ol i no larim kastam bilong ples i stiaim tingting ol i holim long wok bilong lukautim pikinini. I no stret long famili Kristen i bihainim tingting bilong dispela graun. (Efe. 2:2) Papa Kristen i no ken holim tingting olsem, ‘Long kantri bilong mipela, ol meri i save skulim pikinini.’ Baibel i tok: “Yupela ol papa, . . . oltaim yupela i mas mekim bikpela long ol [pikinini] na trenim ol olsem Jehova i makim, na putim tingting bilong em long bel bilong ol.” (Efe. 6:4) Ol Kristen papamama i laik bai pikinini bilong ol i kamap wankain olsem Samuel: Jehova i stap wantaim em kirap long taim em i stap pikinini yet i go inap long taim em i kamap bikpela.—1 Sml. 3:19.

15. Taim yumi laik mekim ol bikpela disisen, olsem wanem yumi inap soim olsem yumi stap gut long Jehova?

¹⁵ Mekim ol disisen. Taim yumi laik mekim ol bikpela disisen, yumi ken kisim helpim long Baibel na oganaisesen bilong God, na long dispela rot yumi soim olsem yumi stap gut long God. Skelim wanpela pasin em planti papamama i save mekim. Sapos papamama i go mekim wok mani long narapela kantri na ol i gat nupela bebi, ol i save salim bebi i go bek long kantri bilong ol, na ol bubu bilong bebi i lukautim em. Dispela em disisen bilong yumi yet long mekim, tasol yumi mas tingim olsem God bai skelim ol disisen yumi mekim. (Ritim Rom 14:12.) Yu  ting em stretpela pasin long yumi go het long mekim ol bikpela disisen long famili na laip bilong yumi na yumi no skelim tok bilong Baibel? Nogat! Yumi nidim helpim bilong Papa bilong yumi long heven bikos yumi yet i no inap long stiaim wokabaut bilong yumi.—Jer. 10:23.

16. (a) Wanpela meri i karim bebi na em i mekim wanem disisen? (b) Wanem samting i helpim em long mekim stretpela disisen?

¹⁶ Wanpela meri i mekim wok mani long narapela kantri na em i karim bebi boi. Olsem na em i laik salim bebi i go bek long kantri bilong em bambai ol bubu bilong bebi i ken lukautim bebi. Bihain long dispela meri i karim bebi, wanpela Witnes Bilong Jehova i kirap stadi wantaim em long Baibel. Dispela meri i kisim save olsem God i givim wok long em long lukautim pikinini na stiaim em long lotuim Jehova. (Sng. 127:3; Snd. 22:6) Dispela meri i bihainim tok bilong Baibel na em i beten long Jehova na autim olgeta tingting na hevi bilong em. (Sng. 62:7, 8) Em i toktok wantaim sista i stadi wantaim em, na tu, em i toktok wantaim ol narapela long kongrigesen, na em i stori long hevi bilong em. Ol wanblut na ol pren i strong long em i mas salim bebi i go long ol bubu, tasol em i luksave olsem i no stret long em i mekim olsem. Man bilong em i pilim tru pasin bilong ol bratasista long kongrigesen long helpim meri bilong em na bebi, olsem na em i kirap stadi long Baibel na go long ol miting wantaim meri na bebi. Dispela meri i pilim tru olsem Jehova i harim beten bilong em.

17. Yumi kisim wanem tok bilong stiaim yumi long wok bilong helpim ol Baibel sumatin?

¹⁷ Bihainim tok. Nambawan rot bilong soim olsem yumi stap gut long God em olsem, yumi mas bihainim ol tok i kam long oganaisesen bilong God. Tingim ol stiatok yumi kisim long pasin bilong mekim ol Baibel stadi. Taim yumi kirap pinis long stadi wantaim man long buk Tru Tru Baibel i Tok Wanem? orait bihain long olgeta wan wan stadi, yumi mas lusim sampela minit long stiaim tingting bilong sumatin i go long oganaisesen. Yumi ken yusim vidio Wanem Samting i Save Kamap Long Haus Kingdom? na buklet Husat i Mekim Laik Bilong Jehova Long Nau? Taim yumi stadi wantaim sumatin na pinisim buk Baibel i Tok, yumi mas stadi wantaim em long buk “Stap Insait Yet Long Pasin Laikim Bilong God,” maski sapos em i baptais pinis. Oganaisesen i tokim yumi long mekim olsem bambai yumi inap helpim ol nupela disaipel long “sanap strong long bilip.” (Kol. 2:7) Olsem wanem? Yu bihainim ol tok i kam long oganaisesen bilong Jehova?

18, 19. Bilong wanem yumi mas tok tenkyu long Jehova?

¹⁸ Jehova i mekim planti samting bilong helpim yumi, olsem na i stret tru long yumi tok tenkyu long em! Em i givim laip long yumi, olsem na yumi inap wokabaut na mekim ol wok. (Apo. 17:27, 28) Em i givim yumi wanpela gutpela presen tru—em buk bilong em, Baibel. Yumi amamas tru long kisim tok bilong God, wankain olsem ol Kristen long Tesalonaika i kisim tok bilong God na bihainim.—1 Tes. 2:13.

¹⁹ Yumi ritim Tok Bilong God long Baibel, na dispela i helpim yumi long i go klostu long Jehova na em i kam klostu long yumi. (Jems 4:8) Papa bilong yumi long heven i bringim yumi i kam insait long oganaisesen bilong em. Yumi mas tenkyu tru long ol dispela blesing! Man bilong raitim song i tok: “Yumi mas tenkyu long Bikpela, long wanem, em i save mekim gutpela pasin long yumi. Oltaim oltaim em i save laikim yumi moa yet.” (Sng. 136:1) Inap 26 taim olgeta, Buk Song sapta 136 i kolim dispela hap tok “oltaim oltaim em i save laikim yumi moa yet.” Taim yumi stap gut long Jehova na oganaisesen bilong em, yumi bai lukim truim bilong dispela tok bikos yumi bai stap laip inap oltaim oltaim!